ሻደይ፣ አሸንድዬስታ ሶለል

ሻደይ፣ አሸንድዬስታ ሶለል አሜት ቺፋ ናሲ 16ዴስ ጄሜራማ 21ኺስታ አማኻሪ ክልል ዋግምኽራ ሰኮታዳ፣ ላሊበላዳስታ ኮቦው ዙራሙሪዳ እንቲታኪ ትግራይ ክልሉ ዙራሙርካዳ ኬቤርስታው ባል ያኹሰ ኹን ዳድካዳስታ አደባባይካዳ ፌካማ ኔፃኔቶ አዌጁኑ ባልያኽ::ሻደይ ፣ አሽንድዬስታ ሶለል ሊሊትጙንኩ ዙራሙርካዳ ሊሊትጙኽ እቑፂ ስምስ እቑስታው ያኹኒውላ አንቓ አንቓስ ኬቤርስታው ባልያኽ:: ኹን ችኹ ዎክት አሌድስታማጊስታ እሪ ኔኬትማጊ ይንትⶓ ሲፋማ እሰካዊ ባል ይንታው አኽⶓ አምንጝስ ኬቤርፃኑ ዴስቲው ባል ያኻማኪላ ካንትስቴ:: ኹን ችኽ ቱጝሊ እምትጛማ ኬሴትስታንኩሳ ችግርካዋ ፌይካማ እሰካዊ ዝቤን ይንታማጊ አኽⶓ እንጉስትጝስ ዴስቴ ጌሌፃኑ፣ አፄብካሊ እምፕልትስ ያኼካማ ሻኻኑስታ፣ ጛጂሱሳ ኔፃኔቶ አዌጃኑዊያኽ::
ሻደይ እስታው እቑፂ ስም እይስትኹ ችኹ አርፊዳ ዋጋው አሸንዳው ቴክልዴስያኽ::
ባልዳ እድሚዉ ሊሊት ጌጌዋውላስ ስራስሪዴስ ኽሳንትካዋኺስታ እምፕልትስ አሴቴፍጛና:: አዳባባይዳ እምፕልትስ ኬቤርፃኑ አኽጝዴስ ጁኽስ ታክስጚው፣ እንካንጚውስታ እምፕልቱ ባልያኽ::
ባሎ ኬቤርፅጙ ካስት ጄሜራው አባላምቲዳ “አሸንዳ እስታውሳ ኻፄ ኬውካማ ጌሜድዳ ዳራዳርጝስ ይውዳ እንፄዋና:: አንቓ አንቓ አሸንዳውሳ ኻፄ ይውዳ እንፄውኒዴስ ፋሌንጋ ፃንጌኻዴስ ሌዋሾ ዳሌ ዋዛዋዝካማጊ ጅማና::
ናሲ እምፕልዴሰ ጄሜርካማ ባልስ ሊሊቲ ቤዴራ ቴርት ፄውስቴ:: ኹን እስካዌ ስዮ ጌቤልዴስ ጄዋና:: ጄውጙ አክም እላቲኩ ዴሜካ ዝኩኽሳ ቑፅካማ ሴያና:: ጛሪውሳ ግቢቴ ሹርቤ ግቢትስቴካማ ባልስ ቴርታና::አንቓ አንቓ ዋዚሚዳ ካዌና ካስካማ አሽንዴ እስታውሳ ኻፄ ኬውካማ ያጉኒዴሰ ፋሌንጋ ኻፄ ጚስጜዋ እምትጝፄካ ጎናጎንካማ ይውዳ እንፄዋኒ ኹንስ ሊሊቴ ግዶ ፌቴሬ:: እን ጊዝዳ እድሚ 15 አሜታዴስ ኩክራ ያኹንኩ ኹን ታፍዳ አምባሮ ሴያና፣ ኽስጝ ኑንኩ ቲባንካዋስታ እንኮኺውሳ ግዶ ፄዋና:: ድሚ 10 አሜታዴስ ኩክራ ያኹንኩ ኩፅኒ ኩንቾስታ ጋሜ ጛሪዳ ግቢስትካማ ፋና::
ናሲ 16ስ ባል ሊሊቲ አኺኒስ ኬቤርስቴ:: አንቓ አንቓ ጉሪጛስ ጁዌካማ ብሽታንሾ ካስጝስ ሻኻና:: ብሽታንዴስ ዙሩኒዴስ ፋሌንጋ ኩፅኒ ኽሳንትካ አቕኾ ካስጝሰ ሊሊትጙኽ ዜሚስ ጝንጝና እንዜጜካማ ጅማና ፡፡እክሪ ጄሜራውኪላ ብሽታንሾ ካስጝስ ያኹስ ቤዴራሱ ጊዝዳ እን ቴርት ጄሜርስታው አጌሮ አኹኪ ዙራሙሬ ቺፅጝፃንትካ እሺንኩ አቕኾ ካስካማኽ፡፡
አሸንድዬ አሸንዳ ሙሴ
ፍስስ በይ በቀሚሴ፡፡
አበሙሴ፣ ወርቅ አበሙሴ
ፍስስ በይ በቀሚሴ”………
አሸንድዬ አሸንድ አበባ
እርግፍ እንደ ወለባ”……..

