ኹረዙ ስረትድ ቺዘቺሰነውዝ ትኽኑ ፅብን ፅበናንስ ከቨነውድ ፅፅቀ ኻትመዙ አሩሸጥ ዊግትⶔ።

ላው ኻግሪል ቃልጥፈው ኢኮኖሚዝመ ገረዱ ሊግዝት ነሰናንስ፣ ዚልቀተ እፍርትዙ አቅም ኲነናንስ፣ ዜገንዝ አውማው ኰሪዝ ኹረዙ አልስንዝመ ችጝሽተትነይድ ደድሰነውዝ ዊርተድ፣ ዳኽንነይዝመ ፃጊተ ኹረዙ ፃየድ እቻቐው ኹረ ዀው፤ ትኽኑ፣ ጊቭርዘተዝመ ሊግዘው እድሚ ፃየውዝመ ፋጥርንዙ ቸልት ፃየው ዜገ ፋጥረነው አይነተ ገቨ የጝ። እኔንት ቲግቭሩ ፃቨናንስም እጝቅ እድሚዙ ክልሊል ችጝሸቊ ትኽኑ ሩሔ ፃይጝጠ ማጥን እቀኽቭሪዙ ማፅንጽንሸው ኹረዙ አርወ አሩሽንድ ሊጊሰነው ተሚሰው የጝ።

ዀነዀንዙ ስረትድ ቺዝሸነው ኻግር ለምረተ ኹሪዙ ትኽነዝመ ዳኽንነይድ ኻየናንስ እንዝጘም ኹረዙ ወይትነይድ ጝነቁ ተግዝ ደድሰናንስ ኽየው እኩሰ ፃየው የጝ።

ይነ ኻግርትልም ስረተ ኹረዙ ቢተድ ቃፅቨናንስ ቺተዝ ቈሽ ኲየንጣን እፈርዝመ ውሸብሊል ትኩርት ፃቨቁ ሰበን ሰራሽተነው ኪርምጝኩⶔ።

ኢትዮጵየቱ ስረተ ኹረድ ቺዘቺሸነው ትኽነዝመ እፍርትዙ አጀንደ አቕ ዊነው አቓንድ ምጝግስትዝመ  አቭርደቊ አካለን እፈርዝመ ኲየንጣንል እትለው ማጽንፅንሸው ኹረዙ እጅጝትድ ቃፅቨናንስ  ልቕረ ፃቭሽታጙ ችጝሸኲ።

ውርም እኮ ፅቃ እምትዝ እጝጎ ኻግሪዝጘ ኹረዙ ጊቭርዘትነይድ ቺዝሸናንስ ትኩርት ይውሽተው አቕሽም ነንም ማፅንፅንሸው ኹረዙ እጅጝትድ አጉረው ትኩርት በነው አቕ ችጝነኲን።

ስረተ ኹረዙ ቺዘቺስንድ ነሰናንስ አይነተ ቲግቭረን ይሽትጝ ቲግቭርዝጎ ጥውሽተቊስም

ኹረዝመ ስረተ ኹረዙ ፖሊሲዝመ ስትራቴጂዝ ሰቭዝጎ ጥወነውዝ ምጝግስት ሰቆጣ ቃልኪዳንት ተከቊ እፈርዝመ ኲየንጣንዙ ኹረዝመ ትኽነይል ትኩርት ፃቨቊ ድርጅተኒጅቅ አቭርድንዝ ሰራሻጙ ችጝሸኲ።

እኒስ ከስጘ ቈሽ ሌማት ትሩፋት፡ የነትም( አትክልት፣ ፍረምረዝመ  እንሰስዙ ፈንጥ፦ ፃቭ፣ ቕሉን፣ ስየዙ ጊቭርትድ ሊጊሰነውዝ ጝነቊዝመ እፈርዙ ማፅንፅንሸው ኹረዝ አርውሸትነይድ ደድሰናንስ ቲግቭርሸነውድ ቃፅልኲ።

ዝቛለ ወረደ ፅፅቀ ኻትመይል ስረተ ኹረዙ አፅቨዝ ስልጠነ ፊሰቁ ኲየንጣንድም ስረተ ኹረድ ቺዝሸነውዝ ጅሉዘ ፊስጘው ስልጠነድ ቲግቭረነውዝ ጝተ ፅብንድ ቺዝስጛጙ አቐነውድ ዊግትጝኩⶔ።

