ኹረ፣ አልተነዝመ አልቨ እጅር ኹርዝቁ ሲርይቁ ተምዝንጢስ በው ቃውሰድ ፃየቁድ ጛይ፡፡ እንዳይ ተምዝጥድ ጠራዘናንስ እድወ እጅር ናንዝ ሰራሽተቊዝመ ፍጥርዝቊ ማርፀንጥድ አሩሸነውድ የጝ፡፡
እጅር ኹር እጅር ናንዝ ሰራሽተቊ ገባኒስ ኹረ፣ አልተነዝመ ጝ አልቨዙ በንትድ እቻዘነውዙ አገነ ፃየው አቕሽም ሲሪቊ ተምዝንጢዙ አይነተ ፍልፍለድ ግነ ፍጥርቊ ፃጅድ አቐነውድ አርቕሽተው የጝ፡፡
ፍጥሩ ፃጀ ይሽተቊድ ቈሽ አየር፣ ብጥ፣ አቑ፣ እፅዋትዝመ ተከተከቁድ ጛይ፡፡ እንዳይቅ ፅበነው ቸልጛንስ ቈሽ እፍርደው ብጥ አይነተ በንዘተ የጝ፡፡ ብጥዙ እፍርድንድ ቺተቺተቊ ምላሰንጥዝ ብሽትጠ ቸለው አቓንስቅ እጅር ኹር ፍጥሩ እፍርዘነ ሰራሸነውዝም አነ እጅር ናንዝ ሰራሽተው እፍርዘነ አሩሸነውዝ ጊቭርትድ ሊጊሰናንስ ሰራሻጙ ችጝሸኩ፡፡ ቺተዝም ፍጥርት ፍጥሩ ጒደነዝ ታኽንኽነነው ቈሽ እጅር ኹርዙ ትኽነዝም አነ ፍጥርቱ ትኽነድ ሊሚሰነው ጋብዝ ፃየው ችጘርድ አጉረው የጝ፡፡
ብላ ክልሊዝ ለርን አኰ ምትዙ ከሰተ ኻለይስ ዚልቀተ እፍርትዙ ኻለየኒስ ላዊዝመ አይነተድ አርሽነይዙ ዚርፍድ ሊጊሰነው የጝ።
አምረ ጨቨቅ ጫረዙ ስወድ ኻየነውዝ ሊንቱ ጊቭርዘነው ችግሰይዙ ከረነ ጉግ አየውም። ኹረዙ ወይትነይድ ደድሰናንስም ቸልሳውም።
ሚንወዙ ሰቭድ አሩሸነውዝም አምረይዝ ሸውን ጊቭርዘነውዝ ጊቭርትድ ሊጊሰነው ችግሰይዙ ከረነ ጉጉም የጝ።
እኒንም ጒዝጝ ጨጢዙ ኹረዙ ወይትነይድ ደድሰነዊስም ከስጘ ቈሺተተ ጥወር ችጝንጥጘም ከቨኩ።
ወይ ኽምረ ብሄረ እቅ ጭሰጭሰኒዝጘድም እኔንት ቲግቭሩ ጻቨናንስ ሰራሽተው ሰቪዝም አኰ ሺኽ ኼክታርስ ንየ ዝቨ ሚንወዙ ሰቭዝ እፍርዳጙ ችጝሸኩ።
ጋዝጊቭለ ወረደይዝጘድም ዲቈው አምረይዝ ሚንወዙ ሰቭዝ እፍርዳጙ ዊነው 647 ሄክታር ዝቨይስ አይሪዝ 450 ሄክታር ዝቨ ቈሸነውዝም እፍርዳጙ ችጝሸነውድ አርሽነይ ጽ/ጝንድ አርቒስኩ።
01 አስከተመ ቀቨሊል ችዝጝ ጥብንደነውዝ ሲዘ እምትዝ በውግ ሚንወዙ ሰቭ ሰራሸነው ኪርመቁድ አት ቻላቸው መለሰ ነንቱ ኮሪዝም ኻትመዙ ዝቨ ጅቨነዊል ችጘጘ ጋልፀቁ ጒዝጨተድ “እንቸን ሚንወዝወ ዝቨሸን እየይዝ ጥቭንደነውዝ የጝ ሰራሸውድ ሰቭድ ኪርመት ሲዘ ምት አኩ” ይጝኩጙ።
