ፍርድ ጝናሳ ዝቤንስ አግልግሎቴ እይጝ

ንግስቴ ተስፋ
ፍርድ ዋኒስታ ዋትጜይ አግስታው? ፍርዶ አግፅጝስ ዋሳላካ ጊዞ፣ ጌንዜቦስታ ግርቦ ፍሽጝ ማንዲስታው? እጂኹ ፍርድ እይስታያሱሳ ፄጌሬ እስታው ምሳሊ ዙማሳ ዋትጜይ ካንትስታው? ፍርድ ጝናሱ አግልግሎቲ ዝቤንሊ ካሳታስታ እንዳርማ ፋይፄ ናው ካሲ ፍርድ ጝናሳ ታክሳው አቒው አንኮሊዳ ዲግጝ ይጉዋቲው ካሲያኽ፡፡
አጌር አቕ እጋ ምንግስትስ ክምስትኹ ባይልስታ እምኔት ኽሳንቲ አኽጝታጊ ፍርድ ጝና ዴሜካ እግስ ካሲስታው፤ ዋሺኒኪ አቒ ክችክቺ ሚዛንስ ሊኪስታው ኾቲያኽ፡፡
አማኻሪ ክልሉ ትክላይ ፍርድ ጝና ፌይኹ አሜትዳ ጉሽፃማ ካስጝፁኽ ትክላሌ አግልግሎቴ እይጜ ዝቤንፅጙስታ አጌላጌልስታንትካ ፍርድ ጝናዳ ዋኾ እምኔቶ ቺፄካማ ዲኚስትጝስ ካላኑ ኾታ ፄውጝስኪላ ሊሊቲ ትኩት እይስታማ እንፃኽስስታማጊያኽ፡፡
አማኻሪ ክልልዳ አግስታንኩ 14 ኬፍቲኒ ፍርድ ጝንካዴስ አዊ ብሄረሰቡ ቺፅጝፂው ኬፍቲኒ ፍርድ ጝናኪላ ኾቶ አጌላጌልስታንትካስ አሜችኹ ያኻታ ፄውጝስ እስካዊስስታ ዝቤናዊ ዳድስ ግቢትⶓ ጄሜርጝዴስ ጉሽፃማ ቴክኖሎጄ ቴግባርዳ እሽፅⶓ ኺስታ ጄሜርስትኹ እንፅኺ ፍቶ ፋያንትካስ ፉሬ እያማጊያኽ፡፡
ጋያኪ 2018 ባጄት አሜትዳ ዳኝኔቱሳ ታምብስታንቶ ቼሜትጝፅጝስ አኮሜችስትኹ ቴግባርዴስ ዲጂታላይዜሽኖ እንፅኺሾ ሚፅጚያኽ፡፡ ፍርድ ጝንካ እምቢት ንኹሳ ዝቤናዌስታ ፍሼ ክብሳውሳ አግልግሎቴ እምፕልታቕ አግፃንታ ፄውጝስ ዳኝኔቱሳ አምንስታንቶስታ ታምብስታንቶ ቼሜትጝፅጝኪላ ግብታ እንኩርስታ፡፡
አውጚው ራዲዮን እጎትኾሉ ቴርትስ ካንቴ እይንኩ ኬፍቲኒ ፍርድ ጝናዳ አጌላጌልስታንትካዴስ ዊዛሩ ባንቻየሁ ያዘው ባንጂ ወረዳ ዚቕ ጎመርቲ ኬቤሊዴስ ፍቶ ፋያ እንዝጜ ጄሜርካ፡፡ ካራካርጛኑኪላ ቱትጚው ጉዳይዳኽ፡፡ ወረዳው ፍርድ ጝናዳ እይስትኹ ውሳኒስ አምናኑላ ይጉዌካማ ውሳኔ ሻሪፅጝስ ይግባኞ ካሲጝስ ትክላይ ፍርድ ጝናሳ ኺስታ ካስጝስ ፍቶ አግፅጝስ ክርክሬ ጄሜርካ፡፡
እንጃቢሪዴስ ባህርዳሮ ዙራዙርጝስኪላ ሚንቾ ፍሼ ፍሻኒስ እጂካ፡፡ ትራንስፖርትስ ፍሻኑ ጌንዜብኪላ ልቓ ጋቲው እሼ፡፡ ክርክሪዳ እጂካማ ጊዝ ክማኒስታ ትራንስፖርቶ አታኒኪላ ምግብዴስ ጉሽፃማ ክማኒስታ ኬፄሩ ፌያኒ ቻኑ ኻግስ ፍሻኑ ጌንዜብኪላ ጛዋ ምኽምኽፃ፡፡ እሊውሳ አብቱሳ ኪሳሬኪላ ታምፃማጊ እጄ፡፡
