አንኩዋ አሜታሱ አጌራዊ አዴር

7ንቲ ትክላሊ ጉላሊዳ ጐሌልስትካማ እስካዊስ ቲሪትጙኽ ኩስጚ ጝናሾ ቱንኩ ኩስጚ ጝናስኩ አባልካ እዝቡ እላስታ እንኩዋኻ ያኼካማ እዝብ እይኹሳ አዴሮ ቱስቱስ ፊትጝጝስ እንፃኽስታንኩ አኽⶓ ጌሌፁና::

እስካዊ አማኻሪ ክልሉ ኩስጚ ጝና 7ንቲ ዙሪ 1ንቲ አሜቱ እንፅኺው ዝቤኑ ቲሪትጝፂውሳ ጉባኤ ካስጝፃማ እስካዊ ክልሉሳ ምንግስቶ ቲሪትጝፃ:: አቶ አረጋ ከበደዋ ክልሉ ፕሬዝዳንታ ፂዋማኪላ ሹማ::

ትክላይ ሚኒስትር አቢይ አህመድ (ዶ/ር) ስልታንሾ ይንቱኒዴስ ንጝኪ 201ዐ ም/አሜታዴሰ ጉሽፃማ ሹሚስቱንኩ ቺፅጝፂ ጛርካዴሰ ዋልታንቲ ፕሬዝዳንቲያኽ::

ናኪኒ ቺፅጝፂ ጛራ አረጋ ከበደ ስልታንሾ ይንትካማ ክልሉ ቺጊርፂ ሰላሙ ፍታኒዴስ ክልሎ ፍሽጝስ ጉሱንኩያኽ::

ሜስኬሩም 21 ጌርክ 2019 ምሬት አሜታዳ እስካዊስ ቲሪትጙኽ ክልሉ ኩስጚ ጝናኪላ ካብስ ክልሉ ቺፅጝፂ ጛራ ያኼካማ አላፍቶ ፊትጛንታ ክልሉ ፕሬዝዳንታ ፄዌማ ሹማ::

ፕሬዝዳንት አረጋ ኩስጚ ጝና አምናማ ላጛንቲ ጊዝስ ክልሎ ቺፅጝፅጙሳ እድሎ እይኹስኪላ ምስጋኔ ዲግስካ:: ክልልዳኪ ያኻ ውላጊ ዙራሙርካዳ ዊዳፊ ሰላም ኬቤርስታታኪላ እዝብ እይኹሳ አላፍቶ ቱስቲስ ፊትጛንኩ አኽⶓ ኩስጚ ጝናስኩ አባልካስ ካሎ ቱዌካ::

ክልሉ ኩስጚ ጝናሱ እንጅኩፂ 294 ዝኩኹ ያኹስ 7ንቲ ትክላሊ ጉላሊዳ ካስጙኽ ኩፅኒ 273 ወንቤርካዳ ይቪቺ አኽጝ ጌሌፅስታ:: እንጚዴስ ኩፅኒ 16 ልኺትጛንትካ ፓለቲካው ፓርቲው አባልካ እንጅኩፄ አግፄካማ ኩስጚ ጝና ቱዌካ::

ፌይኹ አሜቱ ኩስጚ ጝናሱ እንፅኺው ፊፂምጚኪላ ክቻክቼ አቾ እሜው አኽⶓ ካብስ ጉባይ ኽምባ ያኼካማ ጎሌሌስቱንኩ ኬቤርስቱንኩ ፋንቱ ተስፋዬ ዙሜካ::

እንዴስ ድምክና ፌይኹ አሜትዳ እዝቦ ምኽምኽፅኹ ምንግስቱ አግልግሎቴ እይጙ ችግር እሺኹ አኽⶓ ጉሽካማ እስካዊስ ቲሪትጙኽ ኩስጚ ጝና ዴሜካ ችግር ክቼታ እዝቡሳ አዴሮ ቱስቲስ ፊትጝጝ ማንዲስታው አኽⶓ ታክስፅካ::

አዊ ብሄረሰቡ ቺፅጝፂዴስ ክልሉ ኩስጚ ጝናሾ እስካዊስ ቱንኩ አባልካዴስ ዊዛሩ የሻረግ አበበ አግስታና:: ጛኪላ እይኑ አሳብዳ እዝቡሳ አዴሮ ቻቤልካማ ቱንኩ አኽጝስ እዝቡ እላስታ እንኩዋኻ ያኼካማ አላፍቶ ቱስቲስ ፊትጝጝስ እክዶ እሚⶓ ቶኬምካ:: ጎሌሌስቱንኩ ኩስጚ ጝናስኩ አባልካ እጋዌ እዝብ ጎሌልኹሳ ምንግስቶ ቲሪትጝፅጝስ እንፅኼ ጄሜርⶓ ጉሽካ::

