ኢንቨስትመንቱ ዜርፍስ እይስትኹ ትኩት

ንግስቴ ተስፋ

ኢንቨስትመንት እሳንጛኒ ዙራሙሪዳ ጊፁ፣ ኢንዱስትሪው፣ ግብርኒው፣ አግልግሎቶ እይጚውስታ እሊኩ ልማቱ ፕሮጄክትካ እንፅኼ ጄሜራኒ ቴክኖሎጄ እሳንጝፅጝዴስ ፌይኹስ እንፅኺውሳ እድሎ ፌቴርጝስኪላ ኬፍቲኒ ታምብ ዝኩኹ እስታማ አምንስቴ፡፡
ኢንቨስትመንቱ እሳንጚው ቹዋ ቹዋ ትክምካዋ ካንትናኒኪላ እንፅኺውሳ እድሎ ፌቴሬ፤ አጌራው ይኮኖሚውሳ ልግስኔ ቼሜትጝፄ፤ ቴክኖሎጂውሳ ካይጝጜ ይስጝፄ፤ ባርኾቼው ምንዛሪውሳ ሚፄ ሌጌፄ፤ እዝቡ ዝኩዊኒውሳ አቾ ኬሽጝፅጝፅጝስ አሜቻውሳ አኺኔ ፌቴሬ እስታማ አምንስታው አኽⶓ ምታኒ አብቱ ሙሁራንካ ኽይትጝፃና፡፡
እንጚስኪላ ብሄረሰቡ ቺፅጝፂዳ አግስታውሳ ፍትሬቱሳኪ ያኻ አቓ ግብሬ ኢንቨስትመንቱሳ እይስቴ ሊሚፃማ ቴኬምስትጝስ እይስትኹሳ ሊሊቴ ትክቶ ቴግባርዳ እሽፄካማጊ አግስታንኩ ወረድካስታ ኬቴሙ ቺፅጝፅካ አግስታና፡፡
እኒዴስ ቻግኒ ኬቴሙ ቺፅጝፂ ኢንቨስትመንቱ ዜርፍዳ ኪሴ ሜዜጌብፅጝስ እይስትኹ ሊሊቲ ትኩትስ ዋይሚ ሜዜጌብስታማጊ አኽⶓ ኬቴሙ ቺፅጝፂ ኢንዱስትሪስታ ኢንቨስትመንት ፅፌት ጝናሱ አላፊ አያና አድማስ ቼሜትጝፄካ፡፡
2018 ምርቱ ዝቤንዳ ቻግኒ ኬቴምዳ አግስታውሳ ሊሊቴ እይስቴ ሊሚፅጝስ አንኩዋ ፕሮጄክትካስ ፍካድ እይስታማ አንኩዋዴስ እምፕል ፋብሪኪ እንፅኼ ጄሜርⶓ ጌሌፅካ፡፡
ሴዛ ፕሮጄክትካዳ አሴሜርጙንኩ ኢንቨስተርካ ዴሜካ ሊሚፅካማ እንፅኼ ጄሜርጝስ ቴርቴካማጊ አኽⶓ ሼውፅካ፡፡ እንጚስኪላ 215 እንፅኼ ፋያንትካስ እንፅኺው እድል ፌቴርስትⶓ ቶኬምካ፡፡
አቶ አያና አድማስ እይኑ ኽይትጝፂዳ ቻግኒ ኬቴም ቺፅጝፂዳ አብትዌን ኢንቨስታ ፄዋንታ አሜቻውሳ ሴሎ ፌቴርጝዴስ ጉሽፃማ እንፅኺስ ፅንጋኻ ያኻውሳ ውትኽትኼ እንፃኽስትጜ ክችስጝስ አኮሜችስትኹ ቴግባርስ ይስጝፃው ዋይሚ ሜዜጌብስትⶓ ሼውፅካ፡፡
እሊውስ ዴሜካ ኬቴሙ ቺፅጝፂዳ ሴስታ ፕሮጄክትካዳ አሴሜርጙንኩ አብትዌን አሜሬትጝስኪ ያኻ ሊሚፅጝስ ፍካዶ እሚካማ ካፁኑሳ ብቴ ክችክቺስስታ ወክትስ ሊሚፃኑላ ይጉጝስ ብቲው ባንክሾ ዙራታ ፄውስቱስ ብቲው ባንክሰ ዙርኹዴስ እምፕሎ እሊኩ ሊሚፃንትካ አብትዌንስ ፌይጛማ እይስታታ ፄውስትⶓ አላፊ አቕፄካ፡፡
