ክንድጝዙ ጥወር ክንድጝዙ ዊርተዝ!!

ክንድጝዙ ዊርተዝ አርቕሽተቊ ሲንጋፖር፣ ጃፓን፣ ደቡብ ኮሪያ፣ ካናዳት ተከቁ ኻግራን ጝተ ክንድጝዙ ስረትድ ዚምንሰነውዝ ኻግሩ ሊግዝትዝ አጉረው ሲሪየ እቚረነው ቸልጝኩⶔ።

ዊርተ ፃየው ክንድጝ እንዛይ ኻግራንዙ ሊግዝትዝ ነሰው እኩሰድ ቓልናንድም ሳልጥነው እጅርዙ ኻይል ፋጥረነውዝ ገረዱ እሩነይዝመ እርጋቕን፣ አትረው ጽረፅርሽንዝመ ቀሰው ጭሰጭሰን እንዝጘም ኢኮኖሚዙ ሊግዝትዝመ ቴክኖሎጂዝ አትረነው ቸልጝኩⶔ።

ክንድጚል ፈው ፈንዝመ ትኩርትድ ኻግሩ እጝቅትነይዙ ሊግዝትዝ አይንተ ጒግ አቐነውድም እንዛይ ኻግራንድ አምንጝኩⶔ።

ኢትዮጵየም ንቕፀቊ ችግሰንጥ ዲቁስራጙ አርሽም ላጥ ኻግራንዙ ተከድ ቲክንድር ክንድጝዙ ስረቲል ትኩርት ፃቭራጙ የጝ።

ወይኽምረ ብሔረ እቅ ጭሰጭሰንዝጘድም 2019 ዓ.ስ ክንድጝዙ ዚምኒዝ ምቸውዝመ ዊርተድ ኻየው ክንደነውዙ ጅውነ ፋጥረናንስ ልቕረ ፃቭሽታጙ የጝ።

ተረው ክንድጝዙ ዚምኒዝ ክንድጝ ጝንጥዙ ዊርተድ ደድሰቊ ቃውሰ ቲግቭረንድ አክንውሽጝ ክንደነዙ ስረትድ “ግሬ ላው ክፍል ላው” የው ቃወ ቃልዝ ኰሪዝ ኪርምሽኲ።

ሳቁጠ ወረደ ዝውነ 1ትረዝመ ማኽልኘ ክንድጝ ጝን 1987 ዓ.ስ ኪርም ክንድጝዙ አግልግለ ይዋጙ ችጝሸው ችብረ የጝ።
እኔንም ንቕፀቁ ጅውነድ ጭጝሰቁ ክንደጥ ችጝዘነውዝ ቺተቺተው ዚርፍዝ ኻግርት አግልግለቁ ዜገን  ፋጥርኩ፡፡

2019 ክንድጝዙ ዚምኒዝም 560 ክንደጥ ሚዝግቨነውዝ ሚስኩርም 05 ግሬስ ኪርም ክንድጝ ይወነው ኪርምኩ፡፡

ክንድጝ ኰሪዝ ኪርመቁ ክንደጢስ 8ትረ ክፍልዙ ክንደተ አቤል አወጣ  ክንድጝዙ ስረትድ ቃውስ ኪርምሸነውድ ዊርተ ፃየው ክንድጝድ ችጘናንስ ከቨው አቐነውድ ዊግትኩ፡፡

ቺተዝ ቈሽ ክልል አቅቨ ፈተነ ፊሰቁ ክንደጥድ ኰሪዝ ክንድጝድ ሽፍንጝ ፅንኸይዝጎ ዋጥረናንስ አጉረው እኩሰ ፃየነውድ ጉይኩ፡፡

6ትረ ክፍልዙ ክንደተ ሲሳይ ጎበዜ ጝ ጋብዝ ጥውሸው ክንድጝዙ ጥወርድ እቻይሽት ክንድጝድ ኪርመነውድ ዊርተ ፃየው ክንድጝ ችጘናንስ ከቨው አቐነውድ ጉይኲ።

እን አምረይዝም ክንድጝ ጝኒል ደፍተርዙ ከቨዝመ መፃፍዙ አልስንድ ቃዚ ችጘነውድ ሚሪኩ፡፡

ክንድጚስ እግርገ ጝ አቅልድ ጥውሸውዝ ከቭሰው አቐነውድ ጉይ ‹‹ጫረዙ ሰቭድ ምላሰን ፃቭጝ ክንድጚስ እግርተቁ ክንደጥ ንቕፀው አርቕት ጭልቕዝጛጙ አቐነውድ ልብጥጘ ጥውሸኩ›› ያንድ ዊግትኩ፡፡

