ኢትዮጵየ ጝርሲጘይዝ ላጝጠን ምርጸ ጻጝዘነው ቸልድርኩች። ቺተዝ ላጝጠትረ ኻግሩ ምርጸድ ጻጝሽተውድ ብጭቕ ፈተንጥ ማኽሊዝ አቐነውድ ገቨድ ቺትየው አቓንስ ጻቭኲ። ላጝጠትረ ኻግሩ ምርጸድ አቒቱ እርጋቕን እጀው ኰሪዝ ጻጝሽትኲ። ቺተዝ ኽይጠ ሰሜንቱ ጅውነይዝመ ኦሮሚያ ክልሊልም ላውላው ጅውንጢል ኽምዘዝ ምላሰን ምርጸ ጻጝሽቲንቀ ዳቕኲ።
ከምሸጥ ኻይላኒዝ ምላሰን ምርጸ ተሚሰኲ መ ተሚሳው? ምርጸዝ ፃጀ ቅብሰነዊስ ሽጙ ላዘ እፍርትዝመ ሰቭታቍ? የቍ ኻሳቫን ማኽሊስ የውም አቒትቍ ከምሸጥ ምርጸዙ ካርድ ፊስርንሽ! እግረም ማርጽርንሽ ቅውነኩን ይጛጙ ገውስዉሰነዉ ማኽሊል አቕ ምርጸድ ጻጝሽትኲ። እንምርጸ ኪርምስን ኻትሰነውዙ ሰቭድ ገውሰው ዊኑ። ቢዘ ኻግርዝቍ ዚምናንዝቍ ፃለታንም ኢትዮጵየት ቈይዘናንስ ከምሸቍ ኻይላንድ ጊንዝቭዝመ አጭነዝ ከቨነውዝ ውላቕጝ ዊንጙ። ምርጸድ ጻጝሽታየጘም ጻሪጘው ቢጙ እጀውም። ለምስጘው፣ ኻጝስጘው ጝታናንድ ኪልሽኲ።
እኔንትቅ ጻቨቍድ ኢትዮጲቍ ጛይ። ኢትዮጲቍ ሚከረ ማኽሊል አቕጝ ዴሞክራሲድ ማርጽጝኲጙ። ኻግር ምርጸዝ ጭቑ ችብትራንስ ኻር፣ ኪበ፣ ኰረ፣ ሊግዘው ሰልፍ ይጝቀ ወየ ኪፍልጝ ኻግርት ከስጥጘ ጝታችጘርድ ፍጝኲጙ። ኢትዮጲቍ ዊትርቅ ኻግር ሚከረል ጽብራንድ አቭርድጝ ሲጘ ሠራሸነው ጝታአምል የጝ።
ኢትዮጲቍ ነንም ምርጸ ጻጝዝጝ ፃለትዙ ሊግዘው ኻሰቭድ ቀቭጝ ምነነ ቀቭስጘጘ አቒትቍ ባንድጥድ አቭርድጝ ፊስጝ ማልጥጘ ጡሸኲ። እኔንት ጻቨነውዝ ቢዘትቍ ፃለታንድ ፊስጘው ጊንዝቭድ በክን ዳቓንስ፤ ኢትዮጵየትል ምቅሸው ናንድ ቈሽ ጝወንት ዊስ ዃንስ ጻቨኲ።
ኢትዮጲቍ ነንቱ ጊዚዝ ዲግ ተራንስ ምርጸይዝ ጻቨው ሊቨሊቭኒዝጘ ጻውተ ኻይላኒጅቅ አቭርደነውዝ ጝታችጘርድ ፍጥጘ ጡሸኲ። ምጝግስት ጋቢዝም ተረቍ እርፋኒዝ ቃውሰተ ሰቭድ ዲግ ሊሚሰነው አጠ ጡሸኲ። ዲግ ሊሚሰነው ስልጣን ጽየው ምጝግስትዙ ሰቭ የጝ።
ተረቍ እርፋንዝ ዊንም እምታንዝ ነንም ፍልውልወነው ቸልሺንቀ፣ ቀቭሽተቍ እፍርታን ቻቒንቀ እምታን ዲቈነው ኻግርየት ማጽናው አቐጘ እንቅም አርቕጠ ጡሸኲ።
እንኽዝቪዝ እፍርትዙ፣ ናጽነይዙ፣ እክሰዙ፣ አቭርድንዙ ኰረ ፍጠ ጡሸኲ። እንኰረድ ፋንስ ቈሽ ኽዝቭዝመ ምጝግስት ለወንትዝ ጥወጥውሽጝ ሠራሽጥጘ ጡሸኩ። ኻይልዝ ጻቭሽተው ዊንም እዘንዝ አቕየው ገቨ ደግምግም ላው ዊግነዙ አርወድ ጭቍ ሊምድስጠ ቸላው አቐነውድ አስክዘነው ጡሸኲ።
እን ቲግቭርድ ፃለትዙ ናኒስ ዲቍ እዘን ኪል ፤ ኢትዮጵየ ኪብርድር ጽብራንስ ቸልሰኲ። ነንቱ ዚምኒዝ ጽበቍ ኢትዮጲቍም ጝታእድምድ ጅመ ኮለ ማጥለዉ ጽብኒስ ፍጛንስ አትረዉ ኽግ ኪብርዝንዙ ሰቭ ሠራሽትጠ ጡሸኲ።
ግርማ ተጫነ
ግንቦት 30/2018