ዊዛሩ ባንቻየሁ ኑኑውስታጊ እንጚ ችግር ፌያማ ኩፅኒ ወክት ያጉኽ ቴክኖሎጂስ ባህርዳሮ ኺስታ ዙራዙራሺኑ ይጉዋማ ኬፍቲኒ ፍርድ ጝናዳ ያኼካማ ጉዳዮ ካራካርጝጝስ ካላኑ ሴል ፌቴርስታማ ፉሬ አግፅⶓ ሼውፅካ፡፡ ጊዞ፣ ጌንዜቦስታ ግርቦ ኔኬትጝስ ዳኝኔቶ ዲጊ ዙራሙሪዳ ያኼካማ አግፅጝስ ካሊጝስኪላ ዴስቴንካ አኽⶓ ድኹዌካ፡፡
ጋያኪ ቹትካ ኹንዳ ታምባውሳ አንጌሌትስታሺኑሳ ይጉፅⶓ ዊዛሩ ባንቻየሁ ጉሽካ፡፡ ትክላይ ፍርድ ጝናዳ ይግባኝስ ብስፁኑሳ ሜዝጌቦ ዲጂታል ሲስተምስ ብሄረሰቡ ኬፍቲኒ ፍርድ ጝናዳ አግስትጝስ ኦንላይንስ ካራካርጜካማጊ አግፃኑ አግልግሎቲስ ሚንች ጉዳይዴስ ፉሬ አግፅⶓ ዲብስካ፡፡
ዊዛር ባንቻየሁ እይኑ ካንቲዳ ኬፄሩስ ዛራዛራኑላ፣ ኽምቤ ኽይኑ ኮንኪስ አግልግሎቴ አግፅጝስ ካሊጝ ፍቱሳ አምንስቶ ቼሜትጝፃማጊ አኽⶓ ጉሽካ፡፡
ኬፍቲኒ ፍርድ ጝናዳ ፌያፌያማ አግልግሎቲው ችግርታ ዲጋው ኢንተርኔቱ ኬውጚው ችግርስታ እቺት ንኹ ዙራሙሪዴስ ይንታንኩሳ ማንዳማ ሌንጌድፃውላ ይጉጙ ችግር ኽይስቱኒጊ ኬፍቲኒ ፍርድ ጝናሱ አግልግሎቴ እይጚ አምንስታንቲስታ ሼዎ ፉሪውሳ አኽጝስ ካሌ ናኒስ ካሴ ዲግስካ፡፡
ኪስ ምንግስቱ በለተኪላ ዳንግሊ ወረዳ አላፋ ካቺ ከቤሊዴስ እንጃቢሬ ኬቴሞ 2፡30 ሰአትስ ኬፍቲኒ ፍርድ ጝናዳ እሚኑ ኬፄሩስ አግስቴካ፡፡ ጛኪላ ብቲው ጉዳይዳ ካራካርጜካማጊያኽ፡፡ ወረዳው ፍርድ ጝናዳ እይስትኹ ውሳኒዳ እንኩርስትኹሳ ይግባኙሳ ሜብቶ ቴኬምስትካማ ኬፍቲኒ ፍርድ ጝናዴስ ትክላይ ፍርድ ጝናሱ ይግባኙ ካሲስ ታምብካ፡፡
እንዴስ ቤዴራ ካራካርጛኒስ 12 ጌርክካስ ወረዳው ፍርድ ጝናሾ ዙራዙርካ፤ ዞንሾ ዴሜካ ሹኻ ጌርካ ዙራዙርካ፡፡ እኒ ጌርክካዳጊ ፍሻኑ ፍሺ ኩፅኒ ፃንጌኽፃ፡፡ ኪስ ምንግስቱ ቤዴራስኩ አሜትካዳጊ ናካ ካራካርጛኑ ሜዝጌብዴስ ድምክና እሊው ውርሱ ንብሬቱ ምክንያቲስ ትክላይ ፍርድ ጝናሾ ዙራዙራሺንኩ አኽⶓ ታክስፅካ፡፡ እንጚ ጉዝምዳ ሚንቾ ፍሼ ፍሽጝስ ኪሳሪዳ ታምባሺኑ ወክት እሺⶓ እንክርፄካ፡፡ ናኪኒ ወክትዳ ኩፅኒ ካራካርጛኑሳ ጉዳዮ ዲጊዳ ያኼካማ ዳኝኔቶ አግፅጝስ ቢኬካ፡፡
ኪስ ምንግስት ፍርድ ጝናዳ እይስታው አግልግሎቲዳኪላ ዴስቴንካ አኽⶓ እንክርፄካ፡፡ ዝቤን ያጉኽሳ ቴክኖሎጄ ኬፍቲኒ ፍርድ ጝና ቴግባርዳ እሽፃማ ናካዳ ትክላይ ፍርድ ጝናዳ ብሱኑሳ ክሶ ኬፍቲኒ ፍርድ ጝናዳ ያኼካማ ባህርዳራ ይንታኑላ ካራካርጜካማጊ አኽⶓ ጉሽካ፡፡ እንጚኪላ ፍሻኑሳ ጌንዜቦ፣ ግርቦስታ ጊዞ ክብስጝስ ካሊፅⶓ ዙሜካ፡፡ አንጌሌትስትጝዴስ ፊሬካማ ወክትስ ሌንጌድቴካማጊ አኽⶓ ቶኬምካ፡፡
