አልም አቅቨ ተግዝ 420 ሚሊዮን መልቁ ጝታ ክንድጝ ጝኒል ኹረ ችጘቁ አቐነውድ አልምቱ ኹረዙ አፅቨ ሚዝረድ ሚሪየኲ።
153 ሚሊዮን መልቁዝመ 345 ሚሊዮን ዜገን ግድርዝ አጋልሽተቁ አቐነውድም ሚሪሽኲ። ክንድጝ ጝኒዙ ኹረዙ አፅቨድም አጉረው ኹረዙ ችግሰዝ አጋልሽተቁ መልቁዝ ከቨው የጝ።
ፃረቊዙ እግዝግዘዝ 2030 ዓ.ስ እጝቅ ክንድጝ ጝንጥል ፅበቁ መልቁ ኹረዙ አርውሸጥ ፃቨናንስ ኻሊሸው ኻለይዝ 75 ናን ላይስ ምጝግስተን ሲትፍሸናንስ ጝታ ተምዝትድ ቓሊስጘጘድ አልምቱ ኹረዙ አፅቨዙ ሚዝረድ ቓሊሰኲ።
ኢትዮጵየትልም 2007/08 ዓ.ስ ፋጥርሸው ኽርድ ቲክን ደርሰው ከቨዝ ኪርምሸው ክንደጥዙ ኹረዙ አፅቨድ ነንቱ ኮሪዝ ገሪየኑ ኻግሩ ቢቁለተ ኹረዙ ሞዴልዝጎ (Home-grown School Feeding) ከረከር ቺተቺተቁ ኻግርሸንቱ ክልለኒዝጎ ፈራቐነውዝ ክንደጥዙ ማፅንፅንሸው ኹረዙ ተምዝትድ እቻይሽት ክንድጝዙ ዊርተድ ቺዝሸናንስ ኻሊሽት ሰራሽታጙ የጝ።
ብላ ክልልዝጘም 2018 ዓ.ስ ክንድጝዙ ዚምኒዝ አልም አቅቨ ኹረዙ አፅቨዝ አቅቭሸቁ ሰውጠ ወረጥዝመ 281 ክንድጝ ጝንጥል 148 ሽኽዝ ንየ ክንደጥ ኹረዙ አርውሸጥ አጘጘድ ክልሊዙ ክንድጝ ቢሮድ ፊሰው ሚዝረድ ልብሰኲ።
ላጥ እምተኒስ ቺተው አቕንትዝም ክንድጝዙ ችጝሽተትነይድ ፈራዘናንስ፣ ክንድጝዙ ዊርተድ ቺዝሸናንስመ ክንደጥ ማፅንፅንሸው ኹረ ችጝጝ ክንደነውዙ አገነድ ብዘናንስ አልምቱ ኹረዙ አፅቨዝ ኪርምሸው ክንደጥዙ ኹረዙ አፅቨድ ክንድጝ ጝንጥ ጛቕምቱ አቅምዝ ኪርምሰነውዙ ዲዝጝትድ አትረነውድ የጝ። ጋዝጊቭለ ወረደይል ችጝሸቁ 38 ክንድጝ ጝንጢስ መስቀሎ 1ትረዝመ ማኽለኘ ክንድጝ ጝንድ ጝቕመቱ አቅምዝ የጝ ኹረዙ አፅቨ ኪርምሰውድ።
እን ክንድጝ ጝኒል ለወትረ ክፍልዙ ክንደጥድ ኹረዙ አፅቨይዝ አርውሸጥ አጘንድ ክንደተ እሌኒ አገኘሁስመ ክንደተ ዳንኤል ንጉሴ ጥር አርፈይዝ ኪርምሸው ኹረዙ አፅቨድ ጝተ ክንድጝድ ቀቫይጘጘ ፃቨነውዝ ጝተ ክንሰጥድ ጥውሸውዝ ቲክንክንጛንስ ከቫጙ አቐነውድ የጝ ዊግትጘውድ።
ክንደጥ አዕምሮዝመ ግርቭዙ ነቓቕን ችጘውድ ኰሪዝ ችጘነው ጥውሸው ኹረድ ችጝጘንድ የጝ።
ቺተቺተቁ ምላሰንጥዝ ጝተ ጝኒስ ቁርስ( ጣመነ) ጣሚጝቀት ፈቁ እፈር ክንድጝ ለምረነውዙ ጝተ አቅምድ ሳስ የው የጝ። ግድርድጘኩ፣ ዝላቕጘኩ፣ ዝሟርጘኲ፣ ሲለትጘኩ። ክንሰተድ ክንሰው ክንድጝዙ አውር ኻለይድ ወረጘ አቐነውድ ልብቲጝቀት ኮረድ ፍ ኮረድ ጥወኲ። እኔን ቆሽ መልቁዙ ክንደነውዙ ተምዝትድም ቃፅቨነውዝ ጝተ ጝንል ግሬቁድ ንቕፅጘኩ የነት የጝ።
1ትረ ክፍልዙ ክንደጥድ ክንደተ እለኒስመ ክንደተ ዳንኤል ዊግትጘውድም ኹረዙ አፅቨድ ኪርሚጝቀት ክንድጝ ጝንዝጎ ተረነውድ ቃጽቭጝ ዊንጝሽም ክንድጝ ጝኒል ኹረዙ አፅቨ ኪርምሸት ኪርም ቀሰው ቲክንክነ ፃቨነውዝ ቺዝየው አርቕት ችጝጝ ጝተ ቸልትድ ቓሊስጛጙ አቐነውድ የጝ።
