ባኩ ቴግባርስ እሺኹ ማይቤራዊ ታምትጝፂ

አንኪሺ ጉዋጉሲ ወረዳ ቤኬፍቲ ኬቤሊዉ ዝኩዋንታ ዊዛሩ ታወክ የኔት  ሚንች አሜትካስ ሲቑዴስ ግቢትስትኹ ፅቫቭ ጃቪ ጝናዳ ሴዛ ጄርካሊ ዝኩዊኔ ጉስቱስ ሴጝታ:: ችኽ ቱኽ ቺፋ ፕሽስታ ንፋስስ ማልጛ ቼጌርስትጝስ ሲኪኪኒዉሳ ዝኩዊኔ ፊይፄ:: ኻራ ኻራ እኹዊ ኮይኹ ቺፋ ሺንካማ ቱዋማ ጄርካዋ ኹዋዉ ኔታጊ ብቲ ሴጋዳ አቒ ካንታቲዉሳ ፍታኔ ካንቴ:: እን ፅቫቭ ሲቑዊ ጝናዳ ሴዛ ጄርካሊ ታኻታ ችግሮ ፌይፄ:: ካሜንስቱንኩሳ ጄርካዋ  ካዌንዴስ ካኔ ቡያታ ጌቤልዳ ዋይጝስ ጄርካዋ ሊጊፄ:: ይኮኖሚስ አክሞ አቲጝ ግቢትጝ ያኻ አዴስጝስ ኩፂ ካሊያ:: ኹሉ ቺፋ ጄርካዉሳ ዴክቶ ማንዲጝስ ፍንሾስ ቴስፌ እምቴታ ሚንችካ አሜትካስ ችግርሊ ቡንክትጝቱስ እጂቴ:: ጚዉ ዝኩዊኒ ኪስስትጝስ ምክንያታ ያኹኽ ዲብ እምፕል ጌፄሩ ዙራሙሪዳ ዎሌጅታታ ፌሬስቱት ሲቑ ጝናዳ ጄርካሊ ቲሪቴስኪስ ፎቶ ጉሽጝስ ማይቤራዊ ሚዲያስ ባይስትጝ እሺኾ:: ማይቤራዊ ሚዲያ ባኩ ፋይስ ቴኬምስትጝስ ሚንችካ ቼጌርስቱንኩስ እርዳቴ ፋይጝፃዉ አርቲስት ደሳለኝ መኩሪያዉ ማይቤራዊ ሚዲያስ ዊዛሩ ታወክኾ ግቢትስታታ እርዳታንትካስ እቑዌ ዲግስኾ:: ቼጌርስቱንኩሳ እርዳትጝስ አቕስታንኩ ይቶፒያንካ ዊዛሩ ታወኩ  ባንክው ዴብቴር ቼፍስ /አካዉንትስ/ እርዳቴ ፄውና:: ፄውስትኹ እርዳቲስ ባኩ ፋዩ እንፃኽስታንትካ ቤኬፍቲ ኬቤሊዳ ዊዛሩ ታወክኾሳ ግቢትጝስ ኩፑና:: ሊጊሲሚ አሜትካስ እጂቲኹ ሲኪኪኒዉ ዝኩዊኒ ኪስስትጝስ እስካዊ ጝን ግቢትስታይኾ:: እንስ ማልጛ ዴስቴና ታኹት ዊዛሩ ታወክ “እኹዊ ኮይኹ ቺፋ እምፕላቺ ቱዋማ ጉዳቶ ታምፃውጉ ናታጊ ጅፊስታሽትኾ” ንጝስ ፊይፂኹሳ ሲኪኪኒዉሳ ዝኩዊኔ ታክስታ:: “አቒዴስ ፌቴርስታያሱውስታ ማልጛ ቤዴልስታታ እሽትኾ:: ናካ ኩፅኒ እንኩዊኒዳ ቱጛ አቑኻ” ኒስ እሺኹሳ ችግሮ እንክርፄካ::ጝኖ  ግቢትጝ ይጉዋማ እንዳርማኪ ችግር ታምብጝስ ካላቲው እሺⶓ ቶኬምካማ ጄርካታላ እሊውስ ባያማ ካስጝ ጄርካዋ ሌጌፅጝስ ባስኹሳ ችግሮ ፌይፅⶓ ዲብስካ:: “ምርክታ ፃንቑንታታ ጄርካዋ ጉሽኾ፤ አክሞ አቲጝስ ጝኖ ግቢትጝስ ካላያ” ንጝስ ታምብኹሳ  ቤዴሎ እንክርፄካ:: “ጄራታ ካንትጝስ እርዳቴ ፄዋይና፤ድኪ ካንቲቲምኻና” ኒስ ፄዉስታይኹ እርዳቲስ ምስጋኔ ዲግስካ::

