ወይ ኽምረ ብሔረ እቅ ጭሰጭሰን ድሃነ ወረደ 022 ቀቨሊል ፅበቁ ጒዝጝ ጨጥ እጅር ሰራሸተ እፍርዘነድ ፍጥሩ እፍርዘነዝ ቲኬናንስ ሰራሽጛጙ አቐነውድ ዊግትጝኩጙ።
ጒዝጝ ጨጥድ እጅር ሰራሸተ እፍርዘነድ ወየ ኪብረነውድ ጭቑ አይጝቀት ጝአግልግለድ እጅጝ ኰርዝ ጭቑ አቐነውድም ተሚትነይድ ቃፅቭጠጘድ ፃቨጘድ ሚሪጝኩጙ።
እጅር ሰራሸተ እፍርዘነ ሚንወዙ ሰቪዝ አጉረው ችጘር ፃየው አቐነውድ ዊግተቁድ ጒዝጝ ጨጥድ፤ ገሬኑ ቺዝጚል ግነ ሊንስ ይወዉ ጊቭርቲስ ዝቨይል ችጝዘው ዚልቀው ቘጨድ ኽየው አቐጘ ደድስጝኩጙ።
ጒዝጨተ ታድየ አምባው“እጅር ሰራሸተ እፍርዘነድ ዝቨይዙ እፍርድነይድ ቀቫጙ አቐነዊዝ፤ ፍጥሩ እፍርዘነድ ማርፅናጙ የጝ” ይጛንድ ጋልፅጝኩጙ።
እጅር ሰራሸተ እፍርዘነ አርወይስ ቘጨድ ኻይልደጘድ ጉየቁድ ጒዝ ጨተድ፤ጅቭሸው ወየድ ኪብረው አቐነዊስ ከስጘ ስወ እጅጛንድ አረድ ቃጥለነውዝመ ብጢል ቘጨ ችጝዘው አቐጘም ዊግትጝኩጙ።
“ዩሪያዝመ ዳፕዝ ፊስነው ጊንዝቭድ ፍጥሩ እፍርዘነል ግሪስናን ሊጘ ሻቘ እምትዝ ቺዝጚዝ ቀሰው እፍርት ችጝነኩን፤ ያንም እንል ውላቐት ዊንኩን፤ ቀሰው ጊቭርትም ችጛጙ የጝ” ይጛንድ ጝታ ዲዝጝትድ ጉይጝኩጙ።
እየድቅ ቻፅጚል ዛረ ቅብስጛጙ ዊነነውድ ጉየቁድ አርሸድ፤ ፍጭሪዙ ዛረ ሻቘ ምትዝ እንዝጘም ቅሚዙድ ሊጘ ምት አሽ
አርወዉ አቐነዊዝመ ብጥድ እፍርዘው አቐነውድም የጝ ዊግትጘውድ።
ነን ማጽወይዝ አስልጘው ኮምፖስትድ ጫረ ተራንድ ብዝጝ ቢትነናንስ ሰራሽጛጙ አቐነውድ ሚርየቁድ ጒዝጨተ ታድየ ዛረይስ ቺዘውዝ ቈሽ ቀሰው ጊቭርት ችጚሰው አቐነውድም እንዝ ሚቅ ፃቭጘው ሚኩረይዝ ደድስጘጘ ዊግትጝኩጙ።
ላየ ቓለ ነየተድ ቈሽ ጒዝጨተ ዘውዱ መንግስቴ “ሙየ ጉይጥድ ፃቭጘው ቲክንክነይዝ ሲርየ ኮምፖስት አሩሽነ ፃቭሽተነዊዝ ንቕፀው ጊንዝቭ ፊሲጝቀት እጅር ሰራሸተ እፍርዘነድ ቲኬነውዝ ቀሰው እፍርት እፍርዘነው ቸልሸኩ”የነውዝ ጋልፅጝኩጙ።
ዛረይስ ኮምፖስት ማርፅሽተው አቐጘ ዳቕስጝ ተረው ጫረይዝ አቐው ሊጘ ፅምር ግርየነዝ ንየ አቐው አስለናንስ ነንቱ ሰቲስ ኪርምጝ ሰራሽታጙ አቐነውድ ጉይጝኩጙ።