ዊዛሩ የሻረግ እይኑ ጊሊፅፂዳ ኩስጚ ጝናስኩ አባልካ እዝብሊ ኩስጜካማጊ ዲጋውሳ ኬሬቴስታ ካሴ ፌፄምፃንትካ አካልካ ቱስቲስ ፊትጜካማጊማ ናውሳ ጋማጋምጝስ እዝቡ ትክም ኬቤርስታታ እንፃኽስስታንኩ አኽⶓ ዲብስካ::

እዝቦስታ ምንግስቶ አምንጝፃላ ንኹ ሙስኒው ቴግባርኪላ ኔኬታማ እግ ኬቤርስታታ እንፃኽስስታንኩ አኽⶓ ዊዛሩ የሻረግ ጉሽካ:: ሙስኔ ካላካልጛማ አግልግሎቴ እይጚዳ ፍት ቼሜትጛታ ካሊፃው እክድ እምስትⶓ ጉሹንኩ ዊዛሩ የሻረግ ቴክኖሎጄ እሳንጝፅጝዳስታ እዝቦ ቱስቲስ አጌላጌልጝዳ ፌፄምፃንትካ አካልካ ታምቦ ፊትጛንታኪላ ኩስጚ ጝናስኩ አባልካ እጋዊ ዳድስ ሲፍጛንኩ አኽⶓ ቶኬምካ::

ዚጋሚ ወረዳዋ ወኬልካማ ክልሉ ኩስጚ ጝናሾ ቱንኩ አባልካ ክቻዴስ አቶ አስፋራው የኔአባትኪላ እይኑ ካንቲዳ ጌፄር ዙራሙሪዳ አግስታንኩ እምፕልታቕኩ ቤንካ ዝቤናዊ ልማቱ ቴኬምስታንትካ ያኻንታ፣ ስሩ ልማት ዋኽትጛታስታ ቱስቲስ እክምኔ አግፃንታ ድምፃ ያኼካማ አጌላጌልጝስ አኬድⶓ ድኹዌካ:: እዝብ አምናማ እይኹሳ አዴሮኪላ እምኔቶ ዳንጉስኑላ እንፃኽስታንኩ አኽⶓ ጉሽካ::

ክልሉ ኩስጚ ጝና ፍሻው እግስታ ሜሜሪ ቴግባርዳ እሼማጊ አኽⶓ ሲፍጝጝዴስ ፌይኹስ ፌፄምፃንትካ አካልካ እዝቡሳ ትክሞ ኬቤርፅጝዳ ፊትጚኑሳ አላፍቶኪላ ሲፍጜካማጊ ሙስኒስታ ክችክቻ ጋው እንፃኽስትጚ ፌቴርስታቲታ እንፃኽስስታንኩ አኽⶓ ዲብስካ::

ዊዛሩ አለፈች ደመላሽኪላ እስካዊስ ጎሌልስቱንኩ ኩስጚ ጝናሱ አባልካ ክቻዴስ እምፕላኽ:: እጋዊ ዳድስ ጎሌልስትካማ ኩስጚ ጝናሾ ቱጝስ ዴስቴንካ አኽⶓ ጉሽካማ እዝቡ ይኮኖሚው፣ ማቤራዊስታ ፄትቲው ጉዳይካዳ ትኩትስ እንፃኽስስታንኩ አኽⶓ ጌሌፅካ:: እዝብሊ ታምትጛማጊ እዝቡሳ ድምፆ እንኩዋኽጝስ ትኩታው ቤንስ አሳቦ ዲግስጝኪላ ኩስጚ ጝናስኩ አባልካው አላፍቲያኽ ንካ:: አምናማ ወክልኔ እይኹሳ እዝቦ አምንስታማ አላፍቶ ፊትጝጝኪላ ማንዲስታኩ አኽⶓ ጉሽካ::

ብሄረሰቡ ቺፅጝፂዳ ፋይስታውሳ ልግስኔ ቼሜትጝፅጝሰ፣ አለሙ ዙሪዳስታ እሊኩ እጉ ጉዳይካዳጊ ትኩትስ እንፃኽስስትጝስ እክዶ እሚካ:: እንፃኽስስትጝስ አኬድስቱንኩ ፕሮጄክትካ እምፕልትቑ ቴሳትፉስስታ ምንግስትስ እንፃኽስታንታ ኩስጚ ጝና ታምቦ ፊትጛታ እቑዊ ዲጋ:: ፌፄምፃንቲ አካልኪላ እንፃኽስስታው ሜቴንስ ካሲስታንቶ ፌቴርጝ ማንዲስታው አኽⶓ ኩስጚ ጝናዴስ አሳብ ዲጋ:: ክልሉ እዝቡሳ ቴኬምስታንቶ ቼሜትጝፅጝስ ይጋሪስ እንፃኽስስትጝኪላ ማንዲስቴ::

ንግስቴ ተስፋ