ምጝግስት ሰቭተተይዝ ፅብንዙ ኪብርንድ እርጋዘናንስ ሚስኩርም 2018 ዓ.ስ ኪርም ምኻየዙ ቈሽት ፃቨነውድ አርቕሽተው የጝ።
እኔንት ቲክንም ቺተዝ ቈሽ ሻቅጠ ማቅጠ ኢንዱስትሪዙ ጊቭርተኒል አጉረው ወየዙ ቈሸ ቓልሽታጙ የጝ።
ሳቁጠ ኻትመዙ ፅበተ አት መኮነን ገብረ ስላሴ ሳቁጠ ወረደ ማእድን ጽ/ጝን ሞየ ጉሬ አጛንድ አርፈይዝ ጝተ ናኒል ችጝረይ ጝታ ምኻየሸንስ ጝነቊ ጭሰጭሰቊ አጘንድ ነን ፅበው ፅብንዙ ኪብርንድ ጝተ ፅብኒል አውጉረው ጥቕዘ ጭሳጙ አቐነውድ ዊግትጝኲⶔ።
አት መኮነን ቺተዝ ቈሽ ምጝግስት ሰቭተጥዝ ቈሽተው ምኻየዝ ምላሰን ሻቅጠ ማቅጠዝመ ላጥ ጊቭርተኒል ፃቭሽተው ወየዙ ቈሸድ “50 ቊርሸዝ ጅቭሽታጙ ዊነው አትረጘድ ነን 120 ቊርሽ ቅይሻጙ የጝ ዘይትድም አቕሽ ዊነዊስ 200ስ ኪርም 500 ቊርሽ አጢስ ቈሽኩ”ይጝኩⶔ።
አቓንስቅም ምኻየ ቈሸነው ጭቑ አቒጝቀ አርየዙ እርጋዝኒልም እኒስ ሚቕ ሻቘ እርፍዝ ኪፍልሸው ጣቭ አልሳጙ ዊናንትጘ ነንም ምጝግስት ሰራሸነው ጥውሸው አቐነውድ ኻስቭዝጘኲ። ጥውሽት እጀው ወየዙ ቆሸ ጻቨቊል ተግረ ፊስሸትጠ ጥውሸኩ ይጛንድ ዊግትጝኩጙ።
ቆሺተው ምኻየድ ዊትዊዝም አቕሽ ከቭሰው አቅሽም ሻቅጠ ማቅጠይል ቈሸ ጻቭሽትኩ የቊድ ቈሽ ምጝግስትዙ ሰቭ ሰራሽጛጙ ችጝሸቊ አት ኪሮስ ጎሹ ምኻየዙ ቈሸ ጻቭሽተነውድ ይና ጽብኒል ጽጋ ፋጥርኩ ነንቱ ሰቲዝ ጽብንዙ ኪብርንድ እቀጘዝ ጽጐወው አቐነዊዝ “እጅር ኹር ጽበነው ቸላው ተጊል የጝ ቸጝሽነውድ” የነዉዝ ጋልጸቊ ጽበተድ ምጝጝስት ሽኳር፣ ዘይትዝመ ግዘን እኒዝጘም ጣቭ ሸምተጥ ገረጥዝ እድወዝ አልሰነውድ ቀሰው የጝ የነዉዝ ነንቱ ሰቲዝ ኒግርን ጽ/ጝንዝ ምላሰን ጣቭ አልሰናንስ ጻቨው ፍልዉልወድ እቀጘዝ ቀሰው አቓንስቅ አትር ቓጽልጠ ጥውሸንትጘም ጝታ ኻሰቭድ ቢንስጝኩጙ፡፡
ላየ ሳቁጠ ኻትመዙ ጽበተ ዊዝር ማርያሙ ወረታ ጝታ ጋቢዝ “ይነኻግርስ ምጝግስት ጽብንዙ ኪብርንድ እርጋዘናንሥ ሰራሻጙ አቕሽም እትለቁ አልስንዙ ቢተንጥድ ቓቭዘናንስ ልቕረ ጻቭጠ ጡውሸኩ ይጝኩጙ።
ምጝግስት ጋቢዝ ሽምተጥ ሰቭዙ ገረጥዝ አልታጙ ዊነው ዘይት፣ ሽኳርዝመ ግዘን ኮሪዝመ ጡውሸውዝ አልሰነውዝ እትለው እጅጝትድ ቓቭዘናንሥ ሰራሻጙ ችጝሸው ሰቪስ ቈሽተተ ሻቖ ርፍዝ ኪፍልሸው ቁርሻን እዱሰነውዝ ጽብነው ጥቕርቅርሸው ጽብንዙ ኪብርኒስ ዊትወ ፈውን ችጝናንስ ጻቫንስቅ ይሚዜነድድ አልሰኩን ይርኩች።
”ምኻየ ቈሹ ይሽተነዉድ ቲክን ተረው ወየዙ ቈሸድ ኒየጥድ ቃውስጝ ጊቭርትድ ጭቭሰነዊዝ ምላሠን ወየ ቈሽጠጘ ጻቭጛጙ አቓንድ ተክዘዝ ቑጠም 140 ቊርሽ ዊነው ሽኳርድ 210 አቕኩ”ነንቱ ሰቲዝ ምጝግስት ጋቢዝ ጻቭሽታጙ ችጝሸው ፍልውልወድ አትር ቃጽልጠጘዝመ ኽዝቭድም ወየዙ ቈሸ ጻቨቊድ ዲቊስን ይወነው ጡውሸንትጘ ዊዝር ማርያሙ ቈሽር ዊግትርኩች።
