እዝቡሳስታ ጛርት አቑሳ ዴክቶስታ ሰላሞ ኬቤርፅጝ ፋይፄ!

ወንጄሉ እግ ዋሺኒኪ እግታጊ ዋኽትጙኽ ጚው ሜርህስታ እግ ዝኩኹያኽ:: ዴክቶስታ ሰላሞ ማንዲፅጝ ዴሜካ ቹዋ ወንጄሉ እጉ ሜርህ ያኹስ ፍቶ ቼሜትጝፅጙ አላሚሊ እምትጙኹያኽ::

ወንጄሉ እጉ አላሚኪላ ምንግስቱ፣ እዝቡሳስታ ጛርት አቑስ ዴክቶስታ ሰላሞ ቼሜትጝፅጝ ፋይፄ ናው ጉሽፂ አሳብዳ ሞሬኬዝስትኹያኽ::

ፅንኩትካዋ ድፄ ፄዋንትካዴስ ሺሽጝስ ካሊስታው፣ ወንጄሎ ፌፄሙንኩሳ ዴሜካ ድፅኑ ድፂሊ ሜቴቴንጛውሳ ክፃቶ አግፃንታ ካሊፃው፣ ወንጄል ፌፄምስታቲታ ቤዴራማ ካላካልጚስ ቢኪፃው እንቲታኪ አጌራውሳስታ አጌር አቑሳ ዴክቶ ማንዲፅጝስ ወንጄሉ እግ ኬፍቲኒ ፍሺ ዝኩኹ አኽⶓ ክልሉ ሰላሙስታ ዴክቱ ቢሩዴስ አግፅኑኽ ንቫር ሜሴኬሬ::

ወንጄሎ ፂዊስ አሜቻንኩሳ አኼንካዋ ቴኬምስታማ እምፕልታቑሳ እሌት ቺፋሱሳ ዝኩዊኔ ፅንጋኽፅጝስ ፄውስታው ሙኪሪ እግስ ካሲፃውስታ ኪፂፃው አኽጝ እግዳ እሳንስ እንኩርስቱኒውላ ፌያፌያማ ወንጄሉ ቴግባርስ ኩፅኒ እምፕልታቕ ቼጌርስፅⶓ ባይካያ::

ዳዴኹ፣ ዝራፊው፣ ድብዳቢውስታ ፄጌርጛንኩ ወንጄሉ አይኔትካ ስጋት ያኹኑ ዙራሙሪዴስ ዚጋሚ ወረዳ እምፕሊያኽ:: ወንጄል ኬሴት እንቲታኪ ታክስስታ አኬድስታማ ፌፄምስታው አኽጝታጊ ወንጄሎ ዋኽስዋኾ ካላካልጝፅጝስ ካሊስታውላ ይጎዋችኹኒኪላ ኔኬትጝስ ኩፅኒ ካሊስቴ::

ጉዳዮ ካንትኹስ ዙሚትጝፅኑኹ ዚጋሚ ወረዳው ዝኩዋንቲ አስረሳ ማፅንቱ ወክታዌ ሰላሙሳ ችግሮ አጋታሚታ ቴኬምስታማ ዳዴኹሳስታ ዝራፊውሳ ወንጄሎ ፌፄምጝስ ፅሬቶ ፄዋንኩ ወንጄልስታ ታራታርስታንኩ ዝኩንኩ አኽⶓ ጉሽካ:: ጋያኪ እንሴስካዋ ዳዴኽጙስታ እንዝርናንቴ ቲሪፃማ ዜሬፍጙ ወንጄል ስጋታ ያኻ:: ልላኾስታ ሽብሮ አጋታሚታ ቴኬምስታማ እላፎ ሾፌንስትጝስ ሜሳሬ ዶንጌታማ ዜሬፋው ወንጄልስ ታራታርስታው አይል ሚንችካውሳ ዝኩዊኔ ስጋትሾ ሚፅⶓ ጉሽካ::

አቶ አስረስ ናኑውስታጊ አቺትጛማ ወንጄሎ ፌፄማው አይት አቕስታቲው አኽጝታጊ እግስ ፌይፃማ እይጝስ ቼጊርፂ አኽጝስ ምንግስት እንታኮውሳ ወንጄሎ ካላካልጝጝስ ይሴኖ እርምጄ ካፅጝ ማንዲስታው አኽⶓ ድኹዌካ:: ምንግስቱ አካልካኪላ ሙስኒስታ ወንጄሉ ታምትጚዴስ ኔፃ አኽⶓ ሼውናማ ማራማርጝስ እምፕልታቑሳ ችግሮ ኽይጝስ ዴክቶስታ ሰላሞ ቼሜትጝፅጙ ቴግባር ፋይፃው አኽⶓ አሳቦ እይካ:: እዝብስታ ፄትቲኩ አይልካኪላ ቹኒትጛስ ወንጄሉሳ ፂዌ ካላካልጝጝ ፋይፃው አኽⶓ ጉሽካ::

