እግዝግዘነው ቸልሽየው ኢቦላቱ ሽወድ!

ኬንያ ኪርመነ ጊዝዝ ኢቦላቱ ፅውዘ እትለነውድ ደድስርኩች።
ነንት ኰርዝ ዲሞክራቲክ ኮንጎትል ፋጥርሸው ሽወድ ዲዝጝሽየው ኢቦላቱ ዚረድ ቡንዲቡግዮ አቓንድ ውርም አይንት ደድሽተው ክትባት ዊንም ኽክምነ እጀውም።

አቕሽም ሲዘ ክትባተን ሰራሽትጛጙ ችጝሸቊ አጘንድ እንዛጊስም ላውድ እጅሪዝ ሙከረ ፃቭሽተነው ኪርመውድ ኻምል አርፈይዝ የጝ።
እን ሽወድ ዲሞክራቲክ ሪፐብሊክ ኮንጎ ንቕፀው እጅርዙ ሩሔ ዲቁሰው አቓንድ ኬኒያትልም እትለነውድ ጋልጽሽትኲ።

ኬንያቱ ትኽነ ሚኒስትር አደን ዱዌል ጋልፅጘጘድ ላው እርፍዝ በውግ ዲሞክራቲክ ሪፐብሊክ ኮንጎ ኢቦላዝ ጽዊት ንቕፀቊ ኽክምነ ፃቫⶔ ዊነው ላው እጅር ዲቈው ቅዳን ሲንቭት አይንተ ኻትመ ናይሮቢ ችጘጘ ጝሩሔድ ዲቁኲ።

ኬንያቱ ትኽነ ኻይን ሚኒስቴርድም አይንቲስ ኪርም አውሮፕላን ፈወነይዝመ ድበር ቀቨሌኒል(ዲቈነይል) ቲክንክነ ፃቨነውዙ ሰቭድ አትርዘነውድ አርቒስኲ።

እን አምረይዝ ዲሞክራቲክ ሪፐብሊክ ኮንጎትል 4,000 ንየ እጅር ኢቦላዝ ክረው አቓንድ እኔንም አልምዝ ሊጘትረ ቅወተ ሽወ አቕ ሚዝግቭሽኲ።

ዲሞክራቲክ ኮንጎ ግንቭት አርፈይዝ እን ሽወድ እትለነውድ አውጅረት እጝጎ ኡጋንዳትልም ሊጘ እቅ ክርጘጘ ሪፖርት ፃቭሽትኲ። አቕም አልምቱ ትኽነ ድርጅትድ (WHO) ንኻሽ አርፈይዝ ኻግርሸን ፅውዘይስ ናፀ አረጘ አርቒሳንድ፣ ከረከረው እን ሽወድ ዲሞክራቲክ ሪፐብሊክ ኮንጎትል ግነ አጉረው ተጊል ችጝ ዊኑ።

ኬኒያትልም ኢቦላዝ ክረው እጅርድ ዲሞክራቲክ ኮንጎትል ፅዊት ዊን ዋጥረው አቓንድ ጝጅቅ ስልክዝ ዲምቅን ፃየቊ 28 እቅድ ቺዘነውዝመ 23 ሻቘ ፕሌኒል ዊነቊ እቅድ ቲክንክነ ፃቭሽትጛጙ ችጝሽጘኲ።

አልምቱ ትኽነ ድርጅት ነንቱ ኰርዝ ሽወይዝ ቘይሸቁ 8 ሽኽዝ 5 ላዝ 44 እቂስ 4 ሽኽዝ 114 ጝተ ሩሔድ ዲቈጘድ አርቒሰው አቓንድ 1 ሽኽዝ 976 እጅሪል ኢቦላ ኪርመነ ጊዝዝ ሚዝግቭሸውድ ዲሞክራቲክ ኮንጎትል የጝ።
እን ፅውዘድ ፈራቓጙ ፅበውድ ጣይትንዝ ቘይሸቊ ኻግራኒል ፅበው ቲክንክነዝመ ምርመረዙ ቢተዝ አቓንድ ቘጨይዙ ምፅነድ ንየስ ሻⶔ ችጝሸኲ።

ምስራቅቱ ዲሞክራቲክ ኮንጎ ፅቃ እምትዝ ፃጝሽተው ጣይትንድም ሚሊዮነንዝ እጊተቁ ዜገን ክርጘዝመ ስድትዝ ፃቨው አቓንድ ትኽነ ኻይንዙ ስረተንድ ኻይሰናንስም አቅምድ ጊግቭኩ።

ሳምራዊት ግርማይ

ሚስኲሩም 30/2019