ምርጸድ ኽዝቭዙ ሲትፍሽንዝ ከቭሽተው ዲግዝመ እክሱነይዝ አስሽታንስ ጻቨነው ጡሸኲ።

ፖለቲከዙ ምርጸ ኽዝቭድ ደርግቨነውዝ ኽግ ፊሰተ፣ ፋጽምዘተዝመ ኽግ ፃድቅዘተ ችብረንጥድ እቝረው ስረትዙ ክፍል የጝ። ኢትዮጵየት ተከቍ ኻግራንዝ ምርጸ ቀሰውም አነ ኻቨረ ላ እምተንዙ ንየ ሲጘ ጻየው የጝ። ጝለምርሽነይዝመ ቢተድ ግን ዊትርቅም ብሽታውም። አነ ጚ ውርም አነ ኽዝቨን እንዛይ ዊስነተ ምኽር ጝንጢዝ ደርግቨው በነዊስ ደርግቭሽ ፊር ጝችጘርድ ዋርዳንስ ጻቨነው ቺዘኲ።

ኢትዮጵየቱ ምርጸዙ ሲጘ ኪርምንድ ቀዳማዊ አጼ ኃይለሥላሴ ዚምነ ምጝግስቲዝ 1911 ዓ.ስ “የዘውድ ምክር ቤት” ይሽተውድ ሲርየነውዝ ኪርመኲ። አነጚ ሻቘ ኽግ ፊሰተ፣ ፋጽምዘተዝመ ዊስነተድ ቻቐውዝ አይር ምርጸዝ ሲርየነው ኪርምሹ ይሽተውድ 1923 ዓ.ስዝ የጝ። እንዝም ቃውሰተ አቐው ኻግሩ ኽገ ምጝግሥት ቃውሰተ ጊዝዝ ፋጥረነው ቸልሽኲ።

1967 ዓ.ስዝ ኪርም 40 እምታንዝ ኻግርየት ቃወውድ ደርግ «ጊዚያዊ ወታደራዊ አስተዳደር ደርግ»  የው ሽጙዝ  ምጝግስት ሲርይ ኻትሸነ እምታንዝ 1979ዝ 835 አቫላን ጻየው ዊተድሩ ምኽር ጝን ምርጸዝ ሲሪ ዊኑ።

ጝዝግረ ኢሕአዴግ :-
➊ ለወትረ ኻግር አቅቨ ምርጸ ግንቭት 1987፣
➋  ሊጘትረ   ኻግር አቅቨ ምርጸ ግንቭት 1992፣
➌ ሻቘትረ  ኻግር አቅቨ ምርጸ ግንቭት 1997፣
➍  ሲዘንትርነ  ኻግር አቅቨ ምርጸ  2002 ዓ.ስ
➎ አኰንትርነ ኻግር አቅቨ ምርጸ 2007 ዓ.ስ
6. ዋልጠትረ ኻግር አቅቨ ምርጸ ግንቭት 2013 ዓ.ስ
7. ላንጠንትርነ  ኻግር አቅቨ ምርጸ ግንቭት 24  2018 ነን ጻጝሽተኲ።

አይነተ ገቨድ ኽዝቭድ ቃውስ የው ጻቭሽተቍ ምርጸኒስ ክንደነውዝ ምርጸድ ዲጒ አቓንስ ችጘር ዋርደነው ጡሸኲ። ቈሸዝም ምርጸዙ ካርድ ፊሰው ኽዝቭድ ጡሸውዝ ጝካርድድ ወየ ይወው ገቨይዝ ማርጸነው ጡሸኲ። ዴሞክራሲድ ሰቭትሽተቍ አይነተ ገቢስ ምርጸ ላውድ የጝ። ዴሞክራሲድ ቲግቭርሻንድ ሊቨሊቭንዙ ወንነይዝ ሰቭትሽተውዜ እክሱነይድ ደድሽታንስ ከቨ ጻቨኲ።

እክሱነይ ጻየው ምርጸ አቓንስ እንቅ ዊግናንድ ኽዝቭዙ ውሳኒድ ኪብርዘነው ጡሸኲ። ኽዝቭዙ ውሳኒድ ፣ በንድ ኪብርሸውዜ ምርጸዝ ግረ እፍርትዝቍ ሰባኒዝ አቭርድንዝ ሠራሸናንስ ከቨኲ። አምንሽነይ ፋጥርሸው ጥወጥውሽን እማንቱ ዴሞክራሲዙ ቓሊሰነ አቐነውድ ዘስክረነው ጡሻውም። እንዝም እንቅ ኽዝቭድ ዓምርት ዊስነው ይጽብኒዝ ይትሸውድቅ ማርጸነውዙ ሚቭት ጻቀር የጝ የው ኻስቭጠ ጡሸኲ፤ እን ሚቭትድ ኪብርዘው ችጘር ጒርየድም እክሱነይ ጻየው ምርጸ አቓንስ ሠራሽጠ ጡሸኲ።

ወይትል ጻቭሽተው እን ዚምኒዙ ምርጸድ ለወትረ ካርድ ፊሰው እንቅ ዜገን ምርጸል ሲትፍሽጠ ጡሸኲ። እንዝሚቅ ጣይትንዝ ምላሰን ማርጺንቀ ዳቐው ኽዝቭድ ነንም  ምኽር ጝንጥዝ ደርግቭሺንቀ ዳጠ ጡሻውም። እኔን ቈሽ ዋቕርሸቍ እፍርትዝቍ፣ ቀሰው ጭሰጭሰንዝቍዝመ ላጥ ተምዝንጥድ ዲቭሽትጝ ዳቓይጘጘ ጻቨኲ። ናጽነይዝ ማርጸነው፣ እክሱነይ ጻየው አቓንስ ቸልሰነው፣ አሰነይዝም ዲግ አቓንስ ችጘርድ ፈነው ጡሸኲ። ታትነ ዲቍ ነንም ንጭስመ ዓምርት ጊቨነው ጡሻው አቐጘ ልብተነው ጡሸኲ።

ግርማ ተጫነ

ግንቭት 15/2018