ማራቶንቱ ቲክርክረድ 1981 ዓ.ስዝ ጻጝሽተነው ኪርሙ ነንቱ ሰቲዝም አልምትል ጻጝሽተቁ ማራቶንዙ ውጠዙ ቃወ ግቭር አትሌታንድ ማርጽጘው አኩ ። እን ውጠዙ ቲክርክረድ ቆሽ ለንደንቱ ማራቶን የጝ።
ቲክርክረዙ ሲጘይዝ ኬልቨን ኢፕቶም 2023 ዝ 2:01:25 ጥወነውዝ አይር ግልቁዙ ማራቶንዙ ሪከርድ ሚዝግቭሳንድ እቁኒስ ቈሽ እንግሊዝትወ አረይ ሊግዝትዙ አትሌተን ፖውላ ራትክሊፍ 2:15:25 ጥወነውዝ ሲጘ ሰራሸነው ቸልድርኩች።
2026 ለንደንቱ ማራቶንድ ግነ እንዝ ሚቅ ቓልሽተቁ ቲክርክረንድ ማራቶንዙ ውጠዝ እንዝ ሚቅ ጥውጥጘ ቸልጘኩ ይሽትጝ ኽየው ግምት ይውሽትጝጥጘ ጻቨነው ቸሊጝቀ እዳጘው ሰት ጻቨነውዝ አይር ማራቶንዙ ሰትድ ሚዝግቭሽኩ።
2026 ለንደንቱ ማራቶን እጅር ኹር አካልዙ በቓቕንዝ ችጝጠ ጥውሸው ኒየትነይድ ፊትነው፣ሽርፈዝቁ ሴኮንደንዙ ወየድ ዊርቀዙ ሚዘኒል እቑረውዝመ ሲጘዙ መዝገቭዝ ደምቀው ቀለምዝ ጻፍሸው አቕ ዲቁኩ።
አውግረቁ አትሌታኒዙ ኽንቕንቀዝ ጃይርሸው 2026 ለንደንቱ ማራቶን ምስራቅ አፍሪክቁ ኽነ አቡሰው ሽሹድን እትለው ቺትየው እትለ ዊኑ።
ቲክርክረይዝ 59 ሺኽ 850 አትሌት ሲትፍሸነው ቸልሻንድ ፓሪስ ኦሎምፒክዝ ማራቶንዙ ቈሺተተ ወንጨድ አትሌት ታምራት ቶላ ኻቐነውዙ ግምት ይውሽትሽም ግምትድ እማን አቒጝቀስ እዳኩ። ግልቁዝ ጻቭሽተው ማራቶንዙ ውጠዝ ኬንያቱ ዜግነይ ጻየውድ ሳባሳቲያን ሳዌ 1:59:30 ጥወነውዝ አይር ሊግዝትዙ ሪከርድ ኪለነውዝ አይር ሲጘ ሰራሽኩ።
1986 ላግርባ ሚዝግቭሰው አይር ሊግዝትዙ ሪከርድዝ አትሌት ዮሚፍ ቀጀልቻ 01:59:41 ጥወነውዝ 22 ሰከንድ ላጋርባ ጥወው አቓንድ ጃኮፕ ሊሞ ዩጋንዳትል 02:00:28 ጥወነውዝ 3ትረ ፈነውዝ ቲክርክረድ ኻተነው ቸልኩ።
እቁንዝ ፃጝሽተው ማራቶንዙ ቲክርክረይዝ ፓሪስ ኦሎምፒክዝ ሊግዝትዝ 2ትረ ፈነውዝ ኻተነው ቸልድረየን ትግስት አሰፋ ሊግዝትድ 02:15:41 ጥወነውዝ አይር እቁንዙ ሪከርድ ሚዝግቭስራንድ ሄለን አቤጊ ኬኒያቲስ 02:15:53 ሰትዝ ጥወነውዝ 2ትረ ጆይ ሲሊን ጂፕኮስጌ 02:15:55 ጥወነውዝ 3ትረ ፈነውዝ ኻተነው ቸልድርኩች።
ፕላቲኒየም ተግዝ ይውሽተው እን አውግረው ማራቶንዙ ቲክርክረይዝ ኬኒያቱ አትሌት ሰባስቲያን ሳዌ ኢትዮጵየቱ ዮሚፍ ቀጀልቻስመ ኡጋንዳቱ ያቆብ ኪፕሊም ቲክንክንጝ ጥወነውዝ ግልቁዙ ማራቶንዝ አልምቱ ክቭረ ወሰንድ ኪልጝኩጙ።
ሳዌስመ ዮሚፍ ማራቶንዙ ቲክርክረድ ሊጘ ሰቲስ ሳ ጥወነውዝ ዚርፊዝ አይር ምእራፍ ብዝጝኩጙ።ለንደትል ቓልሽተው ፈንድ ሰራሽተውዜ አቐነው ቸላው ውርም ገቨ እጀው አቐነውድ ቓሊሰው የጝ።
አመልማል ተድላ
ሚያዚያ 30/2018
