እንግሊዝ ፕርሚየር ሊጉ እንክራንትካው ዚዊዊርጚ

2026/27 እንግሊዝ ፕርሚየር ሊጉ ችኹ እንክራንትካው ዚዊዊርጚ ናሲ 26/2027ዳ አሌድስታ:: እንክራንትካው ዚዊዊርጚ ፌዩንኩ አሜትካሊ ካንትጛኒ ኬፍቲኒ ጌንዜቡ ፍሺ ፄውስታ::

ስካይ ስፖርቱ ንቫርታ እንግሊዝ ፕርሚየር ሊጉ ክሌብካ ኬፍቲኔ ጌንዜቡሳ ፍሼ ፄዌካ:: ፕርሚየር ሊግኩ ክሌብካ ትክላሊስ 3.4 ቢሊዮን ፓውንድዴስ ጃላ እንክራንትካዋ ጄውጝስ ፍሽካ::እን ጌንዜብ እንዴስ ፍና እሺኹሳ ዚዊዊርጚውሳ ክብረዎሴኖ ዱንፃ:: እንግሊዝ ፕርሚየር ሊግ አሌሙ ኽሳንቲ ጌንዜቡ አክም ልቕልቕናው ልኩ ኩታው ጌቤል አኽⶓ ቼሜትጝፃ::

ፌይኹ አሜቱ እንግሊዝ ፕርሚየር ሊጉ ሻምፒዮን አርሰናል እንክራንትካው ዚዊዊርጚዳ ክቹ እንክራንትካዋስታ ካላካልጛንትካዋ ፌሬምፅጝስ ዋንቺስ ይሴን ልኺትጜ ፄዋው እስታማ ማንዲስታ:: አርሰናል ፌሬምፁክ እንክራንትካ ክቻዴስ ብሩኖ ጉማሬሾ ኒውካስትልዴስ 75 ሚሊዮን ፓውንድስ፣ኢዝሪ ኮንሳ አስቶንቪላዴስ 55 ሚሊዮን ፓውንድስ፣ ፒሮ ሂንካፔ 34ትኩሚ5 ሚሊዮን ፓውንድስስታ ክርቶስ ዞሊሶ34 ሚሊዮንስ ፓውንድስ ፌሬምፃ::

እሊው እንግሊዝ ፕርሚየር ሊግዳ ጌሬምፃው ዚዊዊርጚው ታሪክ ዝኩክ ክሌብካ ክቻዴስ እምፕል ያኹኽ ሊቨርፑል ብራድሊ ባርኮላ ፓርሰን ጀርማዴስ ፣ጄርሚ ጃኩየቶ ሬንስዴስስታ ሙኖዞ ኦሳሱናዴስ ፌሬምፅጝስ ኬቾ ይስጝፃ:: ሞሃመድ ሳላህ፣አንዲ ሮበርትሰንስታ ኢብራሂም ኮናቴ ሊቨርፑልዴስ እሊው ኬችሾ ካሱንኩ እንክራንትካኽ:: ማንችስተር ሲቲ እንክራንትካዋ ዜዌዌርጝፅጝስ ይሴን ልቕልቕቴ ፄውንኩ ኬችካ ክቻዴስ እምፕልያኽ:: ኢንዞ ፈርናንዴዞ ቼልሲዴስ፣ኢሊዮት አንደርሰኖ ኖቲግሃም ፎረሰትዴስ፣አዩ ቡዋዲ ሊልዴስስታ ኢልማን ንዴዬ ኤቨርተንዴስ ፌሬምፁስ ሮድሪ፣በርናንዶ ሲልቫ፣ጆን ስቶን፣ሳቪኒዮስታ ኦማር ማርሙሾ ፄጌርጛንኩሳ እንክራንትካዋ እሊው ክሌብስ ፌይፃማ እያ:: ማንችስተር ሲቲ እንክራንትካዋ ጄውጝስ ይቪቺ ያኻውላስ እንክራንትካዋ ዋይጝስኪላ ቢዲሬ አቾ እሜ::ኢንዞ ማሬስካው ኬች ክሌቦ ባይፁንኩ እንክራንትካዴስ 304 ሚሊዮን ፓውንዶ ካዝኒዳ ሚፃ:: ቼልሲ ማንችስተር ሲቴ ሲፋማ ኬፍቲኒ ጌንዜቦ ፍሽኹ ክሌብ ያኻ:: ምራብ ለንደኑ ክሌብ349 ሚሊየን ፓውንዶ እንክራንትካው ዚዊዊርጚስ ፍሻ:: ያኼስጉ እንክራንትካዋ ጄውጝስ ፍሽኹሳ ጌንዜቦ እንክራንትካዋ ዋይጝስ አኬኬስጝፃ::፡ እንክራንትካዋ ጄውጝስ ፉኽዴስ እንክራንትካዋ ዋይጝስ አግፅኹ ጌንዜብ ኽሳማ አግስታ::

እሊዉ ለንደኑ ክሌብ ቶተንሃም 302 ሚሊዮን ፓውንድ ጌንዜቦ ፍሻማ እንክራንትካዋ ጄውጝስ ሹኻንቲ አችዳ እንጅኩዋ:: ማንቸስተር ዩናይትድ ክቹ እንክራንትካዋ ፌሬምፅጝስ ሜዳው ክችዳ እንክራንኩ ሹኻ እንክራንትካስ ይቪቺ 155 ሚሊዮን ፓውንድ ጌንዜቦ ፍሻማ ጄዋ::ካርሎስ ባሌባ፣አንድሬ ሳንቶሶስታ ዩሪ ቴሌማንስ ዩናይትድሾ አሌቔትጙንኩ እንክራንትካኽ::

ታደለ አጋጄ