ምርጸ ኢትዮጵየ ትጘን ተከቁ ሊግዘቁ ኻግረንዝ እክሰቁ አርወን ጽየው የጝ፤ ተክዘዝም ምርጸ ኽዝቭ ጭሰጭሰተድ ዊንም ምጝግስትድ ማርጽጠ ማጥን ቸልሰኩ።
እን ኽዝቭዙ ኻይልድ አትርጠጘድ ከቨኩ፣ዴሞክራሲዙ ሲሪየድም አትርዘኩ፣ ላየ ምርጸዙ አርወድ ምጝግስትዙ ዋቕርሸተነይድ ሊጊሰነው የጝ። ማርጽሽተቁ ቃወጥ ስልጣኒዝጎ ተርጘውድ ኽዝቭዙ ድመይዝ አቓንስቅ ጝታ ኽዝቨንዝ አጡ ዊሰ ይወነው ኻይሽተኩ።
እኔን ቈሽ ምጝግስትዙ አርቕሽትንዝመ ዋቕርሸተነይድ ሊጊሰኩ።
ምርፀዙ አሩሸተነይ ጉይሽታንድ ዲጉ ጒደነድ ሚሪሰነውድ ተክዘይዝጘድ ጉይሽተኩ፤ ምርጸ ኻግረን ፖለቲከዙ ቺትንድ ዲጉ ጒደነዝ እክስጥጘ ከቭሰኩ።
ጣይትንዝመ ገጫሸንጥዙ ጒደንጥድ እጅጝሰናንስም የይቱ እኩሰድ አውግረው የጝ። ዜገን ምርጸዝ ሲትፍሽጛንድ ጝታ ኻግሪል እኩሰ ጻቨቁ አቐጘ ወይሰኩ፤ እኔን ፖለቲከዙ አርቕትዝመ ዲቁትነይድ ሊጊሰኩ።
ምርጸ ምጽነ ጻጀዙ ሊግዝትድ ነሰናንስም ጝቀሰው ጋቢዝ እትለኩ ፤ እርጋቐው ፖለቲከ ጽየቁ ኻግረን ምጽነ ጻጀዝመ ኢንቨስትመንትዙ ጛ ሊግዝትድ ቺዘ ቺዝ የኩ። እን ቈሽ ኢትዮጵየ ትጘን ተከቁ ሊግዘቁ ኻግረኒዝ እቀጘዝ በንዘተ ኻለይ የጝ።
ምርጸ ጛሉዊስ ኪርም ጽበቊ ጊቭርተንድ ኪቭርሽጝጥጘ ጝእኩሰድ አውግረው የጝ። ምርጸ ጽበነው ምጝግስት ዜግጥዙ ሚቭትድ ኪብርሻንስ ልቕርደኩ፣ እጅርነይዙ ሚቭት ኻይንድም ቺዘ ቺዝ የኩ፣ ላው ኻግር አቒስ ምርጸ ጻጝሽትየውዝነ ጭቅተዝመ ጋብቱ ቘጨን እትልጘኩ።
ጭቅተ ቘጨን ይነቊስ ዴሞክራሲዙ ኻደገል ሊቨነው፣ኽጉነይ ድዘነው፣ጭሰጭሰኑ ዋቕርሸትነይ ድዘነው፣ሚቭትዙ ኻሽን እትልንድ ዳቕሰነው ቸልሸኩ።
ምርጸ ዊነቅ የነው ጋብቱ ቘጨንድ ቈሽ ፖለቲኩ ገጫሸንጥ ቈሸነው ምጽነ ጻጀዙ ሊቭን፣ገረዱ እምንት ሺርሽርሸነው፣አልም አቅቨ ዲምቅሸንጥ ዝላቐነውድ ቲክንዘኩ።
ሩድየው ዊንም ጨቅዘተ ምርጸዝ ምላሠን እክሰቁ ኻግረን ጥውሽትየው ፖለቲኩ ችግሰዝመ ምጽነ ጻጀዙ ድዘራዝጎ ጥውጝኩጙ።
