ጣይትን ገልታሽኒስ ኪርም ችብረንጢዙ ይዝን ኲኲነነው ፈተንጥ ሰሜን ኢትዮጵየትል ደግምግመዝ እትለው ድሰተ ጣይትንዝ ምላሰን ብላ ክልሊዝ ወይ ኽምረ ብሄረ እቅ ጭሰጭሰኒል ችጝሽረይ አበርገሌ ወረደስመ ግጽ ጅወንጢል አውግረው እጅርነይዙ ሚቭትዝመ ጥፍትዙ ድዘር ችጘነውድ አርቕሽተኩ።
ጅውነድ ጣይትኒዙ ኪርመነይስ ኪርም ኪብሽ ዊነነዊዝመ ሲሪቊ እፍርተን ድዘነውዝመ ጥቒርቕረው ፍጥሩ ኽርድ ጽበጢል ጭሰው ገልታሽንድ ነንም አጢስ ኻስቭዘተነይድ ቃጽልኩ።
ነንቱ ኮሪዝ ድዘቁ ትኽነዝቊዝመ ክንድጝዝቊ ችብረንጥድ ግቨሪዝም አቕሽ ዊስን ችበችብሰናንስ ልቕረንጥ ዊንጝሽም ነንም ፈራቐቁ ቢተንጥድ እቀ ኽቭርድ ከፋዘው ፈተነዝ ጻቭጝኩጙ።
ጣይትንድ አቨርገሌ ወረደል ቲክንዘው ችግሰድ እቀ ኽቭርድ ጝጽበነ ጝኒስ ፊንቅልሰነዊስም ከስጘ ሲሪዩ ኽክምነዝመ ኹረዙ አልስን ችጛየጘ ጻቭኩ።
ጒደንጥ ዲቭሽተነዊዝመ ከቨ ኮሪዝ ችጘቕ የነውዝ ኩየንጣንዝመ እፈር መልቊ ከፋቐው ግድርዝመ ትኽነዙ ችግሰል ሊቨቁ ጝን እግዝነ።
አቨርገሌ ወረደይስ ፊንቅልሽጝ ሳቁጠ ኻትመይል ሲዘ ርፍዝ ንየ ዊንጝ ነንቱ ሰቲዝ ጅውነድ ጝዊነው ዲጊዝጐ ዋጥረነውዝ አበርገሌ ኻትመይል ችጝሸቊ ምጝግስትዙ ሰቭተተ አት አምባው ሳሙኤል ጋልጽጛንድ” ጣይትንድ አይሪዝጘድ ጓንድ ይነ ጐዘ መዛንድ ማልን የጝ ሲድሽነውድ፤ ጝዝ ግረም ቈሽ ከፋዘው ኽር ቲክኑ እቊንዝመ መልቊ እፈር ኹጘው ብጝ ኮሩ ዊንዘነ ጨቨቅ ዊነቊድ ግድርድጛንድ ቓለነው እዘን ኪለኩ። ሊግዘው ኮሪዝ ውርም አይንት ኹረዙ ከቨ ችጝየውም ዊኑ ጅውነይዙ ጒዝ ጨተድ ጊቭርዘተ ዊኑ፣ነን ግነ ይነ ክርጘድ ኻይነው ተጊል ችጝን ዊኑን”ይጝኩጙ።
ጘጝም ዲቊ ነንቱ ሠቲዝ ይና ጅውነይዝጐ ዋጥረነውድ ቈሽ እቀጘን ቀሰው የጝ የቊድ አት አምባው “አው ክጝኒዝጘ! ኹሩም ጻም ጭሩም ዲግዝ ፍር ጥወነውድ ተከው እጀውም እነ ዲግዝ ፍን ጥውናጙ የጝ፤ ያን ይቕመ ምጝግስትዙ ሰራሸተ አቓንስቅ ሚንውትዝ አግልግለዙ ሚንፍስዝ ይኽዝቭድ አግልግላንስ ይወንስ ጊድ ጥው ይሰቭድ ኪርምኩን፤ እን አቓንድ ግነ ጅውነድ ዊነው ጣይትንዝ ምላሰን ቈይሻንስቅ ምጝግስት ጋቢዝ ጐዘመዛንድ ጥውሸው አቕንትዝ እቻዘነው ጥውሸኩ የር አምነኩን”ይጝኩጙ።
ላየ ዊግስነው ክንሰተ አበበ ወልደየሡስ ጝታ ጋቢዝ ክንድጝ ጝንጣኒልም አነ ትኽነዝቊ ችብረንጢል ችጘው ቈጨይስመ ሲቅዝንድ እንት ይጛንድ አቭር ኽርኽዝጘኩ።
”ጣይትንድ ጽይን ዊነው ጝሉ ትኽነ ጣቢየድ እቻቐውዝ እቻቐው ድስኩ፤ጥላ ዊንየውም፣ አምቡላንስ እጀውም። ኩየንጣን እኹርንዝ ምላሰን ብር ቅብር ጝታ ሩሄድ ጒደነ ጨቨቅ ዲቋንድ ቓልንኩኑን”ያንድ ዊግተኩ።
