ቺርቤዋ ጋዜታዋ ስካዊ ቴክኖሎጂስ ታምብስታታ ፄውጝስ እንፃኽስስታማጊያኽ

እምፕል አቕስቱኽ ኾትስ  አቕስት እይስታማ አብንካዋ፣ታናታንስቱንኩ ፁፍካዋ አቕፄ፣ ደብዳቤስታ ፄጌርጛንኩ ጉዳይካዋ ዋኽትጝፃማ ጌርክስ፣ ሶኼትስስታ ላጛ ሶኼታዴስ እምፕላቺ ኻሳማ ፋው እትሜቱ ዜርፍ ጋዚቲ እስታማ እቑስቱስቴ:: ጋዚቲ ናካሱ ጊዝዳ ዝቤናዊ ራዲዮን፣ ቴሌብጂንስታ ማቤራዊ ታምትጝፂው ዜርፍ እሳንጚዴስ ፍና አንቤባንትካስ ንባርካዋ ታምፁስ ቢዲሪ ንቫሩ አሊ ያኻማ አጌላጌላ፤ ናካኪላ ዝቤንቺፋ ይንቱኽሳ ቴክኖሎጄ ቴኬምስትጝስ ኬሽጛማጊ ሳሴር ዳድስ አንቤባንትካስ ንቫርካዋ ዲግሳማጊ አግስታውሼ::

እን አጌራኻዳ ቤዴርንካማ አቕትጙንኩ ጋዜትካ ክቻዴስ አእምሮ፣ በኩር፣ አዲስ ዘመንስታ እሊኩጊ ጋዜትካ ቤዴርካማ ማሊስታንኩ ያኻኒስ ትክምቲ እምፕል ጌርክ 2003 ምሬት አሜታዳ አንቤባንትካስ አቕትጝቱት ቺርቤዋ ጋዜታኪላ ሶኼታ አምድስ ማቤራዊ ኢኮኖሚስታ ፓለቲካኩሳ ጉዳይካዋ እሳንስ ታምፄታጊያኽ አግስቴው::

ቺርቤዋ እቺቱኽሳ ዲግስጝስ፣ ካንትስታቲውሳ ካንትፅጝስ፣ ችግሮ ሳሴርስጝስ ናማኪ ፌቴሪኩሳ እንፅኽካዋሰታ ምርምርኩሳ ጉዳይካዋጊ ዲግስጝስ ኬፍ ንኹሳ ትክሞ ይታታጊ አግስቴት  አውጚ ኮንኪስ አቲምስቴት ሌጌስጝዳ አግስቴት ጋዜታኽ::

አሜሪካው ቤዴራሱ ፕሬዝዳንት ቶማስ ጀፈርሰን ጋዚቴ ካንታውስ ጌሌፃኒስ ጋዚቲ እላቲው አጌርዴስ ምንግስት እላቲው አጌር ኬሼ ንጝ ዜኔግስታሊኪ:: አኽጝስኪላ ጛው ጊሊፂታጊ ጋዚቲ እዝቦስታ ምንግስቶ ታምትጝፅጝስ ዳምባ ያኻማ ቴኬሜ:: እዝብ ጉሻውሳ ባኩኔ እንፃኽስትጜስታ ዳንጉኔ ምንግስትሾ ዲግሴ:: ምንግስት እዝብስ ታምፅጝ ቱስታኩሳ እግካዋ፣ ዴምብካዋስታ ትእዛዝካኪላ እዝብስ ታምባንታ እርዳቴ:: ቺርቤዋ ጋዜታኪላ እዝብስታ ምንግስት ክቻዳ ንቫሮ ታምፅጝስ እንፃኽስታንኩ ጋዜታዴስ እምፕላኽ::

አማኻሪ ሚዲያ ኮርፖሬሽንዳ አውጚ አብንስታ ፕሮግራምካው ቴርት ቤናሱ ዳይሬክተር ጋዚቲኒ ምንይችል እንግዳ  ቺርቤዋ ጋዚታ እንካንስታስታ አንቤባንትካዋ ጉስታት ታኻታ ማልጛ ግዲታውሳ ጛሬ ፃፊጝስ፣ ግዲታውሳ ፁፎ ዲግስጝስ ዲጂታል ዜርፍስ ሳሴር ዳድስ አንቤባንትካስ ታምፅጝስ እንፃኽስታውሻው አኽⶓ ጌሌፃ::

