ካርድ ፊሰነውዝ ማርፀናንስ አስልሸነው ጥውሸኩ 

ኢትዮጵየቱ ፌዴራሉ ሪፐብሊክ ኽገ ምጝግስትዝ አንቀፅ 38፣ 102 ብሔሩ ምርፀ ቦርድ ችበችብሰነ ቕዬ (1133/2011)ዝመ ፖለቲከ ፓርቲየንዙ ምዝገቨዝመ ምርፀዙ ስነ ሚግቭር ቕዬድ ሲርዬ ፃቨነውዝ ላጝጠትረ ኮርዝ ኢትዮጵየቱ ጥቅለ ምርፀ ፃጝሽትጠ ኻለይ ፃይሽትኩ፡፡ አውማው ኢትዮጵዩ ዜገ ጝድሚድ 18 እምት እቻቐው ማርፀነውዝመ ማርፅሽተነውዙ ሚብት ፅይኩ፡፡ እኒን ሚቭትድ ዚረዝ፣ ብሔርዝ፣ ፆተዝ፣ ኻይማኖትዝ፣ ፖለቲከዙ እትለ ዊንም ላዬ ምላሰን ጊድቪንቀስ ናፅነይዝመ እክሱነይዝ ማርፀነው ቸለኩ፡፡

ማርፀነውዙ ሚቭት ኽግዝ ዲንግግሸቊ ቃውሰ አቕንተኒዝ ሲርዬ አክንውሸኩ፡፡ ምርፀድ ናፀ፣ እክሱነይዝመ ግልፅነይ እኒዝጘም ዲግ አጠ ጥውሸኩ፡፡ ኢትዮጵየትልም አቑ ብላ ክልሊል ፃጝሽተው ምርፀድ ዜገንዙ ፈቃደኝነይድ ጭቅተዝ ቓሊሽተውዝመ ዲሞክራሲዙ ቅምንድ ሲርዬድ አትርዘው አጠ ጥውሸኩ፡፡ ብሔሩ ምርፀ ቦርድ ገለልተኝነይዝመ አውማው ጥቕዘይስ ናፀ አቐው ሚልክዝ ምርፀድ ፃጝሽተኩ፡፡ ክልለኒል እትልጥጘ ቸልጘኩ ይሽተቊ ገበንድ ሩዘናንስም አቑ እክሰ ይወናንስ ቦርዲዙ ጨፍት ፅፈሽ ጝንጥ ቢትጝ አግልግለ ይውጛጙ የጝ፡፡

ማርፀጢዙ ምዝገቨ ግልፅነይዝመ ማፅንፅንሸው ጒደነዝ ፃጝሽተኩ፡፡ ብላ ክልልዝመ ፅልዬ ክልል ማኽሊል እትለቊ ጥውሸኩዙ ገቨድ እክሰ ችጘው አቕንትድ ሚቸሚችዘናንስ ፌደሬሽንዙ ምኽር ጝን አርቒሰዊዝ ሲርዬ ምርፀ ቦርድ ኢትዮጵየቱ ደርግቭሸጥ ምኽር ጝንዝ ቲክርክርሸነው ቸለቊ አቐነውድ አርቒስ ውሳኒ እቑርኩ፡፡ ፖለቲከዝቊ ፓርቲየንዝመ ወግሽተጥድ እርወ አገነ ፅየቊ አቕጘኩ፡፡

ብላ ክልሊል ፃጝሽተው ምርጸድ ክልሊዙ ዲግድ፣ ዳኽንነይዝመ ኽዝቪዙ ፈቃደኝነይድ እቻቐው አቕንትዝ ግምትል ድወነውዝ አክንውሸው አቐኩ፡፡ ጒሸቊ ዳኽንነይዝቊ ችግሰንጥዝመ ፖለቲከዙ ኪውተዝ ምላሰን ምርፀድ ጨቅሻየጘዝመ ፈንድ እማንትነይ ፅየው ኽዝቭዙ ፈቃደኝነይ እትላንስ ክልሊዙ ምጝግስትዝመ ብሔሩ ምርፀ ቦርድ ቺተው ተግረ ፊስጛጙ የጝ፡፡

ብላ ክልል አቒል ፅበው አትረው ጣይትንድ ቅልጥፈዝ ችብርጠዝመ ጣይትን ፃጝሽተቊ ስፍልል ምርፀ ፃቨነው ቸልሻው አቐነዊዝ ዲግ አቐው ጒደነይዝጎ ተረናንስ ቲግቭሩ ቲስመምን ፋፅመነው ጥውሸኩ፡፡ ዜገን ውርም ገውቲንቀስ ምርፀዙ ካርድ ፊሰነውዝመ ጝታ ድመድ ይውጛንስ ቸልሰው ሰቭ ሰራሽትጠ ጥውሸኩ፡፡

ቦርድድ አውማው ፖለቲከዙ ፓርቲስ ናፀ አቐው ጒደነዝ ጝሰቭድ አክንዋንስ ፃቨነው ተሚሰኩ፡፡ ማርፀጥዙ ምዝገቨ፣ ድመድ ጥውሸውዝ እግዘነውዝመ ፈንድ አርቒሰነው ቸልሸውድ እኒዝጘም ቴክኖሎጂዝ ከቭሽተው አጠ ቸለውድ ምዝገቨድ ጥውሸውዝ አክንወነው ቸልሻንድ ጭቑ የጝ፡፡

እንቅ ፓርቲየንዝመ ወግሽተጥድ እርወ እድል ፅይጛንስ፣ ምጝግስትዙ ፃጀዝመ ብጭቕዝቊ ዲምቅሸንጥድ እርወዝ አርውሽጛንስ ፃቨነውዙ ኻለይድ አትርጠ ጥውሸኩ፡፡ ጥቅለዝ ምርፀድ ዲጉ አቐው አቕንትዝ ፃጝሽታንስ ዲጊል ሲርዬ ፃቨነው፣ ፖለቲከዙ ናፅነይድ ፈራዘነውዝመ ግልፅ አቐው ፃጝት ቲክነነው እኒዝጘም ዲሞክራሲዙ ምህዳርድ ፈራጠ ቸለውድ ምርፀዝ አቐነዊዝ ካርድ ፊሰነው ጭቑ አቒጝቀስ ማርፀናንስ ጥውሸውዝ አስልሽት ፃቨነው ጥውሸኩ፡፡

ወንድሙ ቸኮለ

መጋቪት 30/2018