ሜስኬል አዋኾዳ

ሜስኬል አዋኾዳ ሊሊቲስ ኬቤርስታው ባልያኽ:: ባሎ ኬቤርፅጝስ ቤዴራ ቴርት ፄውስትⶓ ጄሜራው አሱሪቴውሳ ባሎ ኬቤርፁኒዴስ ፋሌንጋኽ::

ሜስኬሉ ባል አይማኖቱስታ ባይሉ እሚ ዝኩኽያኽ:: አይማኖቱ እሚ  ኢየሱስ ክርስቶስ ሳንክስታሺኹ ሚስኪሊ ሚንች ዝቤንካስ ፃሚዳ ዴውስታማ እጂኒዴስ ፋሌንጋ አግስትⶓ ታክስጝስ ኬቤርስቴ:: አይሁድካ 302 ም/አሜታዳ ዴውስትኹሳ ሚስኪሌ ንግስት እሌኒስ ሚስኪሊ ዴውስትኹ ስፍሪዴስ ግሽፅጝስ  አግስትⶓ አይማኖትኩ ታብል ዙማና:: ንግስት ኢሌኒ ሚስኪሊ ዴውስትኹሳ ስፍሬ ማሊጝስ ዲሚሬ  ዲሚሪፄታ ትሺ ሊጊሲሜ እቺቶ ድባን አምፓሾ ካሱኒዴስ ፋሌንጋ ብቲሾ ዙራማ ትሺ ምልኻትኹሳ ስፍሬ ግሽፄታ ሚስኪሊ ዴውስትኹ ስፍሪዴስ ፋታ ፄውስትⶓ ኦርቶዶክስ ብሽታናው ሊካውንትካ ቼሜትጝፃና:: ንግስት እሌኒ ሚስኪሊ ዴውስትኹ ስፍሪዴስ ፍሽጝስ ሜስኬሩም 16 ጌርካስ ግሽፅⶓ ጄሜርታታ ሜጋቢት 10 ጌርካስ ሚስኪሊ አግስትጝ ዙሚስቴ:: ሜስኬሉ ዋዚሚዳ ዲሚሪ ዴሜርስታውኪላ እንጚሶ ታክስጝሲያኽ::

ሜሴኬል ባሉ ባይሉ እሚ ዴሜካ ሊሊትጙንኩ ዙራሙርካዳ ሊሊትጙንኩ ቴርትካስ ኬቤርስታው አኽጝያኽ:: ባሉ ዊዚሚዳ ሊሊትጙንኩ ኩምችንካ ፄውስታና:: ጝርጃ ባላፉቼ ኬውካማ ጝኑ አብጅሊዳ ቴኬላና:: ጝኑ ሙሲስኒዳ ዴሜካ ዴስፃው ኽሪ ዝኩኽ ሲዊ ድሩፃ እስታማ እንፄውስቴ::ሜሴኬሉሳ ባሎ እምፕል ዙራሙሪዳ ዝኩዋንኩ እምፕልታቕ ሊሊቲስ ኬቤርፃኑ ባል አኽⶓ ጉዋንጊ ወረዳዉ ዝኩዋንትካ ዙሜካ::

ጉዋንጊ ወረዳ አንጉዋይ ኬቤሊዉ ዝኩዋንቲ አቶ ስሜነህ ሙሉነህ ሜስኬሉሳ ባሎ ዙራሙሪኩ እምፕልታቕ እምፕልትስ ኬቤርፃኑ ባል አኽⶓ ዲብስካ:: ባል ታምብጝዴስ ቤዴራ ጌውስጙንኩሳ አሬክጝፃና:: ባል እምፕልትስ ኬቤርስታው አኽጝታጊ ኩቦ ድርብካማ ኩፕፁኑ ጌንዜብስ ባልስ አሬድስታውሳ ታዮ አኹኪ ቢሬ ጄዉና :: ውላ እምፕልታቕ እስካዌ ስዮ ሴይካማ ግዲጝስ ባሎ ዴስቲስ ኬቤርፃኑ ሊሊቲ ባል አኽⶓ አቶ ስሜነህ ዲብስካ::ስራስሪ ባላፉቼ ኬውካማ ዜርስትኹ ሴብልዳ ካፅካማ ቴኬልጝስ ሴብል ጉዶ ምርቶ እያታ እንጉስትጝስ አብዜስታ ስልኼ እሚካማ ሴብልዳ ብኹንሳንኩ አኽⶓ ቶኬምካ::ኹና ኹና ዴሜካ ሜስኬሉ ባል ታምብጝዴስ ቤዴርካማ ቺዌ ዶኬስካማ ኹስታውሳስታ ዝቕስታውሳ ቴርሳንኩ አኽⶓ እርዳትፅካ::

እሊው ጉዋንጊ ወረዳ ዲጊሪ ኬቤሊዉ ዝኩዋንቲ አዳመ ጌታሁን ሜስኬሉ ባል አሱሪቴው ባልዴስ ሲፋማ ኬቤርስታው ኽሳንቲ ባል አኽⶓ ዙሜካ::  ባልስ ቤዴራ ቴርቶ ፄውⶓ ጄሜራኑ እስካዊ አሜቶ ኬቤርፁኒዴስ ፋሌንጋ አኽⶓ ቶኬምካማ ሜስኬል ፋዝጋዴስስታ ጊኒዴስ ሲፋማ ብሩኽሳ ኬቤርፃኑ ባል አኽⶓ ድኹዌካ:: ስራስሪስ እስካዊ ስይ  ሜስኬሉ ባልስ  እስታማ ጄውስቴ ንካ:: ምንጊስኩ አቕ ባሎ  ዋንቻሬ ሴይካማ ኬቤርፃኑ አኽⶓ ዙሙንኩ አቶ አዳመ አዊው ባይሉ ስይስ ግዲካማ  ባሎ ኬቤርፃንኩ አኽⶓ እርዳትፅካ::

