ኽሪዝ ምላሰን አጋልደው ቖጨድ ቃጽቨናንስ ኻሊን ሠራሸነው ጡሸኵ!

 ይና ኻግር ኢትዮጵየትል ንጭቱ ዚምኒዝ 8 ክልላኒል ጽበቊ 37 ዞናኒል ኢልኒኖዝ ምላሰን ኽር ፋጥርሽኵ፡፡ አየር ንቭርትዙ  ላወላውጥሸነውዝ ምላሰን አጉረው ስወዙ እጅጝት አጋልድኵ፤ ዊቱዊዝ ሊቨው ስወድም አጉረው አቐነውድ ቲክን ፍጥርዙ ኻደገ ችጝዝ ቖጨ ችጝስ ዲቊኵ፤ ኢልኒኖ ይሽት ጭጝሸው ኽርዙ ችግሰም እንዝ ምላሰን ፋጥርሽኵ፡፡

ብላ ክልሊዝጘ ወይ ኽምረት ቈሽ 39 ወረድጥ አጉረው ስወዙ እጅጝት አጋልዳንስቅ ኽር ፋጥርሽኵ፡፡ እን ኽርድ ሳልጠውዝ እንሰስዙ ጻጀይል ቖጨ ቲክንዘነው ኪርምኵ፤ ዚልቀውዝ ቈሽ እቅድ ግድርዝ አጋልዘነው የውም ዚልቀውዝ ችበችብራይጘጘ ጻቭጠ ቸለኵ፡፡ እኔን ፍጥሩ ኻደገይዝ ጭሰጭሰኒዝጘ፣ ክልሊዝጘ የውም ኻግርዝጘ እጅጝ ጊዝዝመ ሊግዘው ጊዝዙ እክሰ ይወነውዝ አጋልድጠ ቸለው ችግሰድ ቃጽቨነው ጡሸኵ፡፡

ወይ ኽምረ ብሔረ እቅ ጭሰጭሰኒዝጘ ሚስኩርም ግቨሪል አሸ ብጭቕ እንሰስ ስሃላ ሰየምት፣ ዝቋለ፣ አበርገሌስመ ጻግብጂ ወረድጢል ክርጝኵጙ፡፡ ብጭቕ እንሰስም ጻቀ ጽበው ስፍረይዝጎ ሲድትሽጝኵጙ፡፡ እድወ እንገቨድ ጊዝ ይዋው አቐነውድ ልብተነው ጭቊ አቒንቀ ቲግቭሩ ሰቭ ሠራሸነው ተሚሰኵ፡፡

ችግሰድ አጕረውዝ ቈጨ ችጝዛየጘ ወረጘ ሠራሽትጠ ጡሸኵ?
ኽዝቪዝጘ ፡- ፍርዘተ ኽዝቭድ እንስስድ እንዝ ንየ ኮስ ይጝቀ አርየል ፊስን ቅየነውዝ እግዘድ ቃጽቨነው ጡሸኵ፤ እን ተግረድ እንሰስዝ ይውሽተው ሚንወድ ማጽንጽንሸውዝመ እግዝግዘነው ቸልሸው አቓንስ ጻቨኵ፡፡

ላዘ ተግዝ ቈሽ በራኸል በሪሲንቀ እጽውን ግርቭ አብዚንቀ ጥቅዘነውዙ ሰቭል ጥወናንስ ሚቸው አገነም አጠ ጡሸኵ፡፡ ሚስኩርም ግቨሪስ ኪርም አሰነይል አሽ ሊቨው ስወ ጽብሽ አቚ ኪትረነውዝ እንሰስዙ ሚንወ ቢቊልዘናንስ አስልሸነው ጡሸኵ፤ አቚ ጻየቊ ዋርቢል ቃዝየውዝ ችጝጥጘ ቸለቊ ሚንወዝቊ ዚራን ፊዘነውዝ ጻቀ ጻየነው ጡሸኵ፤ አብቂል ችጝሸዉ አይርሸው ጻቀ ጽብሽም ኰረዝመ ፊጌዝ ጂዚት አቢቲንቀ አይረነው ጡሸኵ፡፡