ተክዘዝም ይና ግዘ ኬኒያ አውረፕቊዙ ዚምን እግዝግዘይዝጘን 2007 ዓ.ስዝ ጻጝዝረው ኻግሩ ምርጸይዝ ንዋይ ኪቫኪቭ ፈን ለምጠቅ የነውዝ ኻግርሸንትል እትለው ገጫሽንዝ 1000 ንየ እቅ ጝታ ሩሄድ ብጝኩጙ፣ እክሰቁድም ፊንቅልሽጝኩጙ፣ ኻግርሸንቱ ለወንትድም ኻደገል ሊቭ ዊኑ።
ዚምባቡዌ 2008፣ አይቬሪኮስት 2010፣ ቤላሩስ 2020፣እኒዝጘም ማይናማር 2020 ጻጝዝጘው ኻግሩ ምርጸድ ቲክን ኻግረኒል እርጋቐቅ የነው ፋጥርሽኩ።
ሩደው ምርጸ የነት ናጸ፣ እክሱነይ፣ አራሰውዝመ ዲጉ አቐው ምርጸ ጻጝሽታንስመ ማርጸተ ኽዝቭድም ፈንድ አነ የው ለምራንድ የጝ፡፡ እንትየው ምርጸ ጻጝዘቁ ኻግረን ጝታ ዴሞክራሲድ አትረው ኻግረን ጛይ፡፡ ተክዘዝ ኖርዌይ፣ ካናዳ ሕንድ፣ ጋና፣ ቦትስ ዋናስመ ደቡብ አፍሪካት ጉየነው ቸልሸኩ። ይንም ይና ንጭቱ ጽፈሽዝ ምርፀድ ዲጉ አቕንትዝ ኻትሽጠ ማጥን ውሸቭሊዙ ችጘርድ ሚሪየውዝ አንቭቭስነ ቀኑን።
ውሸቭልዝመ ምርጸ ነንቱ ሰቲዝ እቀጘ በንዘተ የጝ፡፡ ውሸቭል አይነተዝም 18-35 አድም ኽዝቪዙ ንቕፀዝ አውግረው ክፍል አቕሽም ፖለቲከዙ ጻጝት አቒስ ጝታ ሲትፍሽንድ እክሰው ኮሪስ ሳስ የው የጝ 7 ትረ ጥቅለ ምርጸ 2018 ግንቭት አሰነይዝ ጻጝሽተኩ።
ውሸቭለ ደሳለኝ አደሩ ወይ ኽምረ ብሄረ እቅ ጭሰጭሰኒዝ ሳቁጠ ወረደ ጻመረ ቀበሊዙ ጽበተ አቓንድ “ምርጸ ውርም እኳን ዴሞክራሲዙ ጒደነዝ ስረት ላውጠነውዙ ኻግርቱ ሊግዝትድ አትርዘነ ጒደንጢስ ላውድ አቐነውድ አልምትል ችጝሸቊ ቺተቺተቊ ኻግረን ቓሊሰቊ አጝሽም ይነ ኻግር ኢትዮጵየ ትጘድ ቓልሽታንድ ጻቭሽትኩ የናንስ አቕሽ ጚ ቲግቭሩ ምርጸ ጻቭሽታንድ ቓልሽትየውም” ያንድ ጝኻለይድ ቢንስኩ፡፡
“ሊግዘጥ ኻግረንድ ዴሞክራሲ ኮሪዝም አቕሽ ኽምዘ ፋጥርሺጝቀት አጡውድ ማርጽጘኩ፡፡ ይናውድም ጝታዊዝጘድ እኳን አቐቕ ይሽም ዲግ አቐው ጉጉዝ ማርጽናን እገረ ይና ቑሪዝ የነውዝ ጋልፅኩ፡፡
