አልምትል አኽቭሽ ችጝሸው ኹረዙ ጊቭርተንድ ኹረዙ አልስንዙ ችግሰድ ቀልዝጝጠ ቸለቁ አቐነውድ ጋልፅሽቱ

አልም አቅቨ ተግዝ ሩዝ፣ አትረጘ፣ በቂልዝመ ዚርወዙ አኸቨ አጉረው ተግል ችጘነውድ ጋልፅሽትኲ።
አልም አቅቨ ተግዝ አጉረውዝ ኹረዙ ዘባሽንድ
ተረዊዝ አልምቱ አየር ንቭርትዝመ ኹረዙ ጊቭርትነይድ ኻደገይል ማልጠ ቸለው አቕሽም አልምዝጘ ኹረዙ ጊቭርት አኽቨዙ ምፅነድ አጉረው አቐነውድ ችግሰድ ቃፅቭጠ ቸለው አቐነውድ አቭርደቁ ምጝግስተንዝመ አርሽነይ ድርጅት (FAO) አርቒሰነውድ ሮይተርስ ዚግቭኲ።

ዲዝጝትዝ እስያቱ አጉረቁ ክፍለን ብርትዝመ ይዘቁ ጅውንጥድ እንዝጘም  አሜሪከ ኻይሉ ስወድ ቲክንዘው ኹረዙ እጅጝትድ አጉረው ዊነጘድ ጉይሽተኲ።

አልም አቅቨ አክሲዮንዙ አኽቭሽንዝመ ጣቅዝ ሩዝዝመ ላጥ አርዙ አይንተንዙ ጊቭርትድ ሚሪሸውዝም ቺዝየው ጊቭርት ፅበነውድ ዊግተቊድ አቭርደቁ  ምጝግስተን ኹረዝመ ኹረዙ ድርጅትዙ (FAO) ኢኮኖሚስት ሸርሊ ሙስጠፋ አልምትል  አኽቭሸው ኹረዙ ጊቭርትድ ኹረዙ እጅጝትድ ቃፅቭጠ ቸለው አቐነውድ ጋልፅጝኩⶔ።

ፃረቊዙ እግዝግዘይዝ 2015/16 ዓ.ስ አሰነይዝ ኹረዙ እጅጝት፣ ኽርዝመ ኩረዝ አልም አቅቨ ተግዝ ብርትዙ ምፅነ ቈሸው አቓንድ እኔንም እስያቲስ  አፍሪከት ጅል አሽ አርሽነይዙ ጊቭርትድ ዘባዝኲ።

አቕሽም 2026/27 ዓ.ስዙ ፈወነድ ቺተው አቐነውድ ጋልፅሽተው አቓንድ ቲክንክነጥ እምተንዝ ጊቭርትዙ ሪከርድ አልም አቅቨ ተግዝ ሚዝግቭሰነውዝ
አልም አቅቨ ተግዝ አኽቭሸው ኹረዙ ጊቭርትድ ቺተዝ ቈሽ አይንተ አይንተ አረዙ ጊቭርተንዝመ ቢዘ ኻግራንዝጎ እፃቐቁ ኻግራኒል አጉረውዝ ቈሸጘድ ጋልፅሽትኲ።

እኔንም 2017/18 ዓ.ስ ኪርም አልም አቅቨ ተግዝ  ዚርወ፣ ብኻርመይለ፣ ሩዝዝመ ፃረው አትረጘ(ጎታቲ) ቃውሰተ አክሲዮነንድ ቓሊስጘኲ።
ዓልምቱ  ዚርወ ጊቭርትዙ አኽቨድ ኻምል ላው ኽወዙ አምረይስ ኪርመነይል አሽ 279 ነቁጠ 95 ሚሊዮን ሜትሪክ ቶን ችጘው አቐነውድ ሚሪሸኲ።
እኔንም አኰ እምተን አቒዝ አጉረተ ኹረዙ አኽቭሽን አቐነውድ አሜሪከቱ ኹረዝመ ጥላዙ ጭሰጭሰን ሚዝረድ ቓሊሰኲ።

ሳምራዊት ግርማይ

ሲን 15/2018