ሳቁጠ ወረደ ኒግርንዝመ አርየ እፍርት ጽ/ጝንዙ ዲቈተ ዘውነ አረጋ ዘውዱ ዊግትጛንትጘ ኻግሪዝጘ ምጝግስት እቀ ኽቭሪዙ ጽብንዙ ኪብርንድ እርጋዘናንሥ እክሰቁ ሰባንድ ሰራሻጙ የጝ።
“ጽብንዙ ኪብርንድ ማኽተናንስ ወረደይዝጘ አርየዙ ግሬድ ማርጸነውዝ እቀ ኽቭሪዝ አስክዘዙ ልብትን ችጝጥጘ ማጥን ቲክንክነዝ ሰራሽናጙ የጝ እቀ ኽቭር ጋብዝ ጉይሽተው ዋቕረድ ጥውሽት ጻየው የጝ ይንም እኔንት ልብተነውዝ ሳስየው ጽብንዙ ተጊል ችጝሸው ምጝግስትዙ ሰቭተተድ ፈውን ችጛንስመ አርየድ እርጋዘናንስ ወረደይዙ ጭሰጭሰን ምኽር ጝኒዝመ ወረደይዙ ጊንዝቭዝ ኢኮኖሚ ጽ/ጝን ጅቅ ዊገዊግሸነውዝ አምረድቅ ጣቭ አልስናጙ ተርንኩኑን” ይጝኩጙ።
“ምጝግስቲስ አልተቁ ጥወራንድ ኮሪዝ እቀ ኽቭሪዝ አልሰነዉዝ ኻሊሽተው አለመይል ግሪሰነው ጡውሸኩ፤ ይጝ አልስንዙ ጽጉትድ ቓቭዘናንስ ጊቭርዘተይጅቅ አርየዙ እፅቁፅቈ ፋጥረነውዝ ሰራሽታጙ የጝ። ጽብንዙ ኪብርንድ ቃጽቨናንስ አልስኒስ ኪርም ትንዝሽትኒል አሽ እትለው ቢተድ ደምደመነውዝመ ኦዲት ጻቨነውዝ ጨቅሸው ተስር ፋጽመቁ አካለኒል ኽጉ ተግረ ፊስሽተኩ” ይጝኩጙ።
አቐነዊዝም ወረደይል ችጝሸቁ 191 ምጝግስትዙ ሰቭተጢዝመ ኻትመሸንትቁ ጽበጢዝ አይነተዝም ሳስ የው ጽብንዙ ተጊል ችጝሸቊዝ ጣቭዝመ ዘይት አልሰነው ቸልሸጘ ዘውነ አረጋ ዘውዱ ጋልጽጝኩጙ።
ፅብንዙ ኪብርንድ እርጋዘናንስም አቭርት ሰቭዙ ገረደን ጝታ እኩሰድ አጉረው አቐነውድ አርቕሽተው የጝ።
” አቭርት ሰቭዙ ገረደድም ሳስየው ፅብንዙ ተጊል ችጝሸቊዝመ ምጝግስትዙ ሰቭተጥዝ ንኻሽ አርፈይዝ ሻቘ እርፍዙ ምኻየዝ ኪፍልሸው ጣቭዝመ ፋብሪከዙ ጊቭርተን አልስን ዊኑን” ይጝኩጙ።
ነንም ወየዙ ቈሸ ቓሊሰቁ ጊቭርተንድ ፅንኸ ፃቨነውዝ ፅብንዙ ኪብርንድ እርጋዘነውዙ ሰቭድ ቃፅለው አቐነውድ አርቒስጝኩⶔ።
ምጝግስትዙ ሰቭተጢዝ ቈሽተው ምኻየድ ፅብንዙ ኪብርንድ እርጋዘናንስ ከቭጠ ጥውሸኩ ጚ ኒግርንዙ እቀኽቭርድ ፅብንዙ ኪብርንድ ወሰናንስ አርውሽጝጠ ጥውሻውም።
ዲቈው አምረይዙ ሚስኩርም አርፈይስ ኪርም ቈሽተው ምጝግስትዙ ምኻየይዝ ምላሰን ቺተቺተቁ ጊቭርተኒል ወየዙ ቈሸ ቓልሽትጛጙ አቐነውድ ሚሪጝኩⶔ።
ጊቭርት አርየይዝጎ ፊሳቁዝመ ወየ ቈሸቁ ንየጢል ፊስሽታጙ ፅበው ተግረድ አትር ቃፅለነውድ አርቒስጝኩⶔ።
”ግቭረ ኻይልዝ 50ስ ንየ ኒግርንዙ ድርጅተኒል ደግምግመዝ ቲክንክነዝመ እግዝግዘ ፃቨነውዝ ወየዙ ቈሸዝመ ጊቭርት ጭቭሰቁ ኒግርንዙ ድርጅተኒል ተግረ ፊስንኩኑን” ይጝኩⶔ።
ጽብንዙ ኪብርንድ ማኽተናንስ ዞኒዝጘ ዩኒየንድ ምጝግስትዙ ሰቭተተይዝ ጣቭዙ እድወ ሚቸ ሚችዛጙ አልሳጙ የጝ። እንቅ ወረጥዝም ገረጥድ አልስጛጙ አርየድ እርጋዝጛጙ አቐጘድ ችጝነቁ ሚዝረንጥድ ልብስጘኩ። እድወ ምጝግስቲስ አልተቁ ጥወራንድ ኮሪዝ እቀ ኽቭሪዝ አልሰነዉዝ ኻሊሽተዉ አለመይል ግሪሰነዉ ጡዉሸኩ የውድ ይነ እጻ ጻቭኑን።
