ይቶፒያዉ ልኩ ኩታው ብሄራዊ ኬቹ ዴስጝጚ

ኬንያ ታንዛኒያስታ ኡጋንዳ እምፕልትስ ቴርሳኑ 2027ው አፍሪካው ዋንቺው ልኺትጚዳ ፌይጝስ ሊሊትጙንኩ አጌርካ ምድብስ ቤንስቴካማ ፃንኩፂዉሳ እንክሬ ካስጝፃና፡፡አፍሪካው ልኩ ኩታው ታሪክዳ አህጉሩ ኽሳንቲ ልኩ ኩታዉ ልኺትጚ ፃምርትስ ቴርስስቱስ አባላምቲ ጊዝስያኽ፡፡ይቶፒያ 36ንቲ አፍሪካዉ ዋንቺዉ ልኺትጚዳ ፌይጝስ ፃንኩፂውሳ እንክሬ ካስጝፅጝስ ምድብ ፅካዳ ዳላደልስቴ፡፡ሴኔጋልሊ፣ ሞዛምቢክሊስታ ሱዳንሊ ፃንኩፂውሳ እንክሬ ካስጝፂ፡፡
ይቶፒያ ምድቡ ፃንኩፂ እንክሪዳ ዳላደልስትጝዴስ ቤዴራ ሳኦ ቶሜስታ ፕሪንሲፔሊ ቤዴራ ፃንኩፂዳ ታምባ ዙሪውሳ እንክሬ ካስጝፄታ 4-0 ያኹኽ ዋይሚስ ዊፅጝስ ፃንኩፂው ልኺትሾ ቱጝ ታክስስታዊያኽ፡፡ይቶፒያ ፃንኩፂው ልኺትሾ አሌቔትንኩ 48 አጌርካዴስ እምፕላ አኽጝስ ካሌ፡፡48 አጌርካ ዴሜካ 12 ምድብስ ዳላዳልስትጝስ ፃንኩፂውሳ ልኺትጜ ፄዋና፡፡
ጛራ ጛራ ኬች ሹኻ አጌርካሊ ጛው ልኩ ኩታው ስታዲየምዳስታ ስታዲየምዴስ ሴጋ እምፕላኒ እምፕላኒ ትክላሊስ ዋልታ እንክርካዋ ፄዌ፡፡ምድብዴስ እምፕላንቴስታ ላጛንቴ አቾ እሚንኩ 24 አጌርካ አፍሪካው ዋንቺዉ ልኺትጚሾ ፌያና፡፡2027 አፍሪካው ዋንቺው ልኺትዴስ ፋሌንጋ አፍሪካው ዋንቺዳ አሴቴፍጙንኩ አጌርካ 24ዴስ 28 ሾ ኬፍ ናና፡፡ላጛ አሜትዴስ እምፕላኒ ካስጛሺኹ ዴሜካ ሲዚ አሜታስ ካስጛዉ አኽጞ ካፍ አቕፃ፡፡ አፍሪካው ዋንቺዉ አባላምቲ ዙሪው ፃንኩፂው እንክርካ ሜስኬሩም አርፊዳ ካስጛንኩ ያኹስ ላንቲስታ ሹኻንቲ ዙሪ እንክርካ ዴሜካ ቴሳስዳስታ ሜጋቢት አርፊዳ ቤዴራ ሲፊስ ካስጜ።ይቶፒያው ልኩ ኩታው ብሄራዊ ኬች ሜስኬሩም አርፊዳ ካስጛዉ አፍሪካው ዋንቺው ምድቡ ፃንኩፂው እንክሪስ ሴሌቴንፃንቲ ዮሀንስ ሳህሌ 39 እንክራንትካዋ ጎሌላ፡፡
ጎሌልስቱንኩ እንክራንትካዴስ 6 ኩፅኒ እድሚ 20 አሜትዴስ ኩክራ ናሽናል ካምፕዳ አግስታንኩያኽ ፡፡ይቶፒያዉ ብሄራዊ ኬች ዴስጝጜ ካስጝፃማጊ አኽጞ ሶከር ይቶፒያው ዜጌቢ ቶኬሜ፡፡