ወይ ኽምረቱ ኽዝብድ ጅግንነይዝ ጭቚ አቒጝቀት እዘንዙ ገርኽነይዝመ አቭን ለምረትነይዝ አርቕሽተው ኽዝቭ የጝ።
እንዝም የጝ ላው ላው ፃፈጥ” በነዊዝ ጝ ልግስነድ ላውጥየው፣ ግድርደነዊዝ ጝሚልክድ (ጝካኽተድ) ጨቅየው ዊንሽ ወይቱ ኽዝቭ የጝ” ይጛⶔ ዊንም ብልቓጘዝ፣ “ማጣት ልግስናውን ያላስቀረው፣ ርሀብና መከራ ውበቱን ያልቀየረው ህዝብ” ይጛⶔ ወይቱ ኽዝቭድ ሲጘዙ አጋልዝመ አየርዙ ልውጠዝ ምላሰን ችግሰዝመ ሚከረዝ አጋልሽትሽም ጝ ባኽልድ፣ እሴትድ፣ ጝ ልግስነዝመ አውነይድ ብየው አቐነውድ ጋልፅጘኲ።
እን ኽዝቪዙ አትርዝመ ቀሰውነይድ ላው አጋልዝ ችጝሸው አቒጝቀት አቅሊስ ከረከራⶔ ፅበው ኹሪዝጎ ችጘው አጉረው ኪብረኪብርሽንዝመ አርቅሽንዙ እሴትዝ ሲሪሸው አቐነውድ የጝ ቓሊሰውድ።
ፃግቭጂ ወረደይልም እንዛይ ኽየው ሲሪየዝ ሲሪሸቊ ገረዱ ኽገንድ እቀኽቭሪዙ እልቱ ፍልውልወይዝ አይንተ መሰሪ ጛይ። እጅር ኹርዝ ቀንት ይወነው፣ ሰቭዝመ ፃጀዝ ክቭር ይወነው፣ እጅርዙ ቀሰው ፈንዝመ እምጥጘድ እንዝጘም እጅርዙ ኽዝንዝመ ሚከረድ አድልሸነውዙ ቀሰው እሴት ፃየው ኽዝቭ የጝ።
ፃታ 01 ቀበሊል ኻግር ሽመቅሊስ አት አምሳሉ ወንድም ስመ ወረደይዙ ጝነክህነትዙ ዲቈተ መላከ ሰላም ንጉሱ ፀሐዩ ነይጘው ኻሰቭድም፤ ጅውነይል አርቅሽንዝመ ከቨከቭሽትንዙ ባኽልድ እቀኽቭሪል ላው ኽጊዝጘድ አቕ አግልግለነውድ፤ ዲግድ ሩዘነውዝ የውም አቒቱ ቂምዝመ ልኻንድ ሳቕረነውዝ ላውነይድ ኪውይጠጘ ፃቭኲ።
አት አምሳሉ ወንድም ጝተ ጅውነይዙ ቀሰቁ እሴተንድ ነንም ኪብርጝ ፅብጘጘድ ጉይጝ ቺተዝ ቆሽ አምር በልዝ ኪብረኪብርሽተነው፣ አቭን ለምረነው፣ ኽየውዝመ አቅም እጀው እጅርድ ከቭሰነውዙ፣ ክዝንት ኪብርዝን ለምረነውዙ አቅሊዙ ቀሰው ስነ ሚግቭረንድ ኹርዝ ክንሰነውዙ ዲዝጝትድ ነንም ፅበነውድ ልብስጝኩⶔ።
“ቀሰው ፃቭረዊዝ ቀሰው ገቨ ኻየኩ ጚ ጭቓ ተራውም” የቊድ ኻግሩ ሽሚርድ፤ ነንቱ ኰሪዝ ፃውተይዙ ችግሰይዝ ቘይሸቊ ዊግነንድ ከቭሰነውዝ ጭቓ ኰሪዝም ጛስ ጛይቱ ከቨከቭሽትንድ ቓሊሰው ኽዝቭ ፅበነውድ ደድስጘኩ።
ጝነ ክህነትዙ ዲቈተ መላከ ሰላም ንጉሱ ፀሐዩ ጝተ ጋብዝ
ቀለቊ ተከቊ አቭን ለምረነውዙ፣ ኽየው እጅርድ ጉን ለምረነው፣ ልኩድ እቓሰነውዝመ ጛስጛይቱ ገጫሽንድ ባኽሉ አርቅሸነውዙ ስረትድ ቲክነነው ተረው ኹሪዙ ዲጉ አቐው ገረዱዝመ ኢኮኖሚዙ ፍልውልወይዝ ሲሪየ አቕጘጘድ የጝ ልብስጘውድ።
አነ ጚ እን ኰሪዝ ፅበው ኹርድ ባኽልዝመ ዚምኑነይድ ቺዝን አርቐቅ የነዊዝ አቅልዙ ቀሰቁ እሴተንድ ኪብርዘነው ዚምኑነይድ እዳዘው ተካጙ ኹርድ ቀሰቁ እሴተኒስ እክልደነውዙ አጋልዝጎ ፊራⶔ አቐነውድ ባኽልዙ ኪውተድ እኪራⶔ አቐነውድ ልብስጘኲ።
