“ቴክኒኩ ማይኬል ግቢትስታታ እንፃኽስቴ” አቶ ኢሳያስ ጅራ

ይንታው ሲዚ አሜትካስ ይቶፒያው ልኩ ኩታው ፌዴሬሽኑ ፕሬዝዳንት አኽጝስ ይቪቺ ታሜትስታንቲ ያኼካማ ዲጉንኩ አቶ ኢሳያስ ጅራ አጌራውሳ ልኩ ኩታዋ ኬፍፅጝስ ካላውሳ ቴክኒኩሳ ማይኬሎ ግቢትፅጝስ ፅሬቶ ፄዋንኩ አኽⶓ ዙሜካ:: ናካዳ ፌዴሬሽኖ ጉሴካማጊ አግስታንኩ አቶ ኢሳያስ ጅራ ይንታውዳ እንፃኽስትጝስ አኬዱንኩ ቴግባርካው ዙሪዳ ጊሊፄ እይካ::

ፕሬዝዳንት ይንታንኩ ሲዚ አሜትካዳ አጌራውሳ ልኩ ኩታዋ ሌጌፅጝስ ካላንኩ ጉዳይካዳ ትኩቶ እይካማ እንፃኽስታንኩ አኽⶓ ጌሌፅካ:: እኒጛዴስ ቴክኒኩ ማይኬሉ ግንባቲዳ ኽሳንቲ ትኩት እይስትኹ አኽⶓ ቶኬምካ::

እንስኪላ ኦሮሚያ ክልል ሱሉልታ ኬቴምዳ 10 ሄክታር ብቴ ፌኬድፅⶓ ጉሽካ:: እንዴስ ድምክና ይቶፒያውሳ ልኩ ኩታዋ ሌጌፅጝ ሌጌሳታምብካው ልማትዳ ትኩቶ እይካማ እንፃኽስታንኩ አኽⶓ ጊሊፂዳ ጉሽካ:: ኬሽኹሳ ብሄራዊ ኬቾ ቲሪትጝፅጝ እሊው ትኩት እይስታው ጉዳይ አኽⶓ ጌሌፅካ:: ኹኑ ልኩ ኩታዳ ፣ሴሌቴንፃንትካውስታ ዳኝካው ልማትዳ እንፃኽስትጝስ እሊው ትኩት እይስትኹ እንፅኺ አኽጝ ቶኬምስታ:: ቺፅጝፂውሳ ጉዳዮ ዝቤንፅጝ ፣ልኺትጚዉሳ ፃንኩቶ ሌጌፅጝስ ምንግስትሊ ማቔንትጝስ እንፃኽስትጝስታ አሌም አቡቑሳ ታምትጜ ሌጌፅጝ ይንታንኩ ሲዚ አሜትካዳ እንፃኽስስታንኩ እንፅኽካ ክቻዴስ ቶኬምስትካ:: 2028 አፍሪካውሳ ዋንቼ ቴርስጝስ ካሴ ዲግስⶓ ቶኬሙንኩ አቶ ኢሳያስ እንስኪላ ሌንጌድፅጙሳ ድሎ አግፅጝስ ኬፍቲኔ እንፅኼ እንፃኽስትካማጊ አኽⶓ ጉሽካ:: ይቶፒያው ልኩ ኩታው ፌዴሬሽን ባይልስታ ስፖርት ሚኒስቴርሊ እምፕልትስ እንፃስትካማጊ አኽⶓ ጉሽካማ አፍሪካዉሳ ዋንቼ ሌንጌድፅጝስ አቾ ማንዱንኩ ስታድየምካ ፋይፃንኩ አኽⶓ ቶኬምካ:: እንሳ ሳኪትጝፅጝስ ኻሮ ጌርኮ እንፃኽስትጝ ቱስታው አኽⶓ ጌሌፅካ::

ንባሮኪ ኢቢሲ ስፖርቱ ማቤራዊ ታምትጝፂው ፍንዴስ አግፅና::

ታደለ አጋጄ