ታዝቱ እጅር ተስር ኪዝድ ኤሌክትሪክዙ ኻይል ግርቭዘናንስ ኻሊሽት ሰራሽት አግልግለ ይወነው ኪርመውድ 2000 ዓ.ስ የጝ። ኪዝድ ኤሌክትሪክ ግርቭዘነዊስ ከስጘ ፈራቐው ኻዘዙ ፃጀ ችጝሸነ አቕኩ።
ክልሊዙ ኻዘዙ ሙየ ጒጥዝ ፃቭሽተው ፅንኸይዝ 18ዝ ንየ ኻዘዝቍ ዚረዝመ አጉረው ኻዘዙ ምፅነ ፅበነውድ ደድሽትኩ።
ታዝቱ ኪዚል ኻዘ ፃውረነው ኪርምሸውድ 2003 ዓ.ስ የጝ። ኻዘ ፃውረነውዝ አሩሸጥ ወረጥድ ብላ ክልሊስ ጠለምት ወረደ፣ አቭርገሌ ወረደ፣ ስሃለ ሰየምት ወረደዝመ ዝቛለ ወረደ አጛንድ፤ ፅልየ ክልሊስ ቈሽ እጭለ ወረደድ ፈራቐውዝ አሩሸተ ወረደ የጝ።
7 ሺኽስ ፅጉየቍ ውሸብልዝ ኻዘዙ ፃጀ እፍርት ዚርፊዝ ሰቭዙ አገነ ፋጥርሽኩ።
እኔን ፃጀድ አምረ ጨቨቅ ንቕፀቍ ውሸብልዝ ሰቭዙ አገነ ፋጥራጙ አቐነውድ ንየይል ጋልፅሽተው እግዘይስ ልብተነው ቸልሸኩ።
ይንም ስሀለ ሠየምት ወረደይዝጘ ኻዘዙ ሰቪል ዉላቕጝ ችጝሸቁ እቅ ጝታ ሰቪዙ ፍልዉልወድ ዉር ተከጘ አንቭቭስነ ቀኑን።
ባህርዳር ዩኒቨርስቲ ዝመ ዓልምቱ ባንክ ለወንትዝ አቐነውዝ ፅቃ እምትዝ በውግ ፃቭጘው ፅንኸዝ ታዝቱ ኪዚል 18 አይንት ኻዘዙ ዚረ ፅበነዊዝመ አምረዝ 10 ሽኽ ቶኒል አሽ ኻዘዙ ስየ ጊቭርዘነው ቸልሸጘድ ደድስጝኩጙ።
እን አምረይዝም ኻዘ ፃውረነውዙ ሰቭድ ጫረ አሰነይዝ ኻትሸት ኪርም ኪርምሸው አቓንድ አርወድ ዚልቅትነይ ፃየው አጠ ማጥን ጥውሸውዝ አሩሸነው በንዘው አቐነውድ የጝ ውሸብሊዝመ ሰቭዝቍ ዲቈጥድ ዊግትጘውድ።
ውሸቭለ ጻዲቁ ንጋቴ ስሀለ ሠየምት ወረደ 01ቀቨሊዙ ፅበተ አቓንድ ነየው ቓለይዝ ታዝቱ ዊርቨድ ጝታ አቅልድ ቅም ፍጭር ፍርዝጝ፣ ዲበዝ ቺተቺተቍ ኽወጥ እፍርዝጝ አሩሽጝ ሲጘው አቐነውድ ዳቕስ፣ ነንቱ ሰቲዝ ቈሽ “ዝቨድ አቑዝ ሺፍንሹዝ ቅም ፍጭሪዝ ቢዘ አኑን ይን ኻዝንሽም ላየ አርወ ፃይ የጝ ተረውድ” የዉ አቓንድ ኻዘዙ ፃጀድ ጅውነይዙ ውሸብሊዝ ፃጀዙ ፍልፍለ አቐነውድም የጝ ጋልጸውድ።
ውሸብል ቺተቺተቍ ገረድጥዝ ተገተግሽተነወዝ ኻዘ ፃውርጝ ፃጀ ጒጥ አቕጛጙ አቐነውድ ዊግተውድ ውሸብለ ጻዲቁ ንጋቴ” ይቕምትጘድቅ 2010ስ ኪርም ኻዘ ጻዉርንዙ ሰቪል ውላቕ ኻትመይል 3 ላ ሽኽ ቁርሻንዝ ዝቨ ጅቭ ጝን ተሰነዊስ ከስጘ፣ 5 ላ ሽኽዝ ንየ ጊንዝቭ ፊስ ቅም ፍጭርም ጅቭኩን” የው አቓንድ ንቕፀቍ ውሸብል ሞተር ጀልቨይል አሽ ጅቨቍ ፅበነውድ የጝ ዊግተውድ።
