ብላ ክልሊል ወይ ኽምረ ብሄረ እቅ ጭሰጭሰኒል ችጝሽረይ ስሃለ ሠየምት ወረደይል ኽወድ ጻብረይዝጐ ላውጥሽኩ።
ዲቈቊ ቲክንክነ ኮራንዝ ስወ እቻቐውዝ እቻቐው ዳቐነዊዝ ኢሊኖዙ እትለድ አጋልዘው ኽርድ ጅውነይዙ ጒዝጝ ጨጢዝመ ፍርዝጝ ጨጢዝ ፅብንዙ ኻደገ አጋልዝኩ።
3 ሺኽዝ 400 ሄክታሪስ ንየ እፍርደው ኽወ ፍርዚጝቀ ቺዝጚል ይዝ ዳቕኩ። መሸኻ ኻትመ ጣቂል ችጝሽረይ ላይ 06 ቀቨሊዙ እጥን ጉጂል ጽብረይ ሲዘ ኹሊዝወ ኩየን ዊዝር በየን ሰረጸ እን ከፋዘው ዚምንድ እንት የነውዝ አምረርዘነውዝ ጋልፀች፡፡
”ይነ ቅፋነድ ባዶ ዳኩ፤ ዲቈው አምረይዝ ፊዝነው ኽወድ ጨርስ ቢቁልየውም፤ ይቑርድ ኩኑ ኩኑ ግድርዝ ሊዝጛንድ ነየው ብ ላብጠ እደረጅቅ ኻልቅጨኩን! ግሬ ጨቨቅ ኻሊነውድ ኾነው ገቨይዝ አይጝቀ ይና ሩሄድ ቲርፍጡመ?የውድ የጝ። ይነ እንስሰንድ እንቅቅ ዋለ ጨቨቅ ሊቭጛጙ አቢትጝኩጙ፤ ይንም ይነ ቲረ አቓየጘ ገውትናጙ የጝ” የነውዝ ችግሰይዙ ዝቀውትድ ጋልፅርኩች፡፡
ላየ ጅውነይዙ ጽበተ አት ሰፊው አሰፋው ጝታ ጋቢዝ”ይው ዚምኒዝ እንትየው ከፋቐው ኽር ቓል አርቐቕም ቢጘøን ይዝጝኩጙ፣ ጉረዝ አቐው አቑ እኳን ችጘነው ጽገወው አቓጙ ተርኩ። ይቅምድ ይጝነቊዝ ወይትነይ ዊንጙ፤ንጭ ግነ ኹጘው ጻቀ ብጝ ይበዊል ክርጛንድ ቓለነዊስ ቢዘ ውርም ጻቨነው ቸሊቀርም። ሳልጠው ከቨ ተርይሽ ኽዝቭድ አቢጠ የጝ”ይጝኩጙ።
ኽርድ ፋጥረው ኹረዙ እጅጝትድ አይነተዝም ኩየንጣንዝመ እፈር መልቊል ጽገወው ትኽነዙ ኽውከ ቲክንዝኩ።
ወረደይዙ ቲክነተ ጭሰጭሰተዝመ አርሽነይ ጽ/ጝንዙ ዲቈተ አት ማስረሻ መኮነን ጋልጽጛን ትጘ “ወረደይል ችጝሸቊ 13 ቀቨሊጥል ጻቭሽተው ስረተ -ኹረዙ ሊኪየንዝ ሲሪየ እክሰቊ መልቁዝመ ኒቭሰቊ ኩየንጣን ከፋዘው ስነ ኹረዙ እጅጝትዝ አጋልሽትጝኩጙ። እንሰሲዝ ጥላ እጀው አቐነዊዝ ጐው እፈር መልቊዙ ችግሰድ ኻስቭዘተ አቕንትል ችጝኩ፤ ኽርድ ቲክንዘቊ ቘጨ ማኽሊስ 10 ሺኽስ ንየ እንስሰን ክርጘዝ አጋልሽትጝኩጙ” ይጝኩጙ።
እንም ፍርዝጝ ጨጥድ ቲርፈቊዝመ ፍልውልወነው ቸለቊ እንስሰንድ ጻይጝ ላየ ቺዝየው ኹረ ችጝሸው ስፍረይዝጐ ሲድሸናንስ ላውም ማርጸ ዊናየጘ ጻቨጘም ጉይጝኩጙ።
