ኽርድ አጕረው ቖጨ ችጝዛየጘ ደይም አቕሽ ቲግቭሪዝጎ ጥወነው ጡሸኵ!

ይናኻግር ኢትዮጵየትል ጣይትኒስ ወርየው ኢሊኖዝ ምላሰን አጕረው ኽር አጋልድኵ፡፡ እን ኽርድ ቈሽ ወይ ኽምረት ተከቊ ጅውንጢል ‹‹ጽዊተዊል ጥቒረው›› ይሽታንትጘ ሚከረድ ንቒስኵ፡፡ ኽርድ ወይ ኽምረት ቈሽ ብላ ክልሊዝጘ ሰሜን ወሎስመ ሰሜን ጎንደር ጅውንጢል ፍራትዝ እትልኵ፡፡
ወይ ኽምረ ብሔረ እቅ ጭሰጭሰኒል ስሃላ ሰየምት ወረደ፣ ዝቋለ ወረደ፣ አበርገሌ ወረደስመ ጻግብጂ ግቨር ቀቨሊጥድ ኽርዝ ጣይተቊ ጅውንጥ ጛይ፡፡ ኽርድ አጋልዝጠ ቸለው አቐጘ ኻምል ኪርመነይስ ኪርም ምስራቅ አማራ ሜትርዮሊጂ ኤጀንሲድ ደግምግመዝ ጋልጸነ ይዋጙ ዊንኵ፡፡ እን ጥንቅቀድ ሚርየውዝ ግነ ጅውንጢል ይውሽተው ትኩርትድ ዊቱ አቐነውድ ቲክን ግቨር ሚሊዮኒል አልተቊ ወይ ኽምረትቊ ጽበጥ  አጕረውዝ ችግሰዝ አጋልድጝኵጙ፡፡

ኽርድ ፋጥርሸውድ ቈልቁ ጅውንጢል አቐነውድ ቲክን እንዛይ ጅውንጢል ጽበቊ እቅ ቈሽ ጭሰጭሽትጘውድ ኽይጠጘዝ እንሰስ ፍርዘነውዝ የጝ፡፡ እንሰሲስ ችጝጘው አለቨድ አሩሸነውዝ ጝታእልቱ ኹረድ ደድሰቊ አቕጛንድ ቈሺተተ በንድ ቻዘናንስ እንሰስድ ቅየነውዝም ጭሰጭሽተቊ ጛይ፡፡ አነጚ ንጭቱ ኽርድ እቂስ ዲቊ እንሰስድ ቃውስ ጝታሩሔድ ቢሰነውድ ቲክን ችግሰድ ወረው ጻቭኵ፡፡

ዚምናንዝ ፍርዝጘቊ እንሰስድ ላው ጫረዙ ኽርዝ ጝታበዊል ብጝኵጙ፡፡ ስድትስ ፊስን ጝታሩሔድ ዊንዘናንስ ጻቭሽተቊ ልቕርንጥድም ብጭቕ ሚከረ አጋልዝጛጙ ኽይጠጘድ ጅጊትጝ ይናጅውነይል ክርነ የቊድ ብጭቕ ጛይ፡፡ ጅውነይል ጽበው ጣይትንዝመ ከምሸቊ ኻይላንዙ ፍልውልወድ ቈሽ እንዛይ ሲድትሸቊ እንሰስዝ ላዘ ጥቕዘ አቕኵ፡፡
ነን ሚስኩርም ዝመ ጥቅምት አርፈይል ክርጛጙ ችጝሸቊ ፤ ላው ሊጘ አርፈ ዊነናንስ ግርቭ ብጝ ኮስየቊ እንሰስም ግርየ ሊምድጛጙ ክርጘዙ ሚረይል ጎየቊ ጛይ፡፡

እንዛይ ቀንሸቊ ጝእንሰስድ ጝእልድ ቓላጙ ቀምሸው እጅሪዙ ስነ እዘንድ ውርቑጠ አጢ የውድ ኻዝንሰው ገቨ የጝ፡፡ ይ እንሰሲጅቅ ዲቭጭጨ የው ጝን ዲቭ ኤሎሄ የው ኽዝቪዙ እግዘድም ዊቱ አየውም፡፡

ኽርድ ቢሰውድ ፍርዘተድ ፍርዘቊ እንሰስድ ጭቊ አየው፤ ጝ ስነ እዘንድ፣ ንጭስመ ተረቊ ጽቃ እምተኒዙ ጊዝድ፣ ኢኮኖሚዙ ችበችብርን በነውድ የጝ በውድ፡፡ እኔንት በው ኽዝቭ ቈሽ እኹረቊ ኹልድ ስነ ኹረዙ እጅጝትዝ አጋልደቊ፣ ጊቭርትነይስ እግርተቊ፣ ዴሞክራሲዝመ ቈሺተተ እፍርት ዋቕረናንስ አቅም እጀቊ ጻቨነውዙ ጋብድ ኽየው የጝ፡፡