ዝውነ 1ትረዝመ ማኽልኘ ክንድጝ ጝኒዙ ክንሰተ ሸጋው ቸኮለ ፃየፃይስጝ 2019 ዓ.ስ ክንድጝዙ ዚምን እጅጝ ኰርዝ ምዝገቨድ ፃጝሽት ዊርተ ፃየው ክንድጝ ይወነው ኪርምሸነውድ ጋልፅጝኩጙ፡፡
ቺተዝ ቈሽ ክንድጝ ጝንጥዙ ዊርተይስ ኪርም ጥወር አልስንዙ ሰቭድ ቃውስ አስልሸነዊዝ ጭቅተ ክንደነ ክንሰነዙ ሰረቲዝጎ ጥውሽት ቺዝየው ክንድጝ ይወናንስ ከቨጘድ ሚሪጝኩጙ፡፡

ሚዝግቭሸቁ 560 ክንደጢስ 548 ክንደጥ ጝተ ክንድጝድ ቲክንክንጛጙ አቐነውድ  ዝውነ 1ትረዝመ ማኽልኘ ክንድጝ ጝኒዙ አውር ክንሰተ አት መንግስቱ አለማየሁ አርቒስጝኩጙ፡፡

‹‹550 ንየ ደፍተር አቅም እጀቁ ክንደጥዝ ችጝዘነውዝ 97 ናን ላይዝ ንየ ክንደተድ ኰሪዝ ክንድጝ ኪርምኩ›› ይጝኩጙ፡፡
ዊርተ ፃየው ክንድጝ ይወነውዝ አርቕትዝ ፃጅተው ኹር ፋጥረናንስም ክንድጝዙ ጥወርዝመ እጅርዙ ኻይል አልሰነውዙ ሰቪል ትኩርት ይወነው ጥውሸው አቐነውድ ሚሪጝኩጙ፡፡
ዲቈው ክንድጝዙ ዚምኒዝ ክንድጝዙ ዊርተይል ፃቭሽተው ትኩርትዝ ክልል አቅቨ ፈተነይዝ ቀሰው ፈን ተረነውድ አስክዝጝኲጙ።
እን አምረይዝም ክንደጢዝ ዊትረቊ ክንድጝ ጝንጥዝመ እቻቐው ክንድጝዙ ጥወር ፅበነውድ ጋልፅጝኩⶔ።

ሳቁጠ ወረደይዝጘድም 2019 ክንድጝዙ ዚምኒዝ 40 ሽኽዝ ንየ ክንደጥ ሚዝግቨናንስ ኻሊሸነውድ ክንድጝ ጽ/ጝንዙ ቲክነተ ዲቈተ አት ብርሃኑ ዘገየ አርቒስጝኩⶔ።

አቓንስቅም ጥቅለ 53 1ትረዝመ 2ትረ ተግ ክንድጝ ጝንጥድቅ ክንጝዙ አግልግለ ኪርምጝኩጙ፡፡ ሚዝግቭሸቁ 26 ሽኽዝ 6 ላዝ ኒየ ክንደጥድ  ክንድጝ ቲክንክንጛጙ አቐነውድ የጝ ሚሪጘውድ።

ከቨጥ ድርጅተኒስ ችጝሸው 35 ሽኽዝ ንየ ደፍተርድ አልሰነውዝ ክንደጥ ኰሪዝ ክንድጝድ ኪርምጥጘ ፃቭሽተነውድም ሚሪጝኩጙ፡፡

ዊርተ ፃየው ክንድጝ ይወናንስም እጅርዙ ኻይል እቻይሰነው፣ 60 ሽኽዝ ንየ መፃፍጣንዝመ ላጥ ከቨጥ ጥወርዙ አይነተንድ ክንድጝ ጝንጢዝጎ ኰሪዝ አልሰነውዝ 72 ናን ላይስ አቐው ክንደተድ ጝ ክንድጝድ ቲክንክናጙ አቐነውድ ጋልፅሽትኩ፡፡
ክንድጝዙ ዊርተድ ደድሰናንስ ጝተግድ ኻየው ክንደነ ክንሰነዙ ጥወርዝመ ምቸው ጅውነ ፋጥረነው ተሚሰኲ። እኔንት እሩዘነው ቸልሸውድም ምጝግስት፣ ክንሰጥ፣ ክንደጥ፣ አቅልዝመ እቀኽቭርድ አቭርትዝ ሰራሸነውዝ ዋቕርሸትነይዝ ጝተ ችጘርድ ፍጘንድ የጝ።

ሳምራዊት ግርማይ

ማህበራዊ መስከረም 15/2019