”ቈሸዝም እንስሰንድ አርየዝ አልስጝ እግዘዙ ቓጽቭን ጻቨናንስ ሚኩርሽሽም እንስሰኒል ችጘው አውግረው ዝላቐንድ አርየዝ በንሽተቊ አጛየጘ ጻቭኩ። ጅውነይል ጥላዝመ ኹረዙ እጅጝትድ አውግረው አቐነዊዝ ነንትል እቂዝመ እንስሰኒል አጋልዘው ኻደገይዝ ሳልጠው እጅርነይ ዊሰ ይውሽታንስ ጭጝን አልሰኩን” ይጝኩጙ።
ዞኒዙ ኹረዙ ወይትነይዝመ አጋሉ ኻደገ ማኽተነ ዲቈተ አት ምህረት መላኩ”ስሀለ ሰየምት ወረደይዙ ኽርድ ነንቱ ኮሪዝ እቀጘዝ ኻስቭዘተዝመ ዞኒዙ አቕሚስ ንየ አቓጙ ተረው ኻለይ የጝ።
ስሀለ ሰየምት ወረደይል ጭቑ 66 ሺኽዝ ንየ ጽበጥ ደርሰተ እልቱ ኹረዙ ከበ በንጘኩ። ስወዙ ደይኒዝመ ዳቐነውድ ቲክንዘው ቘጨድ ኽወ ይዘነው ጭቑ አይጝቀ 11 ሺኽዝ ንየ ቅምዝመ ጝንዝቊ እንስሰን ክርጛንስ ምላሰን አኩ” ይጝኩጙ።
ብሔረ እቅ ጭሰጭሰኒዝጘ ቺተቺተቊ ከቨጥ አካለንዝመ ክልሊዙ ምጝግስት ጅቅ ጻምርሸነውዝ ዊስንሸቊ ኮሪዝ አቐው ይዘው ኹረዙ አልሰንጥድ ችጝዘናንስ ሚኩርጛጙ አጝሽም በንቲስ ጋብ ግነ እቀጘዝ ሳስ የው አቐጘ ጉይጝኩጙ።
”ጥቅለ ብሄረ እቅ ጭሰጭሰኒዝጘ እትለው ኢሌኖዙ ጥቕዘይዝ ጋልጽሽተጥ አቐቊ ወረጢስ 3 ወረደ፣ 44 ቀቨሊ፣ 75 ሺኽ 543 እቀ ኽቭርዙ ኪፍለን ችጝሽጘኩ። እን አርፈይዝ ጥወው እልቱ ችጘተ ኹረ 5,6000.6965 አቓንድ 28 ሺኽ 750 ኩንታል አረዝመ 136 ነቁጠ 7 ሚሊየን ቊርሽ ጋልጽሽተጥዝ ትንዝሽትኩ።”ይጝኩጙ
ሲርዩ እፍርትዝመ ጒደነዙ ችጝሽተተነይ ችግሰንጥም ከበነውዙ ሰቭድ ፊትነተ ጻቭኩ።”ነንትል እጅርነይዙ ኽምዘድ ቃጽቨናንስመ እቂዙ ሩሄድ ቓዘናንስ ኻግር አቒስመ አልም አቅቨ ጭሩ ጻቨጥ ድርጅተንዝ ቃልጥፈው ዊግንዙ ጭጝን ዲቈዲቊስናጙ የጝ” ይጛንድ አት ምህረት ቈሽጝ ዊግትጝኩጙ።
ቃልጥፍ ችጚየዊዝ ገባንድ ከፋቐው ተግል ችጝንጥጘ ቸልጘኩ። ጥቅለዝ ወይቱ ጁውነይል ኢሊኖዝ ምላሰን ኽርዝ ቈይሸቊ እቀ ኽቭረን ንጭትል ጝታ ምነነድ ይዘው ጝታ ኽወይል ማልጝ ጝታ እልጣንድ እጅርነይ ከበ አልስኒዝጐ ጅልዝጝኩጙ።
ዊርየው ዝይንዙ አቑ፣ እልቱ ኹረ፣እንስሰኒዙ ኹረዝመ ኽክምነዙ ጐዘ መዘዙ አልስን ጅውነይዝቊ ጽበጥ ወናሽንዙ አይጝቀ ፅብንዙ ዋቕረ የጝ።
ሰትድ ስኻርዲጝቀ ቃልጥፈው ዊሰ ይወነው ይነ እንቅቱ እጅርነይዙ ግድን አጠ ጡውሸኩ።
አመልማል ተድላ
ጥቁምት 30/2019
