ስፖርት ላው እፍርትዙ አካል የጝ። እኔንት ጥውሸውዝ አሩሸነዉ ቈሽ ፈንድ ቓለነው ጥቕዘ አቐቁ ኻግረን እኩጙ።
ይነ ኻግር ኢትዮጵየም ስፖርትድ እፍርትዙ ላው አካል ጻቨነውዝ ሊግዘጥድ ቺተቺተው ስፖርትዝቁ አይንተንዝ ጝታ ኒቪድ ችጛንስ ልቕረ ጻቭራጙ ችጝሸች።
ብሄረ እቅ ጭሰጭሰኒዝጘድም ሊግዘጥ ፕሮጀክትዙ ስልጠነድ ላጝጠ ስፖርትዝቁ አይንተንዝ ይውሽታጙ ችጝሸው አቓንድ ሰቁጠ ወረደ ሲሪየል ማእከልድም ሊግዘጥዙ ፕሮጀክትዙ ስልጠነድ ይወቁ ማእከለኒስ ላውድ የጝ።
ልኰ ኳስዙ ፕሮጀክትዙ ስልጠነድ ፊስጛጙ ችጝሸቁ ሊግዘጥድም ብሄሩ ጓነ ተግዝ ኻግርት ደርግቨነውዝ ዋርደነውዙ ኒቪ ጻይጛንድ ነንቱ ሰቲዝ ፊስጛጙ ችጝሽጘው ስልጠነድ ጝታ ክንድጝዙ ለምረ ለምርኒዝ አትረቁ ክንደጥ አጛንስ ከቨ ጻቫጙ አቐነውድ ሳልጥነተ መብራት ብርሃኑ ዊግትኩ።
ፕሮጀክትዙ ስልጠነ ጻጝትድ ፈኑ አቓንስ ጻቨቁ ገባኒስ ላውድ ስልጠነይስ አቐው ጎዘ መዛንድ እቻዘነው የጝ፤እኒን ቈሽ ሊግዘጥድ ጝታ ኒቪጅቅ ዲምቅሽጛንስ ኽየውዝ ከቨው አቕሽም ስልጠነይዝ አቐቊ ጎዘ መዘንድ እቻዘነውዝ ጡውሸው ስልጠነ ፊስጥጘ ማጥን ጻቨነው ጋቢዝ ጽበው ችግሰድ እክሰናንስ በንዘው አቕጘም ቈሸነውዝ ጉይኩ።
ልኰ ኳስዙ ዋርደዝ ሊግዘጥድ በንት ጚ አወየው አቐጘ እንዝ ሚቅ አርቓቊም ዊንጘጘ ስልጠነይል ተርጘት እግርገ ግነ ሲሪዩ ኳስዙ ዋርደድ አወየው አቐጘ ጥቅለ ዋርደይዙ ጻጝትድ ስልጠነይስ አርቕጛንስ ጻቭጛጙ አቐጘም ሳልጥንዘተ ክንሰተ መሠለ ነጋ ዊግትጝኩጙ።
ጅውነይዝጘ ንቕጸቁ ሊግዘጥ ልኰ ኳስዙ ዋርደጥም አነ ላጥ ስፖርትዝ አቐቊ ሊግዘጥ ችጝሸነ የጝ እኔንት ጡውሸውዝ አሩሸነውዝ ዚርፊል ተርጛንስ ኽየውዝ ሰራሽተው አቕሽም ስልጠነድ ፈኑ አጠጘድ ሙየ ጒይጢዙ ከቨዝመ ጎዘ መዘንዙ እጅጝትድ ኻሊነዊዝጘድ ስልጠነድ ጻጝዛይነጘ ጻቭኩ ይጛንድም ጝታ ኻሰቭድ ቢንስጝኩጙ።
ወረደይዝጘድ ሊግዘጥዙ ፕሮጀክት
ስልጠነድ ልኰ ኳስ ፣መረቭ ኳስ፣ቸዝ፣አትሌቲክስ እንዝጘም ባኽልዝቁ ስፖርትዝቁ አይንተኒስ ሊግዘጥድ ጝታ ተምዝጘዊዝጘድ ስልጠነድ ፊስጛንስ ጻቭሽታጙ አቓንድ እኒንም ሊግዘጥድ ጝታ ኒቪዝጎ አልትጛንስ ጻቨነዊስ ከስጘ ጝታ ክንድጚዝም አትረቁ አጛንስ ስልጠነድ ጡውሸውዝ ከቭኩ ይጛንድ ዊግተቁድ ቈሽ ወረደይዙ ባኽል ቱሪዝምዝመ ስፖርት ጽ/ጝን ቲክርክረዝመ ስልጠነ ጓነ ቃወተ አት ደረጀ ሃብቱ ጛይ።
”ፕሮጀክትዙ ስልጠነድ ኪርመነዝ ፈኑ አጠጘድ ቲክንክነዝ ኻለይድ ኮር ጨቨቅ ቲግቭርሸነውድ ወረደይዝጘድ ፕሮጀክትዙ ስልጠነድ ፊስጛጙ ችጝሸቁ ሊግዘጥ ጡውሸውዝ ስልጠነ ፊስጛንስ ስልጠነይዝ ከቨቁ ጎዘ መዛንድ ጅቭን አልሰነው ቸልሽሽም በንሽተዊዝጘድ አቓየጘድ ቈሽ ወየዙ ኪብርንዝመ በጀትዙ እጅጝትድ ጡውሸውዝ ከቨ ጻቫይነጘድ ፃቭኩ” ይጛንድም አት ደረጀ ቈሽጝ ዊግትጝኩጙ።
አመልማል ተድላ
ግንቦት 30/2018
