አርሰናሉ ቴስፊ

ክርስቶስ ዞሊስ አርሰናሉ ማልያ ሴይጝ ፄዉኽ አባላምቲ እንክሪዳ ላጛ ጎልስ ያኹንኩ ኩታዋ ቻቤልፅስ አርሰናሉ ፂኪጙሳ አክሞ ጁትጝፃ፡፡
አርሰናል ኮሚኒቲ ሺልዱ ዋንቺዳ ማንቸስተር ሲቴ ዊፅኹ እንክሪዳ ጌሬምፃዉሳ ካሌቕቶ ካንትፅኹ ዞሊስ ክሌብ ችኹ ዚዊዊርዳ ፌሬምፅጝስ ክችክቺ ዉሳኒ አኽጞ ካንትፅኹ ያኽ፡
አዉሮፓዉ ዝቤን ቼፍታ 2002 ግሪክዳ ካሜንስታማ ሌጌስኹ 24 አሚቲ ዞሊስ ልኩ ኩታውሳ እንክሬ ጄሜርኹ አጌሩ አቕስትኹ ክሌቡ ፓኦክ አካዳሚዳኽ፡፡
እንፃኺቱ ድሚዳ ካንትፅኹ ካሌቕትስ ሚንችካ አዉሮፓኩ አጌርካው ክሌብካስ ትኩቶ ጉሱኽ ያኹስ 2021ዳ እንግሊዙ ኖርዊች ሲቲሾ ካሳሺኾ፡፡
ኖርች ሲቲዳ ፌይፅኹ ጊዝ ቺጊርፂ ያኹኒዉላ ጀርመኑ ፎርቱና ዱሰልዶርፍዳ ውሴትስ ዜዌዌርጛማ ክችከቼ ካሌቕቶ አግፃ፡፡ጀርመኑ እጂዳ 2023/24 ልኺትው ዝቤንዳ 22 ጎልካዋ ቼፍፅጝስ ሊጉ ሚንቾ ጎሎ ቼፍፃንቲ አኽጝስ ጌሬምፃውሳ ጊዞ ፌይፃ፡፡እንሳ ሲፋማኪላ ቤልጄየሙ ኬች ክለብ ብሩጅሾ ዜዌዌርማ ቻምፒዮንስ ሊግዳ ዴሶ ካፅኹስታ ክችክቼ ካሌቕቶ ካንትፅኹ አኽጝስ አርሰናል ፌሬምፃታ ምክኒያታ ያኻ፡፡
አርሰናል ፌሬምፅኹ ክርስቶስ ዞሊስ ክለብ ብሩጅዳ እጂኹ ጊዝዳ 108 እንክርካዳ ሴሌፍስታማ 43 ጎልካዋ ቼፍፁስ 45 ጎልስ ያኹንኩሳ ኩታዋ ቻቤልፃ፡፡
ዞሊስ ቹዋስ ዛንጌኻ ክንፍዳ እንክራዉ ያኹኒውላ ሌዋሾስ ያኻ ዴሬብስታማ ፂኪጝስ እንክርጝስ ካላው ውላቱዊ እንክራንቲያኽ፡፤ካላካልንትካሊ እምፕልስ እምፕሎ ታምትጛኒ ሳሴርስ ፌይጝስስታ ዳንጉኔ ቴኬምስትጝስ ኬፍቲኒ ካሌቕት ዝኮ፡፡ኩታዋ እሜማ ቱጝስስታ ጎሎ ቼፍፅጝስ እንቲታኪ እሊኩስ ቻቤልፅጝስ ኬፍንኹ አክም ዝክኹ እንክራንቲያኽ፡፡
አርሰናል ፕርሚር ሊግዳስታ ቻምፒዮንስ ሊጉ ልኺትዳ ካስጝፃው እንክሪስ ድምክኔ አክሞ ፌቴራው እስታማ ማንዲስቴ፡፡ አባላምቲ እንክሪዳ ካንትፅኹ ጚጛርትጛዳ አምንጝጙ አክምስታ ላጛ ጎላ ያኻንኩሳ ኩታ ቻቤልፅጝስ ኬችኩ አባልካሊ እምቢታማ ዴስጝጞ ካንትፃ፡፡
እንግሊዝ ፕሪሚየር ሊጉ ቻምፒዮን አርሰናል ግሪኩ እንክራንቲ ክርስቶስ ዞሊሶ ቤልጂየሙ ኬች ክለብ ብሩጅዴስ 34 ሚሊዮን ፓውንድስ ሊጊሲሚ ጊዙ ውልስ ፌሬምፅጝ ታክስስቴ፡፡
ንባርኪ ቢቢሲ ስፖርትዴስያኽ፡።