”ቺተቺተቁ አትክልትዝመ ፍረምረም እፍርዛጙ የጝ። ድንች፣ ስውርጠዝመ ኻምረ ቲክልኩን ሚንወዙ ሰቪዝ ጋብዝ ጋብ ቢቅ ጅቭ ቀልቫጙ ጥቕዛጙ ሰራጨኩን። ሰቭድ ኪርመት እግርገ ኻትመዙ ጝን ጅቭ ባንኪል ዊትቁ ቁርሻን ተነነው ቸልኩን” የነውዝ ዊግትጝኩጙ።
ላየ ሚንወዙ ሰቭድ ሰራሽጛጙ ችጝሸቁድ ቈሽ ጒዝ ጨተ አበራው ተስፋው አጛንድ አትር ሚንወዙ ሰቭ ሰራሸው እጅሪዝ ኽየውዝ ልውጠ ቓለነው ቸለው አቐነውድም ዊጝትጘኩ።
“እንዝ ሚቅ ውርም ሰቭ እጀርም ዊኑን ቺዝጝ ጥብንደነውዝ ጻረው ስውርጠ፣ ድንች፣ ኻምረ ቲክልንኩኑን። ሰቭድ ዲቈው አምረይዝ የጝ ሰራሸነው ኪርምነውድ ነን አቓንድ ፈራቐው ዝቨ ጅቨነውዝ ፍራትዝ ሰራሽናጙ ችጝሽነኩን” ይጝኩጙ።
“ነን ቺዝጝድ 14 ሺኽ ቊርሻን የጝ ጥብንድ ሰራሸውድ ጥቅለዝ ሰቪዝ 65 ሺኽ ቊርሽ ፈን ጻቭኩን 10 ኩንታል ጻረው ስውርጠ፣ 100 ኩንታል ድንች እኒዝጘም ኻምረ ችጝጭር የር ኻየኩን” የነውዝም ጝታ ምነነድ ጋልፅጝኩጙ።
አውማው እጅርድቅ ሚንውትዝ ሰራሸነው ቸለውዜ ፈን ችጘው አቐነውድም ማኽርጝኩጙ።
ጋዝጊቭለ ወረደ አርሽነይ ጽ/ጝን አትክልትዝመ ፍረምረዙ ጓነ ቃወተ አት ብርሃን ተፈራ ጝታ ጋቢዝ ጥቅለ ወረደይዝጘድም 1 ሺኽዝ 1 ላ ሄክታር ዝቨ ሚንወዙ ሰቭዝ እፍርዘናንስ ኻለይ ጻይሽት ሰራሽታጙ አቐነውድ ጉይጝ እኒንም አምረይስ አምረ ኽየው ልውጠ ቓሊሣጙ አቐነውድም ጉይጝኩጙ።
“ጥቅለ ይነ ወረደይዝጘ ዊነው ሚንወዙ ሰቭዝ 647 ሄክታርዝቨ አይርዝ ቈሽ 453 ሄክታር ዝቨ እፍርዘናንስ ኻለይ ጻይን ሰራሽናጙ ችጝሽነኩን። ጥቅለዝ ቺተቺተው ሚንወዙ ሰቭዝ ላው ሺኽ ሄክታርስ ንዝቨየ እፍርዘናንስ ሰራሽናጙ የጝ ችጝሽነውድ ፤ ቺተዝ ቄተስመ ወነ ዊርቨይስ ላውም አቑ አርወ እጀው ቅብራየጘ ጻቨናንስ ሰራሽነው ሰቭዝ ኽየው ፈን ችጘነው ቸልን ኩኑን” ይጝኩጙ።
“ጥቅለዝ እንቅም ቀቨሊየኒል ዲቈው አምረይዝ ቺዝየው አቕንቲዝ ሰቭ ሰራሽናጙ የጝ” የነውዝ ነንቱ ኮሪዝ እንቅም ጒዝ ጨተድ ጝቕመቱ በንዝ ሰራሻጙ ችጝሸጘም ጋልጽጝኩጙ።
አመልማል ተድላ
መስከረም 30/2019