ምርጸ ዛሸ ዛሽተነ አቒጝቀት ኻሰቭዙ ንየትነይድ ደድሰነውዝ ባልጸው ለምርሽን ጽየው ፓርቲድ ኽጉዝመ ዴሞክራሱ አሩሰኩ ጒደነዝ ስልጣንድ ለምር ኻግር ቃወነውዙ መለ የጝ የው ውሸቭለድ ይና ጅውነይዝጘድም በጀት ቅብሰነውዝ ምርጸ ጻቭሽቱ የነው ዳቕየውዜ እማንቱ ምርጸ አክንውሽጠ ጥውሸው አቐነውድ ጋልጽ ቺተዝም ቈሽ ቲክርክርሸቁ ቺተቺተቊ ፓርቲየንድ ታኽነዙ ቲክርክረይስ ፍጝ ኻግርት ሊጊስጡ ይጘው ኻሰቪዝመ ኻለይዝ ማርጸተይዝ ቅይጝ ማርጽሽትጛንስ እንጐይስ ኻስቭጝ ሰራሽጛንስ ዊኑ ማኽረውድ።
“ዲጉ ስልጣንዙ ከረ ከረን ጻቨነው ቸልሸውድ ምርጸዝ ጭቑ የጝ”
ምርጸድ ዲግዝ ኻትሻንስም ውሸቭለድ እንጎይስ ጻውተዙ ጽረ ጋቢል ችብርጠ ጡውሸው አቓንድ ምርጸ ላይ ኻግርሸንቱ ሊግዝቲዝመ አሩሸተነይዝ ቲኪሻው ችጘር ጻየው አቓንድ ውሸቭለድ ቈሽ ኻግርሸንቱ ዴሞክራሱ ስረት ኵንን ጻጘይዝ አትረው ሲትፍሽን ጻቨነውዝ ተረው አገነይዝ ሲሪየ ማልጠጘዝመ አምርትወ ኢትዮጵየት ለምረነውዙ ዲቁትነይ ጻየው የጝ።
“ውሸቭለድ ምርጸ ኮሪዝ ዲግዝ ጅሉዘ አትረው ሲትፍሽን ጻቨነውዝ ምርጸዙ ካርድ ተገተግሽትንዝ ፊሰዊዝጘድቅ ምርፀድ ጻጝሽታን ትኮር ጅውነድ አትርንዝ ኻየነው ይና በንነው ፓርቲድ ማርጸናንስ አጡዝ አስልሽን ኩኑን” የነውዝ ላየ ዊግስነው ውሸቭለ ሙሉቀን ጎይታይ ዊግትኩ ።
ምርጸ የነት ኽዝቨን ጝታ ቃወጥድ ድመ ይወነውዝ ማርጸነውዙ ስረት አቐነውድ ዳቕሰነውዝም “ይት ቃውጡ፣ አምር ይዋቕረድ ዊስጡ፣ ኻግርት በዊዝጐ ተግስጡ ይን ኻስቭነው አካልድ ስልጣኒል ጐይስን ቃውጠ ማጥን ጻቨነው፣ ኽገ ምጝግስትድ ኻየው ምጝግስትዝ ድመ ይወነውዝ ማርጸነው የጝ” የውኩ።
ይነ ኻግር ኢትዮጵየትልም አነ አፍሪከ ተግዝ ቓልሽታንድ ንቕጸውዝ ኻይልዝ ዊንም ከምሸዝ፣ ጥፍት ድሰነውዝ፣ እጅር ኹርዙ ሩሄድ ድሰነውዝ ኽምዘ ፋጥርሽጠ ጻቭሽተኩ፤ እኔን ቈሽ ኻግር እግርገ ዳተ፣ ስነ እዘን ተጊዝ ሳስ የው ጽብጠ ማጥን አልምጅቅ ላብጠ ተግራየጘ ጻቨው አቐነዊዝ ሊግዘቊ ኻግረኒዝጘ ክንድጝ ፊሰነው ጥውሸው የጝ ።
