ቅፋኒዝጎ ከረከረነው ተሚሰኲ” ዝቛለ ወረደ ለል ለልዘጥ ጒዝጝ ጨጥድ!!
አት ኪዴ አበራ ዝቛለ ወረደ 01 ቀበሊዙ ፅበተ ጛይ። እኒስ ሚቅ ጝተ ጝኒል ውርም ጣመነ፣ ላፀነ እጀቊ እቀኽቭሪዙ ክፍላኒስ ላውድ ዊንጙ።
ፅቃ እምተኒስ በውግም ፅብንድ ትክቨነው ብጘንድም ጝተ ጅውነድ ሊቅጝ ላየ ጅውነይል ሰራሽጝ ፅብንድ ለጣጝ ጝተቕመ ላውጠናንስ ልቕርድጝሽም ባግራ ጅውነድ ኻይጘዊዝጘድ ችጝየቊም።
እግርገም ጝተ ጅውነይዝጎ ዋጥርጝ ጝተ አቅምድ ፊቅደው ገቨድቅ አትርጝ ሰራሸናንስ ኻሊⶔ።
አቓንስቅም አኰ ባኽሉ ቅፋነዝ ለል ጅቭጝ ፍርዘነው ኪርምጘው ኰሪዝም ሳስየው ፅብንዙ ተግል ችጝሸቊ እቀኽቭሪዙ ክፍለንድ ችበችብሰናንስ ተረው ዚምኑ ቅፋንጥድ አርሽነይ ጽ/ጝን ጋብዝ ጝታይም ለምረነውዝ
እንዛይ አኰ ዚምኑ ለልዙ ቅፋንጥድ ጝታ ሩሔዝመ ፅብንድ ላውጠነውዙ ምላሰን አቕጝኩⶔ።
አምረዝ አምረ ለልዝ ይውጘው ታኽንኽነድ አጉረው አቐነዊዝም ለልዙ ፃጀዝመ ሳረዙ ጊቭርትዝ ጝተ ፅብንድ ቺዝየው ተግል ችጝዝጝኩⶔ። ነንቱ ኰሪዝ 14 ባኽሉ ቅፋንዝመ 13 ዚምኑ ለልዙ ፃጀ ፃይጝኲⶔ።
አምረ ጨቨቅም ላው ባኽሉ ቅፋነይስ 10 ኪሎ ግራም፣ ዚምኑ ቅፋነይስ ቈሽ 35 ኪሎ ግራም ዊርተድ ኻየው ሳረዙ ጊቭርት ችጘነውዝ ጝተ ጝነቊድ ቺዝየው ተግዝ ቃውጛⶔ ችጝሸቁ አቐነውድ አት ኪዴ ዊግትጝኩⶔ።
እን አምረይዝም ገሪየኑዝ ሳረ ቀቭሸተው ኰሪስ ከስጘ ቱነዝ ሊቨው ስወይዝ ምላሰን ቀሰው ሳረዙ ጊቭርት ችጝጘጘድ ዊግትጘኲ።
አቕሽም ኻግሪዝጘድ ቀንሽተትነይ ችጘው ወይቱ ሳረድ ጊቭርትዝመ ዊርተድ ቃፅቭጝጠ ፃቨቊ ችግሰንጥድ ጉይጘንድ “ዚምንጅቅ ፊራቊ ባኽሉ ቅፋንዙ ንቕፅትዝመ፣ ኬሚካልዙ ትንዝንዙ ችግሰድ እክሰነው ጥውሸኩ” ይጝኩጙ።
አት ኪዴ ዚምኑ ቅፋነይስ 35 ኪሎ ግራም ሳረዙ ጊቭርት ችጘነው ጥውሻጙ ባኽሉ ቅፋነይስ 10 ኪሎ ግራም ጭቚ ችጘነውዝ ጒዝጨተይዙ ሳረዙ ጊቭርትድ ሊጊሳየጘ ፅጋ አቐነውድ ልብስጘኲ።
ዊርተ ፃየው ሳረዙ ጊቭርትድ ጊቭርዘናንስ ዚምኑ ቴክኖሎጂዙ ቅፋኒዝጎ ከረከረነው ጥውሸኲ።
ወይኽምረ ብሔረ እቅ ጭሰጭሰኒዙ ሳረዙ ጊቭርትድ ብራንድነይዝ አርየይዝ ግሪሰናንስም ቃውሰትነይዝ ሳረድ ዊርተዝ ጊቭርዘነዙ ስረትድ ዚምንሰነው ጥውሸው የጝ።
01 ቀበሊዙ ለል ለልዝንዝ ውላቐቊስ ላውድ አት ጥላሁን ብርሃኑ ጝተ ጋብዝ ለልዙ ፃጀዝ ንቕፀው እቀኽቭርዙ ክፍልድቅ ጝጝንድ ቃወው አቐነውድ ዊግትጘኲ። ጛይም 34 ለልዙ ቅፋን ፃየቊ አጘንድ እንዛጊስም 10 አቐቊድ ዚምኑ ቅፋንጥ ጛይ።
