ገነ መልወሲጝቀ ልኮ ኳስዙ አንክርሰው ጝቸልትድ ቓሊሰነው ኪርም ዊኑ አቕም ፅጭ ለው ጝምትዝ አጋልዘው ዶክራይንዙ ማዙ ችግሰዝ ሊግዝትዙ ሆርሞንዙ እጅጝት አጋልዙ።
ኽክምነድ ኪብረው አቐነዊዝ አርጀንቲናዝቊ ክለቨን ፈንድ ሺፍነናንስ ቺግርሽጘው ኮሪዝ ስፔንቱ ባርሴሎና ጝምነነድ ቓል እቻቐው ኽክምነዙ ፈንድ ሺፍነነውዝ አርቕሽተተ አካዳሚድ ላ ማሲያ ፊሱ።
ባርሴሎናቱ ዊርቀሹ ዚምን፡ 2004 ባርሴሎናቱ አይነተ ጓነይል ዋርደነው ኪርመውድ ሜሲ፣ ዲቈቁ 17 እምታንስ አቒዝ አልምቱ ልኮ ኳስድ ንየትነይዝ እግዝግዙ።
ሩድንዙ ንየትነትነይ፡- ባርሴሎና ጅቅ 10 ላሊጋትቊ ዋንጨጥድ፣ ሲዘ ቻምፒየንስ ሊግ ወንጨንዝመ ንቕፀቁ ኻግር አቒትቊ ወንጨ ኻቕኩ።
ጝሉዙ ክቭር መዝገቭዙ፡- ሲጘዝ ንቕፀቁ ባሎንዶርዙ ክቭር ችጘው ጝሉ ዋርደተ የጝ።
ብሄሩ ጓነዙ ፈተነዝመ አልምቱ ወንጨ ክቭር፡ ሊግዘቊ እምታንዝ ብሄሩ ጓነይጅቅ ዋንጨ ጉየቅ የነውዝ ሊቨሊቭንዝ አጋልሽታጙ ዊንሽም አሰነይዝቊ እምታኒዝ ጋጽድ ላውጥኩ።
ኮፕ አሜሪካ፡2021ስመ2024 አርጀንቲናት ደቡብ አሜሪካቱ ሻምፒዮን ጻቭኩ።
ኳታርቱ 2022 አልምቱ ወንጨ፡- አርጀንቲናት ቃው 36 እምታንዝ እክልደው አልምቱ ወንጨድ ጉየነውድ አልምቱ ልኮ ኳስ ዊትርቅቱ አጉረተ ዋርደተ የው ሽጙድ ንቕፀቁድ ቲስመምጘኩ ።
ሜሲ ጝዋለይል ጽበው ቺትን እትልኒዝ፡- ኳስ ጻይ ውጥየነውዙ ቸልትድ እጥልቃን ኳሰንድ ስቅኒል ፈውሰነው ፍጥሩ ቸልትዝ አርቕሽተኩ።
ገነ መልወ ሲጝቀ ልኮ ኳስዙ አንክርሰው ሲጘ ኻትሸነድ አልትሽም ጝዋለይስ ቢዘ ኵነው ኒግርንዙ ጭሰጭሰንዝመ ስፖርትዙ ኢንቨስትመንት አይር መድራቕ ብዛጙ ችጝሸኩ።
ፎርብስ ይፈ ጻቨው ሚዝረይዝጘም ጝጻጀድ 1 ነቁጠ 1 ቢሊዮን ዶላር ጅመይል ችጘው መሲ ልኮ ኳስዙ ኻተነይስ እግርገ እቻቐውዝ እቻቐው ስፖርቲስ ዳቒጝቀ ጻጀ ጉሬዝመ ጭሰጭሰተ አቕ ቃጽለው ጒደነድ ቅይስኩ።
ክለቭዙ ወነዝመ ልኮ ኳስዙ ኢንቨስትመንት፡-
ሜሲ ስፖርት ዳይሬክተርነይስ ዊንም ሳልጥንዘተነይስ ኽሽ ክለቭዙ ወነ አቐነውድ ማርጽኩ።
ጝውሳኒይዝ ምላሰን ይዋንድም ሳልጥንዘተ ሸወጭ ጨቨቅ ፈንዝመ ጨንቅሽን አቒል ጽበው አቐጘ ወነ ግነ ክለቪዙ ጥቅለ እስትራቴጂኩ ሚረድ ሲግረይል አቕ ቃወው አቐነውድ ጋልጽኩ።
ሲዲ ኤልዴንስ፣ ስፔንስ ሊጘትረ ዲቪዚዮን ቲክርክረው እን ክለቭድ ሜሲ ወንነይዝ እግዝግዘው አቓንድ ክለቭድ ላሊጋ ትጐ ሊግዘነውዝመ አትርዘው አይነተ ቲኩርት የጝ።
ዩኤ ኮርኔላ ስፔንትል አኮትረ ዲቪዚዮን ችጝሸው ክለቭ አቓንድ ውሸቭል ዋርደጥ ሊግዘነዝመ ሳልጥዘነ አቕ አግልግለኩ።
ዲፖርቲቮ ኤልስኤም ጝጻምረ ሉዊስ ስዋሬዝ ጅቅ አቐነውዝ ኡራጋይትል ሲሪየው ክለቭድ አቓንድ ቃውሰተ አምረይዝ 3 ትረ ዲቪዚዮንዝጐ ሊግዘነው ቸልኩ።
ኢንተር ማያሚ አሜሪካቱ ክለቪጅቅ ጽየው ውሊዝ ሲሪየ ዋርደተነይስ ሲነቭሻንድ ክለቪዝ ዊስንሸው ችጘሪዙ ወነ አቐኩ።
ውሸቭሊዙ አካዳሚስመ ሜሲ ካፕ፡- ሜሲ እፈር መልቁዝመ ውሸቪሊዙ ልኮ ኳስ እፍርትል አውግረው ኮርዝመ ኢንቨስትመንት ጻቨኩ።
ቲክርክረይዙ ፍራትድ፡- ጝታ እድምድ 16 እምትስ ሳ አቐቊ አካዳሚየንዝ አስልሸው እን ቲክርክረድ 20 25ዝ ሰውጠ ጓንጥዝ ኪርምሸው አቓንድ ነንቱ ኮሪዝ 16 አርቕሽተቊ አካዳሚያኒዝጐ ሊግዝኩ።
ሲትፍሸጥ፡- ባርሴሎና፣ አትሌቲኮ ማድሪድ፣ቼልሲ፣አርሰናል ፣ ኢንተር ሚላንስመ እፈርትነይዙ ክለቭድ ኒዌልስ ኦልድ ቦይስ ችጝሽጘኩ።
ልኮ ኳሲስ ቢዘ ጽበቊ ኒግርንዝቊ ኢንቨስትመንት ሜሲትቊ ኒግርንዝቊ ችብረንጥዝመ ከቨጥድ ቺተቺተቊ ዚርፈኒዝ ፊጣሸቁ ጛይ።
ሆቴልዙ ዚርፍ ሜጄስቲክ ሆቴል ጓነጅቅ አቐነውዝ ኢቢዛስ ኪርም አንዶራትል ጽበቊ ዘናሸነ ሆቴለኒዙ ወነ አቓንድ ሆቴለንድ ሜሊየ አቒል ጭሰጭሽትጘኩ።
ሪል ስቴትዙ እፍርት፡- እኹርሸው ኻትመይል ፓራና ዊርቨ ጋቢል ችጝሸው 24 ጽበነ ጝንጥ”ካራስኮ ኤም”ፕሮጀክት ጻጝዘኩ።
ኹረዝመ ሬስቶራንትዙ እጽቊጽቈ፡- ስፔን ካታሎኒያ ጨፈንድ ብዛጙ ችጝሸው “ኤል ክለቭ ደላ ሜላኔሳ” ሬስቶራንት አቒል ላብጠ ሰራሸው የጝ።
ስፖንሰር ሺፕዝመ አልም አቅቨ ብራንደን፡- አይጥ አይጢጅቅ ጻቨው ሩሄዙ ዚምን ቲስመምንዝመ ዝየነዝቊ ጐዘ መዛኒስ አውግረው ስታሊ ጅቅ ሰራሸው “ማቴ”ዙ ዝየነ አኽቭሽንድ ጋልጽሽተኩ።
ጥቅለ ሊዮኔል ሜሲ ዋርደተነይዙ ጝሩሄይዝ እግርገም አቕሽ ልኮ ኳስዝመ ኒግርንዙ አልም አቒስ አውግረው ጥቕዘ ፋጥረተ አቕ ቓጽለው አትረው ጽረድ ኵንኩ።
አመልማል ተድላ
ሚስኲሩም 30/2019




