ዲግ እጅር ኹርዙ ሲርዩ ተምዝት እቻዘነ ጭቑ አቒጝቀስ ኻግሩ ሊግዝትዝመ ብልፅግነዙ ዲቪየ የጝ፡፡ ይና ኻግር ኢትዮጵየ ጝር ሲጘይዝ፣ ጝር ባኽልዝመ ጝር ንቕፅነይዝ አርቕሽትረይ ኽይረይ ኻግር ጚ፡፡ እኒን ዊነው እሴትድ ኻይን ዊንዘናንስዝመ ኹልዝ ከሰናንስ ዲግ ኻይሰነው እንቅም ዜገኒስ ኻይሽተው ቃውሰተ ቲግቭር የጝ፡፡
ነንቱ ሰቲዝ ኢትዮጵየትል ቓልሽትጛጙ ችጝሸቊ ገረዱዝመ ኢኮኖሚው ፍልውልወድ ቺዘው አምርት ዳቕሰቊ ጛይ፡፡ እፍርትዝቊ ሰበንድ፣ አርሽነይዙ ጊቭርትዝመ ጊቭርዘትነይድ እኒዝጘም ሲርይቊ እፍርትዝቊ ኲነንድ ፈን ፅየው ፃቨናንስ ቲኪሻው ችጘር ፅይኩ፡፡ ዲግ እቻቐው ኻግር አቒል ኽዝቭዝ ኽዝቭዙ ዲምቅሽንድ አትርዘኵ፡፡ ላብጠቱ ጥወጥውሽትንም ፅብጠጘድ ፃቨኩ፡፡
አውማው ቺተንድ አቭላይተዝመ ጥወጥውሽትንዝ እክሰነው ዚልቅትነይ ፅየው ዲግዝ ዊስነተ የጝ፡፡ ኻግርዝቊ ሽመቅል፣ ክንደቊ እኒዝጘም ሚድየዝቊ ችብረጥ ዲግዙ ተሚስነይድ ሲቭከነውዝመ እቀ ኽቭሪዙ ላወንትነይድ አትርዘነው ጋቢዝ ዋርድጘው ችጘርድ አውግረው የጝ፡፡ ዜገንዙ ዳኽንነይዝመ ሚቭትድ ኪብርዝረይ ኻግር ኲነናንስዝመ ዲግዙ አየር እቻቓንስ ፃቨነው ተሚሰተ የጝ፡፡
ኢትዮጵየቱ ኽዝቭድ ዲቈው ኰሪዝ ችጘው ቘጨድ አስክዘነውዝመ ዲዝጝት ፊሰነውዝ ለወንትነይድ አትርዘቊ ገበኒዝ ጅልውዘ ትኩርት ፃቨነውዝመ ዲግዙ ፊልየድ ቲክነነው ተሚሰተ አቐነውድ ልብተነው ጥውሸኩ፡፡ ለወንትነይዝመ ቸለቸልሽን ይና ኻግርቱ ጋልፅሽተነ ጛይ፡፡ ነን ፅበው ኻግሩ አቕንትድ ለወንትዝ ማኽርኽርሸነውዝ፣ ድመድምሽተነውዝመ ኻስቨ ኻስቭሸነውዙ ይና ዲዝጝትድ አትርዘነውዝ እርጋቕንዝመ ዚልቅትነይ ፅየው ዲጉ አየር ቲንፍሰናንስ ቸልሰው አቐንት ፋጥረነው ተሚሰኵ፡፡ አቐነዊዝም ላብጠቱ አርውሸትነይዘመ ዲግዙ እሴትድ ቃውሰነውዝ ይና ኻግርት ቺዘው ብልፅግነዙ ፈወነይዝጎ ከሰከሰናንስ እንቅም ዜገንድ አውግረው እኩሰ ፃቨነው ተሚሰኩ፡፡ ዲግዙ አየር ይና ኻግር አቒል ዚልቅትነይዝ ሲፍናንስ ይና እንቅም ልቕረ ፃቭነ ጥውሸኩ፡፡
ሰሜን ኢትዮጵየቱ ጣይትኒዝ ምላሰን ንቕፀቊ ዊግነንልም አቑ ጥፍትል ችጘው ቖጨድ እን ቑጠ የጝ ይን ጊምተናንስ ቺግርዘው አቐንትዝ ችግሰ ፋጥርሸነውድ አስክዝሽተው የጝ። አርቕሽተዊዝጘድ እን ጣይትንድ ችብረውድ ፕሪቶሪያቱ ቲስመምኒዝ ምላሰን ፃቭሽተው አቭላይተዝ የጝ። እን ቲስመምንድ ፋዘናንስ ህወሓትዙ ጓነድ ሳዝመ ንየዝ ይጛንድ ቓሊሽታጙ የጝ። ዲቍ የውም ፕሪቶሪየቱ ቲስመምኒዝ ፃድቀውዝመ ችበችብረው ጊዚዙ ፅልየ ክልልዙ ምጝግስትድ ፋዘነውድ ይወው ጋልፀነይዝ አርቒስኩ። አቐነዊዝም ዲግ ዊነው ሰሜንቱ ጅውነድ ኻውክሽንዝመ ጣይትኒዝጐ ከራየጘድ ኻስቭዘው አቕኩ። እንዝም ምላሰን ይና ጅውነድ ኻየነውዝመ ዲግድ ኻደገል ድውጥጘ ቸለቊ ገበኒስ እክልደነውዝመ ሽሹደነው ተሚሰኩ። እኒዙ ቓሊሰነ አቐው ሳቍጠ ኻትመል ፃጝሽተው ዲግዙ ሰልፍድ እቅ ውር ቑጠ ዲግዙ ተምዝትዝመ ሚንውት ፅየቊ አቐነውድ ልብተነው ቸልሸኩ። ጥቅለዝ ዲግ እጅር ኹርዝ ተሚሰውዝመ አይንተ ገቭ አቐነውድ ልብትን ተሚሰው እኩሰድቅ ፃቨነው ጥውሸኩ።
ወንድሙ ቸኮለ
ሚያዚያ 30/2018