አቶ አያና ኑኑውስታጊ 2018 በጀት አሜትዳ እሺኹሳ ዳንጉኔ ክችስጝስ ይሴንቶ ዴሜካ ሲፍፅጝስ 2019 ባጄት አሜትዳ ኢንቨስትመንቱ እንፅኺዳ ሊሊቴ ትኩቶ ፄውጝስ እዝቡ ቴኬምስታንትስ እንፃኽስስትጝስ እክድ እምስትⶓ ቶኬምካ፡፡
ሚንችካ ስስትስስታ ቓሊትስ ካንታንትስታ እምቢት ንኹሳ ልግሶ ሜዜጌብፅጝስ ፅሬቶ ፄውታት እንጃቢሪ ኬቴምዳኪላ ኢንቨስትመንቱስታ ኢንዱስትሪው እሳንጚስ ፅሬት ፄውስታማጊ አኽⶓ ኬቴሙ ቺፅጝፂው ኢንቨስትመንቱስታ ኢንዱስትሪ ፅፌት ጝናሱ አላፊ ግዛቸው ትላሁን ጌሌፅካ፡፡
2018 በጀት አሜትዳኪላ 7 ትኩሚ 5 ሚሊዮን ካፒታሎ ሜዜጌብፁንኩ 52 አብትዌንካ ኢንቨስታ ፄውⶓ ቴግባርዳ አሴሜርጙንኩ አኽⶓ አቕፄካ፡፡ እንጚስኪላ ላጜታ ፕሮጄክትካስ አሜሬትጙ ዜርፍዳ አሴሜርጛንታ ብቲ እይስታ፡፡ ሴስታ አብትዌንካ ዴሜካ አግልግሎቴ እይጙ ዜርፍዳ አሴሜርጛንታ ፄውስትⶓ ጉሽካ፡፡
አላፊው ኽይትጝፂታጊ ኬቴሙ ቺፅጝፂዳ ኢንቨስተርካ ቱዌካማ ኢንቨስታ ፄዋንታ ካሊፃውሳ እንፃኽስትጜ ቴግባርዳ እሽፅጝዴስ ጉሽፃማ ዙራሙሪው ዝኩዋንትካስ ፋይፃውሳስታ ቴኬማውሳ ዜርፎ ጎሌልካማ እንፅኺሾ ቱዋንታ ሲፍጚ ፄውስታው አኽⶓ ጉሽካ፡፡
ጊፅስ አኹኪ አሜሬትጙሳ እክዶ ቴርሳንታ ፄውጝዴስ ፌይኹስ ፍሻኑ ፍካዱ እጉ ስሬትስ እንፃኽስታንታኪላ ጌዴድስታንኩ አኽⶓ አላፊ ቶኬምካ፡፡ እንጚስኪላ እንጃቢሪ ኬቴምታ ዝኩኹ ፊፂምጚ ይስጝፃው አኽጝስ አብትዌን ፋያኑ ዜርፍስጊ አሴሜርጛንታ እቑዌ ዲግስካ፡፡
ጉዳዮ ካንትኹስ ኽይትጝፄ እያንታ ካሲኑክ ምታኒ አብቱ /ይኮኖሚክሱ/ ክንትፃንቲ አምሳሉ ተሰማ ኢንቨስትመንቱስታ ኢንዱስትሪው እንፅኺ ሳኪትጙኽ ያኻታ ዳላው ካፒታል፣ ጌቤሉ ፅናት፣ ጊፁ እክድ፣ እጉ ፍካድ፣ እንፅኺስ አሜቻው ብቲስታ ስሩ ልማት፣ ቴክኖሎጂው ሜሳሪ፣ አቒው አይልስታ ምንግስቱ ሲፍጚ እንቲታኪ ቼሜትጙኽ ፖሊሲ ዝኩጝ ፋይፃንቲ ጉዳይ አኽⶓ ኽይትጝፄካ፡፡