“እኹዊ ካሱኒዴስ ግሴጝ ቤፍጝ” ኽያ ጋው ክልኽያኽ ንካማ ወንጄሉ ቤዴራማ ካላካልጝጝስ ይሴኖ ቴግባሮ ፋይፃው አኽⶓ ሼውዴስ አምናንኩ ካንቴ እያንትካ ዊዛሩ ሰዋሰወርክ ታየ እምፕልታቕ ቴቬቬርጙኒጊ ወንጄል ኔኬትጝስ ካላ ናውሳ ይሴኖ አሳቦ ጉሽካ::

ዊዛሩ ሰዋሰወርክ አግስታኑ ዙራሙሪታጊ ዝራፊውስታ አትሌልፅⶓ ወንጄል፣ እንቲታኪ ዳዴኹ ወንጄል ስጋት አኽⶓ ቶኬምካ::

“ኹዋሺዴስ ፃሚ ድሳላ” ናንኩ ዊዛሩ ሰዋሰወርክ ፃሜ ድፅጝስ ኩፅኒ ይው ኩ ናውላ ቴቬቬርጛማ እንፃኽስትጝስታ ቤዴራማ ቴንኬክስትጝ ቹዋ ጉዳያኽ ንካ:: ፄትቲኩሳ አይልካዋ ፄጌርካማ አትሌልጝፅጙሳ ወንጄሎ ፌፄማንኩስኪላ ፌቴሽጝ ምንግስትዴስ ማንዲስታው ቴግባሪያኽ::

ትኮሚ እይጝስስታ ምስክራ አኽጝስ ወንጄልስ ታራታርስቱንኩሳ ካሲስታንታ ፄውጝ እዝብዴስ ማንዲስታው ያኹኒውላ እጉሳ ማንዲስቶ  እይጝ ዴሜካ ምንግስትዴስ ፋይፄ ንካ:: እን ያኹኒጊ ናካ ጛ ሼውናንኩስታ ሲጋንኩ ወንጄሉ አይኔትካ ኔኬትጝስ ካላና ንካማ እምኔቶ ቺፄካ::

አዊ ብሄረሰቡ ቺፅጝፂ ወታትካው አችትጝፂው አላፊ ቢኒያም የኔው ሚንቾ ጊዞ ድብዳቢውስታ ዝራፊው ወንጄልዳ አሴሜርጛንኩ ፅናትስ ካንትስታኒ ወታቱ አይል አኽጝታጊ ወታትካዋ እግስ ጄውስታንኩ፣ ወንጄሎስታ ሙስኔ ፄየፍስታንኩ ክምንትካ ያኻንታ ቢኪፅጝስ ጝን አቕ ዴስ አኹኪ ሌጌፃንትካዴስ ጉሽፃማ ይሴኖ ቲቪቪርጜ ፋያው ጉዳይ አኽⶓ ጌሌፅካ::

ወታትካ እንፅኺውሳ እድሎ አግፁኒዴስ፣ ክችክቺ ምግባር ፅንታስ ሌጌሱኒዴስስታ አጌርዴስ ፋያኑሳስታ አጌሩስ እንጉስታኑሳ ቴኬማውሳ ቴግባሮ እንፃኽስስታንኩ ያኹኒጊ ወንጄሉ ፂዊ ኔኬታው አኽጝስ ወታትካስ ምንግስት ሊሊትጙኽሳ ስልታኔ እያማጊ ወንጄል ኔኬታታ ፄውስታው ቴግባር ብሄርሰቡ ቺፅጝፂታ ትኩት እይስትⶓ አቕፄካ::

አዊ ብሄረሰብ ቺፅጝፂ ፖሊስ ሜምሪው አዜዛንቲ ኮማንደር አስራት ወንጄል ኬሴት አኽጝታጊ ቤዴራማ ካላካልጚስ ኔኬትጝስ ጃጊታ ዋኽስዋኾ ድፅጝስ ካሊስታቲው አኽጝታጊ እጉሳ ሴግቴንቶ ቼሜትጝፃማ እዝቡሳ ዴክቶ ማንዲጝስ ይሴን ቴግባር አኮሜችስታማጊ አኽⶓ አቕፄካ:: ፖሊስ እዝቡሳ ክልኾ ቱስቲስ ቹኒታማ እጎ ኬቤርፃታኪላ ሪፎርም እንፃኽስትⶓ ጉሽካ::

