አኹዴስ ይንታንኩ ቑንዝካ

አኹስ ይንታንኩ ቑንዝካ አሌምዳ ቹዋ ቲኑ ችግርካ ያኹንኩ ቑንዝካ ክቻዴስ  ቶኬምስታና:: አኹስ ፌያፌይጛንኩ ቑንዝካ ስንክርስትኹ አኹስ ኬሴትስታው ያኹስ ቑንዚው ጉሽፂ እልስ ካንትስታቲው እንኪቲኒስ ይንታው ያኹስ ቫይረስስታ ባክቴሪያስ ስንክርስትኹሳ አኾ ዝቕጝስስታ ስንክርስትኹ አኹስ ቴርትኹሳ ምግቦ ሜጌብስትጝስ ቑንዚስ ፂኪስታና::

አሌሙ ቲኑ አችቱ ንቫር ካንትፃውስታጊ አሜት ቺፋ ሚሊዮንስ ቼፍስታንኩ አቕ አኹስ ይንታንኩ ቑንዝካስ ክራና:: ሌጌስጝዳ አግስታንኩ አጌርካዳ ዴሜካ ቑንዚው እሳንጝጚ ኬፍቲኒያኽ:: አኹስ ይንታንኩ ቑንዝካ ክቻዴስ ሊኽዴስ 80 ታፋዴስ ጃላ  ቑንዚ ፃንኩቶ ማንዲጙ ችግርስ ኬሴትስታው አኽⶓ አሌሙ ቲኑ አችቱ ንቫር ምልኻቴ::

ችኽ ቱጝሊ እምትጛማ አኹስ ይንታንኩ ቑንዝካ እሳንስ ኬሴትስታኑ ጊዝያኽ:: አኹ አግፂ ያኹንኩ አሊ፣ ብን፣ አይክስታ ፄጌርጙንኩ ስንክርስታኒ እምፕልታቖ ሳሴርስ ቑንዚስ ፂኪፄ:: አኽጝስኪ ዙራሙሪውሳ ፃንኩቶ ማንዲጝስታ አኹ ስንክርስታቲታ ፄውጝስ አኾ ጌፌርፃማ ዝቕጝስ ጛርቱሳ ፃንኩቶ ማንዲጝ ፋይፃንቲያኽ::

አውጚው ራዲዮንሊ እጂጜ ፄውንኩ አንኪሺ ጉዋጉሲ ወረዳ ቤኬፍቲ ኬቤሊው ዝኩዋንታ ዊዛሩ አስናከች ዘላለም “ቲን ዝኩዋኒያኽ ውላዋ ዲቮ ፄውጝስ ካሊስታው:: ኬቤሊ ቺፋ ዝኩንኩ ቲንኩ ውማይቴንካ ሙሬ ዙሬካማጊ እምፕልታቕ ፃንኩቶ ማንዳንታ ክንትፅካማጊያኽ” ናኒስ ዙሜካ:: ጛርቱሳ ፃንኩቶስታ ዙራሙሪውሳ ፃንኩቶ ማንዲጝ እምፕልታቑ ቲንስ ማልጛ ፋይፃንቲ አኽጝስ እምፕልታቕ ቲኑሳ ፓኬጆ ዋኽትጝፅጝስ ፃንኩቶ ማንዳንታ ፄውጝ እምፕልታቕ ቑንዚስ እምስታቲንታ ካላካልጛንኩ አኽⶓ ዙሜካ::

እምፕልታቕ ጛርቱሳስታ ዙራሙሪውሳ ፃንክቶ ማንዲጝስ ሼውቲ ፌቴርስትⶓ ቶኬምካማ ቲን ውማይቴንካ ኩስጝፃኑሳ ኩስጜ ቻቤልጝስ ፃንኩቶ ማንዳንታ  ፄዌካማጊ አኽⶓ ጉሽካ::ጛርቱሳስታ ዙራሙሪውሳ ፃንኩቶ ማንዳኑላስ ይጉጝ ችግሮ ማልጛ ባስጝፄ:: ካቢትጝጚስ ኬሴትስታንኩ አኹስ ይንታንኩ ቑንዝካ ክቻዴስ ጃርዲያ፣ እንጅኩዊ፣ ታይፎይድ፣ ኮሌራስታ ፄጌርጙንኩ ቶኬምስታና:: እኒ ቑንዝካስ ፂኪፃንኩ ምክኒያትካ ዴሜካ ፃንኩቶ ማንዳኑላስ ይጉጝ፣ ፃማ ክብፂ ስፍሪ እላ አኽጝስታ ናቕትጜካማ ዝኩዋኑ ዙራሙሪዳ  አኹ ሊሊትጙንኩ ምክኒያትካስ ስንክርስታኒያኽ::

ዊዛሩ አስናከች ዙሙኑውስታ ጛው ዙራሙሪዳ ፃንኩቶ ማንዱኽሳ አኾ ቦምቢዴስ ችምቢጝስ ዝቓንኩ አኽⶓ ዙሜካ:: እምፕልታቕ አኹስ ፌያፌይጛንኩ ቑንዝካስ እምስታቲንታ ፅንኩቶ አኾ ቴኬምስትጝ ቱስታው አኽⶓ ቶኬምካ:: እሊው እንጃቢሪ ኬቴሙ ዝኩዋንቲ አቶ የሁዋላ ገድፋው ችኽ ቱዋኒ እምፕልታቕ አኾ ሊሊትጙንኩ አኹ አግፂ ስፍርካዴስ ችምቢጝስ ቴኬምስታንኩ አኽጝስ ቑንዚስ እምስትጝስ ካላንኩ አኽⶓ ዙሜካ::

