ወይኽምረ ብሔረቅ ጭሰጭሰንዝ ስሃላ ሰየምት ወረደዝ አውግረው ኽር እትለው ተግል ፅበነውድ ጅውነይዝቊ ጽበጥ ጋልፅጝኲጙ።
ኽር አጡ ስወዙ ትንዝሽትን እጀው አቐነዊዝ አየር ንቭርትዙ ዘባሽንዝ ምላሠን እትለው አውግረው ፍጥሩ ኻደገ የጝ።
አይነተዝመ ይነ ኻግር ኢትዮጵየስ ደቡብስ፣ ደቡብ ምስራቅስመ ሰሜንቱ አድለይልም አውግረው ጥቕዘ ቲክንዛጙ ችጝሸኩ።
ነንቱ ሰቲዝ ሰሜን ኢትዮጵየትል አጋልዘው ስወዙ እጅጝትድ አርሽነይዙ ሰቪስመ እንስሰኒል አውግረው ጥቕዘ ችጝዛጙ ችጝሸኩ።
ወይቱ ጅውነድ እን ችግሰይዙ አጋልሽተጢስ ላዊዝመ ቃውሰተድ የጝ።እን ችግሰድ ኽወዙ እፍርትድ እጅጝሰነዊስም ከስጘ ጊንዝቫኒስ አቐው ኹረድ እጀው አቐነዊዝ እንሰስንድ ክርጘዝ አጋልሽትጛጙ ዲቊ ያንድም ሲድሽጛጙ አቐነውድ ስሃለ ሰየምት ወረደ መንደር ጨርቆስ ቀቨሊዝቊ ጽበጥ ማኽሊስ ቀስ መላኩ ከበደ “ይነ ጅውነይል ስወ ሊቭየው አቐነውዝ ይነ እንስሰንድ ኾሰነው ብን ክርጛጙ የጝ፤ ዳቐቊድም አጝሽ ጅውነይዙ ቃነ ማነድ ኪሥክስናጙ ኾሰናንስ ሚኩርንሽም ይነ አቅሚስ ንየ አቕኩ”ይጝኩጙ።
አጋልዘው ኽርድ እንሰሲስ ጭቑ አይጝቀስ እጅር ኹርዙ ሩሄይዝም እቀጘዝ ችግሰ ፋጥረው አቐነውድ ዊግተቊድ ቈሽ ጒዝጨተ ታደሰ ገብራትአጛንድ”ነን ጽበው ገቨድ ዊግተናንስቅ ጽገወው የጝ። ይነ እንሰስድ ጭቑ አይጝቀስ ይነ ቑርድ ጽይን ዲቈናንስ ገውት ፋጥረው ገቨ አቓንስቅ ምጝስት ተሚተው ገቨድቅ ጻቭ ዲቊሳን ቀሰው የጝ” ይጝኩጙ
ወረደይዙ ቲክነተ ጭሰጭሰተዝመ አርሽነይ ጽ/ጝንዙ ዲቈተ አት ማሥረሻ መኮነን ወረደይዝጘ እኒስ ሚቅ እትል አርቕየው ጒደነዝ ኽር እትለጘዝመ። እንሰስዝ አቐው ፃቀ እኰ ቢቁልየው አቐነውድ ደድስጝኲጙ።
ችግሰድ ችበችብረናንስ ኮሚቴ ፅርሽ ከቨ አክቨነውዙ ሰቭ አክንውሻጙ አቐጘም ዳቕስጝኲጙ።
ወረደድ እንሰስዙ ጻጀዝ አርቕሽተው አቐጘ ልብሰቊድ አት ማስረሻ ኽርዝ ምላሠን እንሰስድ ክርጛጙ አቐነውድም ጋልጽጝኩጙ።
ላዘ ጋብዝ ሚንወዙ ሰቭድ አትርዘናንስ ስመ ችግሰድ ንቕፀው ቖጨ ቲክንዛየጘ ቲኩርት ይውሽት ስራሽታጙ አቐጘም ዊግትጝኲጙ።
ኽርዝ ምላሰን ስድት ፊረቊድ 46 ሺኽዝ 41 አጛንድ ክረቁድ 1 ሽኽዝ 491 አጛንድ 156 ለል ድዝጝኩጙ።
6 ሽኽዝ ንየ ፍጭርዝመ ቢቅ፣ ክርጝኲጙ። ክርጘይስ ቲርፍቁድ ቈሽ ላየ ጅውንጢዝጐ ሲድሽጝኲጙ። 65 ሽኽዝ ንየ እቀገረደ ዕልቱ ከቨ በነው ፅበነውድም ጋልፅጝኲጙ።
ወይትጘድ ኢሊኖዙ እትልንድ ጎነ ጻቨነውዝ ሲን አርፈይስ ኪርም ሚሪሸቊ ችጘር ጒይጥ አካላኒጅቅ አቭላይተ ጻቭሽታጙ ዊነጘ ጉየቊድ ወይ ኽምረ ብሄረ እቅ ጭሰጭሰን ኻደገ ሰጋቕን ቃወነ ጽ/ጝኒዙ አይነተ ዲቈተ አት ምህረት መላኩ ችግሰድ ፈራቓጙ ተረነዊዝ ችግሰይዝ እክሰ ችጘናንስ ችጘር ጒይጥ አካላኒጅቅ ለወንትዙ ኻለይ ጻየነውዝ አቭላይትሽጝ ችግይዝ አቐው እክሰ እቑረናንስ እጅጝ ጊዝዝመ ሊግዘው ጊዝዝ እኪረው የነውዝ ቃውሰይዝ እንሰሲዝ ኽክምነዙ አግልግለ ይወነው ቲግቭርድ ቲኩርት ጻቭሽተጘ ጋልጽጝኩጙ።
ጥቅለዝ እከሰ ነሰው ኻለይድ ስወ ጽየቊ ጅውንጢል ግልቫነ አኽቨናንስ ኻለይ ጻይን ሰራሽናጙ አቓንድ እኒስ ከስጘ ቈሽ ወይቱ እፍርት ገረደ (ዋልማ) ስመ ላጥ ከቨጥ ድርጅተኒጅቅ ዊገ ዊግሽን አልስጛንስ ጻቭሽተኩ ይጝኩጙ።
አመልማል ተድላ
ሚስኲሩም 15/2019
