ዋሺኒኪ እዝቡ ዝኩጝ፣አይትስታ ክብር ቼሜትጛው ጚው አጌሩ ሉዋላውት ዝኩኽ አጌርዳኽ፡፡አጌር ጛሬ ካላማ ቲሬውስታ ክምንትዴስ ክምንትሾ ካይጝጙ ዎሴንስታው ፂኑኽ ሚንዛንዳኽ፡፡እን ሚንዛን ዴሜካ ሰላምያኽ፡፡ሰላም ዝኩኒ ዴሜካ አጌራ ፂኔታ ፄውኔ፣ሌጌፅኔ፣ሰላም ድሳኒ ኩፂ አጌሩ ስር ሺሽርስቴ ንጝያኽ፡፡ ጝን ግቢትስቱስ ይሴን ሙሲሲኒዳ ስራ ያኻማ ግቢትስታውስታጊ አጌራኪላ ፂኔታ ቲሪቴው ሰላሞ ሞሴሴና ፄዋማ ፂኒስጝስያኽ፡፡
እን አኽጝስ ሰላም ይኮኖሚውስታ ልማቱ ስርያኽ፡፡አጌራ ሌጌስታታጊ ካታታ ፣ኢንቨስትመንት እሳንጛታ፣ክንቲ፣ቲንስታ ስር ልማት አጌር አቕስ ታምብስታንታ ያኻንታ ሰላምስ ቢዲሬ ትኩቶ እይጝ ፋይፄ፡፡ሰላምዳ ችግር ጌቴማኒስታ ጋቻ ዝኩዋኒ ኩፂ አቒ ይሪሱ ዝኩዊኒው እልውኒ ዳ ቻኒስት ታምቤ፡፡ ጋቻ ዝኩኽዳጊ ልማት ይጉዋማ ድኽትስታ ጛአጌራዳ ፌኔኬልጚ(ስዴት ) ጌቴምጝስ ካሌ፡፡ሰላም ዝኩዋኒ እጉ ሴግቴንት ቼሜትጜ ፣አጌር አቕ ዳራኪ ጅፍንታ ጋታ ኔፃኔትስ ፋዩኑ ዙራሙሪሾ ልቕልቕ ንካማ እንፃኽስታና፣አብቶኪላ አፌራና፡፡
ሊሊትጙንኩ ዙራሙርካዳ ካንትስታነንኩ ጋችካስታ ቱትጜ አቲጝካ ጋቻሊ ታምትጚ እላቲኩ ሰላማውካ አቑ ይወቶ አቲጝ፣አጌር አቕ ጛ አጌራዳ ፌኔኬልጛንትካስታ ስዴቴንካ ያኻና፡፡፣ይኮኖሚው ስታ ማቤራዊ ቻኒስት ታቡስ ካንተስታና፡፡ ሰላሙ አቲጝ ጝን አቕዴስ ጄሜራማ አጌራው ልግስዳኪላ ፅንጋኻ ያኻማጊ ቻሱ ክምንቱሳ ቴስፌኪላ ፌቴናውሳ ካስቶ ካንትጝ አዴስኪ ቤፍታያሱ ውንያኽ፡፡ አጌራኻሱ እኑስ እኖ ፄውስታው ጋቻ ባርኾቼሱ ባላንጋርካ ሳሴርስ ታፎ ሚፃንታ አኹኪ አጌራው ሉዋላውት ዴፌርስታታ ዳዶ ብሴ፡፡ ታሪክዴስ እርዳተስትናውስታጉ ሚንችካ አጌርካው ዝኩዊኒ ሺሽርስታማ አጌር አቕ ምኽምኽ ንካማጊ ዝኑ ይቢቺ ያኻውላ አጌርካው እልውኒ ድስኹ አኹኪ ፌሬሱኑ አጌራኻሱ ጋቻዴስ ጁኽስያኽ፡፡እን ካንትፃ ው ጋቻስ አኹኪ ዎሬምስ ዊፃንቲ እላቲው አኽጞስታ ውላሾስጊ ድስጚ አኽጞኽ፡፡
ሰላም ጚታፋስ ይንታው አኹኪ አይኪ አግፃዋ እያው ጋቲያኽ፡፡ሰላም ይንታው ጌርክ ቺፋሱ ውላውጊ ታክስጚስስታ እንፃኽስትጚስያኽ፡፡እኑስ እኖ ኬቤቤርጚስታ ፍትስ ይንታው ክብሪ አብትያኽ ሰላም፡፡ይጋሬ ጝን ብኻቲታ ማንዲጝ ዋሺኒኪ አጌር አቒው አላፍትያኽ፡፡ ዋሺኒ ሊሊትጚ አጌሩ እልውኒዴስስታ ሰላምዴስ ጃላ አኽጝስ ካላቲው አኽጝስ ፌቴርስታንኩ ቱትጜ አቲጝካዋስታ ጋቻዋ ዲጝጛማ ሰላማዊ ዳድስ ኩስጝጜ ፄውጝዴስ ይጉ እሊው ጉላሊ ዝኩዋላ አኽጞ ሼው ንጝ ቱስቴ፡፡
ፍቺትግፃንኩ ዙሚትጝካዋ ባይካማጊ ካስጝስታ ዲግጝፃንኩ አሳብካዳ ይጋሪስ አጌው ዝኩዊኒው እልውኒስታ ታብልዴስ አሬኬብስትኑት አጌራ እኖጂሱ እሌቱ እንኮኽስትስ እናና ታሪክዳኪላ ዎኬስታንታ አኽጝዴስ ፊጝ ፋይፄ፡፡አን ይቢቺ(እኖጂ ይቢችካ) ንጞ ባያማ እሊኩሻኪላ እኖጂሽጻ እና አጌራ ይጋራስታ ይቢችቴና አብታ አኽጞ ሼው ንጝስ ኩስጚጜኪላ ባኩስ ካንታማ ይጋሪስ ኩስጝጝ ቹዋ ጉዳይያኽ፡፡
ፅባብሳማ ጛውሳ ፋዮ ይቢቼ ሳኪትጝፅጝስ ፃሪትጊዴስ ፋማ እን አጌራ ይቶፒያውሳ ሰላሞስታ ውላቱዌ ዴክቶ ቤዴርፅጝስ ሰላመስ ቲሪጝስ አጌራው ክብርስስታ ዝኩዊኒስ ሰላማዌ ዳዶ ቴግባርዳ እሽፅጝስ ትኩቶ እይጝ ችሪው ፖለቲካ ያኻውላ ቹዋ ዙኩዊኒ አኽጞ እርዳትስትጝስ አጌራ ቲያጻጊ ዝኪኹ ውትኽትኺ ዳድዴሽ ፍሽጝስታ ጄሜርስትኹሳ ልግሶ አሬኽፅጝስ ሰላምስ ትኩቶ እይጝ ቱስቴ፡፡ ዎሬምስታ ጋቻ ፌሬስኹሳ ታሪኮ ክምንትስ ፌያፌይጝፅጝዴስ ይጉ ላምቡሳ እጂፅካማ አሬኬብፁንኩ ታብሉሳ አዴሮ ፌያፌይጝፅጙ አላፍት ጋቲው አኽⶓ ሼው ናማ ናካስኪ ያኻ ቻሱ አጌራው ዝኩዊኒስ ናካ ኩርፄነትስ እንፃኽስትጝ ዋሺኒኪ አጌር አቒው አላፍትያኽ፡፡
ሰላሞ ፂኒስጝ ውላውጊ አላፍቲያኽ