አነጚ ክልሊል አጋልዘው ጻውተዙ ችግሰድ ኪዚል ችጝሽጠ ጥውሸው ጻጀድ ችጝሻየጘ ጻቨነውዝ ኽየው ጥቕዘ ቲክንዘነዊስም ከስጘ ጝታ ሰቪዝም ጥቕዘ አቐነውድም “ፊሥነው ኻዘድ ዳኽኑ ወየይዝ ጅቨው እጀውም እን ኻትመይል ጽበቁድም ሳስ ሽጝ የጝ ጅቭጘውድ ።
ኻዘ ቈሽ ሣብጥ ቅይሽጡ የነው አየውም፤ግሬይዝ አርቨ፣ አኩርጝኒል አሽ ኻዘ ፊሥነኩን አነጚ ጻውተዙ ችግሰዝ ምላሰን አርየ እጀው አቓንስቅ ልውጠ ነሰነው ቸሊነቅም”ያንድ ጋልጽኩ።
ስቅንዙ ወየ ቈሽንዝ ምላሰን ዊርቨ አቒል ጽበው አቕጸድ ነንቱ ሰቲዝ ችግሰ አጋልዛጙ አቐጘዝመ ጅውነይል ተረው ኻዘዙ መኪነድ አሩሻይጘጘ መኪነድ ጣይትንዝ ምላሠን ጨቅሸጘ ዊግተው ዉሸቭለድ ነንቱ ሰቲዝ ኪዚል ሰራሽተዉ ሰቭድ እጉርትጘ ምጝግስት ተገተግስ ቲክንክነ ጻቭሽተዉ ሚልኪዝ ሰራሽታጙ አየዉ አቐነዉድም ጋልጽኩ።
”ሰቭድ ጝሉ እጅሪዝ የጝ ሰራሽታጙ ጽበውድ ጻዉርንል ውላቐቁ እቅድ አዊስ ተርጘጘ አርቕሽታቁም ጅውነይል ችጝሸቊ ውሸቭልድ ሰቪል ውላቕጝ ጅውነድ ነየዉ አገነድ አሩሸነዉ ቸልሽየዉም”የዉኩ።
ላየ ዊግስነዉ ኻዘ ፃውርንዙ ሰቪል ዉላቕ ችጝሸዉ አት ደባሽ ተገኘ 2007 ዓ .ስ ገረደዝ ተገተግሽት ሰራሻጙ ዊነዉ አቓንድ ነንቱ ሰቲዝ ጝአዉር ቸል ጥፍት ፍርዝ ሲዘ ውሸቭልዝ አርፈዝ 4 ሽኺስ ኪርም 6 ሽኽ ቁርሽ ኪፍላጙ ሰራሸቁ ዉሸቭሊዝ ሰቪዙ አገነ ፋጥርኩ።
“ጝሉዉዝ ኻዘ ጻዉረቊስ ለምር ላጥ ጅውንጢዝጐ ፍልዉልዋጙ ቅያጙ አቓንድ ሰቭድ ጥውሸዉዝ ሰራሻይነጘ ጻውተዙ ችግሰድ እቀጘዝ ጽጋ ፋጥራንስቅ ነንቱ ሰቲዝ ድቛልዝመ ሞተር ሳይክልዝ ገይስናጙ የጝ ችጝሽነዉድ” የውኩ፡፡
“ሰራሸው እጅርዝ አቓንድ ልውጠ ጻየው የጝ ክወንስ ጭቑ አይቀስም ጅውነይዝ አውግረው አርወ ጽየው የጝ ኻዘድ ችጝንሽም ወየድ ችጝናጙ አየውም በውግ ግሬይዝ ሻቘ ሺኺል አጢስ ችጝናጙ ዊኑን ነን አኮላ እኳን ችጛይንም” ያንድ ጋልጽኩ።
