ኢትዮጵየ ዚምናንዙ ሲጙ ጝር ቅርሰንድ፣ አብልሸው ፍጥርቊ ጝር ፃጅጥዝመ እንቅቱነይ ባኽልቊ እሴተን ዚምኑ ሲሪዩ እፍርት ጅቅ እጽቊ ጽቁሰነውዝ ቱሪዝምዙ ዚርፍድ ኢኮኖሚው አይነተ ዲቭየ ጻቨናንስ ቸልሰቊ ተግረንጥድ ፊሰነዊል ችጝሸች።
ጥቅለተ ሚኒስትር አብይ አሕመድ(ዶ/ር)ቱ ኻሠቭዙ ፍልቅዘተነይዝ ቃርጽሽተቊ(ገበታ ለሃገር)ስመ (ገበታ ለትውልድ)ኻግርቊ ጭጝንዝ ምላሰን አክንውሸቊ አውግረቊ እፍርትዝቊ ፕሮጀክተን ኢትዮጵየቱ ቱሪዝምዙ ዚርፍ ሊግዝት ጋጽድ እቻቐውዝ እቻቐው ላውጥጛጙ ችጝሽጘኩ።
ዲቈቊ እምታኒዝ ምጝግስትዙ ቺተው ትኩርት ይውሽትጝ እማን ጻቭሽተቊዝመ ነንም ኵንንል ችጝሸቊ አውግረቊ ቱሪዝም ዝቊ ሲሪቊ እፍርተን፣ኻግርሸን አኽጉሩዝመ አልም አቅቨ ቱሪስተንዙ ችጝሽተተነይስ ኒድፍረው ጝር ኻለየድ አውግረውዝ ስራሽራጙ ችጝሸች።
እንዛይ አንክርሰቊ ቱሪዝምዝቊ ችጝሽተተነይድ ኻግርሸን አልም አቕቨ ተግዝ ጽይረው ዊትረነዙ ማኽልነይዝመ ቲክርክርሸተነይድ ንየስ ሸቊ አጘጘ አምንሸኩ።
እንዝም አዲስ አበባት ቈሽ አይነተ አይነተ ኻትምጥድ እቐጘዝ ማርጽሽተቊ ቱሪስትዝቊ ችጝሽተነ አጝጥጘ ኻስቭሸተ ጻቨቊ ሰበን አክንውሸቊ አጛንድ፣ተክዘዝም አዲስ አባባስ ኲንሸቊ ሸገርቱ፣ እንጦጦስመ ወዳጅነት ፓርከን፣ ሣይንስዙ ሙዚየምዝመ አድዋቱ ሚጉርሰነ ፕሮጀክተን ኻትመሸንቱ ኮንፈረስዙ ቱሪዝም ማእከል ጭቑ አይቀጝስ ቢዘስም አነ ኻግር አቒትቊ ለውርደጥዝ እቀጘዝ እምጥጝዘው ፈወነዝውዝመ ዘናሸነ ስፍል ጻቭጝኩጙ።
ክልላኒልም አቕሽ (ገበታ ለሀገር)ዝመ(ገበታ ለትውልድ) አቅቨንጥድ ደቡብስ ኮይሻስመ ሃላላ ኬላ፣ ብላ ክልሊዝ ጎርጎራ፣ እኒዝጘም ኦሮሚያ ክልሊዝ ቈሽ ወንጪ ትጘ ተከቊ ሲጙዝመ ፍጥሩ ስፍል ዚምኑ ሲሪቊ እፍርተን፣ ለውርደጢዙ ዊንተድ ሊጊሰቊ ሚቸቊ ሎጂየን፣በበነ ስፍልዝመ ዊስንሸቊ ስፍሊል ችጝሸቊ እንሰስን ችጝሸነ አቐቊ ፓርከን አውግረቊ ኢኮኖሚው ግርበን አጛጙ የጝ።
እንዛይ ፕርጀክተን ፍጥሩ ፃጀዝመ ሲጙቊ ቅርሰንድ ዚምኑ አቭኑወይጅቅ ጻምርሰነውዝ ጅውነይዙ ኢኮኖሚዝ አይር ሩሄ ፊዘነዊስም ከስጘ ውሸቭለድ ዚርፊስ ስልጠነ ፊስ ፈራቐው ሰቪዙ አገነ ችጛንስም ኻሊሽትጝ ሰራሽተቊ ጛይ።
እንዛይ ስትራቴጅኩ አቕቨንጥ ኲንሸቊዝመ ኲንሽጛጙ ችጝሸቊ ቱሪዝምዝቊ ችጝሸጥድ ፍጥሩ ጝታ ካኽተድ ኻይጝ እፍርድጝጠ ጻቭሽተነውድ ጅውነይዙ እቀ ኽቭሪዝ ፈራቐው ሰቪዙ አገነ ፋጥረነዊስ ከስጘ ሆቴልዙ፣ትራንስፖርትዙ፣አቪዬሽዝመ ፈራቐው አግልግለዙ ዚርፍድ ጽጽቅዳንስ ጻቭኩ።
