ንፋሱሳ አይሎ ቡንክትጙኽ ሌጌሳ ታምቢ

ቴስፌ ኬውጙ ክምፂስታ ልኻኹ ዝቤን 2001 አውሮፖው ዝቤን ቼፍታ ምስራክ አፍሪካዋ አጌራ ማላዊ ዊምቤ እስቲት እንፃንታ ጌፄርቲ ሙራኻዳ ልኻኽስታ ምርኪ ዲጋሺኾ። ኬፍ ንኹ ባግት ሹምቢውሳ ማሴ ድፁስ 14 አሜቲ ሌጌሳ ታምቢ ዊልያም ካምክዋምባው ጝን አቕ ኬፍቲኒ ምርኪስ  ፂኪስቱና። አውሮፓው ዝቤን ቼፍታ ናሲ 5/1987 ማላዊዳ ማሲታላ እስታው ሙሪዳ ጚታላ ትራይዌል ስታ ጚቹ አግነስዴስ እስታንኩ ድኻድኽዴስ ካሜንስትኹ ዊሊያም ጌርክስ እምፕላኒላ ኹጝ ካሊስታቲው አን ወክትስ አሜቱ 8 ዶላር ክንቲ ጝናስ ኬይስታው ጌንዜብ ኬይስታያሱ አኽጝስ ዊልያም ላጛንቲ አች ክንቲጝናዴስ አሴኔቤትጝስ (ፊጝስ) ጌዴድስትኾ። ሜንችካስ እን እንጎስታ ትምኔቶ ቲሪፃኑ ወክት እሺኾ። ዊሊያም ክንቲ ጝና ካስⶓ አቱኒላ ችግም ናማ እንጅኩⶓ ፋያያላ እሺኾ:: ሙሪዳ አግስታው ሜፃፍ ጝናሾስታ ጊጊሳ ክብፂ  ስፍሪሾ ካስጝስ ዝጉስቱንካ አክኽካዋ ፋያማጊ ኩፕፅጞ ጄሜርኾ::

አሜሪካዉያንካ ቲሪትጝፄካ እሺኑ ፅሊ ሙሪው  ሜፃፍጝናሾ ጌርክ ቺፋ ካሳማጊ ክንትፃንቲ ዝኩዋውላ ይጉኒኪላ ሳይንስስታ ፊዚክሱ ሜፃፍካዋ አንቤብጝስታ እንግሊዝጜኪላ አንቤባማጊ ዴስጝጜ ፄዋሺኾ:: ሜብራቶ ፍልቕፅጙሳ ጉሽፄ አሳቦኪላ አግፅኹ አንጚዳ ሜፃፍ ጝናዳኽ። እምፕላቺ “using energy”አኹኪ አክሞ ቴኬምስትጝ ናው ጛሪስ ፃፊስትኹ ሜፃፍ ታፍዳ ቱኻ። ዊልያም ጚጛርጛስ እንታ ንኾ “እን ኮርሻማርሺ  ይውሳ ሙሬ ምርኪዴስስታ ልኻኽድስ ይጉፅጝስ ካሌ” ናማ ታክስኾ:: አንዴስ ፋሌንጋ ዊልያም ንፋሱሳ ፍልቕፄ ግቢትጝስ ካሊፃው ዳማኪ ጌንዜብ እሼያኪ አኽጝስኪላ አክኼ ፋይጝስ ሙሪውሳ ጊጊሳ ዝጉፄ ስፍርካዋ ካሌቕቱስታ ኮርሻማርሺው ማይኬላ ፄውኻ።

ጚታላስታ ሙሬንካ “ሼዎድሳ” ንካማ ልዊኒምባኺስታ ጌጌዳኻዳ ሲፋንኩሳ ኮርሻማርሽካዋ ሌኬማ እሺኾ። እጂኹሳ ብሽክሊሊታውሳ ፍሬሞስታ ዲናሞ ዝጉዊስትኹ ትራክተሩ ዉቫርፂ ፕላስቲኩ አኹው ቦምቤ ሌግስ እንኩዊንሳማ ወቴርጝስ ውቫርፂስታ ምኮ ፄውኽ ትክልቲው ቻፊ ሊጊሲሚ ሞሴሴና ፄውጝስ ቴኬምስትኹ 2002 አውሮፓው ዝቤን ቼፋታ ዊልያም ጚያጋሊስታ አፄብካሊ አኽጝስ 5 ሜትር ሌጌሴምት ዝኩኽ ካኒው ሙሲሲኒዳ ጊጊስዴስ ቴርስኹሳ ንፋሱሳ ፍልቕፄ ሳንክፁኻ።

ሙሪኩ ዝኩዋንትካ ልኻኾ ብራንፅኹ ሌጌሳታምቢ ሳንክፅኹሳ ሜብራቱሳ አክኼ  ካንትካማጊ ኾኽትጛሺና::

ቴርትኹ ሜብራቱ ፍልቕፂንፋሱ ልቕልቒቲስ አሬኽትስ ዙርⶓ ሲፋኒ ኤሌክትሪኮ ፍልቐፅኾ። ዊልያሙ ታፍዳ እሽቲት እንፂጝ ኒት አምፖላ ቦግኒኾ:: ቻጝቔልታሺንኩ ሙሪኩ አቕኪላ እንገራ ጋሼካማ ቻቫቻቡና::

ዊልያም አባላምቲ ጊዝስ 12 ዋት ኤሌክትሪኮ ፍልቕፃማ ሙሪኩ ጝንካጊ ሜብራቱሳ ብራኖ አግፃንታ ፄዋ::

ፋሌንጋኪላ ንፋስስ ኤሌክትሪኮ ፍልቕፂውሳ ቲሬ 12 ሜትርሾ ሌጌፅጝስ ብቲዴስ ግሽስታማ ፉኽሳ አኾ ፓምፕስ ጉሳማ ፍሽጝስ ሙሪውሳ እርሼ አኾቲስ ሊማታ ፄውኻ። እንስኪላ ምርኪስታ ልኻኽ ሙሪዴስ ድስኾ።

ንባሮ፡ ዊሊያም ካምክዋምባ አውሮፓው ዝቤን ቼፋታጊ 2009  ‘ ንፋሶ ክሙኽ ጄር ‘ ናው ጛሪስ አቴምፅኹ ሜፃፍስታ ቢቢሲው ዘጌቤስታ እሊኩ ድረ ገፅካዴስ ቴኬምስትና::

ግዛቸው ያረጋል