አት ደጀን መሰለ ስሀለ ሠየምት ወረደ እንሰስዝመ ኻዘ ፃጀ እፍርት ፅፈሽ ጝንዙ ዲቈተ ይጘጘድ ጝታ ፅፈሽ ጝንድ ጝንዝቍም አጝነ ድርዝቊ፤ ዝቨዝቁም አጝነ አቑዝቍ እንሰስድ ታኽንኽነነውዝመ ሊሚሽጥጘ ፃቨነውዙ ዲቍትነይ ፃይ ሰራሸው አቐነውድ ዳቕስጝ “ታዝትል ችጝሸው ኻዘድም ጡሽት ፃየው ጒደነዝ አርወል ግርያንስ ላጥም ሚሪሸቍ ችብረጥጅቅ አቕን ሰራሽናጙ ችጝሽነኩን” ይጘኩ።
“ኻዘዙ ፃጀድ ጅውነይል ችጝሸቍ ንቕፀቍ ውሸብልዙ ፅብንድ ላውጠነው ቸለው የጝ ” የቍድ አት ደጀን ኻዘ ፃውረነው ስረቲል ግነ ቺተቺተቊ ችግሰጥ እትልጛጙ የጝ የቍ አጛንድ፣ ቺተዝም ኽጉ አየቍ ኻዘ ፃውረጥ ጽበነውድ፣ አርውሽጘው ስቅንድ አፀው አቐነዊዝመ በንሽታው ኬሚካልዝ ናኽርሸው አቐነውድ ኻዘ ፃጀይል ቘጨ ችጝዛጙ አቓንስቅ ኻዘዙ ጊቭርትድ አምረይስ አምረ ቃፅቫጙ ተርጠ ፃቭኩ ይጘኩ።
ጻይነው በጀት አምረይዝ 15 ሺኽዝ ቶን ኻዘዙ ጻጀ ጊቭርት ጊቭርዘናንስ ኻለይ ጻይሽት ሰራሽታጙ ዊነነውድ ጉይጝ ዲቈቊ ላጝጠ እርፈኒዝም 800 ቶን ኻዘዙ ጊቭርት ችጝሽትኩ ።ዲቈቊ ሻቘ እርፈንዝም ኻዘ ጻውረነውዝ ሰራሸቁ ውሸቭሊዝ ጻውተዙ ችግሰድ ኽየው ጥቕዘ ጭሳጙ አቐነውድም ጉይጝኩጙ።
”ጥቅለ ወረደይዝጘ ተገተግሽተቁ ውሸብልድ 262 ኻዘዙ እፍርትዝ አሩሽጛጙ ችጝሸቊ ጛይ፤ እን አምረይዝ አጋልዘው ጻውተዙ ችግሰድ ተገተግሽትጝ ሰራሸቁ ውሸቭሊል ኽየው ጽጋ ፋጥራጙ የጝ፤ውሸቭልድ ጥውሸውዝ ጝታ ሰቭድ ሰራሻይጘጘ ጻቭኩ።
”ኻዘዙ መኪነድ ውሸቭሊዝ ይወናንስ ሰራሽናጙ ጽብነዊል ከምሸው ኻይልድ ኻትመይል ጥው መኪነድ ጨቅ ፊሩ መኪነድ አርወይስ ቢዘ አቓንስቅ ውሸቭሊስ ይወናንስ ችግርሽንኩኑን ችግሰድ እክሰናንስም ሚሪሸዉ አካሊዝ አርቒሰነዉ ቸልንሽም እክሰ ችጝሽጠ ቸልየዉም”ይጘኩ።
ኻዘዙ ጻጀ እፍርትዝ ተገተግሽትጝ ሰራሽጛጙ ችጝሸቁ ውሸቭልድ አሩሸጥ ጻቨናንስ ጉይሽተቁ ዋቕረንጥዝም ዊሰ ይወናንስ ሚሪሸቁ ችጘር ጒይጢጅቅም አቭላይተ ጻቭሽታጙ ችጝሸጘም ዲቈተድ ጉይጝኩጙ።
ኻዘ ኾነው ትኽነዝ ይወው አርወድ አራሰው የጝ።አዊንም እድምዙ ክልሊል ችጝሸው እጅር ኻዘ ኹጠጘድም ማኽርሸው የጝ። አቓንስቅም አእምሮዙ እፍርትድ ሊጊሰናንስ ኻዘ ኾነው። ቲርፈውድም አርየ ፊስን ቅየነው። አቢታየጘድም ታኽንኽነነው አውማዊስቅ ኻይሽተው ቲግቭር አጠ ጡሸኩ ይና እፃ ፃቭኑን።
ሐመልማል ተድላ
ለሚያዚያ 30/08/2018