እን ገቨድ ኽምረ ኽዝቪዝ ዊቱዝ ጽቃ እምተንዝ ጨቨቅ ተረው ሚከረዙ ኬለ የጝ፡፡ ችግሰድ ልብተው ቃወተ፣ ኽዝቭድ ሲርየ ጻቨው ስረት ቃውስ ሠራሸው ኹርዝመ ምጝግሥትዙ ጽረ ፋጥርሽየውዜ እኔን ዊትርቅም ቢን የጝ፡፡
ኽሪዙ አጋልዝንድ እኔንት ቑጠ አቕ ጽባጙ ምጝግሥትዙ ጋቢዝ ይውሽተው ትኵርትድ ጭቕጛን ዊቱ የጝ፡፡ ኻምል ኪርመው ኽሪዝ ንኻሽስ ኪርም ክረነው ኪርመቊ እንሰሲዝ፣ ዚረድ ፊዝጝ ኾነው ብጝ ኮስየቊ እቂዝ ጥቅምት ግቨሪል አሽ ‹‹ችግሰድ እክሰናንስ ኮሚቴ ጽርናጙ የጝ›› የው ቕልመዝ ንየ ተከው ሰቪስ ቢዘ ቲግቭሩ ሰቭ ሠራሽትየው አቐነውድ ኻዝንሰው የጝ፡፡

ጊዝ ይዋው ግድሪዝ ገነ ወረቂትል ኮሚቴ ማርጸነው እጅርዙ ሩሔድ ቓዛውም፤ ክርጘዙ ሚረይል ጽበቊ እንሰሲዙ ሩሔድ ዊሳውም፤ ነንም አሽ ምጝግሥት እቂዝ አቐው ከቨ ጉዥታጙ የጝ የነዊስ ላዘ አውን ችጝ ይውሽትጡ የዊዝ ሚዝረ ይውጠ ጡሸኵ፡፡ እንሰሲዝ አቐው ውርም ከቨ አልሰኵን ያንድ አዊንም ዊግነ ቓልሽትየውም፡፡ እን የነት እንሰሲዙ ግድሪዝ ግሪ እጅነቅም የነው የጝ፡፡ እኔን ቈሽ ፍርዝጨተ ኽዝቪዝ እዘንድ ኪለው አውንቲስቅም እትለቊ ኽሪስ ወሰው አጠጘድ ጻቨኵ፡፡
እን ኽሪዝ ውርቃጥ ሳልጠው ዊሰ ይወናንስ ሠራሸነው ቸልሽየውም? እንሰሲዝም አነ እቂዝ አቐው ቓዘነ ግሪ ውርቃጥ እቊርሽየውም? ነን ብነው ጻጀድም አነ ሥነ እዘንድ ተረቊ እምታኒዝ ሊንስ ኵንሻው ፤ ሊንስ ችጝሻው አቐነውድ ውር ቃጥ ልብትንዝ ሠራሸነው ቸልሽየውም?

እንዛይ ገብድ ኽዝቪዙ ፅብኒዝ ሲርዩ አቕሽም ችግሰድ ግነ ሳልጠውዝ እክሳው አቓንስቅ ነንም ኽርድ ዓልም አርቓንስ፤ ኽርድ ምጝግሥት ተግዝ አርቕሽትን ችጝ ከቭሽታንስ ጝልቊ እቅ፣ ቀሰዉ ጻቨጥ ድርጅታን፤ ገረዱ ሚድየ አሩሸጥ ወንነይዝ ቲክንክንጝ ሠራሽጥጘ ጡሸኵ፡፡ ወይ ኽምረትል ቻቐቊ ቀሰቊ ጻቨጥ ድርጅታንም ባዶ ጎመዝመ ባዶ ድስት ይወነዊስ እን ገቨይዝ ትኵርት ይውጝ ሠራሽጥጘ ጡሸኵ፡፡

ኽርዝ ምላሰን እጅር ክራየጘ፤ እንሰስድ እንዝ ንየ ክርጝ ዚረዝ ባይነጘ ጅውነይዙ ጭሰጭሰንድ ቲግቭሩ ሰቭ ሠራሽጠ ጡሸኵ፡፡ ጭሰጭሰንድ ዲቊትነይዙ ሚንፍስዝ ሠራሽ፤ ቸላውድ ሚሪሸቊዝ ሪፖርት ጻቭ ሲጘዙ ዋቕርሽነይስ ፍጠ ጡሸኵ፡፡ እኔንት ጻቪንቀ ዳቕ፤ እግርት ሰቭ ኪርም ችጘው ቖጨይዝቅ ነን አሽ ትውድም አነ ነስየትውድ ብርድ ጝናኒል አቐጘ ልብጠ ጡሸኵ፡፡ ጭቭረው ኽር ቀሰው ዊንብር ነሳውም፤ ኽዝቭዙ ስልጣን ኽዝቭዝ አግልግልየውዜ ጝሉዙ ኪብርን አቕ ጭቑ እጊተው አቐነውድ ልብተነው ጡሸኵ፡፡

ግርማ ተጫነ

ጥቅምት 15/2019