ኻግሪዝጘ ፅቃ እምትዝ እጝጎ አርሽነይዝመ ሚንወዙ ሰቭዝ ይውሽተው ትኩርትዝ ወይትጘድ ፅበው አቑዙ ፃጀድ ኢኮኖሚዙ ፍልፍለ ፃቨነውዙ ዲዝጝትድ አትራጙ ተርኲ።
ቺተዝ ቈሽ ውሸብልዝመ ኲየንጣን ጝተ ግርቭድ ሲቭርቭሪጝቀት ሚንወዙ ሰቭድ ሰራሽጝ ጝተ ፅብንድ ላውጥጛጙ ችጝሽጘኲ።
ወይ ኽምረ ብሔረ እቅ ጭሰጭሰን አርሽነይ ቃወነይዙ ሚዝረድ ቓሊሰዊዝጘድ ስረተ ኹረዙ ችግሰድ ሩዘናንስ 16 ሽኽዝ 6 ላዝ ንየ ኲየንጣን እጝግርነዙ አትክልትዙ እፍርቲል ሲትፍሽጛⶔ ችጝሽጘኲ።
ጋዝጊቭለ ወረደይዝጘም ኲየንጣን እልቱ ጝተ ፅብንድ ቺዝሸናንስ ንቕፀቊ እምተንዝ እክልትዝ አቚ ጝተ ሲግዝመ ጅውሪዝ መውርጝ ነሰነው እልቱ ጝተ ግድን ዊኑ።
ጋዝጊቭለ ወረደ 018 ዛሮተ ቀበሊልም ዊዝር አረጋሽ አሰፋስመ ዊዝር ትውረስ ደሴት ተከቊ ኲየንጣንድ እጝግርነዙ አትክልት ጊቭርዘናንስ ይጝ፣ ላው ናንዝ ጝተ ኹርት አቅቭጝ ላየ ናንዝ ኲትኩተነዝመ ዚሰነ መውርጝ ዝቨይስ ፍር ችጘናንስ ልቕርድጛⶔ ተርጘውድ ዊትቁ አየቁም
ቺተዝ ቆሽ ጅውነይል ደግምግመ እምተንዝ እትለቊ ስወዙ ዘባሽንድ፣ ጫረቱ አዝ፣ የውም ኽርዝመ ኹረዙ እጅጝትድ ሽሹደናንስ ኲየንጣንድ ኪበዝመ ብርትድ ችበችብርጝ፣ ምነነ ቀቪጝቀት ጝተቚሪዝ አቐው ኹረ ጝተ እጝግርነይስ ሸፍነነው አይንተ አለመ ፃቭⶔ።
ዊቱ እምተንዝ በውግ ዊዝር አረጋሽስመ ዊዝር ትውረስቱ ፅብንድ ሊኪሸውድ ጝተ ሲግዝ መውርጘው አቚዝመ ልቕርድጘው ጝተ ስዛይዝ ዊኑ።
ዊዝር አረጋሽ ታትነት አስክዝጘንድ ኪበዝመ ኮረዝ ፊትንሽጝ፣ ምነነዝመ ኪውተድ ስረንዝጝ ዲቁስጘው ፈተነድ የጝ።
ላየ ዊዝር ትውረስም ሲዘ ጝነቊድ ጭሰጭሰናንስ ማጥማጥደው ዝቨይል ኪበዝመ ብርትጅቅ ሹሽድጛⶔ እጝግርነዙ አትክልት እፍርዘነው ዊትርቅቱ ጝተ ሩሔ ፃቭጝ ዊንጝኲⶔ።
አቚ መውርን አትክልት ዚሰነው አቅም ዋቕረው አጉረው ልቕረ ዊኑ። ጝተ ልቕረይዝጘድ ፈን ችጛይጘጘ ግነ ስወዙ እጅጝትዝመ ዚምኑ ሰራሽንዙ ቢተድ ጝተ ናንድ ፃይ ዊንኲ። አቕሽም ሻቘ እምትዝ በውግ ኲየንጣንዙ ዝላድ ቀልዘው፣ ጝተ ዝላይዙ ፈንድም ችጚሰው ዚምኑ ካናል ጝተ ጅውነይል ኲንሹ። ነንቱ ኰሪዝ ኲየንጣን ጀሪከ መውረነዊስ ፍጝ ካናልዝ ፈራቐው ዝቨ ናፅነይዝ እፍርዝጛⶔ ችጝሽጘኲ።
እንዝም «ንጭትል ችብርን ቓልናንድ፣ ታትነ ጀሪከዝ መውርነው አቚድ ይነ ኪውተዙ ኽየው ፈወነ የጝ» ይጘኩ ዊዝር አረጋሽ።
ዊዝር ትውረስም እድወዝ ኪርምጘው እጝግርነዙ አትክልትድ ነን አርየይል አልስጝ አትክልትዝ ፈኑ አቐቊ ኲየንጣኒስ ላይሸን አቕጝኩⶔ።
ዊዝር ትውረስቱ እጝግርነይል ችብረ አትክልቲስ ኪርም ንቕፀው ፍረምረዙ አትክልት ችጝሸው አቓንድ ላው አትክልትዙ አይንቲስ 28 ሽኽዝ ንየ ቁርሽ አርየይስ ችጝጘኩ። እንዝም “ይጝኒል ፅበቊ ቢተንጥድ ሽፍን፣ ይቚሪዙ ፅብንድ ላውጠነዊስ ከስጘ አርየይዝ ግሪሳጙ የጝ’ ይጘኲ። እን አምረይዝም ጝተይተ ላር ላርድ ሊጘ ፅምርዝ ንየ እጝግርነዙ አትክልት እፍርዘቊ አጘንድ ችብረተ አትክልቲስ ማንጎ፣ ፓፓየ፣ ሙዝ፣ አቮካዶ፣ ግሽ፣ ቓፀ ተከቊዝመ ፍረምረዝ ቈሽ፤ ቃሪየ፣ ድንች፣ ቲማቲም፣ ስውርጠ፣ ኻምረ፣ ካሮት እፍርዝጝ አርየይዝጎ አልሰነው ኪርምጝኩⶔ።
