ንግስቴ ተስፋ
እምፕል አቒ ሌጌስጝስስታ ቲን ዌና አኽጝስ ሊሊትጙኽ ምግቡሳ አይኔቶ ፋያውስታጊ ኬሻንቲ ልግስስታ ምርቱ ድምክኒስ ኽብፂውሳ አሉምቶ ኬፍፃማ ሚንቾ ምርቶ አፌራታ ፄውጝስ ካሊፃውሳ ኮንፖስቶ፣ ኽብፂው ማዳባሬስታ ጉላሌ ዜሮ ቱስቲስ ቴኬምስትጝ ፋይፄ::
አሬሳቻንትካ ጛጛርትጛዴስ ፊቲስካማ ጌቤሎ ሴማትፅጝስ ካሊፃውሳ ምርቶ አግፃንታ ካሊፃንኩ ጉዳይካዴስ ኽብፂውሳ ማዳባሬ ቴኬምስትጝ ጊዝስ ጎሌልስታው አኽⶓ ኽብፂውሳ አሉምቶ ማራማርጙ ዜርፍዳ አሴሜርጙንኩ ውማይቴን ኽይትጝፃና::
እንጚስኪላ ሊሊትጙኽ ምክንያቲስ አሉምቶ አቱኽ ኽብፂ ኬሻንቴ ምርቶ እያታ አቓ ግብሬ ኽብፂውሳ ማዳባሬ ቴኬምስትጝ ፋይፃንቲ ያኹኒዴስ ሊኽ አሜታዴስ ጃላ ቼፍፅⶓኪላ ፅናት ቶኬማ::
ኽብፂውሳ ማዳባሬ ቴኬምስታማ ሴብሎ ሊሚፅጝስ ምርቱሳ ድምክኔ ኬፍፅጝ እን አጌራ ይቶፒያዋ ፄጌራንኩ ሊኽዴስ 80 ታፋ ያኻው እዝብ ግብርኒው ዜርፍስ ቺትጛውያኽ ዳላውሳ ምርቶ አሜሬትጝስ ቼጌርስታው አጌርስ ኬሻንቴ ምርቶ አሜሬታማ ምርኪዴስስታ ድኽትዴስ ፊጝስ ቹዋ ኽይታ እንኩርስቱኽ ዜርፍዴስ እምፕልያኽ::
ዊዛሩ ይጋርዱሽ ወርኩ ዳንግሊ ወረዳ ዱቪ ኬቤሊዳ እርሺው እንፅኺስ ዝኩዊኔ ፄውኒዴስ አሜትካዋ ቼፍፅካ:: እንፃኽስታኑ ግብርኒው እንፅኺዴስ ኬሻንቴ ምርቶ አግፅጝስ እርሼ ቱስቲስ አሬስጝዴስ ጉሽፃማ ኮንፖስቶስታ ኽበፂውሳ ማዳባሬ ቴኬምስትካማ ዜራኑ ሴብልዴስ ጛውሳ ምግቡሳ ፋዮ ዋኽትጝፄካማ ፊቱኽሳ ጌቤልሰ ዲግስጝስ ይኮኖሜ ሌጌፅጝስ እንፃኽስታንኩ ክቻዴስ ቶኬምስታንኩዊያኽ::
ንጙዊን ችኹ እርሺስኪላ ሹምቤ፣ ታፌ፣ ዳጉፄስታ እሊኩሳጊ ሴብልካዋ ዜርጝስ ፄዋኑሳ ቤዴራ ቴርቶ ይስጝፄካ:: ናካኒ ወክትስኪላ ሹምቤ ዜሬካማጊ አኽⶓ ዊዛሩ ይጋርዱሽ ድኹዌካ::
አንኩዋ ኩፃ ብቲዳ ዜራኑ ሹምቢው ሴብልስ ኩፅኒ እምፕል ኩንታል ዩሪያ ኽብፂውሳ ማዳባሬ ቴኬምስትጝስ ጌዴድስትⶓ ዙሜካ::
እንጚሱ ምክንያቲኪላ ማዳባሪው ክብርናቲዴስ ጃላ ዲግስጚው እንፂጝ ዝኩጝስ ብቲ ፁሞ ቻቲታ ግባቶ ቴኬምስታኑላ ዜሬካማጊ አኽⶓ ቶኬምካ:: ምርቱሳ ድምክኔ ኬፍፅጝስ ፅሬቶ ፄዌካማጊ ያኹኒውላ ኽብፂው ማዳባሪው ክብርናቲስታ ዲግስጚ ኩፅኒ ፍታና አኽⶓ ዊዛሩ ይጋርዱሽ ድኹዌካ::
ዊዛሩ ይጋርዱሽ እዩኑ ካንቲዳ ላንቡሳ ኺስታ ፋያኑሳ ላካ ኽብፂውሳ ማዳባሬ አግፄካያስኩ አኽⶓ ጉሽካ:: እንጚኪላ ይንታው ምርቱ ዝቤንዳ ምርታምቶ ዴሜክጝስ ካሊፃውሳ ግባቶ ቴኬምስታኑውላ ይጉጝ አግፃኑሳ ምርቶ ኔኬትጝስ ካሌ ናውሳ ስጋቶ ቺፄካ::