ጋዝጊቭለ ወረደ መስቀሎ ቀበሊል ክንደጥዙ አቅሊስ ላውድ አት ይርጋ ቸኮለ ጝተ ጋብዝ ጝነቁዙ ችግሰንጥዝ ምላሰን ክንደጥ ግድርድጝ ክንደነው ተሚሳው አቐነውድ ልብትጝ ሊጘ ኪሎ አረ ላው እጅር ፊሰናንስ እቀኽቭርድ ቲስመመነውዝ ጝተቑርድ ኹጝ ክንድጛንስ ፃቭጘጘድ ሚዝርድጘኩ። እቀኽቭሪዙ ሲትፍሽንዝ ኪርምሸው ኹረዙ አፅቨድም ዚልቀትነይዝ ፃጝዘናንስ ምጝግስትዙ አካልድም ጝከቨድ አትርዛንስ የጝ ልብስጘውድ።
ክንድጝ ጝኒል 1ትረ ክፍልዙ ክንሰተ በላይ ወርቁም ክንደጥ ዂጝቀት ክንድጘንድ ዊነው ቲክንክነይስ ኹጝ ክንድጛንድ ቓሊስጘው ጝተ ሲትፍሽንድ አጉረው ልውጠ ፃየነውድ ሚሪጘኲ። ኹረዙ አፅቨድ ኪርምሸትም ክንደጥዙ ንቕፅትድ ቆሸነዊስ ከስጘ ጝተ አርቕትድ ቆሻጙ ተረነውድ ልብስጝኩⶔ።
መስቀሎ ክንድጝ ጝኒል ዲቆው አምረይዝ ደግመው ክንደተድ ንቕፅ ዊነነውድ ዊግተቁድ ቈሽ አውር ክንሰተ ስለሽ ጌታሁን ጛይ። አውር ክንሰተድ እቀኽቭሪዙ ሲትፍሽንዝ ችጝሸው ጥርድ፣ ክንድጝ ጝኒል ፅበቁ አኮ ልቁዙ ፃቭድ፣ እንዝጘም እጝግርነይል አትክልትዝመ ፍረምረ እፍርዘነውዝ 144 1ትረ ክፍልዙ ክንደጥ ክንድጝ ጝንዙ አቅምዝ ኹረዙ አርውሸጥ ፃቭሽተነውድ አርቒስጝኩⶔ።
ወረደይዝጘ አልምቱ ኹረዙ አፅቨዝ አቅቭሽጝ ዊነቁ ሲዘ ክንድጝ ጝንጢስ ቢዘ እን አምረይዝ 12 ክንድጝ ጝንጥ ጝታቕምቱ አቅምድ አርውሸነውዝ 2 ሽኽዝ ንየ ክንደጥዝ ኹረዙ አፅቨ ኪርምስጝኩⶔ።
ኹረዙ አፅቨ ኪርምሰቁዝመ ኪርምስየቁ ክንድጝ ጝንጥድ ቓልናንድ ቆሽ ክንድጝ ቀቨነውዝም አነ ክንድጝ ለምረነውዙ አቅምድ ቺተን ቓሊሰነውድ ዊግተቁድ ጋዝጊቭለ ወረደ ክንድጝ ጽ/ጝኒል ስረተ ክንድጝዙ ጓነ ቃወተ አት አበበ ዘርፉ” ኹረ ኪርምስየቁ ክንድጝ ጝንጥል 50 ናንዝ ንየ ክንደተድ ደግመው፣ ክንድጚስ እዳቐነውዙ ንቕፅት ቓሊስጛንድ ኹረዙ አፅቨድ ኪርምሰቁድ ግነ ክንድጝ ጝንዝጎ ተረነውዙ አቅምድ 90 ናን ላይስ ሊጊሰነው ቸልጝኩⶔ” ይጝኩⶔ።
ተረዊዝም ወረደይል ችጝሸቁ ክንድጝ ጝንጥል ጥቅለ ክንደተይዝ ኹረዙ አፅቨ ኪርምሰናንስ እቀኽቭርዙ ሲትፍሽንዝ፣ አቭርደቁ አካለኒዙ አቭርድንዝመ ክንድጝ ጝንጥዙ አቅምድ አርውሸናንስ ትኩርትዝ ሰራሽታጙ አቐነውድ ሚሪጝኩⶔ።
ኹረዙ አፅቨ ክንደጥዝ ኪርምሸውድ ክንደጥ ጝተ መልቁዙ አቅምዝመ አዕምሮይዝ ችግሰንጥ ችበችብርጝ ክንዳይጘጘድ ፃቨነውዝ ኻግርሸንትል ዊርተ ፃየው ክንድጝድ ደድሰን ኻግር ለምረተ ኹር ፋጥረናንስ የጝ። አቓንስቅም ክንደጥዙ ኹረዙ አፅቨድ አትርዘናንስ እጝቅም ችጘር ፃየው የጝ።
ሳምራዊት ግርማይ
ሚያዚያ 15/2018
