ግሸን ቱሪዝምዝመ ኢኮኖሚዙ ዲቭየ!

ሚስኩርም አርፈዝ ብላ ክልሊል ኪብርሸቊ ኻይማኖትዝመ ባኽሉ በለኒስ ቃውሰትነይዝ ጒይሽትረይ ግሸን ደብረ ከርቤ ማሪያም። ደሴ ኻትመይስ ሰሜን ምዕራቭቱ 76 ኪሎ ሜትር እክልትል ችጝሽረይ፣ ፍጥሩ ዝቨ ሚልክዙ ጎይኒስ ኪርም እቀጘ እምጥጝዝረይ “ዳግማዊት ኢየሩሳሌም” ይሽትራጙ ጭጝሸች። ጝር ጅሉዘድ ቀልቅለዝ ኪብሽረይ፣ ላው አፀው ቢርዝ ጭቚ ኪብየነይ፣ ሚስቅልዙ ቅርፅ ፃየው አበይል/ ቲረይል/ ጎይረይ፣ ስፍረድም ፍጥሩ ገፀ በረከትዝመ ሲጘዙ ማሕደር ፃቭሽት ፊስሽተኲ።

አፄ ዘርዓ ያዕቆብ ዚምነ መንግሥትዝም ኢየሱስ ክርስቶስ ሲቅልሸው ግማደ ሚስቀልድ ስናርቲስ ተር ግሸን ደብረ ከርቤቱ አበይል እግዚአብሔር አብ ምከንድ ፈወው እልትድ አስክዘናንስም ሚስኩርም 21 ግሬዝ አምረ ጨቨቅ ላ ሽኽዝ እጊተቊ አምነጥዝመ ለውርደጥ ስፍረይዝጎ ቃውጘኲ።

ግሸን ደብረ ከርቤዙ አበድ ኽየው ሚንፍሱዝመ ሲጘዙ ፃጀ መፃፈ ጤፉት አፄ ዘርዓ ያዕቆብ ዚምነ ምጝግሥትዝ (1426 -1460 ዓ.ስ) ፃፍሸው ኪብረው ብራነዙ ሰነድ የጝ። አደረድም/ንጉስ/ ግማደ ሚስቅልድ ኢትዮጵየትጎ ነስጘት እግርገ ራእይዝ “ያንብር መስቀልየ በዲበ መስቀል” (ይሚስቅልድ ሚስቅል ቅርፅ ፃየው አበይል እቑር) የው መለኮትዙ ትዛዝዝ ሚስቅልዙ ቅርጽ ፃይረይ ግሸንቱ አበድ ችጝጘት እጝጎ ግማደ ሚስቅልድ ሚስኩርም 21 ግሬዝ ስፍረይል እቚርⶔ።

እን ኰርዝ አደረድ ሚስቅሊዙ ተረተርንድ፣ ኽግዝመ ደንብድ፣ ስፍረይዙ ቅድስነድ ቀርቭርዙ ብራነይዝ ፃፍዝጝ ሳንድቁዝ ኻይሽትጠ ፃቭⶔ። “ጤፉት” የው ሽⶔድም መፃፊዙ አትረድ፣ ቅድስነዝመ ፃፈፃፍንዙ ጥቨቭድ ሚሪየው ነኳን አሽ ግሸን አበይል ሚስጥርድ ኻይሽት ፅበው አጉረው ኻግርዙ ቅርስ የጝ።

ግሸን ደብረ ከርቤዙ በልድም አፄ ዘርዓ ያዕቆብ ዚምኒስ ኪርም እብለውትዝ ኪብርሻጙ ተረው ኽፅሙ ኻይማኖትዙ በል የጝ።

እን ግሬዝም በውግቲስ ኪርም አምረዝ አምረ ዊትዊዝ 350 ሽኺስ (350,000) ኪርም 500 ሽኽዝ (500,000) ንየ አምነትዝመ ለውርደጥ ችጝሸው አቐነውድ ብላ ክልል ባኽል ቱሪዝምዝመ ስፖርት ቢሮዙ ሚዝረድ ቓሊሰኲ።

ቢሮድ ፃቨው ቃውሰ አስልሽትዝም እን አምረይዝ ሚስኩርም 21ዝ ኪብርሸው ግሸን ደብረ ከርቤቱ በልድ 2 ሚሊዮን ኻግር አቒዝመ ቢዘቱ ለውርደጥ/ አምነጥ ለውርድጝኩⶔ።

እኔንም ክልልድ በጀት አምረይዝ አቭኑውዘናንስ ኻልየው 45 ሚሊዮን ኻግር አቒዝመ 168 ሽኽ ቢዘ ኻግርዙ ለውርደጢስ አጉረው ችጘርድ ፃየነው ቸልኲ።