ፖሊስ፣ ፍትህ፣ ሰላምስታ ዴክት እንቲታኪ ሚሊሻው ፅፌት ጝንካ ሴዛጊ ኾትካ ቲቪቪርጚስ እዝብ ማይኬላ ፄዌካማ እንፃኽስስቱኽ እንፅኺስ ዚጋሚ፣ ጉዋንጊዋ፣ እንጃቢሪ ኬቴምስታ አዩ ጉዋጉሲ ወረዳዳ ፌፄምስታሺኹ ወንጄል ልቓሱላ ያኹኔ ኔኬታማጊ አኽⶓ ኮማንደር አስራት ሼውፅካ:: ወንጄሉ አይኔትስታ ሜቴን ሊሊትጛው አኽጝታጊ ካላካልጜ ጉሽፃ ፄውኽ እሴን እክድስ ጉስስታው ኮሚቴ ቲሪትጛማ እጎ ኬቤርፅጙ ቴግባር አኮሜችስታማጊያኽ::

እዝብኪላ ወንጄሉ ጉዳይዳ አንቕንⶓ ባያማ ትንካኪስ ወንጄሎ ካላካልጛታስታ ዜቦ ቲሬታ ሼውቲ ፌቴርስታማጊያኽ:: ዙራሙሪ ቺፋ ወንጄሎ ፄየፍስታውሳስታ እጎ ኬቤርፃውሳ እምፕልታቖ ፌቴርጝስ ወንጄሎ ኔኬትጝ ማንዲስታው አኽⶓ ቶኬምካ::

ወንጄልስ ታራታሪስቱንኩ ፄዌ ፌፄሙኒዴስ ፋሌንጋ ቤፍቴካማ ይጉዋቲንታስታ እጉ ፍንዳ ዲግካማ ቱስታውሳ ክፃቶ አግፃንታ፣ ወንጄሉሳ ፂዌ ቼፍፅጝጝስስታ ካላካልጝጝስ ትኮሜ እያንኩስታ ምስክራ ያኻንኩ ኬፍቲኒ ታምብ ዝኩክ አኽጝስ እጉሳ ትብክኔ አግፃንታ እንፃኽስስታንኩ አኽⶓ ጌሌፅካ::

ዋሺኒኪ ዳድስ ወንጄልስ ታራታርስቱንኩሳ ፖሊስ እግስ ዲግስጝስ ፄውስታው ፅሬትዳ እዝብ ታምቦ ፊትጝጝ ቱስቴ ናኒስ እንፅኼንቶ ዲግስካ:: እዝቡሳ አዴሮ እሚንኩ ፄትቲኩ አካልካኪላ ታምቦ ፊትጝጝስ ወንጄል እምፕልታቑ ስጋት አኻቲታ ፄውጝ 2019 ባጄት አሜቱ ሊሊት እክድ አኽⶓ አቕፄካ::

አዊ ብሄረሰብ ቺፅጝፂው ቹዋ ቺፅጝፃንቲ ቴዎድሮስ እንዳለው እዩኑ ጊሊፂዳ ክልልታ ናማኪ ብሄረሰቡ ቺፅጝፂታ ፌቴርስትኹሳ ሰላሙሳ ችግር አጋታሚታ አኹኪ ክርፂ አኺኒታ ቴኬምስትካማ ወንጄሉ ፂዊዳ አሴሜርጙንኩ አኹኪ ታራታርስቱንኩ ጛርት አቕዴስ ጉሽፃማ ምንግስቱ እንፅኺዳስታ አላፍትዳ ዝኩንኩ አካልካዋ እግስ ሳኪስታንታ ፄውስቱኽ ቴግባርስ ወንጄል ኔኬታማጊ አኽⶓ ኽይትጝፄካ:: ይሴን ፄትቲው አካልካው ፄምርትጚስታ ፍቱ ኾትካው ኩርፄንት ወንጄሎ ካላካልጝጚስስታ እዝቡሳ ዴክቶስታ ሰላሞ ቼሜትጝፅጝስ ቲኪስታቲው ፍሺ ዝኩኹ አኽጝስ ምንግስት ጉዳይዳ ሊሊት እክዶ እሜማ አኮሜችኹ ቴግባርስ እዝብ ፊሬ አግፃማጊ አኽⶓ ጉሽካ::

እዝብኪላ እግስ ጄውስትⶓ ቴግባርስ ካንትፃው አኽጝስ 2019 ባጄት አሜትዳ እዝቡሳ ዴክቶስታ ሰላሞ ቼሜትጝፅጝ ምንግስቱ ቢዲሪ ቴግባር አኽⶓ ቶኬምካ:: እዝብ ጊፅሳማ፣ አሬሳማስታ እንፃኽስስታማ ዳራኪ ስጋታ ጋቲታ ዝኩጝስ ካላውሳ አኺኔ ፌቴርጝስኪላ ውላውሳጊ ቲቪቪርጜ ፋይፃው አኽⶓ ጉሽካ:: እዝቡሳ ትክሞስታ ዝኩጙሳ ሜብቶ ኔክፃንኩስጊ እግስ ካሲሰታንታ ፄውጝስ እንፃኽስስታው አኽⶓ ሼውፅካ:፡

ንግስቴ ተስፋ