ክቹ ካሜንትኾስ!

እንፃኺቱ ጊዝዳ  ዴብታሮስታ ኮቤ እምቴታ ክንቲ ጝና ካትኹ ጊዝዳ ፍንሾስ እምቲኹሳ አላሜ ሳኪትጝፅጝስ እሺኾ:: ክንቲ ጝናዳ ሚዚጊብስቴታ ክንትⶓ ጄሜርትኹዴስ ጉሽፃማ ሊሊቲ ትኩትስ ክንቴ ሲፍጝታታ  ክንትጝስ እሊኩስ ምሳላ ታኻ::እምፕላንቲ ቤንዴስ ጄሜርታታ ክንቲ ጝናዳ ሚዚጊብፄው ዋይሚስ ሼሌምስታንታኽ ክንታንታ ህዳሴ ዘመኑ::

ፅክራ ላጛንቲ ቤኑ አጌር አቡቑ ፍታኒዴስ 583 ዋይሜ ሚዚጊብፄ::እንኪላ አጌር አቡቑ  አችስ ፍትሬቱ ሳይንስስ ኹንዴስ ኬፍቲኒ ዋይሚ ያኻማ ሜዜጌብስታ::

ክንታንታ ህዳሴ እምፕላንቲ  አቹሳ  ክንቴ ባሁንክ ትክላሊ እምፕላንቲ አች ክንቲ ጝናዳ ክንቴ::እምፕላንቲ ቤንዴስ ሶኼታንቲ ቤኖ ኺስታ ክንቲስ ኬሽኹሳ ዋይሜ ሜዜጌብፅጝስ አሜት ቺፋ ሽልማቴ አግፄ::ሶኼታንቲ ቤኑ ፍታኒዳ ኬፍቲኔ ዋይሜ ሜዜጌብፅጝስ ላጛንቲ አቹሳ ክንቴ አገው ምድር ትክላሊ ላጛንቲ አች ክንቲ ጝናዳ ሲፍጝታ::ላጛንቲ አቹሳ ክንቴ ክንቲስ ኩፅኒ ክልልታ ኬሴትስትኹ ፄትቲው ችግር ኬፍቲኔ ቻኒስቶ ቺፃ::ያኼስጉ ዋሺኒኪ ችግር ክንታንታ ህዳሴዋ እንግርግራ ፄዋያ::አሜትዴስ አሜቶ ክንቲዳ ይስታታ ሲፍትኾ::ክንትፃንትካ ክንትፃኑሳ ሲፍጝታታ ክንቲ፤ሜፃፍ  ጝናዳ ፂኒስቴ፤ቶያሱሳ ክንቴ ክንትፃንትካዋ ካስቴታ እርዳትስቲ::አኽጝስኪላ አሜት ቺፋ ኬሽኹሳ ዋይሜ ሜዜጌብፅጝስ አግፄው ሽልማቲ ክንቲዳ ይስታታ ፄዋ::

ክንታንታ ህዳሴ ላጛንቲ አቹሳ ክንቴ አገው ምድር ትክላሊ ላጛንቲ አች ክንቲ  ጝናዳ ክንቴ::ፅክራ እምፕላንቲ ቤንዳ  ክንቲስ 99.67 ዋይሜ  ሜዜጌብፅጝስ ካሌ::28 አሜትዴስ ፍና ቲሪትጙኹ  አገዉ ምድር ትክላሊ ላጛንቲ አች ክንቲ    ጝና ኬሽኹሳ ዋይሜ ሜዜጌብፃንኩ ክንታንትካዉ ስምስ ሜፃፍ   ጝና እቑስታታ ፄዌ::ክንታንታ ህዳሴ ፅክራ እምፕላንቲ ቤንዳ ክንቲ  ጝናሱ ታሪክስ ሚዚጊብፂኹ ኬፍቲኒ ዋይሚስ ሜፃፍ ጝና  ሴዬምስታያታ ካሊፃ::

ክንታንታ ህዳሴ”ጉዶ ዋይሜ አግጝስ እክድ እሺኾ ፤አጌር አቡቑ አችስ ኬፍቲኔ ዋይሜ ሜዜጌብፃኻ ናታ ኩፅኒ ታክሳያ እሽትኾ ’’ኒስ እሺኹሳ አኺኔ ዲብስታ::ክንታንታ ህዳሴ  ኬሽኹሳ ዋይሜ አግጝስ ካሊኹ ሲፍታው ፂኒስጙ ሴልስያኽ::ባዮሎጂውሳስታ ኬሜስትሪው ክንቲውሳ አይኔቶ  ቪዲዮ ካንትጝስ እርዳትስቴት አኽⶓ ዙሜ::አሜትዳ ዝኩኽሳ ጊዞ አርፍካስ፣ ሶኼትካስ፣ ጌርክካስስታ ሳትካስ ቤንጝፄታ ፂኒስታውሳ እክዶ ፍሽጝስ ፂኒስጝስ ጉዶ ዋይሜ ሚዚጊብፄታ ፄውⶓ ድኹታ::ጝንዳ ክንቲዴስ ይጎ እንዳርማኪ እንፅኺው ቻኒስት እላቲው አኽⶓ ዙሚት ክንታንታ ህዳሴ ቹዋ ታብል ክንቲስ ፄዋኑ እርዳቲ ኬሽኹሳ ዋይሜ ሚዚጊብፄታ ካሊፅኹ አኽⶓ  ድኹታ::እንጃቢሪ ዩንቨርስቲስታ ይቶፕያው አይሩ ዳድ ላብራቶሪስታ ቴግባርስ እርዳትስትኹሳ ክንቴ እይጝ ክርፄ ዋይሜ ሜዜጌብፅጝስ እርዳትኹ አኽⶓ  ዙሜ።

