ሊግዙ ስፖርት ቲክርክረ (ፕሪሚየርሊግ፣ሻምፒየንስ ሊግ ዊንም ኻግር አቒቱ ሊገን)ጝታ አርወድ እቀጘዝ ፈራቐው የጝ።እንዛይ ቲክርክረንጥድ ዋርደጥዝ፣ አንክርሰጥ፣ እቀ ገረደዝመ ኢኮኖሚዝ አውግረው እኩሰ ዋርድጘኩ።
አልም አቅቨተግዝ ስፖርትዙ ሊገን ትኽነዝ ፣ ገረዱ ዲምቅሽንዝ፣ ክንድጝዝመ ኢኮኖሚዙ ሊግዝቲዝ ሲሪየ ጛይ።
እቀ ገረድጥዙ አትርንዝመ ኢኮኖሚዙ ሊግዝትድ አትርዝጘኩ፣ ዘናሸነዊስ ከስጘ ሩሄ ላውጠቊ ቲግቭረን ጛይ።
ጥቅለዝ ጝታ አርወድ ፍጥርዙ ቸልትድ ዲቭርዘነውዝመ ቺዝየው እቀ ኽቭር ፋጥረነው፣ ብሄሩ ኲርንዝመ አልም አቅቨ ዲምቅሽንድ አትርዘኩ፣ ኻግረኒዙ እፍርትዝ (ትኽነዝ፣ ክንድጝዝ፣ ኢኮኖሚ)ዝ መለዙ፣ ስልቱ ሰራሸነ የጝ ሊግዙ ቲክርክረን ሩደቊ አጛንድ ዋርደጥዙ ኒቪ፣ አንክርሰተይስ ዘናሸነዝመ እቀ ገረደዙ ሊግዝቲዝ አውግረው እኩሰ እኩሰኩ።
እንዝም ኽምረ ሊግዙ ቲክርክረ ሊግዘጥዙ ኒቪድ ከቨነው ጋብዝ ኽየው ችጘር ፋጙ ችጝሸኩ።
5ትረ ኽምረ ሊግዙ ቲክርክረድ ጻጝዘናንስ ቃውሰ አስልሽትዙ ሰበንድ ጥውሸውዝ ሰራሻጙ አቐነውድ ባኽል ቱሪዝም ዝመ ስፖርት ቃወነድ አርቒሱ።
ቃወነይዙ ስልጠነ ዝመ ቲክርክረ ጓነ ቃወተ አት አበራ ቢምረው እንዝሚቅ ጻጝሽተቊ ቲክርክረንድ ጅውነይዙ ስፖርትድ ነቃዘነው ጋብዝ ኽየው ችጘር ፈነው ቸልጝኲ ይጝኲጙ።
ቺተዝም ፕሮጀክትዙ ስልጠነይዝ ዲቈቊ ሊግዘጥድ ቲክርክረዙ አገነ ችጛንስመ ዲዝጝት ችጝጛንስም ቲክርክረድ ከቭኲ ይጛንድም ዊግትጝኲⶔ ።
ቲክርክረይዝ ሲትፍሸቊ ሊግዘጥድ ጝታ ኒቪድ ሩዘናንስ ኻግርሸንትል ችጝሸቊ ኽየቊ ክለቨኒል ስረንተነው ቸልጝኲⶔ። እኔንን ቈሽ ቲክርክረይዙ ኽየው ፈንድ የጝ።
ልኰ ኳስዙ ዋርደይስ ከስጘ መረቭ ኳስዙ ክለቨንዙ ቲክርክረ ዲቈው ዓምረይዝ ቈሸነውድ ስፖርት ቀነተ ወይቱ ኽዝቪዝ ቲክርክረድ ቀንሸተ አጠጘድ ቸልሰጘም ጋልጽጝኲⶔ።
2018 ዓ.ስትዙ ኽምረ ሊግዙ ቲክርክረድ በጀትዙ ዓምረይዝ ኪርም እንዝሚቅ ጻጝሽተቊ ቲክርክረኒስ ቺዘውዝ ጻጝሽታንስ ኻለይ ጻይሽት ሰራሽታⶔ አቓንድ ወይቱ ስፖርትድ ሊግዝጠጘድ ኽየው ችጘርድ ፈነው ቸለቊድ “ኢንስፔክተር መብራት አሸብርት” ዚክረነውዝ ቲክርክረድ ጻጝዘናንስ ኻሊሽት ሰራሽታⶔ ችጝሸው አቐጘም ጉይጝኲⶔ።
አመልማል ተድላ
ሰኔ 15/2018