ነንቱ ሰቲዝ እድ ኻቨረ ኮርድ ዲቊ ይነ ጅውነድ ዲግ አቐነውዝ ይነ ጅውነይል ችጝሽነኩን የቊድ ክንሰተድ”ያን ይቕመንትጘ ይክንደጥድ ስነ እዘኒዝ ቈይሻጘጘ ይግስ ኻይሽተው ገቨድቅ ጻቨነው፣ ዲቈው ክንድጝድም ከሰነ ክንድጝ ይወነውዝ ቀሰቊ ክንደጥ ፋጥረናንስ አኑጭ ይሰቭድ ሰራጫጙ ችጝሸኩን”የነውዝ ዊግትጝኩጙ።
ችብረንጥዙ ድዘነውዝመ ነንቱ ዊስን ኲነነው አቕንትድ ጣይትኒስ ግረ ድዘቊ ሲሪቊ እፍርተንድ ዊስን ኲነናንስ ምጝግስትዝመ ምጝግስትቊ አየቊ ድርጅተን ቺተቺተው ልቕረን ጻቭጛጙ ችጝሽጘኩ።
አይነተዝም አልም ባንክ ጻቨው ጊንዝቭዙ ከቨዝመ ዩኤንኦፒኤስ (uNops) ፋጽምዘተነይዝ አቨርገሌት ጅውንጢል ችጝሸቊ ላውላቊ ትኽነዝቊ ችብረንጥል ግቨር ዊስን ኲነነው ሰበን አክንውሽጝኩጙ።
አነ ጚ ጻቭሽተቊ ልቕረንዝ ቘጨይዙ ፍራቲስ ጋብ ነንም እቀጘዝ ሳስየው አቐነውድ ጽንኸንድ ቓሊስጘኩ ጣቂዝ ፈቊ ደምደመዝቊ ጽንኸን ቓሊስጛንትጘም ጣይትኒዝ ቈይሸቊ 180 ትኽነዝቊ ችብረንጥ ማኽሊስ እቻቐውዝ እቻቐው ዊነው ጻየይዝጐ ዋጥረቁድ 3 ላይስ ሳ ጛይ።
ትኽነዝቊ ማእኸለንድ ነንም ኤሌክትሪክዙ ኻይል ጄኔሬተረን፣ አቑዙ አልስን፣ ኽክምነዙ አግልግለ፣ መጻፍጣንዝመ አምቡላንስዙ እጅጝትድ ጽየቊ ጛይ።
ወረደይዙ ጭሰጭሰን ጽ/ጝንዙ ዲቈተ አት ልጃለም ነጋሲ ዊግትጛንትጘን” ጅውነድ ደግምግመዝ ጣይትንዝመ ኽርዝ ጣይተነውዝ ዊስን ኲንንዙ ሰቭድ አውግረው ጽጋ አኩ። ወረደይል ጽበቊ ትኽነ ጣቪየጥድ ጽራነድም ግድግደድም ጣይትንዝ ፋረይረውድ ጻግነነውዝ አግልግለ ኪርምጛንስ ጻቭንሽ ጣይትኒዝ ዚርፍሸቊ አምቡላስ፣ ኮምፒውተርዝመ ኮረዙ ኻይል ጊቭርዘነ (ሶላር) ዊስን ቲኪየናንስ ግነ ነንም ፈራቐው ጻጀዙ ቢተ ጽይንኩኑን።ይነ እቀ ኽቭርድ እቻቐውዝ እቻቐው ጝጅውነይዝጐ ዋጥርዘናንስመ ሲሪዩ አግልግለ ይወናንስ ቈሺተተ አልም አቅቨ ከቨ በንነኩን” ይጛንድ ጝታ ጭጝንድ አልስጝኩጙ።
ነን ጽበው አቕንትዝ አበርገሌ ወረደይል ችጝሸቊ አቑ ጽየቊ ቀቨሊጢል አይነተዝም ጽራር ዊርበድ ጒዝ ጨተድ ሚንወዙ እፍርትዝ ስውርጠዝመ ጥረምረዝቊ ኽወጥድ ጊቭርዘነውዝ ጝታውር ቸልሰናንስ ልቕረ ጻቭጛጙ አጝሽም ጣይትኒዝመ አዝ ምላሰን ኽወድ ድዘነውድ ነንም ሰጋቕን አኩ የቊድ ዲቈተድ ጽበጥድ ጝታ ዲግድ አምንሰው አቕንትዝ ኪብርሽ ድዘቊ ክንድጝ ጝንጥዝመ ትኽነዝቊ ችብረንጥድ እቻቐውዝ እቻቐው ኲንሽጝ ዊነው ጝታ ሩሄይዝጐ ዋጥርጛንስ ምጝስትዝመ ከቨጥ ድርጅተኒስ ቃጽልነይ ጽየው ከቨ ኻየነዊል ችጝሽነኩን ይጝኩጙ።
አመልማል ተድላ
የጥቅምት 30/2019
