ኤልኒኖ ወይቱ ቈልቊ ጅውንጢል እጅርዝመ እንሰስዙ ሩሔል አጉረው ጥቕዘ ጭሰነውድ ጋልፅሽቱ።!!

ሲመይ ስወድ ጊቭ ዝቨ ይዝርኩች። ጒዝጝ ጨጥ ጝተ ዝላድ ችጚጝቀት፣ ፊዝጘው ኽወድ ፍር ፍርዚጝቀት ኰረዝ ቃጥልሽ እዳቕኩ። እንዝም ሰሃለ ሰየምት ወረደዝመ ዝቛለ ወረደዙ እቀኽቭርድ ንጭ ጝተ ናንድ ሲመይዝጎ ፈጣቕጝ ከቨው ዊግን ደምዝጘኲ።

ወይኽምረ ብሔረ እቅ ጭሰጭሰኒል ሰሃላ ሰየምትዝመ ዝቛለ ወረድጢል ፋጥርሸው ስወዙ እጅጝትዝመ ኽርዝ እቀኽቭርድ ኹረዙ፣ ዝይሽተው አቚዝመ እንሰሰ ኹረዙ እጅጝትዝ አጋልሽትኩ።

ፊተው ኽወድ ዝቨይስ ጒጝቀት ይዛንስቅ፣ ዚምነንዝ እፍርዝጘው እንሰስዙ ፃጀድ አቢታⶔ፣ ጅውነይዙ እቀኽቭርድ አጉረው ችግሰድ ዲቁሳጙ አቐነውድ ጋልፅሽትኲ። ሊጘ ወረድጢል 140 ሽኽዝ ንየ ዊግናንዝመ 10 ሽኸንዝ እጊተቊ እንሰስ ደርተው ኹረዙ ከቨ ተምዘቊ ጛይ።

ሊጘ ወረደይዙ ፅበጥድ ልብስጘንድም እን አምረይዙ ኽርድ እኒስ ሚቅ እትለቊ ዚምነኒስ ቺትየው ጒደነዝ እጅርዙ ሩሔዝመ እንሰስዙ ፃጀድ ኻደገይል ማለው አቕ ችጝጝኩⶔ።

ሰሃለ ሰየምት ወረደ 011 ቀበሊዙ ፅበተ አት ምስጋናው ምህረቱ ዊግትጘንድ 23 ፅምር ዝቨይል ፊዝጘው ኽወድ ፍር ፍርዚጝቀት እዳቐነዊዝ እልቱ ኹረዝመ ተረዊዝ ፊዝጘው ዚረ ብጝኩⶔ።

ኹረዙ እጅጝትዝም 10 ፍጭር በቊድ አት ምስጋናው፣ አርየይዝ አልስን ቂሸው እንሰስ ብሽተነውድ ጋልጽጘኲ።

“ነን ኹነው ብንኩኑን፤ ይና ሩሔድ አጉረው ችግሰይል ሊቭኲ፤ እንዝጘም እንሰስዙ ፃጀድም ቃዚ ችጘው ዊግን ብን ይና እልድ ቓላጙ ላውዝ ላው አቢትኲ” ይጘኲ።

ዝቛለ ወረደይዝጘ 011 ቀበሊዙ ፅበተ ዊዝር ወርቅ ዊግትጘንድ “እትለው ኽሪስ ምላሰን እፈር ግድርድጛⶔ ክንድጝ ጝኒዝጎ ፊርጛጙ የጝ። ፊዝነዊስ ላው ፍርም ችጚነቅም፤ ይና ቅሚዝኮ አቐው ፃቀ ችጚነቅም” ይጘንድ፣ ነንቱ ሰቲዝ ጝተቚሪጅቅ ፊረነ ብጝ ጭንቅቲል ችጝሽጘኩ።

ኤልኒኖዙ ጥቕዘዝ ፋጥርሸው ኽርድ ሰሃለስመ ዝቛለቱ ኽዝቭድ ፊዘው ኽወድ ጥቅለ አርወ ይዊጝቀት እዳቕኩ። ቓለ ነየጥድም ጒዝጝ ጨጥ ፊዝጘው ኽወድ ልየዝ አቕ እዳቐነዊዝ  ምጝግስት ደርሰውዝ ችጝየውዜ እጅርዝመ እንሰስዙ ሩሔድ አጉረው ኻደገል ሊቨነውድ ኻስቭዝጝኩⶔ።

ሰሃለ ሰየምት ወረደይዝጘ 2018/19 ጊቭርትዙ ዚምንዝ ሽፍንሸው 9 ሽኽዝ 210 ሄክታርድ እጅርዝም አነ እንሰስዙ ኹረዝ ችጚጝቀት ይዘነውድ አርሽነይ ጽ/ጝንዙ ሚዝረድ ሚሪየኲ።

ወረደይዙ ቲክነተ ጭሰጭሰተዝመ አርሽነይ ጽ/ጝንዙ ዲቈተ አት ማስረሻ መኮነን ጋልፅጘንትጘድ፣ ፋጥርሸው ኽርድ እጅሪስ ከስጘ እንሰስዙ ፃጀይል ቲክንዛጙ ፅበው ችግሰድ አጉረው የጝ።

