እምፕል አችዳ 84 አሜትካዋ እንፃኽስታማ አሌሙ ዲኒክፄው ሜዝጌብ (Guinness world records) ስም ሜዘጌብስትኹ ሪከርድ ዌና ዋልተር ኦርትማን አውሮፓው ዝቤን ቼፍታጊ ማንዚ 19 ጌርክ 1922 ብራዚልዳ ካንታ ካሪና እስታው ዙራሙሪዳ ብሩስኬ እስቴት ኬቴማዳ ካሜንስቱንኩ ያኻኒስ ወክትዳ ጝን አቕ ይኮኖሚው ችግር ዝኩክ አኽጝስ እንፃኺት አድማስ ጄሜርካማ እንፅኼ ፋያ ቱና::
ቼርኩ ፋብሪኪሾ ካስጝስ እንፅኺውሳ እድሎ አግፅጝስ ካሊፃውሳ ካሴ ዲግስካ ጀርመንጚውሳ ኮንኬ ካላንኩስታ ክንትጝስ ዝኩኽ ፋይኪላ ክርፂ አኽጝስ እርዳታንቲ ያኻማ ኬፄርስታታ ፄውስታ:: ዋልተር እንፅኺዳ ዝኩኽ ክርፂ ዴስስታ ዋይሚስታ አኽጝስ እንቲታክ አምንስታንቲ ውማይቲኒ አኽጝስ ካሉንኩ አኽጝስ እርዳታንቲዴስ ቼርኩ ምርትካ ዋይስታኑ ቤንዳ እንፃኽስታንቲ ያኼካማ ሜዴብስቱና::
እጂካማኪላ እንፃኽስታኑ እንፅኺ ኬሽኹሳ ዋይሜ ሜዜጌብፅⶓ ሲፍፁንኩ ዋልተር ምርትካው ዋይፂ ቤኑ ቺፅጝፃንቲ ያኼካማ ሹሚስቱና::
እንፃኽስቱኑ ዋኽ ዝቤንዳጊ አቺቱሳ ምርቶ ዋኽ ብራዚልዳ አቕትጝፅጝስ ሻይስ ቼፍስታንኩ ኪሎ ሜትርካዋ ባቡርስ አውቶቢስስታ ልኩስ እንዜጝካ:: ምርቶ ጄዋንትካው ቼፍ ዴሜካማጊ ይንቱኹ ኩፂ ምርቶ አቕትጝፅጝ ይቪቺ ያኻውላስ ሊሊትጙንኩ አችሊ ይሴንስታ ሼውዴስ ስርቱኽ ታምትጚ እሺኩ አኽጝስያኽ::
ዋልተር እድሚ 100 ያኻኩስኪላ እቑስታንኩ ኩፕትካዳጊ አግስቴካማጊ እንፃኽስታንትካስ ኩስጜ እያሺና:: ሊጊሲሚ ጊዝስ ድሚውሳ ሳኪትጚውሳስታ እጂጚውሳ ዴስ ካንትኹስ ካሊስትካማ እይኑ ዙርፂ “እንካንታኑሳ እንፅኼ ፋታንስታ እንቶጂሱ ይወትዳ እምፕላቺላ እንፃኽስቲኑሳ ፄጌራላኽ” ንካ ሺና:: አውሮፓው ዝቤን ቼፍታጊ 80 አሜታሱ አገልግሎቲው ዝቤንዳ ዲኒክፄ ሜዜጌብዳ አሌምዳ ሚንች ጊዝ እምፕል አችትዳ አጌላጌሉንኩ አቒ እስትካማ አቕስቲ እይስትኾ::
ዋልተር እንፅኼ እንፃኽስትⶓ አሌሙ ዲኒክፄ ሜዝሬብዳ ስሞ ሜዜጌብስቱኒላ እንፅኼ ሲፍካማጊ ካሱና:: 2022 አውሮፓው ዝቤን ቼፍታጊ 84 አሜትካስ 9 ጌርክካዋ እንፃኽስቱንኩ እስትካማ እንግራ ጛውሳ ሪከርዶ ዱንፅካማ ጛውስም ካብስ ሜዜጌብስታ::
እን ወክትዳ እድሚ 100 አሜት ዋኻኩኽ ያኹኒኪላ ስግላስ ጅዌካማጊ እሺኾ ቢሩሾ ካሳኑ:: ዋልተር ካቢትጚስ ዲብሳኑ “ዋሺኒኪ አቒ ሊጊሲሜ እድሜ ሳኪትጚሊ እጄታ ፄውጝስ እንፃኽስትናውሳ እንፅኼ እንፃኽስትጝ ቱስታው አኽጝስ ይቪቺ ያኻውላስ ሼውዴስ እንካንናና እንፃኽስትናኒ ጊዝ ዋኒ ካሳው አኽⶓ ሼው እናውላ ካሴ” ናሺና:: “ፌይኹሳኪ ያኻ ይንታውሳ ጊዞ ካንትኹስ ታክስጝዳ ጊዝ ዊድጝ ቱስታላኽ” ናንኩ ዋርትነር ናካስ ክርፂ አኺኒስ ፌይፅጝ ቻሱ ሳኪትጚስ ስርያኽ ንካማኪላ ዋሺኒኪ አቒ ናካዳ ቱስቲስ እንፃኽስትጝ ቻሱ ዋይሚስ ቢኪፃው አኽⶓ ካንትኹስ ኩስጝፃና:: ቲኖ ካንትኹስኪላ ዋርተነር ጌርክ ቺፋ ስፖርቱሳ ልቕልቕቴ ፄዋንኩስታ ምግቦኪላ ቱስቴ ቼፍጝጜ ፄዌካማጊ ኹዋኒኩ አኽጝዴስ ድምክና ዳላውሳ ሳቔናዋ ሳቒጝኪላ ቲኖ ማንዳማ ሊጊሲሜ እድሜ እጂጝስ ካሊፃው አኽⶓኽ ኩስጝፃሺኑ::
ዋርተር አውሮፓው ዝቤን ቼፍታጊ 2014ስ 102 አሜቱ እድሚስ እንዴስ አሌምዴስ ክርጝስ አጉሌልጜካ:: ዋልተሩ ታሪክ ሳሴርስ እንፅኺው ሪከርድ ይቪቺ ያኻውላስ እንፅኺስ ዝኩኹ አምንስታንት እንካንስታ ፂኒጙ እምፕል አቒውሳ ዝኩዊኒ ዋሳላካ አቾ ታምፃው አኽⶓ ካንትፃዊያኽ::
ግዛቸው ያረጋል