ጛው አክምስ አሬሱኑዳ እርሺዳጊ ኽብፂውሳ ማዳባሬ ታምፅⶓ ካላኑላ ይጉኒውላ ልቓ ብቲዳ ኩፅኒ ኮንፖስቶ ቴኬምስትካማ ሴብሎ ዜርጝስ ሞኬርካማጊ አኽⶓ ቶኬምካ::
ዊዛሩ ይጋርዱሽ ናኑውስታጊ ኽብፂው ማዳባሪዳ ዝኩኽ ዋይሚውሳ ክብርናቴስታ ፋይስታው ልክስ ዲጋውላ ይጉጙሳ ችግር ኩፅኒ ምንግስት ትኩትስ እንፃኽስስቱኒ ግብርኒው ዜርፋ ኪሴ ሜዜጌብፅጝስ ካሌ ናውሳ አሳቦ ዲግስካ::
ዳንግሊ ወረዳ ዱቪ ኬቤሊው ዝኩዋንቲ አቶ አያና ጋሼኪላ 2018/2019 ምርቱ ዝቤንስ ሱኺቲ ኩንታላ ኽብፂውሳ ማዳባሬ ቴኬምስትካማ ሊሚፃኑ ሴብልዴስ፣ ትክልቲስታ ኩፓኩፒዴስ አግፃኑሳ ምርቶ ቤዴራ አግፂሺኑዴስ እፅፍስ ምርቶ አግፄካማ ኬሻንቴ ዝኩዊኔ ጉስጝስ እክዶ እሚካ::
ላጛ ሄክታራ ብቲዳ ሹምቢውሳ ሴብሎ ሊሚፅጝስኪላ ላጛ ኩንታላ ኽብፂውሳ ማዳባሬ ቴኬምስትካማጊ አኽⶓ አቶ አያና ዙሜካ:: እምፕል ኩንታል ሸምቢውሳ ጉልሌ ዜሮ ዜርⶓ ጉሽካ:: ኽብፂው ማዳባሪው ክብርናቲሊ እምትጛማ ጛው ማሲስ ፋይፃው ሜቴንስ አግፅጝስ ቼጌርስቱኒውላ ኮንፖስቶ ቴርሴካማ ዜራኑ ሴብል ኬሻንቴ ምርቶ እያታ ፄውጝስ ፅሬቶ ፄዌካማጊ አኽⶓ አቶ አያና ድኹዌካ::
ፌዩንኩ ላጛ አሜታስ ወሬሙ ምክንያታስ ኽብፂውሳ ማዳባሬ ቱስቲስ ታምባውላ ይጉዋማ እምፕሎ ኩንታሎ ላጛስስታ ሹኻስ ቤንጜካማ ሴብሎ ሊሚፃሺኑ ወክት እሺⶓ ታክስካ:: ንጙዊኒ አሜትዳ ኩፅኒ ፋይስታው ሜቴንስ ያኻውላ ይጉዋችኹኒውላ ፌይኹ አሜትሊ ካንትጛኒ ኩፅኒ ኬሻንቲ አኽⶓ ጉሽካ:: ያኼስጉ ኽብፂው ማዳባሪው ዋይሚ ኩፅኒ እፅፍስ ዴሜክጝስ ሴብልስ ቱስታው አኺኒስ ቴኬምስትካማ ሴብሎ አሜሬትጝስ ቼጌርስትካማጊ አኽⶓ ቶኬምካ::
ጉልሊ ዜሩ ፃንኩትስታ ዲጋው ጉልሊ ዜሩ አይኔት አሬሳቻንትካው ምርትዳ ድምክኔ አጋቲው አኽጝስ ምንግስት ትኩትስ ቼፍጛማ ፅንኩቶ ዜሮ አሬሳቻንትካ አግፅጝስ ካላንታ ፄውጙ ቴግባር ይስጛማ ሲፋታ ናኒስ ካንቴ እይካ::
ዱቪ ኬቤሊ ግብርኒ ፅ/ጝናሱ አላፊ አቶ ደረበው በላይነህ ኬቤሊታ 2018/2019 ችኹ ምርቱ ዝቤንዳ 1 ሻይ 297 ሄክታር ብቴ ሊሚፅጝስ አኬድስታማ ይስጝፃው ፊፂምጚዳ አግስታንኩ አኽⶓ ጌሌፅካ:: 9 ሊኻ 41 ትኩሚ 5 ኩንታል ዳፕስታ 8 ሊኻ ኩንታል ዩሪያ ኽብፂው ማዳባሪ አሬሳቻንትካው ታፍዳ ታምባማ ዜር ዜርስትⶓ ጄሜራማጊ አኽⶓ አቕፄካ::
አቶ ደርበው እዩኑ ኽይትጝፂዳ ኬቤሊታ አሬሳቻንትካው ኽብፂው ማዳባሪው ፋዩሳ ካሴ ዋኽስ ዋኾ ዙርፅጝስ ካሊስታውላ ይጉኒውላ 50 ታፋ ሊኽዴስ አሬሳቻንትካ ፍታዊ ዳድስ አግፃንታ ፄውስትⶓ ኽይትጝፄካ::