አኾ አግፅጝታ ችምቢጝስ ቴኬምስትጝ ቱስታ ጋቲው አኽⶓ ቶኬምካማ ችኽዳ ኩሪስስታ ፄጌርጙንኩስ አኹስ ፌያፌይጛው ቑንዚስ ሚንችካ  ቑንዳስትጝስ እክምኒዳ  ካሳንኩ አኽⶓ ዙሜካ:: አኽጝስኪላ አኾ ጌፌርፃማ ዝቕጝ፣ ምግብ /ኹጝ/ ቴርቱስ ፃንኩቶ ማንዲጝ ፋይፃንቲ አኽⶓ ድኹዌካ::

እንጃቢሪ ትክላሊ እምፕላንቲ አች ሆስፒታልዳ አኪም ዶ/ር ይርሳው ትላሁን ችኽሊ እምትጛንኩ ቑንዝካዴስ እምፕል አኹስ ይንታው ቑንዚያኽ ንካ:: ችኽዳ አኾ ብንዴስ ችምቢጝስ ቴኬምስታንኩ አቕ አኾ ጌፌርፅጝስ ቴኬምስትጝ ቱስታው አኽⶓ ቶኬምካ::

አኾ ብንዴስ ችምቢጝስ ፃንኩፂስ ፄክፅጝስ ዝቒስ ቴኬምስትጝ ፋይፃው አኽⶓ ዙሙንኩ ዶ/ር ይርሳው ብንዴስስታ አሊዴስ አኾ ችምቤካማ ቴኬምስታንኩ እምፕልታቕ  ቑንዚስ እምስትጙ ድል ኬፍንኹ አኽⶓ ቶኬምካ:: አኹስ ይንታንኩሳ ቑንዝካዋ ካላካልጝጝስ ጛርቱሳስታ ዙራሙሪውሳ ፃንኩቶ ማንዲጝ ፋይፄ:: ዝቕስታውሳ አኾ ሜጌብስትናውሳ ምግቦስታ ሜጌብስትጝስ ቴኬምስትናዉሳ አክኼ  ፃንኩቶ ማንዲጝ ፋይፄ::

ምግቦ ሜጌብስትጝዴስ ፍናስታ ፋሌንጋ አክኼ ትንካኪስ እሚጝስ ቑንዚዴስ ካላካልጝጝ ፋይፃው አኽⶓ ቶኬምካ:: ዙራሙሪዳ ዝኩኽሳ ፃሜ ቱስታው ዳድስ ድፅጝስ አኾ ስንክራቲታ ፄውጝ ቱስቴኪላ  ንካ::

አኹስ ይንታንኩ ቑንዝካስ እምስትኹ አቒ፣ እንጅኩዋ ፄዌ፣ ጉዝጎ ቑንዳፅጝ፣ ምግቡሳ ፋዮ ኔኬትጝ፣ ጃላፅጝስታ ፄጌርጙንኩ ምልኻትካዋ ካንትፃው አኽⶓ ቶኬሙንኩ ዶ/ር ይርሳው አኹስ ይንታንኩ ቑንዝካ አቒዴስ አቒሾ ሳሴርስ ፌያፌይጝስ ካላንኩ አኽⶓ ቶኬምካ::

አኹስ ይንታንኩ ቑንዝካዋ ካላካልጝጝስ ጛርቱሳስታ ዙራሙሪውሳ ፃንኩቶ ማንዲጝ ፋይፃንቲ አኽⶓ ጉሽካ:: አኹስ ይንታንኩ ቑንዝካስ እምስቱንኩ አቕ እክምኒ ጝና ይንታኒ ላቦራቶሪው ምርማሪስ ሺሽስታው አኽⶓ እርዳትፅጝስ ቑንዚዴስ ቤዴራማ ካላካልጛንታ እምፕልታቕስ ሼውቴ ፌቴርጝ ፋይፃው አኽⶓ እርዳትፅካ::

አኾ ቦምቢዴስ ችምቢጝስ እንኩራኑሳ አኾ ጉድጛ ልምጝስ እንኩርጝስታ እንኩርፄ አክኼ ቑፅጝ ፋይፃው አኽⶓ ቶኬምካማ ቻኺ ጝና ካስጝዴስ ፍናስታ ፋሌንጋ ፃንኩቶ ማንዲጝ ፋይፃው አኽⶓ ጉሽካ::ብንዴስስታ አሊዴስ ችምባኑሳ አኾ ጌፌርፃማ ዝቕጝ ቱስቴ  ኑንኩ ዶ/ር ይርሳው እምፕልታቕ ፃንኩቶ ማንዳንታ ክንትፅጝስ ሼውቴ  ፌቴርጝ ፋይፃው አኽⶓ ታክስፅካ::

ታደለ አጋጄ