“ኮምፖስት ዝቨድ እፍርዘነዊስ ከስጘ አርመ ቢቁላየጘ ፃቨውዝመ ጊንዝቭዝመ ጊዝ ተነው አቐነዊዝ እቀጘ ማርፅሽተተ ፃቨኩ”ይጛንድ ድሃነ ወረደ 022 ቀቨሊዙ እፍርት ጣቭየ ጽ/ጝንዙ ዲቈተ አት ፍትሀለው አበባው ጋልፅጝኩጙ።
ቀቨሌዝጘ 503 ነቁጠ 7 ሄክታር ዝቨይል 520 ጒዝጝ ጨጥ ውላቐነውድ ሚርየቁድ አት ፍትሀለው፤ 3 ሽኽዝ 4 ላዝ 20 ኩንታል ቻፅጚል ፊተነውድ ዊግትጝኩጙ።
ኮምፖስት ዲቨቁ እንቅም ቀበሊዝቊ ጒዝጝ ጨጥ አጛንድ ነንቱ ሰቲዝ ዲቭጛጙ አቐነውድ ሚርየቁድ አት ፍትሀለው 23 ኩንታሊስ ኪርም ሳስ የዊዝ ቈሽ 19 ኩንታል ኮምፖስት አስልሸው አቓንድ፤ ማኽልዘተድ 1 ሽኽዝ 7 ላዝ 20 ኩንታል ቻፅጚል ትኒታንስ ኻሊሽተጘድ ጉይጝኩጙ።
እጅር ሰራሸተ እፍርዘነ እክሰው ጊቭርት ጊቭርዘናንስ ቸልሰው አቕሽም፤ ዝቨዙ እፍርድንድ ቃፅቨነዊስ ከስጘ ሊንቱዝ ንየ አግልግለ ይዋውም የቁድ አት ፍትሀለው፤ “ዋቕረው ጊንዝቭድም ጊዝ ጨቨቅ ኪብረነውድ ቈሽ እንቅም ጒዝ ጨተይዝ ችጘተ አጠ ቸልየውም” ይጝኩጙ።
ፍጥሩ እፍርዘነ እጅር ሰራሸተ እፍርዘነይዝ ዲቈውዝ ዝቨዙ እፍርድንድ ሻቘ ምት አሽ ቈሸጘ ጋልፀቁድ ሙየ ጉርየድ፤ዛረዝመ ኮምፖስትዝም ይውጘው አርወድ ቺተቺተው አቐጘ ዊግትጝኩጙ።
ዛረዝመ ኮምፖስትዝ ዝቨቱ እፍርድኒል ፃይጘው አርወድ ተከተከው አቕሽም አረይል ፃይጘው አርወድ ቈሽ ቺተቺተው አቐጘ አት ፍትሀለው ጋልፅጝኩጙ።
ዛረ ፊታንድ አርመ ንቕፀው አቓንድ ኮምፖስት ቈሽ አርመዝ ናፀ አቐው ጒዝ ጨተይዙ ኻይልድም ተነው አቐጘ ዊግትጝኩጙ።
ድሃነ ወረደ አርሽነይ ጽ/ጝንዙ ቲክነተ ዲቈተ አት ሞገስ ሃይሌ “አርሸድ ኢኮኖሚ ተነተ አቐው ኮምፖስቲል ውላጠጘድ ሰቭትናጙ የጝ” የነውዝ ጋልፅጝኩጙ።
ፃይሸው 2019/20ቱ ጊቭርትዙ ዚምንዝ ወረደይል ፅበቁ እንቅም ቀቨሌኒልቅ 112 ሽኽዝ 6 ላዝ 6 ሜትር ኩብ ኮምፖስትዙ እፍርዘነ ሰራሸናንስ ኻለይ ፃይሽት ሰራሽታጙ አቐጘ ዊግትጝኩጙ።
ፍጥሩ እፍርዘነድ ጒዝጨተድ ቲኩርትዝ ሰራሻንስ አውግረውዝ አስክዘ ኻትርሰነ ክንድጝ ሙየ ጒይጥ ማኽልዘተነይዝ ችጝጝጥጘ ማጥን ሰራሽታጙ አቐነዊዝ ነትው ማጽወይስ ኪርም ኮሞፖስት አስለነው ቲግቭርድ ጝታ ጊቭርትድ ጉይጘጘን ሰቢዝጐ ውላጛንስ ጻቭሽታጙ ንቕፀቁድ
አመልማል ተድላ
ዜና ጥቅምት 15/2019