ኪስ ምንግስቱ ክሬቲታ ዲግሱኑዴስ ፍርድ ጝናዳ ካራካርጛንትካ ዋኽትጛኑላ ይጉዋኒ ሜዝጌብ ልምታማ እጂጝ ፍርድ ጝናሾ ካቢትጚስ ዙራዙራንታ ፄውጝስ ችግር ፌቴርስታማጊ አኽጝስ ፍርድ ጝና ክችሳታ ካሴ ዲግስካ፡፡
አዊ ብሄረሰቡ ቺፅጝፂ ትክላይ ፍርድ ጝናሱ ፕሬዝዳንት አየነ ታደለ ዳኝኔቱሳ እይጜ ጊዝዴስ ጊዞ ኬሽጝፅጝስ አኮሜችስትኹ ቴግባርስ አጌላጌልስታንትካ ፍቱ ታምብስታንትዳ አምንጛንታስታ አንጌሌትስታኑላ ፍቶ አግፃንታ ፄውስታማጊ አኽⶓ አቕፄካ፡፡ ፌይንኩ ዝቤንካዳ እሺኹ አግልግሎቴ እይጚ ፍሼ ፍሽፅጝዴስ ድምክና ሚንችካዳ ክሬቴ ፌቴራሺኹ ወክት እሺኹ አኽⶓ ጉሽካማ ናኪኒ ወክትዳ እንፃኽስትጜ ኬሽጝፄካማጊ አኽⶓ ቶኬምካ፡፡
ፍርድ ጝናሱ ፕሬዝዳንት እይኑ ጊሊፂዳ 2018 በጀት አሜትዳ 20 ሻይዴስ ጃላ ሜዝጌብዳ ውሳኒ እይስትⶓ አቕፄካ፡፡ ሜዝጌብ ዋልቲ አርፋዴስ ኩክራ ውሳኔ አግፃታ ፄውስታማጊ አኽⶓ ጉሽካ፡፡
ዝቤናዌ ቴክኖሎጄ ቴግባርዳ እሽፅጝስ እምቢትንኹሳ አግልግሎቴ እይጝስ እክድስ እንፃኽስስታማጊ አኽⶓ ኽይትጝፄካ፡፡
አጌርታኪ ያኻ ክልልታ እንኩርስትኹ ዲጂታላይዜሽኑ እንፅኺ ብሄረሰቡ ቺፅጝፂው ኬፍቲኒ ፍርድ ጝናዳኪላ ቴግባርዳ እሼታ ካሊፃውሳ 10 ሚሊዮን ባጄቶ ትክላይ ፍርድ ጝና ሜዴባማ እንፅኺ ጄሜርስታማ አግልግሎቲ እይስታማጊ አኽⶓ አቕፄካ፡፡
አጌላጌልስታንትካዴስ ዲግኹ አግልግሎቴ እይጚ ክቼታኪላ ወክት ቺፋ ኬሽጝፄካማጊ ክችክቼ ዳኝኔቶ እይጝስ ትኩትስ እንፃኽስስታጊ አኽⶓ ሼውፅካ፡፡ ዳኝካውሳ ምግባር ፅንታሳ ክችስጝስ ስልታኔ እይጝ፣ ሜዝጌቡ ምርማሪ እንቲታኪ ዝቤን ካሴውሳ ቴክኖሎጄ ቴኬምስትጝኪላ ግዲቲ አኽⶓ አቕፄካ፡፡
ኬፍቲኒ ፍርድ ጝናሱ ፕሬዝዳንት አየነ እይኑ ኽይትጝፂዳ ምግባር ፅንታስ ክሬቲ ዲጉክ ዳኝካዳ ላጛ አርፋሱሳ ደሞዜ ኪፂጝ፣ ፁፍሳ ቲንኪክፄ እይጝ እንቲታኪ ላጛ ዳኝካዋ እንፅኺዴስ አሴኔቤትጝፅⶓ ኺስታ እርምጂ ካፅስታማጊ ክችክቺ ዳኝኔት እይስታታ ፄውስታማጊ አኽⶓ ቶኬምካ፡፡
ፍንሾስኪላ ፍርድ ጝናሳ ወረዳዋ ኺስታ ቴክኖሎጄ ይስጝፃማ ሲፍፅጝስ አግልግሎቴ ታምብስታንታ ፄውጝስ እክድስ እንፃኽስትካማጊ አኽⶓ አቕፄካ፡፡ ሜብቶ አቱኽጊ ሜብቶ ኬቤርፃው ፍርድ ጝና ፄውጝስኪላ እንፅኺ ይስጛማ ሲፍⶓ ሼውፅካ፡፡