ዲቈተይዙ ጋልፅኒዝጘድ ማፅወ ብጣ 66 ሽኽዝ ንየ ኽዝቭ ግድርዝ አጋልሽታንድ፣ 10 ሽኽዝ ንየ እንሰስ ክርጝኲⶔ።

ተከተከዊዝ ዝቛለ ወረደልም ጫረይዝ ኽወዝ ሽፍንሸው 10 ሽኽ ሔክታሪስ 76 ሽኽዝ ንየ ኩንታል ጊቭርት ችጘናንስ ኻሊሽት ዊንሽም 27 ሽኽ ጭቚ ችጝሸነውድ እቀኽቭርድ ኹረዙ ወይትነይድ ደድሳየጘድ ፃቭኩ ይጘንድ ወረደይዙ አይነተ ጭሰጭሰተ አት ሚሰነ ታፈረ ጋልፅጝኩⶔ።

ነንቱ ሰቲዝ ሴፍቲኔትዙ ከቭሽተጥድ ቈሺጝቀት 55 ሽኽዝ ንየ ወረደይዙ ኽዝቭድ ደርሰው ኹረዙ ከቨ ተምዘው አቐነውድ ሚሪጝኲⶔ።

ወረደይዙ እቀኽቭርድ ዝቨይል ቅብስጘው ፍርድ ጭቚ አቒጝቀት እጝቅ ጝነቊዙ ኻይልዝ ዚምናንዝ ፍርደው ጝተ እንሰስ ፃጀድ ግድርዝ ብጘጙ የጝ። ፅበው ወረደይዙ እንሰስ ፃጀይስ 11 ሽኽዝ ንየድ ክርጘንድ 40 ሽኽዝ ንየድ ማዕኸሉ ጎንደርትጎ ሲድሽጘጘድ አት ታፈረ አርቒስጝኩⶔ።

ሊጘ ወረድጢዙ ቃወጥድ ጝተ አቅሚዝጘድ ችግሰጢዝ እክሰ ችጘናንስ ልቕርድጛⶔ ችጝሽጘኲ።

ሰሃለ ሰየምት ወረደዙ ቲክነተ ጭሰጭሰተዝመ አርሽነይ ጽ/ጝንዙ ዲቈተ አት ማስረሻ መኮንን፣ ምጝግስት ሰቭተተይስ አኽቭሸው ጊንዝቭዝ 291 አቅም እጀቊዝ ጥር ጅቭሽተንድ፣ ከቨጥ ድርጅተኒስ አልተው 12 ኩንታል እንሰስዙ ኹረድ ትንዘነውዝመ ክትቫትዙ ዝምረድ አትር ቃፅለነውድ ሚሪጝኩⶔ።

ላየ ጋብዝ ዝቛለ ወረደይዝጘድ ፊስሽትጛⶔ ፅበቊ እክሰዙ ተግረንጢስ ቃውሰተድ ምጝግስት ሰቭተተይዝመ እቀኽቭሪዝ ማፅንፅንሸው ወየዝ አር አልሰናንስ ልቕረ ፃቭሽታጙ አቐነውድ አት ታፈረ ልብስጝኩⶔ።

እኒስ ከስጘም ፅበቊ ዋርብዙ ቅብረድ እጝጎይስ ቃፅቫⶔ ተረነውድ ሰቪዝ ፅጋ ፋጥርሽም ሚንወዙ እፍርትዝ ላው እክሰዙ ሚሪየ ፃቨነውዝ እጅርዝመ እንሰስዙ ኹረዝ አቐው  እፍርዘናንስ ሰራሽታⶔ አቐነውድም ሚሪሽኲ።

አቕሽም ሊጘ ወረጢል ፃቭሽታⶔ ፅበው ሊቨሊቭንድ እጅሪዝመ እንሰስዙ ሩሔድ ቲርፍዘናንስ አጡ አየውም። እንዝም እቀኽቭርድ አጉረው ግድርዝመ ኽርዝ ጫይርሻⶔ የጝ።

ሊጘ ወረድጥዙ ቃወጥድ ክልልዝመ ፌዴራል ምጝግሥትዙ አካለንዝ አርቒሰነውዝመ ቀሰው ፃቨጥ ድርጅተን ጥውጛንስ ሰራሽጛⶔ አቕሽም፣ እንሰስ ፃጀዝመ እቀኽቭርዙ ግድርድ ችበችብረናንስ አውማው ሚሪሸው አካልድቅ ደርሰውዝ ሊቨሊቭን ፃቨነው ጥውሻንትጘ ልብስጝኩⶔ።

ነንቱ ኰሪዝ እንዛይ ሊጘ ወረጢል ጭቚ አቒጝቀት አበርገሌ ወረደት ቈሽ ላጥ ወይቱ ጅውንጢል ኽርድ አጉረውዝ አጋልሽትኩ። ጅውነይዙ ፍጥሩ ፃጀድ አቢተነዊዝ፣ ዋርብ ይዘነዊዝመ ግፅ ጅውንጢልም ተከተከው ስወዙ እጅጝት ዊነነዊዝ፣ እንሰስ ጣምጘው ላፅጘው ብጝ ክርጘንድ እቀኽቭርድ ፃቨነውዙ አቅምድ ብ ናንድ አፅቭ ጎይኩ።

አቓንስቅም ምጝግስቱዝመ ምጝግስቱ አየቊ ድርጅተን እዳቐቊ እንሰስዝ ኹረዝመ ክትቫትድ ቃዝየውዝ አልሰነውዝ የውም አቅም እጀቊዝመ ኽርዝ አጋልሽተቊ እቀኽቭሪዝ እጅርነይዙ ከቨድ ፃቭጝ ዲቅንሸው እጅርነይዙ ኻደገይስ ፊስጛንስ ወረድጢዙ ቃወጥድ ጭጝን አልስጝኩⶔ።

የመስከረም 15/2019 ዓ.ም

ሳምራዊት ግርማይ