አሸንዳ በሉ
አሸንዳ
አሸንዳ ብዬ
አሸንዳ
ለባሌ ብዬ
አሸንዳ‘………ንካማጊ አንቓ አንቓ ጅማና፡፡
ሻደይ አይማኖትሊ ታምትጚ ዝኩኽ ባልያኽ:: ባልታዋ አንቓ አንቓ ጝንጝናሾሰታ አደባባይሾ ዙርካማ ኬቤርፅጝዴስ ፍና ብሽታንሾ ካስጝስ እንክሬ ጄሜራና:: እንክሪዳ ኹን ሊሊትጙንኩ ባይልኩ ስይካስ ግዲካማ ብታቺዳ ብሽታንሾ ካሳና :: ብሽታና ካሳኒስ ኪሪዌስታ እሊኩሳ አክኽካዋ ዋኽፃና:: ብሽታና ታምቡንታ ሜዝሙሮ ዜሜርጝስ ሹኺኒ ብሽታንሾ ዙርጝስ ማኩታና:: ብሽታንዴስ ፉኒዴስ ፋሌንጋ ዴሜካ አሜቻው ስፍሪዳ ያኼካማ ምስጋኔ ጄሜራና::
ባሉ አሴቴፍጛንትካ ኪሪዌ ታስጝስ፣ ታቡቱሳ ስሞ እቑዊጝስ ግዴው ድምፅስ ዜሜርጝስ፣ ጉድ ልቕልቕቴ ፄውጝስ ጉዶ እንፅኼንቶ እሚንኩ ግትምካስ አሜቶ ታምፅኹ ድባንስ ምስጋኔ ዲግሳና:: ምስጋኒኪላ “እን አሜትስ ታምፂኾ ድባን ይንታው አሜትስኪላ እንጚስታ ሴላምስ፣ እንካንስስታ ዴስቲስ ታሚፅ” ናዊያኽ::ብሽታንዴስ ዙሩንታኪላ ሙርዳ አግስታንኩ ኽሳንትካ አቕኾ ካስካማ ድቕሮ ቻቤላና፡፡
ሻደይ አሸንደዬስታ ሶለል ባልካ ኹኑ ባል ያኹኒውላ ጝርጃኪላ ኬፍቲኔ ቴሳትፎ ካንትፃኑ ባልያኽ:: ጝርጃ እን ባል ታምብጝዴስ ቤዴርካማ ጛሬ ሌጌፅካማ፤ ጎፈሬዋ ሹካትካማ ፣ ሊሊቲ ኽሪ ዝኩኽሳ ፍትሬቱሳ ክባቶ ስንክትካማ እጄና:: ናሲ 15 ጌርክስ ኹንስ ሻደዩሳ ኻፄ ኬውካማ እይጙሳ እንፅኼ አኮሜቻና:: ኻፄ ኬውጛ ካሳኑኪላ እንዳራኪ አሬ ኬሜሳኑላኽ::ኹንስ ጛው ይው ልክስ ጌሜትካማ ባርዛፉ ቕሺስ ቴርሴካማ እያና:: ኹንኪላ ጝርጃ ቴርሳኑሳ ሻደዩ ኻስካማ ጝና ቱዋላኽ:: ጝኑ ዙራሙሪዳ ክይስ ሾፌንስትኹ ብቲዳ እንኩርካማ ቺፃና:: ናሲ 16 ጌርክስ ዴሜካ ጝርጃ ጉሪጛስ እቑትጜካማ “ጊቴ” እስታውሳ፤ ቡዜ አኽዳ አኾ እሚጝስ ካላውሳ ጉሚቴ ኬዋና::ጊቴ ካኒዴሰ ግቢትስታው ካኒስ ሴባኒ ሳሴርስ ቑችሰታውያኽ::ባሉ እንክራንትካኪላ “ጊቴ” ሴክክጝስ ልኺትጛኑሳ ግንቦ ቴክልካዴስ ቴርሳና:: ኹን “ሻደይ” ንካማ እንክራኒስ ጝርጃ ዎሬሞ ሜኬትካማጊ ይሴንቶ ካንትፃና:: ቡንክትጝጚስስታ ልኺትጚስ ኹንስ እንካንስቶ አግፅጝስ ፅሬቶ ፄዋና::እን ባሉ እንክሪዳ ጝርጂ እንጉስታትሳ ጄሬዋ ሲፋማ ይውዴስ ሻደዩሳ ኻፄ ኪማኒ እኾኽቲኒ ኩፅኒ ድላ ፄውኹ አኽጞ ቼሜትጝፄ:: እንዳራኪ ዙርሜ አግፃያሱ ያኹኒ ኩፅኒ እሊኩዳ ሞኬርጝስ እምቢትናማ ዙርጝኔ::
እሊው ሻደይ ባልታዋ ፄውስታው ቴርት ዴሜካ ኹን ስኒውዴስ ካምፒዴስ ግቢስታው “አስኩር” እስታው ምግቡሳ አይኔቶ ጝናኻዳ ቴርስካማ ጝርጃ አግፃቲንታ ቤፍፅጝያኽ:: ጝርጃ ጝና ቱዋቲንታኪላ አብጂሊዳ ያኼካማ ሚፅፃላ ንጝስ ፅሬቶ ፄዋና:: ጝርጀ ዴሜካ አስኩሮ አግፅጝስ ቡንክትጝጜ ፄዋና:: አግፁኒዴስ ፋሌንጋ ዴስቲስ ሻሚትጜካማ ኹዋና::
እንክሪ አሌዴስታኒ ኹንስታ ጝርጃ ሻደይ እንክሪ ጊዛይ ድፁኑ ድፂ ዝኩኒጊ ይጉዌ ካሲትጜካማ አሜትስ ታምፅምኻና ንጝስ ይንታው አሜትስ እንክራኑዳ ካሎ ቱትጜካማ ጎሌልጛና:: እን እንክሪ ጊዛይ እንካንጛንኩ ዝኩኒ ኩፅኒ ሹማጌልቱ ቴርታሳ ሲፋማ ፄውስታው ትዳርሾ ካይጛና::
ትክላሊስ ሻዳዩ ባል እምፕልታቑሳ እሴቶ ክምንትዴስ ክምንትሾ ፌያፌይጝፅጝስ ካሊፃው፣ ጝናኻዳ ዎሴንስትካማ እሺንኩ ኹን ውታኺዳ ፌካማ ኔፃኔቶ አዌጃንታ ፄዋው፣ ኹን ዋኒዴስኪ ጃላ ግዲትካማ ፊጝስ ትዳርስ ያኻውሳ አፄቦ እሜኑ፣ ጝርጃስታ ኹን እምፕልትስ አሴቴፍጛኑ አኽጝስ ኽሳንቴ ዴስቴ ፌቴራውስታ ባሎ ካንታንትካ አንኩሊውሳ ዴስቴ አግፃኑ አኽጝስ አምፕልታቕስ እያው ትክም ኬፍንኹዊያኽ፡፡ባሎ አሜትቺፋ ኬቤርፅጝዴስ ፌይኹስ ቱሪስቱ ጉስፃ ያኻማ ይኮኖሚውሳ ቴኬምስታንቶ ቼሜትጝትጝስ እንፃኽስትጝ ቱስቴ፡፡
ንባር፡ሻደይ መጽሔት 2003 ም.አሜታሱ እትሚዴስታ ሊሊትጙንኩ ንባርካ ቴኬምስትና