ጋዜታዋ ሳሴር ዳድስ ታምፅጝስ አሚኮ እስካዌ አሚኮ ላይቭ (AMECO LIVE) እስታውሳ አፕሊኬሽኖ ቴርሳማ ዲግሱኽ አኽⶓ ጌሌፅኹ ጋዚቲኒ ምንይችል እንጚ አፕልኬሽን ኔትወርክ ዝኩኹ ዙራሙሪዳጊ  አንቤባንትካስ ታምባታ ፄዋው አኽⶓ እርዳትፃ:: አኽጚስኪላ አንቤባንትካ እስካዌ ቴክኖሎጄ ላይክ፣ ኮሜንትስ ሼራ ፄዌካማ ውላስ ታምፃንታኪላ ሼውፃ::

ቺርቤዋ ጋዜቴ ላጛ ሶኼታዴስ እምፕላኒ ኻታታ ፊያኩ አምድካ ክቻዴስ ቹዋ እንፅኼንት፣ አብን፣ዝርዝር አብን፣ ልማት፣ ባይል፣ ማቤራዊ፣ ፍትስታ ቺፅጝፂ፣ አሌሙ ዙራሙሪስታ ስፖርት ቶኬምስታና::

ቹዋ እንፅኼንትዳ ማልጛ ወክታዊ ምንግስቱሳስታ እዝቡሳ አኩዋሞ ጌሌፃንኩ አሳብካ ፃፊስታኑ ያኹስ አብንካ ዴሜካ አይጛሳ ናካሳስታ ቻሳ ካንትፃኑ ዳድስ አንቤባንትካዋ ሜቴናው ዳድስ ዲጋና:: ልማቱ አምድዳ ዴሜካ እንፃኽስቱንኩ ልማቱ ኩምችንካ፣ እክድካስታ አሳብካ ፃፊስታና:: ባይልዳ ዴሜካ እዝቡሳ ባይሎስታ ዎጎ አቕትጝፃንኩ ቴግባርካ እሳንስ ዲጋና:: ማቤራዊ አምድዳ ዴሜካ ቲን፣ክንቲስታ ማቤራዊ ልቕልቕቴ ካንትፃንኩ ጉዳይካ አቺትጜካማ ዲጋኑ ዜርፍያኽ:: ክርፂ ቺፅጝፂው ጉዳይዳ ዴሜካ እዝብ ጉሻኩ ክርፂ ቺፅጝፂው ጉዳይካ፣እግኩ  ልቐልቕትካ ፃፊስታና:: አሌሙ ዙራሙሪዳ አሌምዳ አኮሜችስታንኩ ጌሬምፃንኩ ታሪክካስታ እሊኩጊ ዲጋኑ አምድያኽ:: ስፖርቱ ዜርፍዳ ዴሜካ ሙሪዴስ ጉሽፃማ አሌም አቡቖኺስታ አግስታንኩ ስፓርትኩ ኩምችንካ፣ ጛርት አቑ ዴስካ እሳንስ ፃፊስታና::

አማኻሪ ሚዲያ ኮርፖሬሽን ህብር ዜርፍስ አቲምስቴት ቺርቤዋ ጋዜታ እዝብስ ንባሮ እይጝዴስ ድምክና ክንታንትካ አንቤብካማ ኮንኬ ሌጌፃንታ፣ ንቫሩ አሊ ፄዋንታ ማራማርጛንትካ ኮንኬ ማራማርጛንታ ክምንት እጂኹሳ ንባሮ ዙርጝ ናማ አግፃታስታ ጚውዳ ኮንኪዳ ጚ ኩራታ ፄውታት ጋዜታኽ::

ቤዴርንኹ ጊዝዳ ቺርቤዋ ጋዜታ አቲምስቴታጊ እዝብስ ታፍዳ ታምቤሽቲት ታኹስ ናካሱ ጊዝዳ ኩፅኒ አማኻሪ ክልልዳ ፌቴርስትኹ ሰላሙሳ ችግሮ ሲፍጝስ አማኻሪ ሚዲያ ኮርሽን ድረገፅ www.ameco.et ድረገፅዳ ስታ አሚኮ አዊኛ ናው ፌስቡኩ ማቤራዊ ታምትጝፂው ፍንዳ እሳንስ ንቫሮ ታምባማጊያኽ አግስታው::

እንጚዴስ ድምክና ይንታው ጊዝዳ ጋዜታዋ ሳሴር ዳድስ አንቤባንትካውዋላ ታምፅጝስ ቤዴራ ቴርት ፄውስትⶓ ቴርት ቤናዴስ አግፅኑኽ ንባር ምልኻቴ:: ቺር ቤዋ ጋዜታዋ አንቤብትካማ ንባሮ አግፃን:: ካንቴኪላ ታምፃን::

አዳሙ ሽባባው