ዋሺኒኪ አብት ዌና ኢንቨስት ፄውጝስ ጚጛርትጛዴስ ፌያማ ዙራሙሪኩ አቕስ ቴስፌ እያው፣ ዙራሙሪዳ ዝኩኹሳ ችግሮ ኽይጝስ ፅሬታ ፄዋው ያኹኒጊ ኢንቨስትመንቱ ዜርፍስ ሌጌሱንኩ አጌርካ ታምቡኑሳ ኪሴ ታምብጝስ እርዳታው አኽⶓ ሼውፅካ፡፡ ጛርትስ ሌጌስጝዴስ አቭርቱ ሌጌስጙሳ አላሜኪላ አብትዌንካ ሼውናንታ ኩስጝፄካ፡፡
ብሄረሰቡ ቺፅጝፂዳ አግስታው ምታኒ አብቱ /ይኮኖሚው/ ሜቴን ኔክስታያሱ ያኹኒውላ አብትዌንካ ሊሚፅጝዳ ሊሊቴ ፕሮጄክቶ ፌቴርካማ እዝቦኪ ያኻ ጛጛርትጛሳ ይኮኖሚስ ቴኬምጝዳ ታምቦ ፊትጛንታ አሳቦ ዲግስካ፡፡
28 ቢሊዮን ብርዴስ ጃላ ካፒታሎ ሜዜጌብፁንኩ 194 ሊሚፃንትካ አብትዌንካስ ፍካዶ እይⶓ አዊ ብሄረሰቡ ቺፅጝፂ ኢንዱስትሪስታ ኢንቨስትመንት ሜምሪ አቕፁኻ፡፡
አዊ ብሄረሰቡ ቺፅጝፂ ኢንቨስትመንትስታ ኢንዱስትሪ ሜምሪው አላፊ ፈካዱ ወንዴ እይኑ ጊሊፅፂዳ ብሄረሰቡ ቺፅጝፂዳ ኢንቨስታ ፄዋንታ ፍካድ እይስቱክ አብትዌን ሊሚፅጙ አክምስ እንፅኺውሳ እድሎ ፌቴርጝስስታ እሊኩጊ ቹዋ ጉዳይካዋ ዋኽትጝፄካማ ጎሌልስትጝስ እንፅኺሾ አሴሜርጙንኩ አኽⶓ ሼውፅካ፡፡
2018 በጀት አሜትዳ ሊሚፃኑሳ ብቴ አሬኬብስትካማ እንፅኼ ጄሜርካያስኩ ላጜታ ሊሚፃንትካ አብትዌንዳ እርምጂ ካፅስታማ 1 ትኩሚ 5 ሄክታር ብቲዴስ ጃላ ብቲ ብቲው ባንክሾ ዙርⶓ አቕፄካ፡፡
ባጄት አሜትዳ ሶኼታ እስካውካ አሜሬታንትካ ኢንዱስትርካ እንፅኺሾ ቱዋኒስ ሊሊትጙኽ ምክንያትስ እንፅኼ ጄሜርካማ አሜሬትⶓ ኬውጝፃሺንኩ አንኩዋ አሜሬታንትካ ኢንዱስትርካ ዴሜካ ድጋፎ አግፄካማ እንፅኼ ጄሜርⶓ ሜምሪው አላፊ አቕፄካ፡፡
ኢንቨስትመንቱስታ ኢንዱስትሪው እንፅኺዳ አሴሜርጜካማ እንፅኼ ጄሜሩንኩ አሜሬታንትካ ኢንዱስትርካዳ 2 ሻይ 900ዴስ ጃላ እንፅኻ ፋይካ እንፅኼ አግፃንታ ካሊፅⶓ አላፊ ሼውፅካ፡፡
አብትዌን ቱኑ ውሉ ስሬትስስታ ሜሜሪስ አሴሜርጙኑ እንፅኺዳ ዋይሚስታ ያኻንታ ትኩትስ ሲፍጚ ፄውስታማጊ አኽⶓ አቶ ፈካዱ ቶኬምካ፡፡ ብሄረሰቡ ቺፅጝፂ ኢንቨስትመንቱ ቴግባርስ አሜችኹ ያኻታስታ ዝኩኹሳ እይስቴ ሊሚፅጝስ ይኮኖሚውሳ ትክሞ አግፅጝስ እንፃኽስስትጝ ማንዲስታው አኽⶓኪላ ሼውፅካ፡፡