አውጚው ብኽርካ

ቴሳስ አርፊ 1988 ም/አሜታዳ እንጃቢሪ ኬቴምዳ 5 ጌርክካስ ካስጙኽ አዊው ባይሉ፣ ታሪኩስታ ኮንኪው ሲምፖዚየም እሺኾ:: ሲምፖዚየሙ ቹዋ አላሚ ዴሜካ አውጚውሳ ኮንኬ ፁፉ ኮንኪሾ ኪስጝስ እሺኾ:: እንሳ አላሜ ስራ ፄዋማ አዊው እዝቡ ኮንኪዳ፣ ታሪክዳ፣ ባይልዳ፣ ይኮኖሚዳስታ ማይቤራዊ አኼንካዳ ትኩቶ ፄውንኩ ሴዛ ፅናትኩ ፁፍካ ዲግካማ ኩስጝጚ ፄውስትⶓ 1988 ም/አታዳ በኩር መፅሄትዳ ፉኹ ንባር አንቤብፄ::

እን ጊዝዳ አውጚ ዙሚትጚ ኮንኪዴስ ፁፉ ኮንኪሾ ኪስጙ አኺኒዳ ትክላሊስ 25 አንቤብስታንትካስታ 6 አንቤብፃንትካ ፊደልካ ድምፆ ዎኬላንታ ፄውስታማ እንፃኽስስትኾ:: አውጚስ ኽምቤ ኽዩንኩ ስራስሪስ ክንቴ እይጝስ ፁፍሾ ኪስስታማ ሜፃፍካ ቴርቱና::

አዊ እዝቡ ኮንኪው ታሪኩስታ ባይሉ ሲምፖዚየም ካስጝⶓ ሲፋማ 1989 ም/አታዳ አዊ ብሄረሰቡ ቺፅጝፂዳ አግስታንኩ አንኩዋ ክንቲ ጝንካዳ አባላምቲ ጊዝስ አውጚው ኮንኪስ ክንቲ እይስትⶓ ጄሜርኾ:: እንስ ጄሜርኹ አውጚ ኮንኪው ክንቲ ናካ 29 አሜታዴስ ፋሌንጋ ዴሜካ አባላምቲ ጊዝስ ዲግሬ ዳቔርፅⶓኺስታ ታምብኾ::

እንጃቢሪ ዩንቨርስቲ ስንብቶ ሊሊትጙንኩ ክንቲው ዜርፍካስ ዳቔርፁክ ክንታንትካዴስ 150 ያኻንኩ ክንታንትካ አውጚው ኮንኪስ ዳቔርስቱንኩዊያኽ:: አውጚ ኮንኪስታ ፁፍ ፅንታ ክንቲ ቤናው ዳቔርስታንታ ወይንሽት ታደሰ አባላምቲ ጊዝስ አውጚ ኮንኪስ ዳቔርስቲት አኽጝስ ኽሳንቲ ዴስቲ እንኮኽስቱት አኽⶓ ዙሜ:: ፅክራ ላጛንቲ ቤንዳ ኬሽኹሳ ዋይሜ ሜዜጌብፅጝስ ዩንቨርስቲሾ ትያታ አውጚው ኮንኪስታ ፁፍ ፅንታው ክንቲ ቤናሳ ፋይስ ጎሌልጝስ ክንቴታ ዳቔርስቴ::

ዩንቨርስቲው ሲዚ አሜታሱ እጂጚዳ ክንቲው ቤንዳ ቱስታውሳ አቕቶስታ ካሌቕቶ እምቴታ ፊⶓ ቶኬምታ:: ክንታንታ ወይንሸት እይስታው ጝን እንፅኻሳ እንፃኽስትጝስሰታ አንቤብጝስ እርዳትፂ ሜፃፍ ፋይስታውሳ ላካ ዋኽትጛያሱ አኽጝስ ቼጌርስትⶓ ዲብስታ:: እንስኪላ ኮንኬ ካላንኩ እምፕልታቖ ካሲጝስስታ ሊሊትጙኽ ዳድስ ፅሬቶ ፄውጝስ እንፅኻሳ እንፃኽስትጝስ ድቕርስ ታምብⶓ እንክርፄ:: ፍንሾስኪላ አውጚውሳ ኮንኬ ክንታንኩ ክንታንትካስ እርዳትፂ ሜፃፍ ዋኽትጝጝ ፋይፃው አኽⶓ ጉሽታ::