አት ጥላሁን ባኽሉ ለልዙ ለልዝኒስ ዚምኑ ቴክኖሎጂየንድ ቺዝየው አቕንትዝ አርውሸነው ዊርተዝመ ጊቭርትድ ሊጊሰው አቐነውድም ጋልፅጝኩⶔ።
ወረደይዙ ሳረ ጊቭርትዙ ዊርተድ ቃፅልሰናንስም ጅውነይል ችጝሸቊ እክመ፣ ፃልወ፣ መንጠሴዙ ቀስም እፅዋተንድ ኻየነው አውማው እቀኽቭሪዙ ክፍሊስ ኻይሽተው አቐነውድ ኻስቭዝጘኲ።
እኒስ ከስጘም ዊርተ ፃየው ሳረዙ ጊቭርትድ ሊጊሰናንስ ዚምኑ ቅፋንጥዙ ችጝሽተትነይድ ፈራዘነውዝ፣ ድር ጭጭፈቁ አካለንድ የውም ኬሚካል ትንዝንድ እግዝግዘነው ጥውሸው አቐነውድ ኻስቭዝጘኲ።
ዝቛለ ወረደይል 1 ሽኽዝ 500 ንየ ጒዝጝ ጨጥ ለል ለልዝንዝ ውላቐቁ አጘንድ ጥቅለ ፅበው 19 ሽኽዝ ንየ ለልዙ ፃጀይስ ግነ 2 ላዝ 50ዝጎ አልተቊ ለልዙ ቅፋንጥድ ጭቚ ዚምኑ ቅፋንጥዝጎ ከሰከሰነው ቸልሸነውድ ወረደይል እንሰስዝመ ኻዘ እፍርት ጽ/ጝንዙ ሚዝረይስ ልብተነው ቸልሸኩ።
ጽ/ጝኒል ለልዙ ፃጀ ሙየጉሪየ አቐቁድ አት ሙላት ሙሐባው ወረደይዙ ለልዙ ፃጀዝመ ሳረዙ ዊርተድ ኻይሰናንስ አቨርደቁ አካለኒጅቅ ሰቭትጛጙ አቐነውድ ሚሪጝ ዚምኑ ቴክኖሎጂ አርውሽኒዝጎ ከረከረናንስ ጒዝ ጨተይዝ ተሚሰቊ ጥወረንድ አልትጛⶔ አቐነውድ አርቒስጝኩⶔ።
ወረደይል ውርም እኰ ዚምኑ ቅፋንጥዙ እግዘድ ሳስየው አቕሽም 150 ከረከረተ ቅፋነ አስለነውዝ ቀቨነዊስ ኪርም ቅየነዊል አሽ ሳረዙ ጊቭር ዊርተድ ኻይሰቊ ጎዘመዘንድ ጒዝጨተይዝ አልሰነውዝመ አርቕት ፋጥረነውዙ ሰቭ ሰራሽታጙ አቐነውድ የጝ ሙየ ጉሪየድ ዊግትጘውድ።
“ለልድ ታኽንኽነነዊስ ኪርም፣ ሳረድ ቀቭጛንድ እክመ ጥየዝ፣ ዊርተ ፃየው አቚዝመ ሰለዝ አርውሸነውዝ ዊርተ ፃየው ሳረ ጊቭርዝጛንስ ቲክንክናጙ የጝ” ይጘኲ።
ቺተዝ ቈሽ ለልዙ ፃጀድ ቃፅቭንዝ ምላሰን አቐው፣ ሳረዙ ዊርተዝም ፅጋ አቓⶔ ተረው ኬሚካል ትንዝንድ የውም ድርዙ ጭጭፍንድ እግዝግዘነውዙ ሰቭድ ግቭረ ኻይል ተገተግሽት ተግረ ፊሰነው ኪርምሸነውድ ጒይጝኩጙ።
ግቭረ ኻይልድም ልብትን ፋጥረነዊስ ኪርም ፈው ተግረድ ቲግቭራው አካልድቅ አኰ ላ ቁርሻኒስ ኪርም ሻቘ እምት እፅቊሸነውዙ ኽግ ፈነውድም አርቒስጝኩⶔ።
አቓንስቅም ወረደይዙ ለልዙ ፃጀዝመ ሳረዙ ጊቭርት ዊርተድ ቃፅቭሰቁ ችግሰንጥድ እክሰነውዝ ጊቭርትነይድ ሊጊሰቊ ዚምኑ ከረከርንዙ ቴክኖሎጂዙ አርውሽንድ ቺዘቺሰነውዙ ሰቪል አትርጝ ሰቭትጛጙ አቐነውድ ዊግትጝኩⶔ።
ሳምራዊት ግርማይ
ግንቭት 30/2018