ዎታት አስፋው አይኔ አንኪሺ ጉዋጉሲ ወረዳ ቤኬፍቲ ኬቤሊዉ ዝኩዋንቲ ያኹስ ሊሊትጙንኩ ባኩ ፋዩ እንፅኺዳ አሴቴፍጜ:: ዊዛሩ ታወክኾሳ ግቢትጝስ ዙራሙሪኩ ዝኩዋንትካ እምፕልትስ ፊጝስ እንፃኽስትካ:: አክም እላቲንኩስ ፄውስታው እርዳቲዴስ ድምክና አጌሩ ልማትዳ፣ አምሉ አሻሪዉ ሜርሃ ግብርዳስታ እሊዉ ልማቱ እንፅኺዳ አሴቴፍጝጝስ እንፃኽስታንኩ አኽⶓ ዲብስካ::

ዊዛሩ እብስቴ ባይሌ አንኪሺ ጉዋጉሲ ወረዳ ኹንስታ ማይቤራዊ ጉዳይ ፅፌት ጝናሱ አላፋኽ:: ባኩ ፋይ አግልግሎቴ ወረዳታጊ ጄሜርፁኑ ወክትዳ ዊዛሩ ታወክኾሳ ግቢትጝስ ጄሜርፅካ:: ባኩ ፋዩ ቹዋ አላሚ ቼጌርስቱንኩስ እርዳትጚያኽ ኑንኩ ዊዛሩ እብስቴ ወረዳታጊ ችኹ ባኩ ፋዩ አግልግሎቲዳ 62 ሻይዴስ ጃላ ዎታትካዋ አሴቴፍጝፅጝስ እክድ እምስትⶓ ጌሌፅካ:: 17 እንፅኺኩ ዜርፍካዳ ዎታትካ አሴቴፍጝፅጝስ ጝኖ ግቢትጝዳ ፣ብሬ እይጝዳ፣ ዳዶ ቴጌንጝዳ ክንታንትካስ ክንቲዉ ሜሳርካዋ ዋኽትጝፅጝዳስታ እሊኩ ቴግባርካዳጊ ዎታትካዋ አሴቴፍጝፅጝስ አኮሜችስታዉ አኽⶓ ዙሜካ:: አክም እላቲንኩ አቕስ ባኩ ፍካዴንካስ  አሜት ቺፋ ባሎ ዴስንካማ ፌይፃንታ ፄውስትⶓ ጉሽካ:: ፌይኹ አሜትዳ እንፃኽስስትኹ ባኩ ፋዩ አገልግሎቲስ 1ሻይ 8 ሊኻዴስ ጃላ ስራስሪስ 1 ሻይ ላጛ ሊኻ ደርዘን ዴብተሮ ኩፕፅጝስ ክንታንትካ ክንቲው ማድዳ አሴቴፍጛንታ ፄዉስትⶓ ጌሌፅካ:: እንፃኽስስትኹ እንፅኺስ ክንቲዴስ ኬውጝፃሺንኩ ስራስሪ ክንቲዉ ማድንሾ ዙራንታ ፄውስታ ንካ:: ችግራኻዳ ዝኩንኩ እምፕልታቖ እርዳትጝ አንኮሊውሳ ዴስቴ እያው አኽⶓ ቶኬምካማ ዎታትካ ሊሊትጙንኩ ባኩ ፋዩ እንፅኽካዳ አሴቴፍጛንታ እቑዌ ዲግስካ::

አዊ ብሄረሰቡ ቺፅጝፂዉ ኹንስታ ዎታትካዉ ማይቤራዊ ጉዳይ ሜምሪዉ አላፋ ዊዛሩ አምባነሽ ስሜነህ ባኩ ፋዩሳ እንፅኼ ቤኬፍቲ ኬቤሊዳ ጄሜርፃኒስ ዙሙኑውስታ ማይቤራዊ ሚዲያ ባኩኒ አላሚስ ቴኬምስትጝስ ቼጌርስቱንኩ አቕስ ታምብጝስ እምፕልታቑሳ ችግሮ ኽይጝስ ካሊስትኹ አኽⶓ ዙሜካ:: ዎታትካ ባኩ ፋዩ እንፅኺዳ አሴቴፍጝጝስ እስካዌ ጝኖ ግቢትጝስ፣ አቤሌሽስትኹሳ ዳዶ ግቢትጝስ ክንታንትካዋ ክንትፅጝስ፣ አምሉ አሻሪዉ ሜርሃ ግብርዳስታ ብሬ እይጙ እንፅኺዳ እክዶ እሜማ እንፃኽስትጝስ ቴግባርስ ካንትስታዉ እንፅኺ አኮሜችስታማጊ አኽⶓ ጌሌፅካ:: እምፕልታቕ ጛስ ጛዋ እርዳትጝጝስ  እምፕልታቑሳ ችግሮ ኽይጝስ ምንግስትዴስ ፋዉሳ ፍሼ ይጉፅጝስ እምፕልትስ ቴቤቤርጝስ እንፃኽስትጝ ቱስታዉ አኽⶓ ዲብስካ:: ባኩ ፋዩ እንፅኺዳ ዉላ እምፕልታቕኩ ቤንካ አሴቴፍጝጛታ እቑዌ ዲግስካ::

ታደለ አጋጄ