ነንቱ ኹርድ ኽፅምቊ አቅሊስ ለምርጘው ቸለቸልሸነውዙ፣ ከቨከቭሽትንዝመ አርቅሽን ዊንም ስቚርትዙ ጒደነድ ጥውሸውዝ ኪውሽጝ ፃቀቅ የነዊዝም ይና ጅውነይዝ ዚልቀተ ዲግዝመ እቻቐው አቭርድነይድ ደድሰናንስ አጉረው ፅጋ አቕኲ።
ይነ አቅሊስ ለምርነው ዲግዙ ቑልፍድ ዘስክረነውዝ ቀለውዝ እኪተቊ ቅሬተንድ
ቃርዝጎ የውም ቺተቺትንዝጎ ላውጥሽጛንድ ቓለነው እዘን ፅውሰኲ።
ፃግቭጂ ወረደዙ ኻግሩ ሽመቅልዝመ ኻይማኖትዙ አቅለንድም “እንዛይ ቀሰቁ እሴተንድ ጽበው ኹሪዝ ላየ አቕየቊ ዚምኑነይ ተከቊ ዲዝጝተኒጅቅ ስረንዚጝቀት የውም ባኽልድ ዘስክሪጝቀት ቃጽልሰነው ቸልጝ ዊንጛን፣ ንጭ በንነው ዚልቀተ ዲግድ ሩድጠ ዊኑ”ይጘኲ።
“ኹር ተከውድ ጚርት የጝ” የቁድ አቅልድም አውማው እቀኽቭርድ ፅበው ኹርድ ጝ ግሬነውድ ቲክንክነነውዝ ጅውነይዙ ሲጘዝመ እሴትድ ክንሰነውዝመ ቲግቭርን ቓሊሰነውዝ ስልጣኒ ተካⶔ ቀሰው እሴተንድ በረቊ ውሸብልድ ጝተ አቅሊስ ለምርጘቊ አርወቊ እሴተንድ ፊስጘንስ ፃቨነው ተሚሰው አቐነውድ ማኽርጝኩጙ።
ውሸብሊዝ እፍርት ተረውድ፣ ችብረንጥ ሰራሽትጘውድ፣ ይናኻግርት ላውጠነው ቸልሸው ቲስመምንዝ፣ ዊግሽንዝመ ቀሰው ስነ ሚግቭርዝ አቐነውዴት ልብሰነው ጝተ ችጘርድ ፈቊ አቐነውድም ኻግሩ ሽመቅልዝመ ኻይማኖትዙ አቅልድ ሚሪጝኩⶔ።
ላየ ጋብዝ ፃግቭጂ ወረደዙ ባኽል ቱሪዝምዝመ ስፖርት ጽ/ጝንዙ ዲቈተ ቀስ አምኃ ጌታሁን ጅውነይል ጽበው ቀሰው ስነ-ሚግቭርድ ፅበው ኹርዙ እዘኒልም ፅበጘድ ጉይጘኩ። ጝሉ እጅርዙ ገጫሽንም አነ ጓነዝ ፋጥርሸው ቃርድ ኻግሩ ሽመቅልዝመ ኻይማኖትዙ አቅልዝ እክሰነውዙ ዲዝጝትድ አትረው አቐነውድ ሚሪጝኩⶔ።
ጽ/ጝኒዝጘም ኻግሩ ሽመቅልዝመ ኻይማኖትዙ አቅል ኽዝቭዝመ ውሸብል ጋብዝ ጝተ ወይሽተትነይድ አጉረው አቐነውድ ልብተነውዝ አቭርድን ሰራሸነውዝ ዲግድ ሩደው ጅውነ ፋጥረነውዝመ ጝባኽልድ ኪብርዘው ኹር ቃፅልሰናንስ ሰራሽታⶔ አቐነውድ ዲቈተድ ጋልፅጝኩⶔ።
“ኻግሩ ሽመቅልድ አሩሸነውዝ በረኸይል ፍጝ ዊነቊ 2 ላዝ 49 ከምሸጥ ውሸብል ጝተ ጝንዝጎ ዋጥርዘነው ቸልሽኲ”ይጘኲ።
አቓንስቅም ወረደይዝጘድ ፅበቊ ቀሰቊ እሴተንድ ውሸብለድ ቲግቭርጠ፣ ኻይጠ ማጥን ባኽል ቱሪዝም ጽ/ጝንዝመ ሚሪሸቊ አካለንድ ጝተ ችጝርድ ፈነው ኻይሽተኲ። አቅል ቲክንክነዝ አርውሽጛጙ ተርጘቊ ዲግዝመ አርቅሽንዙ ስነ ሚግቭርድ ነን ፅበው ውሸብለድ ቃፅልሰነው ቸልየውዜ ታትነቱ ይና እሴትድ ሲጘ ጭቚ አቕ እዳቓየጘ ገውሰኲ።
ፅበው ኹርድ ጝ አውነይዝመ ጝ አቅሊዙ ቀሰቁ እሴተንዝጎ ዋጥረነውዝም ዲግዙ፣ ቀንትዝመ አቭርድነይዙ ወነ አጠ ጥውሸኲ።
ጥቅምት 30/2019
ሳምራዊት ግርማይ