እንጃቢሪ ዩንቨርስቲዳ አገው ፅናቱ ኢንስቲቲዩት ቴርሳዉ ሊሊትጙንኩ ፕሮግራምካዳ አሴቴፍጝጝስ ሚንቾ ዴሶ ክንትⶓ ዙሜ:: ክንታንታ ወይንሸት ዩንቨርስቲዳ ክንቱኑ ክንቲ ስሬታስ አውጚ ኮንኪው ልግስስ እንፃኽስትጝስ ኽሳንቲ  ፋይ ዝኩⶓ ቶኬምታ::

ኽምባ ኽይፂ ኮንኪስ ክንትጝ እምፕልታቕዳ ታምባውሳ ችግሮ ኽይጝስ፣ ክንቴ ሳሴርስ እርዳትስታንታ ፄውጝስስታ ባይሎስታ ኮንኬ ሌጌፅጝስ ኬፍንኹ ትክም ዝኩኽ አኽⶓ ዲብስታ::

እሊው  ዳቔርስታንቲ ዘርያኮብ ጌታሁን ኪላ ዙሙኹስታጊ አውጚው ክንቲ 2010 ም/አታዳ ላጛንቴ አች ክንቲ ጝናዳ እይስታታ ፄውስቱኒዴስ ሱኺቲ አሜታዴስ ፋሌንጋ ዲግሪስ አባላምቲ ጊዝስ ዳቔርፅጝ ኮንኪው ልግስስ ኽሳንቴ ታምቦ ፊትጝⶓ ካንትፃዊያኽ::

ክንታንቲ ዘርያኮብ አውጚ ኮንኪስ ክንትጝ ክንታንትካ ባይሎስታ ታሪኮ ሺሻንታ፣ ኮንኬ ሌጌፃንታ፣ እምፕልታቕሊ ቱትጝጝስ እሳንስ ፁፍ ፃፊስታማ እንኩርስታታ ፄውጝስ ኽሳንቲ ትክሞ ዝኩኽ አኽⶓ ዲብሳ::

ፍንሾስኪላ አውጚ ኮንኪ ሌጌሳታ ፄውጝስ ድራማ፣ ፊልሞ ፣ልብወለዱሳ እንፅኼ እንፃኽስትጙ ፋዩ ዝኩኽ አኽⶓኪላ ዘርያኮብ ዲብሳ::

አውጚው ኮንኪ እሊው ኮንኪታጊ ዩንቨርስቲዳ እሳንጛማጊ ላጛንቲ ዲግሪስ ክንቲ እይስታታ ፄውስትጝ ቱስታው አኽⶓኪላ ቶኬማ::

እሊት ዳቔርስታንታ ሙሉነሽ ይሁን  ዴሜካ አውጚው ኮንኪስ አባላምቲ ዲግሪስ ዳቔርፅጝ እምፕልታቕዳ እሺኹሳ ካንቴ ኪስኹስታ ኮንኪ ሌጌሳታ ፄውኽ አኽጝስ ዴስቴና አኽⶓ ድኹታ::

“አውጚስ ዲግሬ ክንትናናጊ እናኒ እምፕልታቑ ካንቲ ላንቡሳኺስታ ኪስስታያ፣ ፂኒስናኻ እናኒ አውጚስማ ቺኒክስቴኑ” ንጝስ ቴሬበኑ እምፕልታቕዳ ዝኩኽ ኬርትኹ ካንቲ ክቺጝ ቱስታው አኽⶓ ጉሽታ:: አውጚ እሊው ኮንኪታጊ ኮንኬ ፂኒስጝ አኽጝስ ማልጛ ቼጌርፃው አኽⶓ ቶኬምታ:: ዳቔርስታንታ ሙሉነሽ ኮንኪ ዩንቨርስቲው አችስ እይስትጝ ኮንኪ ሌጌሳታስታ ሊሊቲ ትኩት እይስታታ ፄዋው አኽⶓ ዲብስታ::

እንጃቢሪ ዩንቨርስቲዳ አውጚው ኮንኪስታ ፁፍ ፅንታ ክንቲ ቤናሱ አላፊ እሱባለው ክንዴ ዩንቨርስቲ አውጚው ኮንኪስ ታሪክስ አባላምቲ ጊዝስ 150 ክንታንትካዋ ዳቔርፅⶓ ዙሜካ::

እንጃቢሪ ዩንቨርስቲ ቤዴራማ አውጚኩሳ ክንትፃንትካዋ ኬፄርጝስ አውጚውሳ ሞጁሎ ቴርሳንታ ፄውስቱኒዴስ ፋሌንጋ ክንታንትካ ክንትፅጝስ ዳቔርፅⶓ ጉሽካ::