ክንታንታ ህዳሴ ይንታውስ ሶፍትዌር ኢንጂነሪግ ክንቲውሳ አይኔቶ ክንትጝስ አቬሽን ዜርፍዳ አሴሜርጝስ ኬፍቲኒ ፋይ ዝኩⶓ  ቶኬምታ::ችኹ ዎክትዳ ሲፍጝስ ካፂኹ ስቴም/ይስጝፂው/ ክንቲ ቴክኖሎጄ ክንቴታ ጁትጝፃ::”ይንታውስ ቴክኖሎጂስ አጌራዋ አጌላጌልጝስ ፋቴ” ኒስ ፍንሾሱሳ  አላሜ ክንታንታ ህዳሴ ዲብስታ::

ፊቲ ጊዝዳ ሳይንሱ ፣ቴክኖሎጂውስታ ኢንጂነሪንጉሳ  ክንቴ ዩንቨርስቲዳ ካፅጝ  ፋዮስታ አክሞ ሺሽታታ ካሊፅኹ አኽⶓ  ቶኬምታ::

ዊዛሮ ሰብለ ገበየሁ ክንታንታ ህዳሴስ ጚቹኽ:: ክንታንታ  ኬሽኹሳ ዋይሜ ሚዚጊብፄት ንካማ ማንዳሺንኩ ያኹኒውላ አጌር አቡቑ አችስ ኬፍቲኔ ዋይሜ ታጋት ንካማ ጌሜትካያ እሺካ:: አጌርታ ሚዚጊብፂኹ ዋይሚስ ዴስቲ እንኮኽስቱት አኽጙ ድኹዌካ::  ህዳሴ ጝንዳ እንፅኺ ሚንቻቲታ  ፄውጝስታ ጝናኻዳ ኔፃኔትስ እንዳራኪ ቤፍፃኑውላስ  ግልፅስ ኩስጝጚ  ፄውጝ  ክርፄ ዋይሜ ሚዚጊብፄታ እርዳትኹ አኽⶓ  ዙሜካ ።

ክንታንታ  ህዳሴስ ጚታላ እንጃቢሪ ዩንቨርስቲዳ ፊዚክሱ ክንትፃንቲ ዘመኑ ምህረት/ዶ.ር/ክንታንታ ህዳሴ ሚዚጊብፂኹ ዋይሚስ  ኬፍቲኒ ዋይሚስ ዴስቴንካ አኽⶓ ዙሜካ።

ክንታንታ ህዳሴ ሶኼታንቲ ቤንዴስ ጄሜርታታ  ኬፍንኹሳ ዋይሜ ሜዜጌብፅጝስ ሼሌምስታንታ እሽቲት አኽⶓ ቶኬምካማ ላጛንቲ አች ክንቲ ጝናዴስ ትክላሊስ ክንታንትካዴስጊ አባላምቴ አቾስታ ኬፍቲኔ ዋይሜ ሜዚጊብፂታጊ ሼሌምስታንታ እሽቲት አኽⶓ ዲብስካ::

ክንቲስ አሜችኹሳ አኺኔ ፌቴርጝ፣ እሽፅጝፄ ሲፋሲፍጜ ፄውጝ፣ ግልፅስ እሽፅጝፄኪላ ኩስጜ ፄውኔ ንካ። ጚውሳ ፋዮ ዋኽትጝፅጝስኪላ ፅሬቶ ፄውጞ ዙሜካ። ክንታንትካ ቹዋ ታብል ቱስታውሳ ሲፋሲፍጜ ፄውኒጊ ዋይሚስታ ያኻቲኑ ዳድ እላኪያኽ ንካ።

ታብሊ ዘመኑ ምህረት/ዶ.ር/ ፍንሾስኪላ ህዳሴ አጌርስ ዋይሚስቴ እንፅኼ እንፃኽስቴት አኽⶓ ጄራዳ ዝኩኽሳ ቴስፌ ዲብስካ  ።

2018 ም.አሜታዳ 12 አጌር አቡቑሳ ፍታኔ ካፅጝስ 564 ሻይ ክንታንትካ ሜዜጌብስቱንኩ ያኻኒስ 550 ሻይ210 ክንታንትካ ፍታኔ ካፁንኩ አኽⶓ ክንቲው ሚኒስቴር አቕፃ::እኒጛዴስኪላ ሊኽዴስ 12 ትኩሚ 8 ታፋ አኹኪ 50 ሻይ544 ክንታንትካ ሊኽዴስ 50 ታፋስታ አንዴስ ጃላ ዋይሜ ሜዜጌብፅካ::ፌይኹ አሜቱሊ ካንትጛኒ ክንታንትካው ፌይጙ ሜቴን ኬሽጝጜ ካንትፃ::ንጙዊኒ አሜቱ  ፍታኒዳ ፍትሬቱ ሳይንስስ ሊኽዴስ 16 ትኩሚ 58 ማይቤራዊ ሳይንስስ ዴሜካ 8ትኩሚ ያኻንኩ ክንታንትካ  ፍታኔ ፌይጝስ ካሌካ::

እን አሜትዳ  ፍታኒዳ ዋኽስ ዋኾ ክንታንትካ ፌይፁንኩ ክንቲ ጝንካው ሚንቺት 88ኽ::565 ክንቲ ጝንካ እንዳራውላ ክንታንቴ  ፌይፅካያ::ፌይኹ አሜትዳ እምፕሎውላ ክንታንቴ ፌይፅካያስኩ ክንቲ ጝንካ 1ሻይ232 እሺና::

ታደለ አጋጄ