ባል ታምብጝዴስ ቤዴራ ጌውስጙንኩሳ አሬክጝፅጝ፣ እምፕልትስ አሬዳኑሳ ቢሬ ጄውጝስስታ ዲሚሬ እምፕልትስ ዴሜሬጝ ቤዴርካማ አኮሜቻንኩ ቴግባርካ አኽⶓ ድኹዌካ::ሜስኬሉ ባልዳ ሊሊቲስ ጄር  ጄርካ እቑስትካማ ላጛ ሶኼታዴስ ጃላ  ዛኽ ዝሜድካ እቑትጜካማ እምፕልትስ ኬቤርፃኑ ሊሊቲ ባል አኽⶓ ጉሽካ::እምፕልታቑሳ ማይቤራዊ ታምትጜ ይስጝፃው ባል አኽⶓ ቶኬምካ::

እሊት ጉዋንጊ ወረዳ ዲጊሪ ኬቤሊው ዝኩዋንታ ፀሀይነሽ ብርሃኑ  ኹን ሜስኬሉ ባልስ  ቤዴርካማ ስልኼ ዜኬትጝስ፣ ቺዌ  ዶኬስጝስስታ እሊኩሳ ዲብካዋ ቴርስጝስ ቴርታንኩ አኽⶓ ዙሜካ:: ሜስኬል እቺዳ ዝኩዋንኩ ጄርካዋ እቑዊጝስ ታምትጛኑ ጊዝ አኽⶓ ድኹዌካ::

ጉዋንጊ ወረዳ አምቢቒ ኬቤሊዉ ዝኩዋንቲ መሪጌታ ልኡል ሀይሉ ሜስኬሉሳ ባሎ ኬቤርፅጝ ጄሜራው ሶኼቶ ቤዴርካማ አኽⶓ ቶኬምካማ ጝንቺፋ ስልኺ ዜኬትስታማ ኹስታውታ ዝቕስታው ቤዴራማ ቴርታው አኽⶓ ዙሜካ::

መሪጌታ ልዑል ዙሙኑውስታ ሜስኬልታዋ ጉሪጛስ ውላ እስካዌ ስዮ ሴያና:: እስካዌ ስይስ ግዴካማ ሜብራቶ እሚካማ ዋዚሚታዋ ግቢትስትኹ ዲሚሪሾ እምፕልትስ ካስካማ ሜብራቶ ብርፃንኩ አኽⶓ ቶኬምካ::”ዲሚሬ እምትጝፄካማ ሌግስ ድጙፁኒዴስ ፋሌንጋ ዲሚሪው ናቕትዳ እምፕልትስ ኩፕንካማ ታምብኹሳ ሹምቢውሳ ምሜ ጌሽካማ ኹዋና:: ጝን ጝናዴስ ቴርትኹሳ አብዜስታ ስልኼ ቡዌካማ ዲሚሪ እሺኹ ስፍሪዳ እምፕልትስ ኹዋና፤ ዝቓና:: ባልታዋ እምፕልትስ ያኼካማ አሬዱኑሳ ቢሬ እምፕልትስ ኹዋና:: ቴርት አሌድስቱኒዴስ ፋሌንጋ ድቕር ፄውስታማ ቴርት አሌድስታው አኽⶓ ዲብስካ::  “ናካ አሜታ ዴክስ ታምፁኒጊ እንሳ እንሳ ፄፓኻኽ ንካማጊ አክም ፌኬዳውሳ ስሌቶ ሳሊታና” ናኒስ ሜስኬል ሊሊቲስ ኬቤርስታው ባል አኽⶓ መሪጌታ ሉእል ድኹዌካ:: ባል ፌዩኒዴስ ፋሌንጋ እቑስቲ ፄውስቴ:: እቑስቲ ፄዉስታዉ ጝንዳ ቺፌንቲ ፄውስታማ ኹስቴ፤ ስልኺስታ እሪኪጊ ዝቕስቴ:: እቑስቱንኩ ጄርካጊ  እቑስቱኑ ጝንዳ  ቼካማ ካሳንኩ አኽⶓ ዘሜካ::

ትክላሊስ ሜስኬሉ ባል ይቶፒያ ዩኒስኮዳ ሚዚጊብፂኩ ዳሴስስታቲንኩ ማኼትካዴስ እምፕልያኽ:: 2006 ም/አሜታዳ ዩኒስኮው ዳሴስስታቲው ማኺቲው ሜዝጌብዳ እንኩርስታ:: ዩኒስኮዳ ሜዜጌብስቱኒዴስ ፋሌንጋ ሚንችካ ቱሪስትካ ባሎ ኬቤርፅጛ ይቶፒያሾ ይንታና::ቱሪስትካዴስ ባርኾቼውሳ ምንዛሬ አግፅጝስ ሚፂው አግፂ ፄውስታማጊያኽ::

ታደለ አጋጄ