እጝቅ ኻግራን ቀይ ባሕርትል መርከቭዙ   ናፅነይዝ እምጥጘነው ጥውሻንትጘ ቻይነስመ  ጅቡቲስ አርቒስⶔ!!!!

ቻይነስመ ጅቡቲ ቀይ ባህር ስመ ባብ ኤል-ማንዴብ ባሕርዙ ወሽመጥ (ስርጥ) ጋብዝ እጝቅ ኻግራን መርከቭዙ ናፅነይዝ እምጥጘነው ጥውሸኩ ይጘንድ ጋልፅጝኩጙ

ቤጂንግትል ቢዘዙ ኻለይ ጝተ ሚኒስትረንድ ፃቭጘው አኸቨይዝ ቲክን ፊስጘው ላብጠቱ ጋልፀነይዝ ወራጙ ተረው ፃውተይዙ አቕንትዝ ገውትን ፅበነውድ ጋልፅጝኩⶔ።

ጅቡቲ የመንቲስ ባብ ኤድ-ማንዴብት ጭቅቱ/በዊዝ ችጝሽረይ ጚ። ኢራንቱ ጋብዝ ከቭሽተቊድ ሁቲየ፣ ሳውዲት ጋብዝ ከቭሽተቊ ምጝግስትዙ ኻይለንድ ሹሽድጘንድ ጥቅለ የመንቱ ሰረው ባሕር ኪዝዙ ደይድ እግዝግዘናንስ ሚኩርጘንድ መርከቨንዙ ጒዥትንድ አጓጉልዝጛጙ የጝ።

አ.እግዝግዘኒዝ 2017 ዓ.ስ ቻይና ኪርመነዙ አቐው ቢዘ ኻግርዙ ዊተድሩ ስፍረድ ጅቡቲ ጋብዝ ብዝርኩች።

ዌልስንትኩተ ፍራት ፃየው በውግቱ ፈረንሳይቱ ቅኝ ቅምንድ ነን ምድረ በዳ አቓንድ ኢትዮጵየትል፣ ኤርትራስመ ሶማሊያት ማኽሊል ችጝሸው አሜሪካቱ፣ ጃፓንስመ ፈረንሳይቱ ጣይትንዙ ስፍልድ አቭንውዘኲ።

ቻይናስመ ጅቡቲስ ፊስጘው ላብጠቱ ጋልፅነድም
ቻይናም አቕች ጅቡቲ ሰረው ባሕርስመ ባህረ ሰላጤ አቒዝ ፅበው መርከቭዙ ነፅነይድ ኻይሰነውድ ተሚሰተ አቐነውድ ኻስቭዝጝኩⶔ።

እንዝም እጝቅ ኻግራንዙ ኒግርንዙ መርከቨንድ አልም አቅቨ ኽግዝ ሲሪየ መርከቨንዙ ሚቭተንድ ኻየነውዙ ጝተ ሚቭትድ ኪቭርዘነው ጥውሻንትጘ ሚሪጝኩⶔ።

ሊጘ ዊግናንድም ሰረው ባሕርት ጭሰጭሰነውዝመ ኻይሰነው ጋብዝ ሰረው ባሕርቱ ኪዚዙ ደይድ ኻግራንዙ ንየትነይድ፣ ቅምንዙ ላውንትዝመ ተምዝተንድ ጥውሸውዝ ኪብርዘነው ጥውሻንትጘድ አምንጘኲ። እኔንም ቀጠነይዙ ጥቅለ ዳኽንነይዙ ኻደገንድ ቈሻይጘጘ ፃቨው አቐነውድ የጝ ልብስጘውድ።

ቻይና ሰረው ባሕርቱ ኪዝዙ ደይ ቅምነንድ አልም አቅቨ መርከቨንዝ ሚስምረንዙ ዳኽንነይዝመ ትኽኑ ቅብረድ ጥውሸውዝ ኻይሰናንስ ከቭስረይ አረጘድ ቻይናቱ ኦፊሴላዊዝ ሺንዋ ጂጘዙ ደርግቭንድ አርቒስኩ ያንድ ሮይተርስ ዚግቭኲ።
ሊጘ ኻግራኒዙ ክልልዙ ጭንቅትድ ሰረው ባሕርትጎ ቅብርጠ ተምዛቁ አቐነዊዝመ ክልሊስ ቢዘ ፅበቁ አይንተ ኻይለን ክልሊል ችጝሸቊ ኻግራንዙ ንየትነይዝመ ቅምንዙ ላውንትነይድ ኪብርዘነው ጥውሸኩ ይጝኩⶔ። እንዝጘም ኻይልዝመ ላው ዊግንዙ ማዕቀበንድ አርውሸነዊስ እክልደነው ተሚሰው አቐነውድ ኻስቭዝጘጘድም ሮይተርስ ዚግቭኲ።

ሳምራዊት ግርማይ

ጥቅምት 15/2019