ክንታንትካ ዳቔርስትጝዴስ ቤዴራ ፅናቱስታ ምርምሪውሳ እንፅኼ እንፃኽስታኑ ጊዝዳ እንዴስ ቤዳራ እንፃኽስስትኹ እማኛ ፄዋኑ ፅናትስታ ምርምሪው እንፅኺ እላ አኽጝስ ክንታንትካ ቼጌርስቱንኩ አኽⶓ ቶኬምካ:: ብሄር ብሄረሰብካ ጛውሳ ኮንኬስታ ባይሎ ሌጌፅጙ ሜብት ቴግባርዳ እሼታ፣ አውጜ ክንትፃንኩ ክንታንትካዋ ዳቔርፅጝስ፣ ኮንኪ ሌጌሳታ፣ ፁፍ ፅንታሱስታ ፍትኽፂው ኮንኪ ያኻታ ፄዉጝስ  አውጚ ኮንኪስ ዳቔርፅጝ ዝኩኽሳ ፍሼ ቶኬምካ::

ላጛንቲ ዲግሪስ ክንቴ እይጝስ ዴሜካ ፋይፃንኩ ቤዴራ ቴርትካዋ ዋኽትጝፁኒዴስ ፋሌንጋ ጉዳይ ካንታኩ አካልካሊ እንፃኽስትጝስ ዲጊስ ቴግባራዋ ፄውጝስ ፅሬቶ ፄዋንኩ አኽⶓ ጌሌፅካ::

“አውጚው ኮንኪ እንዴስ ጌና እንግርግራ አኻላኽ” ኑንኩ አቶ አሱባለው ኮንኪ ሌጌሳታ ፄውጝስ ውላጊ ታምቦ ፊትጝጝ ቱስታው አኽⶓ ጉሽካ::

እንጃቢሪ ዩንቨርስቲዳ አገው ፅናት ኢንስቲቲዩቱ ቹዋ ዳይሬክተር እርዳታንቲ ፕሮፌሰር ብርሃኑ አሳየ ዩንቨርስቲ አውጜ እምፕላንቲ አችዳ ክንትፃንኩ ክንትፃንትካው ቼፍ እንፂጝስ  ዲፕሎማሲ አውጚስ ዳቔርስቱንኩሳ 50 ክንታንትካዋስታ ሚዲቢኒስ አውጜ ጎሌሉንኩ ክንታንትካዋ ቻቤልጝስ አባላምቲ ጊዝስ አውጚው ኮንኪስ ዲግሬ ዳቔርፅጝስ ካሊⶓ ጌሌፅካ::

ክንታንትካ  አባላምቲ ጊዝስ አውጚ ኮንኪስ ዲፕሎማስ ዳቔርስታኒስ ኮሌጅዳ  ክንትፅⶓ ቶኬሙንኩ ፕሮፌሰር ብርሃኑ ናካ ዴሜካ ዲግሪስ  ዳቔርፅጝስ ካሊⶓ ጉሽካ::

“ዳቔርስቱንኩ ክንታንትካ ኽያኑ ሚንች ችግር ዝኮ” ኑንኩ ፕሮፌሰር ብርሃኑ አውጜ እምፕላንቲ አችዳስታ ላጛንቲ አችዳ ክንትፃንኩ ክንትፃንትካውሳ እንፂⶓ ይጉፃው አኽⶓ ቶኬምካ::

ናካ ዳቔርስቱንኩ ክንታንትካ፣ ክንትጝ፣ ክንትፅጙ ካስትዳ ዝኩኽሳ ችግሮ ኽይጝስ፣ ሜፃፎ ቴርሳንታ ፄውጝስ፣ ባይልስታ ቱሪዝምዳ እንፃኽስታንኩ ውማይቴንካዋስታ ሚዲያው እንፅኺዳ ኬፍንኹሳ ታምቦ ፊትጛንኩሳ ክንታንትካዋ ዳቔርፅጝ ኽሳንቲ ትክም ዝኩኽ አኽⶓ እርዳትፅካ::

ፍንሾስ ዴሜካ ፋይስታውሳ ዲቦ ዋኽትጝፅጝስ ሊሊትጙንኩ ክንቲው ቤንካስ ላጛንቲ ዲግሪስ ክንትፅጝስ እንፃኽስታንኩ አኽⶓ ቶኬምካ::

ታደለ አጋጄ