እጅር ሰራሸተ አስትውልንዝ (AI) ቲግቭርሸው ካንሰርዙ ክትቫትዙ ምርመረድ ጊንዝቭዙ ከቨ ችⶔ።

ዲቈቁ ንቕፀቁ እምተንዝ እጅር ሰራሸተ አስትውልንዙ ቸልት (AI) አልም አቅቨ ተግዝ ኽየው ስፍረ ፃየጘድ ሚሪሽኲ። ትኽነ ኻይንዙ ሴክተርድ AIዝ ቃልጥፈቁ ዚርፈኒስ ላውድ አቓንድ አጉረው አቅምዝመ ምነነ ፃየቊ ኽክምነዙ ሊግዝተኒስ አርቴፊሻል ኢንተለጀንስት (AI) ካንሰርዙ ቃውሰን ምርመረጅቅ ስረንዘናንስ እቑርሽኲ።

ካንሰርድ ቺዘነው ጋብዝም AI አርውሸነው ዲቈቁ እምተንዝ ፍራትዝ ፅንኸ ፃቭሽተው አቓንድ አርውሽኒልም ዲዝጝሽየው ቆሸ ቓሊስኲ።

አርቴፊሻል ኢንተለጀንስ (AI) ዝመ በውግቱ
ካንሰርዙ ምርመረን ኻስቭዘቊ ኻለየን አቕጝኩⶔ።

አቓንስቅም ላው ዩኒቨርስቲዙ ጓነ” አይር ኹርዝ ጝሉዝ ገሪየቊ ካንሰርዙ ክትቫተን” እጅር ሰራሸተ አስትውልንዝ (AI) ኲነነው ጋብዝ ጊንዝቭዙ ከቨ ችጝኲ።

ዩኬትል ፅበቁ ኽየቁ AI ሱፐር ኮምፒውተረንዙ ሚርምርሸጥ አቒስ ኦክስፎርድ ዩኒቨርሲቲል ዶውን ይሽት አርቕሸተዊዝ ችጘነውዙ ሚቭትድ ይውሽተው አቓንድ ተረው ሰራሽጘው ክፍሊዝ ኽክምነዝመ ምርምረ ምኽር ጝን (MRC) ጊንዝቭዙ ከቨ ጻቭሽተው አቐነውድ ቢቢሲቱ ዘገቨድ ሚሪኲ።

እን አፅቨድም 2 ሽኽዝ 500 ንየ ዩኬቱ ካንሰርዙ ክትባት AIዝመ ሱፐር ኮምፒውቲንግ ፕሮጀክትዙ  ዶክተረን፣ ካንሰርዙ ሳይንቲስተን፣ አዕምሮ ኽክምነዙ ሙየጒይጥ፣
ሮቦቲክስ መሐንዲሰንዝመ ማኑፋክቸሪንግዙ ሙየጒይጥድ ስረንዝ ፃየው የጝ።

ኽክምነዙ ኦንኮሎጂስትዝመ ፕሮጀክትዙ ቃወተ ዶክተር ሌናርድ ሊ ነን ጝሉዝ ገሪየው ጥላዙ እፍርትል “እቀጘ ቃልጥፈው” ተግረ ፊሰነው ጥውሸው አቐነውድ ዊግትጝኩⶔ።

ዶ/ር ሌናርድ ሊ ዊግትጘንድ  “አንክርሰው ጒደነዝ እጅጝ ኰሪዝ”  ዩናይትድ ኪንግደም አልም አቅቨ ተግዝ አጉረተ AIቱ ስረተን ፃይረጘድ ቓሊስኲ” የጝ ይጘውድ።

ዩኒቨርሲቲዙ ማርምርሸጥድም ዲዝጝሸው ዩኒቨርሲቲዙ ኮምፒውቲንግ  ጅውነይል እቀጘ ብጭቕ ካንሰርዝመ ፅውዘይዙ ማኽተነ ሚዝረንጥድ ቲንትንሽጛንስ ፊቅድሽጘጘድ ዊግሽኩ።

MRCቱ ጊንዝቭዙ ከቨድም ተረዊዝ ተግረንጥድ ፊሰው አቓንድ mRNA ሙከረዙ ካንሰር ክትቫተን ጊቭርዘናንስ ቸልሰቁ መሰሪየንዝመ AIቱ ትንበየንድ ኻክምሸጥዙ  ናሙነኒል ሰራሸቁ አቐነውድ ሚኩረናንስ ሰራሸኲ።

አለመድም  AIቱ ማርፅሽተቊ ክትቫትዙ ኢላምጥድ አትረው አንፀ ካንሰርዙ ፅውዘድ ማኽተነውዙ አቅምዝ ዊሰንጥድ ፋጥረነው ቸለቁ አቐነውድ ዊስነናንስ የጝ ይሽትኲ።

ሳምራዊት ግርማይ

ግንቦት 30/2018