ፅፅቀ 01 ቀበሊዙ ፅበጥ ዊዝር አምበር ዘሩ ዊግትጘንድ  ቀበሊዙ አርሽነይ ሙየጒይጥዝ ይውሽተው ስረተ ኹረዙ አስልንዙ ስልጠነዝ ሲሪየ ጝተ ጝንድ ፍርዘቊ አኰ ዋልጠ ፃቑ ፍርዙ አይንተንድ አስለነውዝ አርውሽጛⶔ አቐነውድ ዊግትጝኩⶔ።

ላየ 01 ቀበሊዙ ፅበተ ዊዝር ግምጃ አሰፋ ስረተ ኹረ ዀነዀንዙ ስረትድ ቺዝሰቁ ሰበንድ ቲግቭረነውዝ ትኽንቁ ጝነቁ ፋጥረነው ጋብዝ ልውጠ ተራጙ አቐነውድ ሚሪጝኩⶔ።

ተረዊዝም ጝተ እጝግርነይል እፍርዝጘው አትክልትዝመ ፍረምረዝ፣ እንሰስዙ ፈንጥል ትኩርት ፃቭን ሰራሸነውዝ ስረተ ኹረዙ አርውሽንድ አትርዝጝ ቃፅለነውዝ ላጢዝም ተከ አቐቁ አቐነውድ ጋልፅጝኩⶔ።

ትኽነዙ ኤክስቴንሽን አግልግለድ ፈራዘነውዝ እቀገረደ አቅቨ ስረተ ኹረዙ አፅቨ ትኽነ ሙየጒይጥ ጋብዝ  ጊዙረቊዝ፣ ኒቭሰቊዝመ እፈርዝ  ማፅንጽንሸው ኹረዙ አርቕት ፋጥርሻⶔ የጝ።

እኔንም እኒስ ሚቅ ዊነው “ጥር ብን ጣቭ ኹነኩን የው” የነየንድ ቲግቭረነዊስ ጊግቭሸነውዝ ጝን ፍርዘውድ አስልን ማፅንፅንሸው ኹረ ዀነው ጥውሸው አቐነውድ የጝ ኲየንጣንድም ሚሪጘውድ።

01 ቀበሊዙ አርሽነይ ዚርፍዝ አትክልትዝመ ፍረምረዙ ሙየጉሪየ ዊዝር ፋሲካ ግርማይ ጝታ ጋብዝ ቀበሊል እቀኽቭርዙ ክፍልድ ኹረዙ ስረትድ ቺዘቺዝሻንስ ጥውሸው አርቕትድ ፋጥርሻጙ አቐነውድ አርቒስጝኩⶔ።

ጝዝ ከስጘ ጝተ እጝግርነይል አትክልት ቲክልጝ፣ ጅርቁ ፍርዝጝ ዀነዀንዙ ስረትድ ቺዝሸነውዝመ ጝተ ፅብንዙ ተግድ ሩዘናንስ ሰራሽተው ሰቭድ ፈን ቓሊሳጙ ተረነውድ ዊግትጝኩⶔ።

እን አምረይዝም 60 ሞዴል  ኲየንጣን ችጝዘነውዝ ጊውርሰናንስ አስልሽጘጘድ ጉይጝ ጝተ ፅብኒልም እኩሳጙ ፅበው እኩሰድ አጉረው አቐነውድ ሚሪጝኩⶔ።

ጥቅለ ወይ ኽምረ ብሄረ እቅ ጭሰጭሰኒል ችጝሸቊ 82 ሞዴል ሚንድረኒስ ዝቛለ ወረደይዝጘም ሊጘ ቀበሊል 120 ሞዴል ኲየንጣን ችጝዘነው ቸልሽኲ።

ወረደይዝጘ ስረተ ኹረዙ ቺዘቺስንዙ አፅቨድ ኪርምሸውድ 2016 ዓ.ስ ኪርም አቐነውድ ዊግተቁድ ዝቛለ ወረደ አርሽነይ ጽ/ጝኒል ስረተ ኹረ ቴክኖሎጂ ሙየ ጉሪየ አት መላኩ መሰለ 600ዝ ንየ ኲየንጣን ቺዝየው ኹረዙ ስረትድ ቲክንጛንስ ሰራሽታጙ ተረነውድ ዊግትጝኩⶔ።

ሊጘ ቀበሊየኒል ፋጥርሸቊ 120 ተከ (ሞዴል) ኲየንጣንድም ጝተ ዀነዀንዙ ስረቲስ ከስጘ ጝነቊድ ቺዝየውዝ ቃወነው ተግዝም ላጥዝ ተከ አቕጘጘድ አርቒስጝኩⶔ።

ሳምራዊት ግርማይ

ሚያዚያ 30-2018