ምርጸ ዴሞክራሲው፣ ናጸዝመ እክሱ አጠ ጥውሸኩ ይሽት እቑርሸው አቓንድ” ይነ ኻግር ኢትዮጵየትል ጻቭሽተው ላጝጠትረ ጊዝዝ ጻጝሽተው ሚቸውዝመ ዴሞክራሲው ጒደነዝ ማሪጽሰነውዝ ፈኑ ጻቨናንስ ውሸቭሊስ።፣ እምንትቊ አቅለኒስ፣ ኻግሪዝቁ ሺመቅሊስ።፣ እቁኒስመ ጥቅለ ጻውተይዙ ጽረይጅቅ አንቭቭሽተነውዝ ጝታ ጅውነድ፣ ጝታ ቀቨሊድ ኻየነዊስ ጋብ ቀሰው ፍልውልወ የጝ ጽበውድ ዛተስ መረዋ ድበር ጅውነ አቐነዊዝ ውሸቭለድ ጻግቭ ድውሰው ገቨይስ ፍ ጝጅውነድ ምርፀድ ዲጉ አቕንትዝ ጻጝሽታንስ ጝጅውነድ አትር ኻያጙ ችጝሸኩ “የቊድ ቈሽ ሳቁጠ ወረደ ዲግዝመ ዳኽንነይ ጽ/ጝኒዙ ዲቈተ አት አማረ ደባሽ ጛይ።
ዚምንድ ቴክኖሎጂዙዝመ ኢንፎርሜሽንዙ ዊንም ሚዝረዙ ዚምን የጝ፡፡ ሚዝረ ዲቈዲቊሰነ ገባንድ ቈሽ እንቅቱ ናኒል ጥውጘው ኮር አቓንስቅ ገረዱ ሚዲየ አሩሸጥ ጥንቅቀዝ እማንድ ዚግቨነውዝ ውሸቭለድም አቕሽ ፈው ሚዝረድ ስቑ ይን ለምረነው አቒጝቀስ ሚርምርን እማንድ ቺዘነውዝ ምርጸድ ዲጉ ጒደነዝ ዲቋንስ እንቅም ጝችጘርድ ፍጠ ጥውሸኩ ይጛንድም ጝታ ኻሰቭድ ቢንስጝኩጙ።
ጥቅለዝ ምርጸድ ዲጉ ጒደነዝ ኻትሻንስ ውሸቭለይዙ ሲትፍሽንድ፣ ውሸቭለይዙ ኻሰቭድ፣ ውሸቭለይዙ ከቨድ ነንቱ ሰቲዝ ጽበውድ እቀጘዝ አውግረው የጝ የቁድ አት አማረ “እኒስ ሚቅ ምርጸድ ጽጋሰናንስ ላጥ ኻይላንድ ጻቭጘው ፍልውልወድ ውሸቭለድ እቀጘዝ ልብታንስቅ ጅውነ ጨቨቅ ፓትሮል አቕ ኻየኩ ተገተግሽተነውዝ ፍልውልወ ጻቫጙ ጻውተዙ ኻይሊስ አቅምዝመ ግርቭ አቕኩ”ይጝኩጙ።
ማርጽሽተውድ ቺዝየው ኻሠቭዝ የጝ ቲክርክርሸጥድም አጝሽ ላይ ኻግርስትል እኹርሽጝ ላይ ኻግርቱ ሊግዝትዝ ሰራሸቊ አጠ የጝ ጥውሸውድ። ምርጸድ ዲግዝ ፃጝሽት ዲግዝ ዲቊጠ ማጥን እንቅም ውሸቭለድ ጝችጘርድ ፍጠ ጥውሸኩ ይናጙ ይነ ጽፈሽድ ኻትኑን ዲግ አጥን።
ሐመልማል ተድላ
ግንቭት 15/2018