እንሰሲስ ላዘ ኽሪዝ ውርም አዝምረ ችጝየቊ ፤ ቃውስ ይጝ ጝታቅፋንጥድ አብዘቊ እቅዝም ኻዝነነው፣ ከቨከቭሽተነው ጡሸኵ፤ ቺተዝም ቺተው ከቨ በነቊ ሽመቅልዝ፣ እቊንዝ ፣ እፈርዝ ይውሽተው ከቨድ ኽይ ያንስመ ትኵርት ይውሽታንስ ጻቨነው ጡሸኵ፡፡

ምጝግሥት ጋቢዝ ፡- ምጝግሥት ኽርድ ሚርየውዝ ሳልጠው እክሰ ይወነውዙ ችብረል ችጝሽጠ ጡሸኵ፡፡ እንዝቅ ክረቊ እንሰስድ ዊስሰናንስ ቸላው አቕሽም ችግሰድ እንዝ ንየ ቈጨ ችጝዛየጘ ግነ ፅንኸዝ ከቭሽተው ሰቭ ሠራሽጠ ጡሸኵ፡፡ አጋልደው ኽርድ ሺፍንፍነነውዝ ፤ እንቅ ቻቐው ፤ ዊንም ገቨድ ቀለው የጝ ይን ቀልዘነውዝ ዲቊጠ ጡሻውም፡፡

ምጝግሥት አጋልደው ኽርድ እቅዝመ እንሰስዝ ውር ቊጠ ቈጨ ፋጥርጠ ቸለኵ? እን ገቨድ አጕረው ቈጨ ፋጥርሻየጘ ሊግዘውዝመ እጅጝ ኰርዝ ጻቭሽትጠ ጡሸኵ ከቨድ፣ ምኽርድ ሳልጠውዝ ሚሪጠ ጡሸኵ፡፡

አይነተ ገቨድ ኽር ፋጥርሸነውድ ቲክን ኽዝቭድ ወረጘ ጥንቅቀን ልብጠ ጡሸኵ፤ልብተው ገቨይዝስ ውር ተግረ ፊስጠ ጡሸኵ፤ እንሰስዝ ማጥን ሚንወ እፍርዝን፣ አልስንድ ወረጘ ተግዝ ችጝጠ አቐጘ ሚሪጠ ጡሸኵ፡፡

እኔንት ጻቨነው ሊግዘው ኰርዝ ኽዝቪል ችጝጠ ቸለው ቈጨድ ዊቱዝም አቕሽ ቃጽቭጠ ቸለኵ፡፡

ጭሰጭሰኒዝጘም አነ ክልሊዝጘ ነን አሽ ስወዙ እጅጝትዝ አጋልደቊ ወረድጥ ጽበነውድ ጚ ፤ ስወዙ እጅጝትዝ ምላሰን ክርጛጙ ችጝሸቊ እንሰስድ ነን አሽ ቓዘናንስ ውርም ተግረ ፊሲንቀ ጽበነውድ ትኻዝቭሰው የጝ፡፡

ነንም አቕሽ ገቨይዝ ይውሽተው ትኩርትድ እግርተው የጝ፡፡ እግርተነውድ ቲክንም ጊዝ ይዋው ፍጥሩ ኻደገይስ ቈጨ ችጘቊዙ እግዘድ ችብሰናንስ ጽገወኵ፡፡ አነጚ ጋጽ ጅልውዝን ጎየነዊስ ነንም አሽ ቲግቭሩ እክሰ ይወነው ኪርመነው ጡሸኵ፡፡ ግድርድ ጭቭሰነው ፖለቲኩ አርወ ችጝሰው አቕሽም እጅርዙ ሩሔ፣ እንሰስዙ ሩሔስ ዲቈው አየው አቓንስቅ እማንድ ለምርን ችግሰይስ ፈናንስ ፈኑ ሰቭ ሠራሸነው ጡሸኵ፡፡

ሠራሽተው ፈኑ ሰቭድ የጝ ፖለቲኩ ቸልት አቕ ቅመነው ቸልሸውድ የውድ ልብተነው ተሚሰኵ፡፡ ምጝግሥት ጽበነዊዙ አይነተ ገባኒስ ላውድ ኽዝቪዙ ሩሔዝመ ጻጀድ ችግሰል ሊቫንድ ደርሰው ከቨዝመ እክሰ ሚርየነውዝ፣ አቭርዘነውዙ እክሰ ይወነው አቐነውድ ጭቭሽተው ገቨ አየውም፡፡

ግርማ ተጫነ

ሚስኲሩም 15/2019