እንዝም ኲየንጣን ጝተ ጝነቊዙ ኹረዙ ወይትነይድ ደድስጝ፣ ቺዘችዝሽተው ስረተ ኹረዝ ቃወነዊስ ዲቁ ጝተ ጊቭርትድ አርየይዝ አልሰነውዝ አጉረው ጥወርዝመ ኢኮኖሚዙ ፍልፍለ አቐነው ቸልኲ።
ተረዊዝም እኒስ ንየ ሰራሽጝ እቻቐውዝ ቺዝየው ፅብኒል ችጘናንስ አጉረው ጝተ አለመ የጝ።
እን ሊጘ ኲየንጣንዙ ሲጘድ ቓሊሰውድ ጝተ ገልታሽንድ ጭቑ አየው ፤ ሚንወዙ እፍርትዝመ ሲሪዩ እፍርትዙ ፈጣቕንድ እቊንዙ ሩሔድ ዚልቀትነይዝ ላውጠነው ቸለው አቐነውድም የጝ ሚሪየውድ።
ታትነ ጝተ ሲግዝ መውርጝ እፍርዝጘው አትክልትድ ጅውነይዙ ጒዝጝ ጨጥዝ ኪውተዙ ተከ አቕጝኩⶔ፤ ካናልዝ ቅብረው አቚድም አምርቱ ጝተ ሩሔድ ላውጠው አይር ፈወነ አቕ ቃፅልኲ።
ነንቱ ኰሪዝ ዛሮተ ቀበሊል ኲንሸው ስሚንቶዙ ካናልድ 2 ላዝ 50 ኒስ አርጭድ ሲትፍዘው አቓንድ ዊዝር አረጋሽስመ ዊዝር ትውረስት ቆሽ 75 ንየ ኲየንጣንዙ ሩሔድ ላውጠነው ቸልኩ።
ጋዝጊቭለ ወረደይዝጘ ዲቈው አምረይዝ 3 ሽኽዝ ንየ ኲየንጣን ሚንወዙ ሰቭዝ ሲትፍዘናንስ ኻሊሽት 1 ሽኽዝ 4 ላዝ 50 ንየድ አርውሸጥ ፃቭሽተነውድ አርሽነይ ጽ/ጝንዙ ሚዝረድ ሚሪየኲ።
ጽ/ጝኒል ኹረዝመ ስረተ ኹረዙ ሙየጉሪየ አት አበበ አሰፋ ዊግትጘንድም፣ ኲየንጣንዙ ኹረዙ ስረትድ ቺዝሰናንስመ ኢኮኖሚዙ አርውሸትነይድ ሊጊሰናንስ ሚንወዙ ዚርፍዝ ሲትፍዘነውዙ ሰቭድ አትር ቃፅለነውድ ልብስጘኲ።
እን አምረይዝ 1ትረ ጅልወ ሚንወዙ ሰቭዝ 6 ላዝ 50 ኲየንጣን ሲትፍዘነውዝ ፅበው አቑዙ እጅጝትድ ችበችብርን ጊቭርዘናንስ ሰራሽጛጙ አቐነውድም ልብስጘኲ።
ኲየንጣን ሚንወዙ ሰቪል ቓሊስጛጙ ፅብጘው ፈንድ ልብተነውዝም 65 ኪሎ ግራም አትክልትዙ ዚረዝመ 2 ላዝ ንየ ዚምኑ አርሽነይዙ ጎዘመዘንድ ትንዘነው ቸልሸነውድ ዊግትጝኩጙ አት አበበ።
ወረደይል ችጝሸቊ 25ስ ንየ ካናልዙ ፕሮጀክተን ጅውነይዙ እቀኽቭርድ ሚንወዝ ኹረዙ ወይትነይድ ደድሰናንስ ጥውሸው ሙየዝመ ጥወርዙ ከቨድ ፃቭሽታⶔ አቐነውድም የጝ ሚሪሸውድ።
ንየይል ዊዝር አረጋሽስመ ትውረስቱ ድሊስንድ፣ አቚዙ ካናል ሰራሽተነውድ አቒጝቀት፤ ጀሪከ አቚ መውርንዝ ናን ይዊጝቀት ፈተነድ ኪውተዝ ዲቊሰነውዝ ቺዝየው ፅብኒዝጎ ከረነው ቸልሸው አቐነውድ የጝ።
አቓንስቅም አውማው እቀኽቭሪዙ ክፍልድ ጅውነይዙ አቚዙ ፃጀድ ጥውሸውዝ ሰቪል ግሪሰነውዝ ጝተ ኹረዙ ወይትነይዝመ ስረተ ኹረድ ቺዝሰነው ቸልሸኲ።
ሚሪሸው አካልድ ሚንወዙ ሰቭል ሲትፍሸቊ ኲየንጣንዝ ሙየዝመ ዚምኑ ቴክኖሎጂዙ ጥወረንድ አርውሸጥ ፃቨነውዝ ኢኮኖሚዙ አርውሸትነይድ ሊጊሰነው ጥውሸኲ።
ሳምራዊት ግርማይ
የጥቅምት 30/2019