ኬቤሊታ ሹምቢ፣ ዳጉፂስታ ታፊ እሳንስ ሊማው አኽጝስ ውማይ ፌኬዳው ሜቴንሰ ኽብፂውሳ ማዳባሬ አሬሳቻንትካ ቴኬምስታንታ ፄውጝስ ዋይሚው ክብርናቲስታ ዲጋው ሜቴን ፍታና አኽⶓ ጉሽካ::
አጌርታ ጌቴሙኽሳ ኽብፂው ማዳባሪውሳ ክብርናቴስታ ዲግስጚውሳ እንፂⶓ አሬሳቻንትካስ እርዳትፅጝስ ኮንፖስቶስታ በርሚኖ እንቲታኪ ባዩሰላሮ ቴኬምስትካማ ሴብሎ አሜሬትጝስ አግፃኒስ ምርቶ ዴሜካንታ ፄውጝስ እንፃኽስስታማጊ አኽⶓ ቶኬምካ:: ፌያፌያማ ካንትስታው ጉልሊ ዜሩሳ ፃንኩቱሳ ችግሮኪላ ትኩታኩ ቤንካ ኽያንታ አሳቦ ዲግስⶓ ጌሌፅካ::
ዳንግሊ ወረዳ ግብርኒ ፅ/ጝናሱ ትክትሊ አላፊ አዲሱ አለሙ ወረዳታ ኽብፂው ማዳባሪውስታ ጉልሊ ዜሩ ዲግስጚ ፌዩንኩ አሜትካሊ ካንትጛኒ እንዳ አሜትዳ ኬሽኹ ፊፂምጚ ዝኩኽ አኽⶓ አቕፄካ:: እሳ ዜጌቤ ቴርስንኹሳ ወክቶ ኺስታ ሊኽዴስ 52 ታፋ ወረዳሾ ዲጋማ እክዱሳ ኪንዴ ፊፄምጝስ ፅሬቶ ፄውⶓ ጉሽካ::
ወረዳታ 2018/2019 ምርቱ ዝቤንስ 56 ሻይ 314 ኩንታል ዳፕ ኽብፂውሳ ማዳባሬ አሬሳቻንትካስ ዲግስጝስ እክድ እምስታማ ላምቡሳ ኺስታ 33 ሻይ ኩንታልዴስ ጃላ ወረዳሾ ዲጋማ አሬሳቻንትካስ ዲጋማጊ አግስቴ:: 56 ሻይ 310 ዩሪያ ኽብፂው ማዳባሪ አሬሳቻንትካስ ዲጋታ አኬድስታማ 30 ሻይ ወረዳዋ ቱዋማ አሬሳቻንትካስ እይስትⶓ አቶ አዲሱ ቶኬምካ::
አቶ አዲሱ እይኑ ኽይትጝፂዳ ወረዳዳ ፅንኩት ጉልሊው ዜር አሬሳቻንትካስ ታምባታ ካሊፅጝስ ክልሉ ዜሩ ኩራንታይን 11 ዜሮ ዲግሳንትካ አችትካዋ ወረዳሾ እንፃኽⶓ ጌሌፅካ::
ወረዳታ ጐልሊ ዜሩ ዲግስጚው እክድኪላ ሊሙ ሹምቢው ዜር 3ሻይ 980 ኩንታል ዲጋታ አኬድስታማ 4ሻይ 79 ኩንታል ማይኬልሾ ታምቡስ BEH 660 እስታው ሹምቢው ዜር 2ሻይ ዲጋታ እክድ እምስታማ 3ሻይ 104 ኩንታል ዲጋማ አሬሳቻንትካ ጄዌካማጊ አግስታና::
ጉልሊው ዜርዳ ችግር ዝኮ እስታማ ዲጋውሳ ክሬቴ ኽይጝስኪላ ወረዳ ሲፍጜስታ ቼፍጝጜ ፄዋማጊ አኽⶓ አቕፄካ:: አሬሳቻንትካ ፋያኑ ጉልሊ ዜር ዲጋታ እንፃኽስስታማጊ አኽⶓ ቶኬምካ::
ኽብፂው ማዳባሪው ክብርናቲሊ እምትጛማ አሬሳቻንትካዳ ስጋት ዝኩጝስ አሬሳቻንትካስ ሼውቴ ፌቴርጙስታ ኮንፖስቶ ቴርሴካማ ሴብሉሳ ድምክኔ ቼሜትጝፅጝስ ካላንታ ፄውⶓኪላ ቴግባር ይስጛማ ሲፍⶓኪላ ጉሽካ::
ወረዳታ 2018/2019 ችኹ ምርቱ ዝቤንዳ 18 ሻይ ሄክታር ብቲዳ ሹምቤስታ እሊኩሳጊ ሴብልካዋ ዴሜካማ 47ሻይ ሄክታር ብቲዴስ ጃላ ዜርስ ሾፌንጝስ ትኩትስ እንፃኽስስታማጊ አኽⶓ አቶ አዲሱ አቕፄካ::