ባኽልዝቊ ናን ጥቨቫኒስ ኪርም ኻግር አቒትቊ ጊቭርተኒል፣ አሪሽንዝመ ኮንፈረንስዙ ቱሪዝም አሽ ጽበው ሰንሰለትድ ነቓቓንስ ጻቨነው ጋብዝ እንዛይ ፕሮጀክተንድ ጽይጘው እኩሰድ እቀጘዝ አውግረው የጝ።
ቱሪዝምዙ ዲፕሎማሲድ አትርዘነውዝመ ቢዘቱ ምንዝረ ችጝሽንድ ሊጊሰነውስ ጋብ አክንውሽጛጙዝመ ኻሊሸቊድም እንዛይ ሰባንድ ኢትዮጵየ ድኽትዙ ጅሉዘይስ ፍር ፈራቐው ብልጽግነዙ ፈወነል ጝር አቐነውድ አራሰውዝ ደድሰቊ ጛይ።
ታትነቱ ጽጋንድ ዚምኑ አርቕትዝጐ፣ ስትራቴጂክ ኻለይዝመ አትረው ሰራሽንድ ላውጠነውዝ አምር ትወ ኢኮኖሚዙ ንየትነይድ እማን ጻቭጛጙ አቐነውድ ዚርፍዝቊ ሙየ ጒይጥዝመ አልም አቅቨ ሪፖርተረን ደድስጘኩ።
አይነተዝም አቪዬሽንቱ ኢንዱስትሪድ ቱሪዝም ዚርፊጅቅ ጻምርሽ ሰራሻጙ አቐነውድ ሩድኒስ ቈሺተተ ፈወነ ብዝኩ።
ኢትዮጵየቱ አየር ጉጉድ አልም አቅቨ ቢርንድ ፈራራዘነውዝመ አይር ኲናጙ ችጝሸው ቢሾፍቱ አልም አቅቨ አየር ፈወነ ተከተከቊ ቱሪስትዝቊ ችጝሽትነይጅቅ እጽቊጽቈነውዝ ሚሊዮንዝ እጊተቊ ጒዥተጥድ ኻግርሸንትጐ ዊትረናንስ ቸልሰው አቅም ፋጥርኩ።
ጥቅለ ኢትዮጵየ ቱሪዝምዙ ዚርፍዝ ሚዝግቭስራጙ ችጝሽረው ስር ኒቅለው ልውጠድ ኻግርሸን ጽይረው ጭቭረው አቅምድ አጡዝ አርወል ግሪሰነው ጝር ቸልደነውድ ቓሊሰው የጝ።
ታትነቱ ጽጋድ ተግርጝ ነንትል እማን አቐቊ እንዛይ ፕሮጀክተንድ፣አምር ትወ እንቅቱነይ ኢትዮጵየቱ ጒዥትንድ ጸናቐው ሲሪየይል እቑረቊ ሲጝቊ እሴተን ጛይ።
ጣይትን ቱሪዝምዙ ዚርፊል አውግረውዝመ ሳልጠው የይቱ ጥቕዘ ጭሰው አይነተ ምላሰን የጝ። ቱሪዝም ጝፍጥርቲዝ ዲግ፣ እርጋቕንዝመ ዳኽንነይድ በነው ኽውከ ቀናው ሲፍየው ዚርፍ አቐነዊዝ አዊንም ጅውነይል ጐው ገጫሽንድ ኢንዱስትሪድ ጭቅተዝ ቈይዘኩ።
አይነተዝም ብላ ክልሊል አጋልዘው እርጋቐቕ የነውድ ቱሪዝምዙ ዚርፍድ እቻቐውዝ እቻቐው የነው ተግዝ አውግረውዝ ቈይዝኩ።
ክልልድ ኢትዮጵየቱ ሲጙዝመ ባኽልቊ ቅርሰን አይነተ ማእኸል አቕሽም ግሬ ጨቨቅ ፈቊ ጽንኸንዝመ ሚዝረንጥድ ቓሊስጛን ትጘ ዚርፍድ ጽጐወው ምጽነ ጻጀዙዝመ ገረዱ ኽምዘ አቒል ችጝሸኩ።
አቐነዊዝም ጅውነይዙ ዲግድ ኻይሰነውዝ ቱሪዝምዙ ዚርፍድ ሊግዛንስ ዲግዝ እንቅ ወነ አነ ይናጙ ይነ ጽፈሸድ ኻትኑን!
አመልማል ተድላ
ሚስኲሩም 30/2019