እኒስ ሚቅ ዊነው ኻግርሸንቱ ዲግዙ ድርቑትንዝ ቱሪዝምዙ ዚርፍድ ቓዝቕዝ ዊንሽም ነንቱ ኰሪዝ ዲግ ኲንንዙ ፃጝትድ ቺዝያጙ ተረነዊዝ በለን ዲግዝ ኪብርሽጝ ዲቁጝኩⶔ። አንፃሩ ዲግ ፅበነውድም ንቕፀቊ ለውርደጥ ችጝሽጠጘ ፃቨነውዝ ጅውነይዙ ኢኮኖሚድ ነቃዝኩ።

እን በልድ ዲግዝ አሽት ለውርደተድ ዲግዝመ ቀንትዝ ኪብርዝ ዲቈነውድ ስፍረይዙ ሚንፍሱነይዝመ ገረዱ ወየድ ንየስ ሸውኲ።

ክልሊዙ ባኽል ቱሪዝምዝመ ስፖርት ቢሮዙ ሚዝረይዝጘድ ጅውነይዙ እቀኽቭርድ፣ ምከንሽንቱ ፅረጽርሽንዝመ ፃውተይዙ አካለን አቭርድንዝ ሰራሽጘው ሰቪዝ በልድ እብለውትዝመ ዲግዝ ኪብርሽ ዲቈነው ቸልኲ። እኔንም ቱሪስተንዝ አምንሰተዝመ ምቸው ቱሪዝምዙ ችጝሽተነ አቕ ችጝሽኲ።

ግሸን ደብረ ከርቤ ኻይማኖትዙ ማዕኸል ጭቚ አቒጝቀት አጉረተ ቱሪዝምዝመ ኢኮኖሚ ፍልውልወዙ ሲሪየም ጚ።

ግሸንትጎ ፃጘቊ ላ ሽኽዝ እጊተቊ ለውርደጥ/ አምነጥ ችጝዘናንስ ፍልውልወቊ ኽዝቭዙ መኪንጥድ ትራንስፖርትዙ ዚርፍድ አጉረውዝ ነቃዝጘኩ።
ቺተዝ ቈሽ ደሴ ኻትመ፣ ወልዲየስመ ጅውነይል ፅበቊ ወረጢል ችጝሸቊ ሆቴለን፣ ኒግርንዙ ማዕከለንዝመ አቭን ለምረነ ስፍልድ በሊዝ ሸወጭ እቻቐውዝ ፃይሽጘኲ። እኔን ቈሽ ሆቴልዙ ፃጀጒይጥ፣ ለውርሰጥዝመ ኹረዙ ጝንጥ፣ ኻይማኖትዙ አልብዝመ ናነ ጥቨቭዙ ፈንጥድ ቅየነውዝ እቀኽቭርድ አጉረው ጥወር ችጝጘኲ።

ጥቅለዝ ግሸን ደብረ ከርቤዙ አምሩ በልድ ኽዝቭዙ ሚንፍሱ ተምዝትድ ኻየነዊስ ከስጘ ጝር ጅውነይል ችጝሸቊ ኻትምጥድ ኒግርንዝመ ቱሪዝምዙ ፍልውልወድ ጒሰጒሰው፣ ኢትዮጵየቱ ባኽሉዝመ ሲⶔ እሴተንድ አልምዝ አርቕሽትጘው ኻግሩ ፃጀ የጝ።

ወይትጘድም ቱሪዝምዙ ዚርፊል ትኩርት ይውሽት ሰራሸነው ቸልሻን ንቕፀቊ ግሸንት ተከቊ ቱሪዝም ዚርፍዝመ ኢኮኖሚድ ነቃዘቊ ባኽሉዝመ ኻይማኖትዙ ቅርሰን ችጝሽጘኲ።

ወይቱ ሲጙዝመ ባኽሉ ስፍልድ ግሸን ማሪያምትጘ አጉረተ ለውርደጥዙ ችጝሸነ ፃቨናንስም ሲሪዩ እፍርትዙ ፈጣቕንድ ፈራዘነው ባኽልዝመ ናነ ጥቨቭዙ አርየድ ፈራዘነው እንዝጘም ፅረፅርሸተው ቱሪዝምዙ ሚስምር ጸጣቐነው ባኽል ቱሪዝም ዚርፍድ ሚሪሸቊ አካለንጅቅ ፅረፅርሽንዝ ሰራሽጠ ጥውሸኩ።

ሳምራዊት ግርማይ

መስከረም 30/2019